യുഎഇയിൽ ജോലി ചെയ്യുന്ന ഇന്ത്യൻ പ്രവാസികൾ 2025-26 സാമ്പത്തിക വർഷത്തേക്കുള്ള (അസസ്‌മെന്റ് വർഷം 2026-27) ആദായനികുതി റിട്ടേൺ സമർപ്പണത്തിനായുള്ള രേഖകൾ ഇപ്പോഴേ തയ്യാറാക്കി സൂക്ഷിക്കണമെന്ന് നികുതി വിദഗ്ധർ നിർദേശിച്ചു. സമയപരിധിക്കുള്ളിൽ റിട്ടേൺ ഫയൽ ചെയ്യാത്തത് പിഴ, റീഫണ്ട് വൈകുക, നികുതി ആനുകൂല്യങ്ങൾ നഷ്ടപ്പെടുക തുടങ്ങിയ പ്രശ്നങ്ങൾക്ക് കാരണമാകാമെന്നാണ് മുന്നറിയിപ്പ്. വൈകിയുള്ള ഫീസ് ഒഴിവാക്കി ഐടിആർ സമർപ്പിക്കാനുള്ള അവസാന തീയതി 2026 ജൂലൈ 31 ആണെന്ന് അധികൃതർ ഓർമ്മിപ്പിച്ചു. ഇതിനോടൊപ്പം 2026ലെ പുതിയ ആദായനികുതി ചട്ടങ്ങൾ പ്രാബല്യത്തിൽ വരുന്നതിനാൽ, നിലവിൽ ഉപയോഗിക്കുന്ന പല നികുതി ഫോമുകളുടെയും നമ്പറുകളിൽ മാറ്റമുണ്ടാകുമെന്നും ഇത് പ്രവാസികൾക്കിടയിൽ ആശയക്കുഴപ്പത്തിന് ഇടയാക്കാനിടയുണ്ടെന്നും വിദഗ്ധർ പറയുന്നു. ഇന്ത്യയിൽ നിക്ഷേപങ്ങൾ, വാടക വരുമാനം, സ്വത്ത്, ഓഹരി നിക്ഷേപങ്ങൾ തുടങ്ങിയ സാമ്പത്തിക ഇടപാടുകൾ ഉള്ള യുഎഇ പ്രവാസികൾ പലപ്പോഴും ആവശ്യമായ രേഖകൾ സമയത്ത് തയ്യാറാക്കുന്നതിൽ അലംഭാവം കാണിക്കുന്നതായി നികുതി വിദഗ്ധർ ചൂണ്ടിക്കാട്ടുന്നു. ദി ടാക്സ് എക്സ്പെർട്സ് ഡിഎംസിസി ഡയറക്ടറും ചാർട്ടേഡ് അക്കൗണ്ടന്റുമായ ദീക്ഷിത് ജെയിൻ, രേഖകൾ മുൻകൂട്ടി ശേഖരിക്കുന്നത് റിട്ടേൺ സമർപ്പണ പ്രക്രിയ കൂടുതൽ ലളിതമാക്കുമെന്ന് വ്യക്തമാക്കി.

പ്രവാസികൾ തയ്യാറാക്കി വെക്കേണ്ട പ്രധാന രേഖകളിൽ 2025 ഏപ്രിൽ 1 മുതൽ 2026 മാർച്ച് 31 വരെയുള്ള എൻആർഒ, എൻആർഇ, റെസിഡന്റ് ബാങ്ക് അക്കൗണ്ടുകളുടെ സ്റ്റേറ്റ്‌മെന്റുകൾ ഉൾപ്പെടുന്നു. കൂടാതെ വാടകക്കരാറുകൾ, വാടക ലഭിച്ചതിന്റെ തെളിവുകൾ, ഫിക്സഡ് ഡിപ്പോസിറ്റ്-എഫ്സിഎൻആർ നിക്ഷേപങ്ങളുടെ പലിശ വിവരങ്ങൾ, വസ്തു ഉടമസ്ഥാവകാശ-വിൽപന രേഖകൾ, ഓഹരി-മ്യൂച്വൽ ഫണ്ട്-പ്രോപ്പർട്ടി ക്യാപിറ്റൽ ഗെയിൻസ് റിപ്പോർട്ടുകൾ എന്നിവയും സൂക്ഷിക്കണം. ഭവന വായ്പ പലിശ സർട്ടിഫിക്കറ്റുകൾ, സെക്ഷൻ 80C, 80D, എൻപിഎസ് എന്നിവയുമായി ബന്ധപ്പെട്ട നിക്ഷേപ രേഖകൾ, പാസ്‌പോർട്ട്, വിസ, എമിറേറ്റ്‌സ് ഐഡി, പാൻ കാർഡ് തുടങ്ങിയ ഔദ്യോഗിക തിരിച്ചറിയൽ രേഖകളുടെ പകർപ്പുകൾ എന്നിവയും ആവശ്യമായി വരും. കൂടാതെ കഴിഞ്ഞ അഞ്ച് സാമ്പത്തിക വർഷങ്ങളിലായി ഇന്ത്യയിൽ എത്ര ദിവസം ചെലവഴിച്ചു എന്നതിന്റെ കൃത്യമായ വിവരവും നിർണായകമാണ്.

