വിദേശത്തുനിന്നും ഗൾഫ് രാജ്യങ്ങളിൽ നിന്നും ഇന്ത്യയിലേക്ക് യാത്ര ചെയ്യുന്ന പ്രവാസികൾക്കായി ഡയറക്ടറേറ്റ് ജനറൽ ഓഫ് സിവിൽ ഏവിയേഷൻ (DGCA) പുതിയ മാർഗ്ഗനിർദ്ദേശങ്ങൾ പുറപ്പെടുവിച്ചു. വിമാനത്താവളങ്ങളിലെ അതീവ സുരക്ഷാ വിവരങ്ങൾ സോഷ്യൽ മീഡിയയിലൂടെ പുറത്തുപോകുന്നത് തടയാനാണ് ഈ കടുത്ത നടപടി.

യാത്രക്കാരുടെ സുരക്ഷാ പരിശോധന നടക്കുന്ന സെക്യൂരിറ്റി ചെക്ക്പോയിന്റുകൾ, വിമാനത്തിലേക്ക് പ്രവേശിക്കുന്നതിനുള്ള ബോർഡിങ് ഗേറ്റുകൾ, യാത്രക്കാരെ കൊണ്ടുപോകുന്ന റൺവേ ബസുകൾ, വിമാനങ്ങൾ പാർക്ക് ചെയ്യുന്ന ആപ്രണുകൾ, മറ്റ് നിയന്ത്രിത പ്രവർത്തന മേഖലകൾ എന്നിവടങ്ങളിൽ ചിത്രീകരണം പൂർണ്ണമായും വിലക്കിയിട്ടുണ്ട്. എന്നാൽ ചില നിബന്ധനകൾക്ക് വിധേയമായി ചെക്ക്-ഇൻ ഹാളുകൾ, ഫൂഡ് കോർട്ടുകൾ, നിയന്ത്രിത മേഖലയ്ക്ക് പുറത്തുള്ള ഡിപ്പാർച്ചർ കോൺകോഴ്സുകൾ തുടങ്ങിയ പൊതുമേഖലകളിൽ യാത്രക്കാർക്ക് ദൃശ്യങ്ങൾ പകർത്താം.

അനുമതിയില്ലാതെ സുരക്ഷാ മേഖലകളിൽ ചിത്രീകരണം നടത്തിയാൽ പകർത്തിയ ദൃശ്യങ്ങൾ ഉടനടി നശിപ്പിച്ചു കളയും. ചിത്രീകരണത്തിന് ഉപയോഗിച്ച മൊബൈൽ ഫോണോ ക്യാമറയോ സുരക്ഷാ ഉദ്യോഗസ്ഥർ പിടിച്ചെടുക്കുകയും ഗുരുതര സാഹചര്യങ്ങളിൽ ഇത് ഫൊറൻസിക് പരിശോധനയ്ക്ക് അയക്കുകയും ചെയ്യും. ഇതിനുപുറമെ വലിയ തുക സാമ്പത്തിക പിഴയായും ഈടാക്കുന്നതാണ്.

കൂടാതെ നിയമം ലംഘിക്കുന്ന യാത്രക്കാരെ കരിമ്പട്ടികയിൽ ഉൾപ്പെടുത്തി യാത്രാവിലക്ക് (No-Fly List) ഏർപ്പെടുത്താനും ഡിജിസിഎയ്ക്ക് അധികാരമുണ്ട്. കുറ്റത്തിന്റെ ഗൗരവമനുസരിച്ച് യാത്രാവിലക്കിനെ മൂന്ന് ഘട്ടങ്ങളായി തരംതിരിച്ചിരിക്കുന്നു. ആദ്യമായി അല്ലെങ്കിൽ ചെറിയ തോതിൽ നിയമം ലംഘിക്കുന്നവർക്ക് മൂന്ന് മാസം വരെയാണ് വിലക്ക്. നിയമം ലംഘിച്ച് തർക്കത്തിൽ ഏർപ്പെടുകയോ സുരക്ഷാ ഭീഷണിയുയർത്തുകയോ ചെയ്താൽ ആറ് മാസം വരെ വിമാനയാത്ര നിഷേധിക്കാം. എന്നാൽ ആവർത്തിച്ചുള്ള നിയമലംഘനങ്ങൾക്കോ അതീവ ഗുരുതരമായ സുരക്ഷാ വീഴ്ചകൾക്കോ രണ്ട് വർഷമോ അതിൽ കൂടുതലോ കാലയളവിലേക്ക് യാത്രാവിലക്ക് ഏർപ്പെടുത്താൻ നിയമമുണ്ട്.

