മേഖലയിലെ സൈനിക സംഘർഷത്തിന്റെ പശ്ചാത്തലത്തിൽ യുഎഇയിലെ തൊഴിൽ നിയമനങ്ങളിൽ ഗണ്യമായ ഇടിവ് രേഖപ്പെടുത്തിയതായി പുതിയ റിപ്പോർട്ട്. പ്രത്യേകിച്ച് പ്രതിമാസം 10,000 ദിർഹം വരെ ശമ്പളമുള്ള ജോലികളെയാണ് പ്രതിസന്ധി ഏറ്റവും കൂടുതൽ ബാധിച്ചത്. തിങ്കളാഴ്ച പുറത്തിറങ്ങിയ ‘നൗക്രിഗൾഫ് ഹയറിംഗ് ഇൻഡക്സ്’ റിപ്പോർട്ട് പ്രകാരം, കഴിഞ്ഞ വർഷത്തെ അപേക്ഷിച്ച് ഈ വിഭാഗത്തിലെ നിയമനം 26 ശതമാനം കുറഞ്ഞു. അതേസമയം ഉയർന്ന ശമ്പളമുള്ള തസ്തികകളിലെ നിയമനങ്ങളെ പ്രതിസന്ധി താരതമ്യേന കുറച്ചേ ബാധിച്ചിട്ടുള്ളൂ.

വിവിധ ശമ്പള വിഭാഗങ്ങളിലെ നിയമന ഇടിവ് ഇങ്ങനെ:

• 11,000–20,000 ദിർഹം: 22 ശതമാനം കുറവ്
• 21,000–40,000 ദിർഹം: 19 ശതമാനം കുറവ്
• 41,000–80,000 ദിർഹം: 11 ശതമാനം കുറവ്
• 80,000–150,000 ദിർഹം: വെറും 5 ശതമാനം കുറവ്

150,000 ദിർഹത്തിന് മുകളിലുള്ള തസ്തികകളിൽ 23 ശതമാനത്തിന്റെ ഇടിവ് രേഖപ്പെടുത്തിയെങ്കിലും, ഇത്തരം ഒഴിവുകൾ പൊതുവെ വളരെ കുറവായതിനാൽ ശതമാനക്കണക്കിൽ വലിയ വ്യത്യാസം പ്രകടമായതാണെന്ന് റിപ്പോർട്ട് വ്യക്തമാക്കുന്നു. ഈ വിഭാഗത്തിലെ ഉയർന്ന തസ്തികകളിലേക്ക് തൊഴിലുടമകൾ ഇപ്പോഴും സജീവമായി നിയമനം നടത്തുന്നുണ്ടെന്നും റിപ്പോർട്ടിൽ പറയുന്നു.

ഫെബ്രുവരി 28-ന് ആരംഭിച്ച പ്രാദേശിക സൈനിക സംഘർഷം യുഎഇ ഉൾപ്പെടെയുള്ള ഗൾഫ് രാജ്യങ്ങളുടെ സമ്പദ്‌വ്യവസ്ഥയെ പ്രതികൂലമായി ബാധിച്ചു. യാത്ര, വ്യാപാരം, ടൂറിസം തുടങ്ങിയ പ്രധാന മേഖലകളിലുണ്ടായ മന്ദഗതിയെ തുടർന്ന് നിരവധി സ്വകാര്യ സ്ഥാപനങ്ങൾ പുതിയ നിയമനങ്ങൾ മന്ദഗതിയിലാക്കുകയോ ജീവനക്കാരുടെ എണ്ണം കുറയ്ക്കുകയോ ചെയ്തതായി റിപ്പോർട്ടിൽ ചൂണ്ടിക്കാട്ടുന്നു.

