അബുദാബി: വേനൽക്കാലത്തെ യാത്രാത്തിരക്ക് ഒഴിവാക്കാനും മുൻകൂട്ടി യാത്രയ്ക്ക് തയ്യാറെടുക്കുന്നവരെ പ്രോത്സാഹിപ്പിക്കാനുമായി പുതിയ ഓഫറുകളുമായി എത്തിഹാദ് എയർവേയ്‌സ്. വിമാനത്താവളത്തിലെ തിരക്കുകളിൽ പെടാതെ മുൻകൂട്ടി ‘സിറ്റി ചെക്ക്-ഇൻ’ (City Check-In) സൗകര്യം ഉപയോഗപ്പെടുത്തുന്ന യാത്രക്കാർക്കാണ് എത്തിഹാദ് ആകർഷകമായ ആനുകൂല്യങ്ങൾ പ്രഖ്യാപിച്ചിരിക്കുന്നത്.

ഈ ആനുകൂല്യം വഴി സിറ്റി ചെക്ക്-ഇൻ നടത്തുന്ന യാത്രക്കാർക്ക് 3 കിലോഗ്രാം അധിക ലഗേജ് സൗജന്യമായി കൊണ്ടുപോകാം. കൂടാതെ, എത്തിഹാദ് ഗെസ്റ്റ് (Etihad Guest) ലോയൽറ്റി അംഗങ്ങളായ യാത്രക്കാർക്ക് 1,000 ബോണസ് മൈലുകളും സമ്മാനമായി ലഭിക്കും. 2026 ഓഗസ്റ്റ് 16 വരെയുള്ള യാത്രകൾക്കാണ് ഈ പ്രത്യേക ഓഫർ ലഭ്യമാകുക.

യാത്രക്കാരുടെ സൗകര്യം കണക്കിലെടുത്ത്, ഫ്ലൈറ്റ് പുറപ്പെടുന്നതിന് 24 മണിക്കൂർ മുതൽ 4 മണിക്കൂർ മുൻപ് വരെ ലഗേജുകൾ കൈമാറാനും ബോർഡിംഗ് പാസ് സ്വന്തമാക്കാനും സിറ്റി ചെക്ക്-ഇൻ വഴി സാധിക്കും. ഇതിലൂടെ വേനൽക്കാല അവധിക്ക് നാട്ടിലേക്ക് പോകുന്നവർക്ക് സായിദ് ഇന്റർനാഷണൽ എയർപോർട്ടിലെ വലിയ ക്യൂ ഒഴിവാക്കി നേരിട്ട് സെക്യൂരിറ്റി പരിശോധനയിലേക്ക് കടക്കാം.

വളരെ കുറഞ്ഞ നിരക്കിലാണ് ഈ പ്രീമിയം സേവനം എത്തിഹാദ് ഒരുക്കിയിരിക്കുന്നത്. മുതിർന്നവർക്ക് 35 ദിർഹവും, കുട്ടികൾക്ക് 25 ദിർഹവും, രണ്ട് വയസ്സിൽ താഴെയുള്ള കുട്ടികൾക്ക് 15 ദിർഹവുമാണ് ചാർജ്. വിമാനത്താവളത്തിലെ സമ്മർദ്ദമില്ലാതെ സമാധാനപരമായി യാത്ര ആരംഭിക്കാൻ ഈ സംവിധാനം പ്രവാസികൾക്ക് ഏറെ സഹായകരമാകും.യുഎഇയിലെ വാർത്തകളും തൊഴിൽ അവസരങ്ങളും അതിവേഗം അറിയാൻ വാട്സ്ആപ്പ് ഗ്രൂപ്പിൽ അംഗമാവുക https://chat.whatsapp.com/Dbf59JLetgBECJpr5UZOuZ?mode=gi_t

‘സ്ഫോടന ശബ്ദ’മുണ്ടാക്കുന്ന വാഹനങ്ങൾക്കെതിരെ യുഎഇയിൽ കർശന നടപടി; പിഴയും 12 ബ്ലാക്ക് പോയിന്റും

