കുവൈത്തിലെ ബ്നൈദ് അൽ-ഗാർ മേഖലയിൽ പോലീസ് നടത്തിയ പതിവ് പട്രോളിംഗിനിടെ മദ്യവുമായി അഞ്ചംഗ സംഘം പിടിയിലായി. കറുത്ത എസ്യുവി വാഹനത്തിൽ നിന്നാണ് ഇവരെ കസ്റ്റഡിയിലെടുത്തത്. പ്രതികളിൽ ചിലർ ലഹരിയുടെ സ്വാധീനത്തിലായിരുന്നുവെന്നും പോലീസ് അറിയിച്ചു. ക്യാപിറ്റൽ സപ്പോർട്ട് പട്രോളിംഗ് ഉദ്യോഗസ്ഥർ പ്രദേശത്ത് നിരീക്ഷണം നടത്തുന്നതിനിടെ ഒരു വാഹനത്തിൽ നിന്ന് അസാധാരണമായ ബഹളം കേട്ടതിനെ തുടർന്ന് വാഹനം തടഞ്ഞുനിർത്തി പരിശോധിക്കുകയായിരുന്നു. വാഹനത്തിൽ ഒരു അറബ് പ്രവാസിയും നാല് കുവൈത്ത് പൗരന്മാരുമാണ് ഉണ്ടായിരുന്നത്.
തുടർന്ന് നടത്തിയ പരിശോധനയിൽ വിദേശത്ത് നിന്ന് ഇറക്കുമതി ചെയ്ത രണ്ട് കുപ്പി മദ്യം കണ്ടെത്തി. വാഹനത്തിലുണ്ടായിരുന്ന മൂന്ന് പേർ മദ്യത്തിന്റെയോ മയക്കുമരുന്നിന്റെയോ ലഹരിയിലായിരുന്നുവെന്ന് ഉദ്യോഗസ്ഥർ സ്ഥിരീകരിച്ചു.
പിടിയിലായ നാല് കുവൈത്ത് പൗരന്മാരെ തുടർ അന്വേഷണത്തിനായി മയക്കുമരുന്ന് നിയന്ത്രണ വിഭാഗത്തിന് കൈമാറി. അറബ് പ്രവാസിയെ നിയമനടപടികൾക്കും നാടുകടത്തൽ നടപടികൾക്കുമായി ബന്ധപ്പെട്ട വകുപ്പിലേക്ക് മാറ്റി. കുവൈത്തിൽ നിയമലംഘനങ്ങളും അനധികൃത പ്രവർത്തനങ്ങളും തടയുന്നതിനായി സുരക്ഷാ ഉദ്യോഗസ്ഥർ ശക്തമായ പട്രോളിംഗ് തുടരുന്ന സാഹചര്യത്തിലാണ് ഈ നടപടി.