ഇന്ത്യയിൽ നേരിട്ട് നികുതി അടയ്ക്കേണ്ട സാഹചര്യമില്ലാത്ത പ്രവാസികൾക്കും ഐടിആർ ഫയൽ ചെയ്യുന്നത് ഭാവിയിൽ ഗുണകരമാകുമെന്ന് നികുതി ഉപദേഷ്ടാക്കൾ പറയുന്നു. റീഫണ്ട് ലഭിക്കൽ, മുൻവർഷങ്ങളിലെ സാമ്പത്തിക നഷ്ടങ്ങൾ മുന്നോട്ട് കൊണ്ടുപോകൽ തുടങ്ങിയ കാര്യങ്ങളിൽ സമയബന്ധിത റിട്ടേൺ ഫയലിംഗ് സഹായകരമാകും. പ്രവാസികളുടെ നികുതി ബാധ്യത നിർണയിക്കുന്നതിൽ ഇന്ത്യയിൽ ചെലവഴിച്ച ദിവസങ്ങളുടെ എണ്ണം പ്രധാന ഘടകമായതിനാൽ, യുഎഇ പ്രവാസികൾ തങ്ങളുടെ ‘റെസിഡൻസി സ്റ്റാറ്റസ്’ കൃത്യമായി കണക്കാക്കണമെന്നും വിദഗ്ധർ മുന്നറിയിപ്പ് നൽകി..യുഎഇയിലെ വാർത്തകളും തൊഴിൽ അവസരങ്ങളും അതിവേഗം അറിയാൻ വാട്സ്ആപ്പ് ഗ്രൂപ്പിൽ അംഗമാവുക https://chat.whatsapp.com/Dbf59JLetgBECJpr5UZOuZ?mode=gi_t

‘സ്ഫോടന ശബ്ദ’മുണ്ടാക്കുന്ന വാഹനങ്ങൾക്കെതിരെ യുഎഇയിൽ കർശന നടപടി; പിഴയും 12 ബ്ലാക്ക് പോയിന്റും

ജനവാസ മേഖലകളിൽ അർദ്ധരാത്രിയിൽ സ്ഫോടനത്തിന് സമാനമായ ശബ്ദമുണ്ടാക്കി ജനങ്ങളിൽ പരിഭ്രാന്തി സൃഷ്ടിക്കുന്ന വിധത്തിൽ നിയമവിരുദ്ധമായി രൂപമാറ്റം വരുത്തിയ കാറുകളുടെയും മോട്ടോർ സൈക്കിളുകളുടെയും യുഎഇ പോലീസ് കർശന നടപടികൾ ആരംഭിച്ചു. മേഖലയിലെ സംഘർഷാവസ്ഥ വാർത്തകളിൽ നിറഞ്ഞുനിൽക്കുന്ന സാഹചര്യത്തിൽ ഇത്തരം വാഹനങ്ങളിൽ നിന്നുണ്ടാകുന്ന ‘ബാക്ക് ഫയർ’ ശബ്ദങ്ങൾ പലരും മിസൈൽ ആക്രമണമോ സ്ഫോടനമോ ആണെന്ന് തെറ്റിദ്ധരിച്ച് ഭീതിയിലായിരുന്നുവെന്ന് അധികൃതർ വ്യക്തമാക്കി. എഞ്ചിനുകളിൽ മാറ്റം വരുത്തി ഉദ്ദേശപൂർവ്വം ശക്തമായ ശബ്ദമുണ്ടാക്കുന്നത് പ്രധാനമായും കൗമാരക്കാരും യുവാക്കളുമാണെന്ന് അന്വേഷണത്തിൽ കണ്ടെത്തിയതായി പോലീസ് അറിയിച്ചു. റിപ്പോർട്ട് ചെയ്യപ്പെട്ട ശബ്ദങ്ങൾ വാഹനങ്ങളിൽ നിന്നുള്ളതാണെന്നും രാജ്യത്തിന്റെ സുരക്ഷയെ ബാധിക്കുന്ന യാതൊരു ഭീഷണിയും നിലവിലില്ലെന്നും അധികൃതർ ജനങ്ങളെ ആശ്വസിപ്പിച്ചു. യുഎഇ പൂർണ്ണമായും സുരക്ഷിതമാണെന്നും പോലീസ് വ്യക്തമാക്കി.