വിദേശ പൗരന്മാരായ ക്രൂ അംഗങ്ങൾ ചിത്രീകരണം നടത്തണമെങ്കിൽ സുരക്ഷാ ഏജൻസികളിൽ നിന്നുള്ള സെക്യൂരിറ്റി ക്ലിയറൻസ് നിർബന്ധമാണ്. ഇത്തരം ദൃശ്യങ്ങളുടെ രേഖകൾ മൂന്ന് വർഷം സൂക്ഷിക്കുകയും വേണം. ഇൻഫ്ലുവൻസർമാരുടെ പ്രൊഫഷണൽ ഷൂട്ടുകൾ, പരസ്യങ്ങൾ, ബ്രാൻഡ് പ്രമോഷനുകൾ എന്നിവയുൾപ്പെടെയുള്ള എല്ലാത്തരം വാണിജ്യ ചിത്രീകരണങ്ങൾക്കും വിമാനത്താവള അധികൃതരിൽ നിന്നും സുരക്ഷാ ഏജൻസികളിൽ നിന്നും മുൻകൂർ അനുമതി വാങ്ങേണ്ടത് നിർബന്ധമാക്കിയിട്ടുണ്ട്.

വിമാനത്താവളങ്ങളിലെ ഒരു ചെറിയ അശ്രദ്ധ പോലും വലിയ നിയമനടപടികളിലേക്കും യാത്രാ തടസ്സങ്ങളിലേക്കും നയിച്ചേക്കാം. അതിനാൽ യാത്രയിലുടനീളം ഫോൺ ഉപയോഗിക്കുമ്പോൾ അതീവ ജാഗ്രത പുലർത്തുക.യുഎഇയിലെ വാർത്തകളും തൊഴിൽ അവസരങ്ങളും അതിവേഗം അറിയാൻ വാട്സ്ആപ്പ് ഗ്രൂപ്പിൽ അംഗമാവുക https://chat.whatsapp.com/Dbf59JLetgBECJpr5UZOuZ?mode=gi_t

‘സ്ഫോടന ശബ്ദ’മുണ്ടാക്കുന്ന വാഹനങ്ങൾക്കെതിരെ യുഎഇയിൽ കർശന നടപടി; പിഴയും 12 ബ്ലാക്ക് പോയിന്റും

ജനവാസ മേഖലകളിൽ അർദ്ധരാത്രിയിൽ സ്ഫോടനത്തിന് സമാനമായ ശബ്ദമുണ്ടാക്കി ജനങ്ങളിൽ പരിഭ്രാന്തി സൃഷ്ടിക്കുന്ന വിധത്തിൽ നിയമവിരുദ്ധമായി രൂപമാറ്റം വരുത്തിയ കാറുകളുടെയും മോട്ടോർ സൈക്കിളുകളുടെയും യുഎഇ പോലീസ് കർശന നടപടികൾ ആരംഭിച്ചു. മേഖലയിലെ സംഘർഷാവസ്ഥ വാർത്തകളിൽ നിറഞ്ഞുനിൽക്കുന്ന സാഹചര്യത്തിൽ ഇത്തരം വാഹനങ്ങളിൽ നിന്നുണ്ടാകുന്ന ‘ബാക്ക് ഫയർ’ ശബ്ദങ്ങൾ പലരും മിസൈൽ ആക്രമണമോ സ്ഫോടനമോ ആണെന്ന് തെറ്റിദ്ധരിച്ച് ഭീതിയിലായിരുന്നുവെന്ന് അധികൃതർ വ്യക്തമാക്കി. എഞ്ചിനുകളിൽ മാറ്റം വരുത്തി ഉദ്ദേശപൂർവ്വം ശക്തമായ ശബ്ദമുണ്ടാക്കുന്നത് പ്രധാനമായും കൗമാരക്കാരും യുവാക്കളുമാണെന്ന് അന്വേഷണത്തിൽ കണ്ടെത്തിയതായി പോലീസ് അറിയിച്ചു. റിപ്പോർട്ട് ചെയ്യപ്പെട്ട ശബ്ദങ്ങൾ വാഹനങ്ങളിൽ നിന്നുള്ളതാണെന്നും രാജ്യത്തിന്റെ സുരക്ഷയെ ബാധിക്കുന്ന യാതൊരു ഭീഷണിയും നിലവിലില്ലെന്നും അധികൃതർ ജനങ്ങളെ ആശ്വസിപ്പിച്ചു. യുഎഇ പൂർണ്ണമായും സുരക്ഷിതമാണെന്നും പോലീസ് വ്യക്തമാക്കി.

