യൂറോപ്പിലേക്ക് യാത്ര ചെയ്യുന്ന യുഎഇ യാത്രക്കാർക്ക് മുന്നറിയിപ്പുമായി ട്രാവൽ രംഗത്തെ വിദഗ്ധർ. യൂറോപ്യൻ യൂണിയന്റെ പുതിയ ബയോമെട്രിക് എൻട്രി-എക്സിറ്റ് സിസ്റ്റം (EES) നടപ്പിലാക്കിയതും വിവിധ യൂറോപ്യൻ രാജ്യങ്ങളിലെ തൊഴിലാളി സമരങ്ങളും കാരണം വിമാനത്താവളങ്ങളിൽ മണിക്കൂറുകളോളം നീളുന്ന കാത്തിരിപ്പും യാത്രാ തടസങ്ങളും നേരിടേണ്ടിവരുന്ന സാഹചര്യമാണെന്ന് റിപ്പോർട്ടുകൾ സൂചിപ്പിക്കുന്നു. പുതിയ ഇലക്ട്രോണിക് എൻട്രി-എക്സിറ്റ് സംവിധാനത്തിന്റെ ഭാഗമായി യൂറോപ്പിലെ ഷെൻഗൻ മേഖലയിൽ പ്രവേശിക്കുന്ന യൂറോപ്യൻ യൂണിയൻ ഇതര രാജ്യങ്ങളിലെ യാത്രക്കാർ നിർബന്ധമായും വിരലടയാളവും മുഖപരിചയ വിവരങ്ങളും ഉൾപ്പെടുന്ന ബയോമെട്രിക് രജിസ്ട്രേഷൻ പൂർത്തിയാക്കണം. ഗൾഫ് രാജ്യങ്ങളിൽ നിന്നുള്ള യാത്രക്കാരെയും ഇത് നേരിട്ട് ബാധിക്കുന്നതാണ്. ആംസ്റ്റർഡാം, ലിസ്ബൺ, മിലാൻ ഉൾപ്പെടെയുള്ള പ്രധാന വിമാനത്താവളങ്ങളിൽ നിലവിൽ അഞ്ച് മുതൽ ആറ് മണിക്കൂർ വരെ വൈകലുകൾ റിപ്പോർട്ട് ചെയ്യുന്നുണ്ടെന്ന് ട്രാവൽ ഏജൻസികൾ വ്യക്തമാക്കുന്നു. പുതിയ ബയോമെട്രിക് പരിശോധനകൾക്കും ചില രാജ്യങ്ങളിലെ തൊഴിൽ സമരങ്ങൾക്കും പിന്നാലെ നിരവധി യാത്രക്കാർക്ക് കണക്ഷൻ ഫ്ലൈറ്റുകൾ നഷ്ടപ്പെടുന്ന സാഹചര്യവും ഉണ്ടായിട്ടുണ്ടെന്നാണ് റിപ്പോർട്ടുകൾ.

വേനൽക്കാല അവധിക്കാല യാത്രകൾ ശക്തമാകുന്നതോടെ യൂറോപ്യൻ വിമാനത്താവളങ്ങളിലെ തിരക്ക് ഇനിയും വർധിക്കുമെന്നാണ് മുന്നറിയിപ്പ്. യാത്രക്കാർ സാധാരണത്തേക്കാൾ മൂന്ന് മുതൽ നാല് മണിക്കൂർ വരെ മുമ്പ് വിമാനത്താവളങ്ങളിൽ എത്തിച്ചേരുകയും വളരെ കുറഞ്ഞ ഇടവേളയുള്ള കണക്ഷൻ ഫ്ലൈറ്റുകൾ ഒഴിവാക്കുകയും ചെയ്യണമെന്ന് ട്രാവൽ വിദഗ്ധർ നിർദേശിക്കുന്നു.
അമിത തിരക്ക് ഉണ്ടാകുന്ന സാഹചര്യങ്ങളിൽ ചില രാജ്യങ്ങൾ താൽക്കാലിക ഇളവുകൾ പരിഗണിച്ചിട്ടുണ്ടെങ്കിലും, ബയോമെട്രിക് പരിശോധനാ സംവിധാനം തുടരുമെന്നും അംഗരാജ്യങ്ങൾ നിയമങ്ങൾ പാലിക്കേണ്ടതുണ്ടെന്നും യൂറോപ്യൻ കമ്മീഷൻ വ്യക്തമാക്കിയിട്ടുണ്ട്.
യൂറോപ്പിലേക്ക് യാത്ര ആസൂത്രണം ചെയ്യുന്ന യുഎഇ നിവാസികൾ യാത്രയ്ക്ക് മുമ്പ് വിമാനക്കമ്പനികളുടെയും വിമാനത്താവളങ്ങളുടെയും ഏറ്റവും പുതിയ അറിയിപ്പുകൾ പരിശോധിക്കുകയും അധിക സമയം കരുതുകയും ചെയ്യണമെന്ന് അധികൃതർ നിർദേശിക്കുന്നു.യുഎഇയിലെ വാർത്തകളും തൊഴിൽ അവസരങ്ങളും അതിവേഗം അറിയാൻ വാട്സ്ആപ്പ് ഗ്രൂപ്പിൽ അംഗമാവുക https://chat.whatsapp.com/Dbf59JLetgBECJpr5UZOuZ?mode=gi_t

‘സ്ഫോടന ശബ്ദ’മുണ്ടാക്കുന്ന വാഹനങ്ങൾക്കെതിരെ യുഎഇയിൽ കർശന നടപടി; പിഴയും 12 ബ്ലാക്ക് പോയിന്റും

