2025-26 അധ്യയന വർഷത്തിലെ അവസാന സെമസ്റ്റർ പരീക്ഷകൾ ആരംഭിക്കാനിരിക്കെ യുഎഇയിലെ സ്വകാര്യ സ്കൂളുകൾ വിദ്യാർത്ഥികൾക്കും രക്ഷിതാക്കൾക്കും കർശന നിർദേശങ്ങൾ നൽകി. പരീക്ഷാ കാലയളവിൽ പഠനാന്തരീക്ഷം തടസപ്പെടാതിരിക്കാനും അച്ചടക്കം ഉറപ്പാക്കാനുമാണ് പുതിയ നിയന്ത്രണങ്ങൾ ഏർപ്പെടുത്തിയിരിക്കുന്നത്. അധ്യയന വർഷം അവസാനിക്കുന്നതിന്റെ ഭാഗമായി സാധാരണയായി നടക്കുന്ന ആഘോഷങ്ങൾ, അധ്യാപകർക്കുള്ള സമ്മാനങ്ങൾ, മധുരപലഹാര വിതരണം, ഓർമ്മസമ്മാനങ്ങൾ നൽകൽ തുടങ്ങിയവയ്ക്ക് സ്കൂളുകൾ വിലക്ക് ഏർപ്പെടുത്തി. പ്രൊഫഷണൽ വിദ്യാഭ്യാസ അന്തരീക്ഷം നിലനിർത്തുന്നതിനുള്ള നയത്തിന്റെ ഭാഗമായാണ് ഈ നിയന്ത്രണങ്ങൾ ആവർത്തിച്ച് ഓർമ്മിപ്പിച്ചിരിക്കുന്നത്. സ്കൂൾ പരിസരങ്ങളിലേക്കോ ക്ലാസ് മുറികളിലേക്കോ ആഘോഷങ്ങളുമായി ബന്ധപ്പെട്ട വസ്തുക്കൾ കൊണ്ടുവരുന്നതും നിരോധിച്ചിട്ടുണ്ട്. ബലൂണുകൾ, കൺഫെറ്റി, വിസിലുകൾ, ചിയർ ഹോണുകൾ, നിറമുള്ള സ്പ്രേകൾ തുടങ്ങിയവ സ്കൂളിൽ അനുവദിക്കില്ലെന്ന് അധികൃതർ വ്യക്തമാക്കി.

പരീക്ഷാ ദിവസങ്ങളിൽ വിദ്യാർത്ഥികൾ ഔദ്യോഗിക യൂണിഫോം നിർബന്ധമായും ധരിക്കണമെന്നും സ്ലിപ്പറുകൾ ഉൾപ്പെടെയുള്ള തുറന്ന പാദരക്ഷകൾ അനുവദിക്കില്ലെന്നും സ്കൂൾ മാനേജ്മെന്റുകൾ അറിയിച്ചു. അച്ചടക്കവും സുരക്ഷയും മുൻനിർത്തിയാണ് ഈ നിർദേശങ്ങൾ നൽകിയിരിക്കുന്നത്. പരീക്ഷാ സമയത്ത് വിദ്യാലയത്തിലെ ശാന്തതയും ക്രമവും നിലനിർത്താൻ നിയമങ്ങൾ ലംഘിക്കുന്നവർക്കെതിരെ നടപടിയുണ്ടാകുമെന്നും സ്കൂൾ അധികൃതർ മുന്നറിയിപ്പ് നൽകി. പരീക്ഷകൾ സുഗമമായി നടത്തുന്നതിനും വിദ്യാർത്ഥികളുടെ ശ്രദ്ധ പഠനത്തിൽ കേന്ദ്രീകരിക്കുന്നതിനുമായാണ് പുതിയ നിയന്ത്രണങ്ങൾ നടപ്പാക്കിയിരിക്കുന്നത്.യുഎഇയിലെ വാർത്തകളും തൊഴിൽ അവസരങ്ങളും അതിവേഗം അറിയാൻ വാട്സ്ആപ്പ് ഗ്രൂപ്പിൽ അംഗമാവുക https://chat.whatsapp.com/Dbf59JLetgBECJpr5UZOuZ?mode=gi_t

‘സ്ഫോടന ശബ്ദ’മുണ്ടാക്കുന്ന വാഹനങ്ങൾക്കെതിരെ യുഎഇയിൽ കർശന നടപടി; പിഴയും 12 ബ്ലാക്ക് പോയിന്റും