ദുബായ്, ഷാർജ തുടങ്ങിയ എമിറേറ്റുകളിലെ ജനവാസ പ്രദേശങ്ങളിൽ രാത്രികാല പോലീസ് പട്രോളിംഗ് ശക്തമാക്കിയിട്ടുണ്ട്. യുഎഇ ട്രാഫിക് നിയമപ്രകാരം അമിത ശബ്ദമുണ്ടാക്കുന്ന വാഹനങ്ങൾ ഓടിക്കുന്നവർക്ക് 2000 ദിർഹം പിഴയും 12 ബ്ലാക്ക് പോയിന്റുകളും ലഭിക്കും. കൂടാതെ വാഹനം പോലീസ് പിടിച്ചെടുക്കുകയും ചെയ്യും. അനധികൃതമായി രൂപമാറ്റം വരുത്തിയ വാഹനങ്ങൾ തിരികെ ലഭിക്കാൻ 10,000 ദിർഹം വരെ ഫീസ് നൽകേണ്ടിവരുമെന്നും അധികൃതർ അറിയിച്ചു. ഈ നടപടി കർശനമായി നടപ്പാക്കുന്നതിന് ദുബായ് പോലീസ് ഓപ്പറേഷൻസ് അസിസ്റ്റന്റ് കമാൻഡർ-ഇൻ-ചീഫ് മേജർ ജനറൽ സെയ്ഫ് മുഹൈർ അൽ മസ്‌റൂയിയും ഷാർജ പോലീസ് സെൻട്രൽ റീജിയൻ ഡയറക്ടർ ബ്രിഗേഡിയർ ഖലീഫ അൽ ഖസൂനിയും നേതൃത്വമൊരുക്കുന്നുണ്ട്. കുട്ടികൾ വാഹനങ്ങളിൽ അനധികൃത മാറ്റങ്ങൾ വരുത്തുന്നില്ലെന്ന് മാതാപിതാക്കൾ ശ്രദ്ധിക്കണമെന്നും അധികൃതർ അഭ്യർത്ഥിച്ചു. ഇത്തരം ശബ്ദശല്യം ഉണ്ടാക്കുന്ന വാഹനങ്ങളെക്കുറിച്ച് ഔദ്യോഗിക ചാനലുകൾ വഴി പോലീസിനെ അറിയിക്കണമെന്നും പൊതുജനങ്ങളോട് നിർദേശിച്ചിട്ടുണ്ട്. മേഖലയിലെ നിലവിലെ സാഹചര്യം പരിഗണിച്ച് ജനങ്ങളുടെ സമാധാനവും സുരക്ഷയും ഉറപ്പാക്കുക എന്ന ലക്ഷ്യത്തോടെയാണ് ഈ നടപടികൾ ശക്തമാക്കിയതെന്നും പോലീസ് അറിയിച്ചു. പോലീസിന്റെ ഈ ഇടപെടലിനെ പ്രവാസികളും സ്വദേശികളും സ്വാഗതം ചെയ്തിട്ടുണ്ട്.യുഎഇയിലെ വാർത്തകളും തൊഴിൽ അവസരങ്ങളും അതിവേഗം അറിയാൻ വാട്സ്ആപ്പ് ഗ്രൂപ്പിൽ അംഗമാവുhttps://chat.whatsapp.com/Dbf59JLetgBECJpr5UZOuZ?mode=gi_t