ടെഹ്റാൻ: നയതന്ത്ര ചർച്ചകൾക്കപ്പുറം ഇറാനെതിരെ അമേരിക്ക രഹസ്യമായ സൈനിക നീക്കത്തിന് പദ്ധതിയിടുകയാണെന്ന് ഇറാൻ പാർലമെന്റ് സ്പീക്കർ മുഹമ്മദ് ബാഘർ ഖലിബാഫ്. മധ്യപൂർവദേശത്തേക്ക് 3500 സൈനികരുമായി യുഎസ് പടക്കപ്പൽ ‘യുഎസ്എസ് ട്രിപ്പോളി’ എത്തിയെന്ന വാർത്തകൾക്ക് പിന്നാലെയാണ് ഖലിബാഫിന്റെ രൂക്ഷ പ്രതികരണം. സമാധാന ചർച്ചകളുടെ സന്ദേശങ്ങൾ അയക്കുമ്പോഴും അമേരിക്ക ആക്രമണത്തിന് കോപ്പുകൂട്ടുകയാണെന്നും, തങ്ങളുടെ സൈന്യം ശത്രുവിനെ നേരിടാൻ സജ്ജമായി കാത്തിരിക്കുകയാണെന്നും അദ്ദേഹം ഔദ്യോഗിക വാർത്താ ഏജൻസിയായ ഐആർഎൻഎയോട് പറഞ്ഞു.

കുഞ്ഞുങ്ങളെ കൊന്നവർ ഇവരാണ്: സൈനികരുടെ ചിത്രം പുറത്തുവിട്ട് ഇറാൻ
മിനാബിലെ സ്കൂളിലേക്ക് മിസൈൽ വർഷിച്ച് 168 കുട്ടികളുടെ മരണത്തിന് കാരണക്കാരായ രണ്ട് അമേരിക്കൻ നാവികസേനാ ഉദ്യോഗസ്ഥരുടെ ചിത്രങ്ങൾ ഇറാൻ പുറത്തുവിട്ടു. യുഎസ്എസ് സ്പ്രുവാൻസിലെ കമാൻഡിങ് ഓഫിസർ എൽ.ആർ. ടേറ്റ്, എക്സിക്യൂട്ടീവ് ഓഫിസർ ജെഫ്രി ഇ. യോർക്ക് എന്നിവരുടെ ചിത്രങ്ങളാണ് വിവിധ രാജ്യങ്ങളിലെ ഇറാൻ എംബസികൾ വഴി പ്രചരിപ്പിച്ചത്. സ്കൂളിന് നേരെ മൂന്ന് തവണ ടോംഹോക്ക് മിസൈലുകൾ തൊടുക്കാൻ ഉത്തരവിട്ടത് ഇവരാണെന്ന് ഇറാൻ ആരോപിക്കുന്നു. ആക്രമണം മനഃപൂർവമാണെന്ന് ഇറാൻ ഉറപ്പിച്ചു പറയുമ്പോഴും, ലക്ഷ്യനിർണ്ണയത്തിലെ പിഴവാണെന്നാണ് അമേരിക്കയുടെ വാദം.

പശ്ചിമേഷ്യയിലെ അമേരിക്കൻ സൈനിക കേന്ദ്രങ്ങളുടെ രഹസ്യ വിവരങ്ങൾ റഷ്യ ഇറാന് കൈമാറുന്നതായി യുക്രെയ്ൻ പ്രസിഡന്റ് വൊളോഡിമർ സെലൻസ്കി ആരോപിച്ചു. ഇന്ത്യൻ മഹാസമുദ്രത്തിലെ യുഎസ്-യുകെ സംയുക്ത കേന്ദ്രമായ ഡീഗോ ഗാർസ്യ, കുവൈത്ത് വിമാനത്താവളം, വിവിധ രാജ്യങ്ങളിലെ എണ്ണപ്പാടങ്ങൾ എന്നിവയുടെ ഉപഗ്രഹ ചിത്രങ്ങൾ റഷ്യ ഇറാന് നൽകിയെന്നാണ് സെലൻസ്കിയുടെ വെളിപ്പെടുത്തൽ. മാർച്ച് 24-നാണ് ഈ കൈമാറ്റം നടന്നതെന്നും അദ്ദേഹം അവകാശപ്പെട്ടു.

അതിനിടെ, മേഖലയിൽ സമാധാനം പുനഃസ്ഥാപിക്കാൻ തുർക്കി, സൗദി അറേബ്യ, ഈജിപ്ത് വിദേശകാര്യമന്ത്രിമാർ നടത്തുന്ന ചർച്ചകൾ നിർണ്ണായകമാവുകയാണ്. എങ്കിലും, ടെഹ്റാനിൽ അമേരിക്കൻ-ഇസ്രയേൽ ആക്രമണത്തിൽ തകർന്ന കെട്ടിടങ്ങളിൽ ഇപ്പോഴും രക്ഷാപ്രവർത്തനം തുടരുന്നത് സംഘർഷാവസ്ഥയുടെ ആഴം വ്യക്തമാക്കുന്നു.യുഎഇയിലെ വാർത്തകളും തൊഴിൽ അവസരങ്ങളും അതിവേഗം അറിയാൻ വാട്സ്ആപ്പ് ഗ്രൂപ്പിൽ അംഗമാവുക https://chat.whatsapp.com/DfsJVtpVohVHb4aFdLbW46?mode=wwt