ജനവാസ മേഖലകളിൽ അർദ്ധരാത്രിയിൽ സ്ഫോടനത്തിന് സമാനമായ ശബ്ദമുണ്ടാക്കി ജനങ്ങളിൽ പരിഭ്രാന്തി സൃഷ്ടിക്കുന്ന വിധത്തിൽ നിയമവിരുദ്ധമായി രൂപമാറ്റം വരുത്തിയ കാറുകളുടെയും മോട്ടോർ സൈക്കിളുകളുടെയും യുഎഇ പോലീസ് കർശന നടപടികൾ ആരംഭിച്ചു. മേഖലയിലെ സംഘർഷാവസ്ഥ വാർത്തകളിൽ നിറഞ്ഞുനിൽക്കുന്ന സാഹചര്യത്തിൽ ഇത്തരം വാഹനങ്ങളിൽ നിന്നുണ്ടാകുന്ന ‘ബാക്ക് ഫയർ’ ശബ്ദങ്ങൾ പലരും മിസൈൽ ആക്രമണമോ സ്ഫോടനമോ ആണെന്ന് തെറ്റിദ്ധരിച്ച് ഭീതിയിലായിരുന്നുവെന്ന് അധികൃതർ വ്യക്തമാക്കി. എഞ്ചിനുകളിൽ മാറ്റം വരുത്തി ഉദ്ദേശപൂർവ്വം ശക്തമായ ശബ്ദമുണ്ടാക്കുന്നത് പ്രധാനമായും കൗമാരക്കാരും യുവാക്കളുമാണെന്ന് അന്വേഷണത്തിൽ കണ്ടെത്തിയതായി പോലീസ് അറിയിച്ചു. റിപ്പോർട്ട് ചെയ്യപ്പെട്ട ശബ്ദങ്ങൾ വാഹനങ്ങളിൽ നിന്നുള്ളതാണെന്നും രാജ്യത്തിന്റെ സുരക്ഷയെ ബാധിക്കുന്ന യാതൊരു ഭീഷണിയും നിലവിലില്ലെന്നും അധികൃതർ ജനങ്ങളെ ആശ്വസിപ്പിച്ചു. യുഎഇ പൂർണ്ണമായും സുരക്ഷിതമാണെന്നും പോലീസ് വ്യക്തമാക്കി.

ദുബായ്, ഷാർജ തുടങ്ങിയ എമിറേറ്റുകളിലെ ജനവാസ പ്രദേശങ്ങളിൽ രാത്രികാല പോലീസ് പട്രോളിംഗ് ശക്തമാക്കിയിട്ടുണ്ട്. യുഎഇ ട്രാഫിക് നിയമപ്രകാരം അമിത ശബ്ദമുണ്ടാക്കുന്ന വാഹനങ്ങൾ ഓടിക്കുന്നവർക്ക് 2000 ദിർഹം പിഴയും 12 ബ്ലാക്ക് പോയിന്റുകളും ലഭിക്കും. കൂടാതെ വാഹനം പോലീസ് പിടിച്ചെടുക്കുകയും ചെയ്യും. അനധികൃതമായി രൂപമാറ്റം വരുത്തിയ വാഹനങ്ങൾ തിരികെ ലഭിക്കാൻ 10,000 ദിർഹം വരെ ഫീസ് നൽകേണ്ടിവരുമെന്നും അധികൃതർ അറിയിച്ചു. ഈ നടപടി കർശനമായി നടപ്പാക്കുന്നതിന് ദുബായ് പോലീസ് ഓപ്പറേഷൻസ് അസിസ്റ്റന്റ് കമാൻഡർ-ഇൻ-ചീഫ് മേജർ ജനറൽ സെയ്ഫ് മുഹൈർ അൽ മസ്‌റൂയിയും ഷാർജ പോലീസ് സെൻട്രൽ റീജിയൻ ഡയറക്ടർ ബ്രിഗേഡിയർ ഖലീഫ അൽ ഖസൂനിയും നേതൃത്വമൊരുക്കുന്നുണ്ട്. കുട്ടികൾ വാഹനങ്ങളിൽ അനധികൃത മാറ്റങ്ങൾ വരുത്തുന്നില്ലെന്ന് മാതാപിതാക്കൾ ശ്രദ്ധിക്കണമെന്നും അധികൃതർ അഭ്യർത്ഥിച്ചു. ഇത്തരം ശബ്ദശല്യം ഉണ്ടാക്കുന്ന വാഹനങ്ങളെക്കുറിച്ച് ഔദ്യോഗിക ചാനലുകൾ വഴി പോലീസിനെ അറിയിക്കണമെന്നും പൊതുജനങ്ങളോട് നിർദേശിച്ചിട്ടുണ്ട്. മേഖലയിലെ നിലവിലെ സാഹചര്യം പരിഗണിച്ച് ജനങ്ങളുടെ സമാധാനവും സുരക്ഷയും ഉറപ്പാക്കുക എന്ന ലക്ഷ്യത്തോടെയാണ് ഈ നടപടികൾ ശക്തമാക്കിയതെന്നും പോലീസ് അറിയിച്ചു. പോലീസിന്റെ ഈ ഇടപെടലിനെ പ്രവാസികളും സ്വദേശികളും സ്വാഗതം ചെയ്തിട്ടുണ്ട്.യുഎഇയിലെ വാർത്തകളും തൊഴിൽ അവസരങ്ങളും അതിവേഗം അറിയാൻ വാട്സ്ആപ്പ് ഗ്രൂപ്പിൽ അംഗമാവുhttps://chat.whatsapp.com/Dbf59JLetgBECJpr5UZOuZ?mode=gi_t