ഇതിന്റെ ഫലമായി 2026 ഏപ്രിൽ-മേയ് മാസങ്ങളിൽ യുഎഇയിലെ ആകെ തൊഴിൽ നിയമനം കഴിഞ്ഞ വർഷത്തെ ഇതേ കാലയളവിനെ അപേക്ഷിച്ച് 23 ശതമാനം കുറഞ്ഞു. യുഎഇ, ഖത്തർ, ഒമാൻ എന്നിവിടങ്ങളിലെ 7,000-ത്തിലധികം കമ്പനികളിൽ നിന്നുള്ള 2.2 ലക്ഷം തൊഴിൽ പരസ്യങ്ങൾ വിശകലനം ചെയ്താണ് റിപ്പോർട്ട് തയ്യാറാക്കിയത്.

നിയമനങ്ങളിൽ പൊതുവെ ഇടിവുണ്ടായെങ്കിലും സാങ്കേതികവിദ്യ മേഖല മികച്ച പ്രകടനമാണ് കാഴ്ചവെച്ചത്. ഐടി മേഖലയിൽ 6 ശതമാനവും ഡിജിറ്റൽ ജോലികളിൽ 3 ശതമാനവും മാത്രമാണ് കുറവ് രേഖപ്പെടുത്തിയത്. അതേസമയം ആർട്ടിഫിഷ്യൽ ഇന്റലിജൻസ് (AI), മെഷീൻ ലേണിംഗ്, സൈബർ സെക്യൂരിറ്റി, ഡാറ്റാ സയൻസ് എന്നീ മേഖലകളിൽ ഏകദേശം 20 ശതമാനം വളർച്ചയുണ്ടായി. എൻജിനീയറിങ് മേഖലയിലെ നിയമനത്തിലും താരതമ്യേന ചെറിയ ഇടിവ് മാത്രമാണ് ഉണ്ടായത് (16 ശതമാനം).

മറുവശത്ത്, സെയിൽസ് & മാർക്കറ്റിംഗ് മേഖലയിൽ 42 ശതമാനവും ഹ്യൂമൻ റിസോഴ്സസ്, ഫിനാൻസ് മേഖലകളിൽ 34 ശതമാനം വീതവും നിയമനം കുറഞ്ഞു. ഓയിൽ, ഗ്യാസ്, എനർജി മേഖലയിൽ 30 ശതമാനത്തിന്റെ ഇടിവാണ് രേഖപ്പെടുത്തിയത്. ഹെൽത്ത് കെയർ & ഫാർമസ്യൂട്ടിക്കൽസ് മേഖലയിൽ 24 ശതമാനവും റിയൽ എസ്റ്റേറ്റ് & കൺസ്ട്രക്ഷൻ മേഖലയിൽ 20 ശതമാനവും കുറവുണ്ടായി.

ദേശീയതയുടെ അടിസ്ഥാനത്തിൽ നോക്കുമ്പോൾ, യുഎഇയിലെ ഏകദേശം 68 ശതമാനം കമ്പനികളും നിയമനത്തിന് പ്രത്യേക ദേശീയത നിബന്ധനയാക്കുന്നില്ല. എന്നാൽ ദേശീയതയ്ക്ക് മുൻഗണന നൽകുന്ന കമ്പനികളിൽ 21 ശതമാനവും അറബ് ഉദ്യോഗാർത്ഥികളെയാണ് തേടുന്നത്. യൂറോപ്യൻ, ദക്ഷിണേഷ്യൻ ഉദ്യോഗാർത്ഥികൾക്ക് മുൻഗണന നൽകുന്ന കമ്പനികൾ 6 ശതമാനം വീതമാണ്.

അറബ് ഉദ്യോഗാർത്ഥികൾക്ക് പ്രധാനമായും എൻജിനീയറിങ്, സെയിൽസ് & മാർക്കറ്റിംഗ്, ഐടി മേഖലകളിലാണ് കൂടുതൽ അവസരങ്ങൾ ലഭിക്കുന്നത്. യൂറോപ്യൻ ഉദ്യോഗാർത്ഥികളെ പ്രധാനമായും ഐടി, ഹെൽത്ത് കെയർ മേഖലകളിലേക്കാണ് കമ്പനികൾ പരിഗണിക്കുന്നതെന്നും റിപ്പോർട്ട് വ്യക്തമാക്കുന്നു.