ശ്രദ്ധിക്കുക; യുഎഇയിൽ ജിപിഎസ് തകരാറുകൾ? നിങ്ങളുടെ ഗൂഗിൾ മാപ്സും വെയ്സും തെറ്റായ ലൊക്കേഷനുകൾ കാണിച്ചേക്കാം

യുഎഇയിലുടനീളമുള്ള നിരവധി ഡ്രൈവർമാരും താമസക്കാരും ഗൂഗിൾ മാപ്സ്, വേസ് തുടങ്ങിയ നാവിഗേഷൻ ആപ്പുകളിൽ സമീപകാലത്ത് കൃത്യതക്കുറവ് അനുഭവപ്പെടുന്നതായി റിപ്പോർട്ട് ചെയ്യുന്നു. ചില ഉപയോക്താക്കൾ അവരുടെ മൊബൈൽ ഫോണുകളിൽ കാണുന്ന ലൊക്കേഷൻ യഥാർത്ഥ സ്ഥാനത്തുനിന്ന് ഏറെ അകലെയാണെന്ന് ശ്രദ്ധയിൽപ്പെടുത്തിയിട്ടുണ്ട്. ഈ പ്രശ്‌നം സംബന്ധിച്ച് നിരവധി പേർ സോഷ്യൽ മീഡിയയിലും ഓൺലൈൻ ഫോറങ്ങളിലുമായി ചർച്ച ചെയ്യുകയും ചെയ്തു. വിദഗ്ധർ പറയുന്നത്, ഉപഗ്രഹ സിഗ്നലുകളെ ബാധിക്കുന്ന ചില സാങ്കേതിക കാരണങ്ങളാൽ ഇത്തരം തടസ്സങ്ങൾ ഇടയ്ക്കിടെ ഉണ്ടാകാമെന്നാണ്. പ്രത്യേകിച്ച് സംഘർഷാവസ്ഥകളിൽ സുരക്ഷാ മുൻകരുതലുകളുടെ ഭാഗമായി ജിപിഎസ് സിഗ്നലുകളിൽ താൽക്കാലിക ഇടപെടലുകൾ സംഭവിക്കാൻ സാധ്യതയുണ്ടെന്ന് മുഹമ്മദ് ബിൻ റാഷിദ് സ്പേസ് സെന്റർ ലാബിലെ ഡിജിറ്റൽ ട്രാൻസ്ഫോർമേഷൻ മേധാവി മുഹമ്മദ് ഹനീഫ് വിശദീകരിച്ചു. സെൻസിറ്റീവ് സ്ഥലങ്ങളുടെ സുരക്ഷ ഉറപ്പാക്കുന്നതിനായി അധികാരികൾ ചിലപ്പോൾ പ്രത്യേക സാങ്കേതിക നടപടികൾ സ്വീകരിക്കാറുണ്ടെന്നും ഇതിന്റെ ഭാഗമായി ജിപിഎസ് സിഗ്നലുകൾക്ക് താൽക്കാലിക തടസ്സങ്ങൾ ഉണ്ടാകാമെന്നും അദ്ദേഹം പറഞ്ഞു. ഇതിന്റെ ഫലമായി ഗൂഗിൾ മാപ്സ് പോലുള്ള നാവിഗേഷൻ ആപ്പുകളിൽ തെറ്റായ ലൊക്കേഷനുകളോ അസാധാരണമായ റൂട്ടുകളോ കാണാൻ സാധ്യതയുണ്ട്.

സുരക്ഷാ ഏജൻസികൾ ഉപയോഗിക്കുന്ന ജിപിഎസ് ജാമിംഗ്, ജിപിഎസ് സ്പൂഫിംഗ് പോലുള്ള സാങ്കേതിക വിദ്യകളും ഇതിന് കാരണമാകാം. ജിപിഎസ് ജാമിംഗ് സിഗ്നലുകൾ തടയുന്നതും, ജിപിഎസ് സ്പൂഫിംഗ് ഉപകരണങ്ങളിലേക്ക് തെറ്റായ സിഗ്നലുകൾ അയയ്ക്കുന്നതുമാണ്. സിവിലിയൻ നാവിഗേഷൻ ആപ്പുകൾ ഒരേ ഉപഗ്രഹ സിഗ്നലുകളെ ആശ്രയിക്കുന്നതിനാൽ ഇത്തരം നടപടികൾ അവയുടെ കൃത്യതയെ ബാധിച്ചേക്കാമെന്ന് വിദഗ്ധർ പറയുന്നു. എങ്കിലും മിക്ക സാഹചര്യങ്ങളിലും ഉപഗ്രഹ സിഗ്നലുകൾ വീണ്ടും സ്ഥിരത കൈവരിക്കുന്നതോടെ നാവിഗേഷൻ സംവിധാനങ്ങൾ സ്വാഭാവികമായി ശരിയായ നിലയിലേക്ക് മടങ്ങുമെന്നും വിദഗ്ധർ വ്യക്തമാക്കി.യുഎഇയിലെ വാർത്തകളും തൊഴിൽ അവസരങ്ങളും അതിവേഗം അറിയാൻ വാട്സ്ആപ്പ് ഗ്രൂപ്പിൽ അംഗമാവുക https://chat.whatsapp.com/DfsJVtpVohVHb4aFdLbW46?mode=wwt