ജനവാസ മേഖലകളിൽ അർദ്ധരാത്രിയിൽ സ്ഫോടനത്തിന് സമാനമായ ശബ്ദമുണ്ടാക്കി ജനങ്ങളിൽ പരിഭ്രാന്തി സൃഷ്ടിക്കുന്ന വിധത്തിൽ നിയമവിരുദ്ധമായി രൂപമാറ്റം വരുത്തിയ കാറുകളുടെയും മോട്ടോർ സൈക്കിളുകളുടെയും യുഎഇ പോലീസ് കർശന നടപടികൾ ആരംഭിച്ചു. മേഖലയിലെ സംഘർഷാവസ്ഥ വാർത്തകളിൽ നിറഞ്ഞുനിൽക്കുന്ന സാഹചര്യത്തിൽ ഇത്തരം വാഹനങ്ങളിൽ നിന്നുണ്ടാകുന്ന ‘ബാക്ക് ഫയർ’ ശബ്ദങ്ങൾ പലരും മിസൈൽ ആക്രമണമോ സ്ഫോടനമോ ആണെന്ന് തെറ്റിദ്ധരിച്ച് ഭീതിയിലായിരുന്നുവെന്ന് അധികൃതർ വ്യക്തമാക്കി. എഞ്ചിനുകളിൽ മാറ്റം വരുത്തി ഉദ്ദേശപൂർവ്വം ശക്തമായ ശബ്ദമുണ്ടാക്കുന്നത് പ്രധാനമായും കൗമാരക്കാരും യുവാക്കളുമാണെന്ന് അന്വേഷണത്തിൽ കണ്ടെത്തിയതായി പോലീസ് അറിയിച്ചു. റിപ്പോർട്ട് ചെയ്യപ്പെട്ട ശബ്ദങ്ങൾ വാഹനങ്ങളിൽ നിന്നുള്ളതാണെന്നും രാജ്യത്തിന്റെ സുരക്ഷയെ ബാധിക്കുന്ന യാതൊരു ഭീഷണിയും നിലവിലില്ലെന്നും അധികൃതർ ജനങ്ങളെ ആശ്വസിപ്പിച്ചു. യുഎഇ പൂർണ്ണമായും സുരക്ഷിതമാണെന്നും പോലീസ് വ്യക്തമാക്കി.

ദുബായ്, ഷാർജ തുടങ്ങിയ എമിറേറ്റുകളിലെ ജനവാസ പ്രദേശങ്ങളിൽ രാത്രികാല പോലീസ് പട്രോളിംഗ് ശക്തമാക്കിയിട്ടുണ്ട്. യുഎഇ ട്രാഫിക് നിയമപ്രകാരം അമിത ശബ്ദമുണ്ടാക്കുന്ന വാഹനങ്ങൾ ഓടിക്കുന്നവർക്ക് 2000 ദിർഹം പിഴയും 12 ബ്ലാക്ക് പോയിന്റുകളും ലഭിക്കും. കൂടാതെ വാഹനം പോലീസ് പിടിച്ചെടുക്കുകയും ചെയ്യും. അനധികൃതമായി രൂപമാറ്റം വരുത്തിയ വാഹനങ്ങൾ തിരികെ ലഭിക്കാൻ 10,000 ദിർഹം വരെ ഫീസ് നൽകേണ്ടിവരുമെന്നും അധികൃതർ അറിയിച്ചു. ഈ നടപടി കർശനമായി നടപ്പാക്കുന്നതിന് ദുബായ് പോലീസ് ഓപ്പറേഷൻസ് അസിസ്റ്റന്റ് കമാൻഡർ-ഇൻ-ചീഫ് മേജർ ജനറൽ സെയ്ഫ് മുഹൈർ അൽ മസ്‌റൂയിയും ഷാർജ പോലീസ് സെൻട്രൽ റീജിയൻ ഡയറക്ടർ ബ്രിഗേഡിയർ ഖലീഫ അൽ ഖസൂനിയും നേതൃത്വമൊരുക്കുന്നുണ്ട്. കുട്ടികൾ വാഹനങ്ങളിൽ അനധികൃത മാറ്റങ്ങൾ വരുത്തുന്നില്ലെന്ന് മാതാപിതാക്കൾ ശ്രദ്ധിക്കണമെന്നും അധികൃതർ അഭ്യർത്ഥിച്ചു. ഇത്തരം ശബ്ദശല്യം ഉണ്ടാക്കുന്ന വാഹനങ്ങളെക്കുറിച്ച് ഔദ്യോഗിക ചാനലുകൾ വഴി പോലീസിനെ അറിയിക്കണമെന്നും പൊതുജനങ്ങളോട് നിർദേശിച്ചിട്ടുണ്ട്. മേഖലയിലെ നിലവിലെ സാഹചര്യം പരിഗണിച്ച് ജനങ്ങളുടെ സമാധാനവും സുരക്ഷയും ഉറപ്പാക്കുക എന്ന ലക്ഷ്യത്തോടെയാണ് ഈ നടപടികൾ ശക്തമാക്കിയതെന്നും പോലീസ് അറിയിച്ചു. പോലീസിന്റെ ഈ ഇടപെടലിനെ പ്രവാസികളും സ്വദേശികളും സ്വാഗതം ചെയ്തിട്ടുണ്ട്.യുഎഇയിലെ വാർത്തകളും തൊഴിൽ അവസരങ്ങളും അതിവേഗം അറിയാൻ വാട്സ്ആപ്പ് ഗ്രൂപ്പിൽ അംഗമാവുhttps://chat.whatsapp.com/Dbf59JLetgBECJpr5UZOuZ?mode=gi_t