ദുബായ്, ഷാർജ തുടങ്ങിയ എമിറേറ്റുകളിലെ ജനവാസ പ്രദേശങ്ങളിൽ രാത്രികാല പോലീസ് പട്രോളിംഗ് ശക്തമാക്കിയിട്ടുണ്ട്. യുഎഇ ട്രാഫിക് നിയമപ്രകാരം അമിത ശബ്ദമുണ്ടാക്കുന്ന വാഹനങ്ങൾ ഓടിക്കുന്നവർക്ക് 2000 ദിർഹം പിഴയും 12 ബ്ലാക്ക് പോയിന്റുകളും ലഭിക്കും. കൂടാതെ വാഹനം പോലീസ് പിടിച്ചെടുക്കുകയും ചെയ്യും. അനധികൃതമായി രൂപമാറ്റം വരുത്തിയ വാഹനങ്ങൾ തിരികെ ലഭിക്കാൻ 10,000 ദിർഹം വരെ ഫീസ് നൽകേണ്ടിവരുമെന്നും അധികൃതർ അറിയിച്ചു. ഈ നടപടി കർശനമായി നടപ്പാക്കുന്നതിന് ദുബായ് പോലീസ് ഓപ്പറേഷൻസ് അസിസ്റ്റന്റ് കമാൻഡർ-ഇൻ-ചീഫ് മേജർ ജനറൽ സെയ്ഫ് മുഹൈർ അൽ മസ്‌റൂയിയും ഷാർജ പോലീസ് സെൻട്രൽ റീജിയൻ ഡയറക്ടർ ബ്രിഗേഡിയർ ഖലീഫ അൽ ഖസൂനിയും നേതൃത്വമൊരുക്കുന്നുണ്ട്. കുട്ടികൾ വാഹനങ്ങളിൽ അനധികൃത മാറ്റങ്ങൾ വരുത്തുന്നില്ലെന്ന് മാതാപിതാക്കൾ ശ്രദ്ധിക്കണമെന്നും അധികൃതർ അഭ്യർത്ഥിച്ചു. ഇത്തരം ശബ്ദശല്യം ഉണ്ടാക്കുന്ന വാഹനങ്ങളെക്കുറിച്ച് ഔദ്യോഗിക ചാനലുകൾ വഴി പോലീസിനെ അറിയിക്കണമെന്നും പൊതുജനങ്ങളോട് നിർദേശിച്ചിട്ടുണ്ട്. മേഖലയിലെ നിലവിലെ സാഹചര്യം പരിഗണിച്ച് ജനങ്ങളുടെ സമാധാനവും സുരക്ഷയും ഉറപ്പാക്കുക എന്ന ലക്ഷ്യത്തോടെയാണ് ഈ നടപടികൾ ശക്തമാക്കിയതെന്നും പോലീസ് അറിയിച്ചു. പോലീസിന്റെ ഈ ഇടപെടലിനെ പ്രവാസികളും സ്വദേശികളും സ്വാഗതം ചെയ്തിട്ടുണ്ട്.യുഎഇയിലെ വാർത്തകളും തൊഴിൽ അവസരങ്ങളും അതിവേഗം അറിയാൻ വാട്സ്ആപ്പ് ഗ്രൂപ്പിൽ അംഗമാവുhttps://chat.whatsapp.com/Dbf59JLetgBECJpr5UZOuZ?mode=gi_t