ജനവാസ മേഖലകളിൽ അർദ്ധരാത്രിയിൽ സ്ഫോടനത്തിന് സമാനമായ ശബ്ദമുണ്ടാക്കി ജനങ്ങളിൽ പരിഭ്രാന്തി സൃഷ്ടിക്കുന്ന വിധത്തിൽ നിയമവിരുദ്ധമായി രൂപമാറ്റം വരുത്തിയ കാറുകളുടെയും മോട്ടോർ സൈക്കിളുകളുടെയും യുഎഇ പോലീസ് കർശന നടപടികൾ ആരംഭിച്ചു. മേഖലയിലെ സംഘർഷാവസ്ഥ വാർത്തകളിൽ നിറഞ്ഞുനിൽക്കുന്ന സാഹചര്യത്തിൽ ഇത്തരം വാഹനങ്ങളിൽ നിന്നുണ്ടാകുന്ന ‘ബാക്ക് ഫയർ’ ശബ്ദങ്ങൾ പലരും മിസൈൽ ആക്രമണമോ സ്ഫോടനമോ ആണെന്ന് തെറ്റിദ്ധരിച്ച് ഭീതിയിലായിരുന്നുവെന്ന് അധികൃതർ വ്യക്തമാക്കി. എഞ്ചിനുകളിൽ മാറ്റം വരുത്തി ഉദ്ദേശപൂർവ്വം ശക്തമായ ശബ്ദമുണ്ടാക്കുന്നത് പ്രധാനമായും കൗമാരക്കാരും യുവാക്കളുമാണെന്ന് അന്വേഷണത്തിൽ കണ്ടെത്തിയതായി പോലീസ് അറിയിച്ചു. റിപ്പോർട്ട് ചെയ്യപ്പെട്ട ശബ്ദങ്ങൾ വാഹനങ്ങളിൽ നിന്നുള്ളതാണെന്നും രാജ്യത്തിന്റെ സുരക്ഷയെ ബാധിക്കുന്ന യാതൊരു ഭീഷണിയും നിലവിലില്ലെന്നും അധികൃതർ ജനങ്ങളെ ആശ്വസിപ്പിച്ചു. യുഎഇ പൂർണ്ണമായും സുരക്ഷിതമാണെന്നും പോലീസ് വ്യക്തമാക്കി.

ദുബായ്, ഷാർജ തുടങ്ങിയ എമിറേറ്റുകളിലെ ജനവാസ പ്രദേശങ്ങളിൽ രാത്രികാല പോലീസ് പട്രോളിംഗ് ശക്തമാക്കിയിട്ടുണ്ട്. യുഎഇ ട്രാഫിക് നിയമപ്രകാരം അമിത ശബ്ദമുണ്ടാക്കുന്ന വാഹനങ്ങൾ ഓടിക്കുന്നവർക്ക് 2000 ദിർഹം പിഴയും 12 ബ്ലാക്ക് പോയിന്റുകളും ലഭിക്കും. കൂടാതെ വാഹനം പോലീസ് പിടിച്ചെടുക്കുകയും ചെയ്യും. അനധികൃതമായി രൂപമാറ്റം വരുത്തിയ വാഹനങ്ങൾ തിരികെ ലഭിക്കാൻ 10,000 ദിർഹം വരെ ഫീസ് നൽകേണ്ടിവരുമെന്നും അധികൃതർ അറിയിച്ചു. ഈ നടപടി കർശനമായി നടപ്പാക്കുന്നതിന് ദുബായ് പോലീസ് ഓപ്പറേഷൻസ് അസിസ്റ്റന്റ് കമാൻഡർ-ഇൻ-ചീഫ് മേജർ ജനറൽ സെയ്ഫ് മുഹൈർ അൽ മസ്‌റൂയിയും ഷാർജ പോലീസ് സെൻട്രൽ റീജിയൻ ഡയറക്ടർ ബ്രിഗേഡിയർ ഖലീഫ അൽ ഖസൂനിയും നേതൃത്വമൊരുക്കുന്നുണ്ട്. കുട്ടികൾ വാഹനങ്ങളിൽ അനധികൃത മാറ്റങ്ങൾ വരുത്തുന്നില്ലെന്ന് മാതാപിതാക്കൾ ശ്രദ്ധിക്കണമെന്നും അധികൃതർ അഭ്യർത്ഥിച്ചു. ഇത്തരം ശബ്ദശല്യം ഉണ്ടാക്കുന്ന വാഹനങ്ങളെക്കുറിച്ച് ഔദ്യോഗിക ചാനലുകൾ വഴി പോലീസിനെ അറിയിക്കണമെന്നും പൊതുജനങ്ങളോട് നിർദേശിച്ചിട്ടുണ്ട്. മേഖലയിലെ നിലവിലെ സാഹചര്യം പരിഗണിച്ച് ജനങ്ങളുടെ സമാധാനവും സുരക്ഷയും ഉറപ്പാക്കുക എന്ന ലക്ഷ്യത്തോടെയാണ് ഈ നടപടികൾ ശക്തമാക്കിയതെന്നും പോലീസ് അറിയിച്ചു. പോലീസിന്റെ ഈ ഇടപെടലിനെ പ്രവാസികളും സ്വദേശികളും സ്വാഗതം ചെയ്തിട്ടുണ്ട്.യുഎഇയിലെ വാർത്തകളും തൊഴിൽ അവസരങ്ങളും അതിവേഗം അറിയാൻ വാട്സ്ആപ്പ് ഗ്രൂപ്പിൽ അംഗമാവുhttps://chat.whatsapp.com/Dbf59JLetgBECJpr5UZOuZ?mode=gi_t