ദുബായ്: 2025-ൽ ദുബായിലെ വാടക മേഖലയിൽ അമ്പരപ്പിക്കുന്ന വളർച്ച രേഖപ്പെടുത്തി. ജനസംഖ്യാ വർധനവും വിദേശ നിക്ഷേപകരുടെ വർധിച്ച താൽപ്പര്യവുമാണ് വാടക വിപണിയെ പുതിയ ഉയരങ്ങളിലെത്തിച്ചത്. ദുബായ് ലാൻഡ് ഡിപ്പാർട്ട്‌മെന്റ് പുറത്തുവിട്ട ഏറ്റവും പുതിയ കണക്കുകൾ പ്രകാരം, വാടക കരാറുകളുടെ മൂല്യത്തിൽ മുൻവർഷത്തെ അപേക്ഷിച്ച് 17 ശതമാനത്തോളം വളർച്ചയാണ് ഉണ്ടായത്.

കരാറുകളുടെ എണ്ണത്തിൽ വൻ കുതിപ്പ്

കഴിഞ്ഞ വർഷം മാത്രം 13.8 ലക്ഷം വാടക കരാറുകളാണ് ദുബായിൽ രജിസ്റ്റർ ചെയ്തത്. ഏകദേശം 126.4 ബില്യൺ ദിർഹത്തിന്റെ മൂല്യം ഈ കരാറുകൾക്കുണ്ട്. അഞ്ച് ലക്ഷത്തിലധികം പുതിയ കരാറുകൾ ഒപ്പുവെച്ചപ്പോൾ, നിലവിലുള്ള കരാറുകൾ പുതുക്കുന്നവരുടെ എണ്ണത്തിലും വർധനവുണ്ടായി. ഇത് പ്രവാസികൾക്കിടയിൽ ദുബായ് വിപണിയോടുള്ള വിശ്വാസവും വിപണിയിലെ സ്ഥിരതയുമാണ് കാണിക്കുന്നത്.

ഡിമാൻഡ് ഏറുന്നത് എവിടെ?

അപ്പാർട്മെന്റുകളുടെ വാടകയിൽ 21.7 ശതമാനവും വില്ലകളുടെ വാടകയിൽ 19.6 ശതമാനവുമാണ് വാർഷിക വർധനവ് രേഖപ്പെടുത്തിയത്. ജുമൈറ വില്ലേജ് സർക്കിൾ (JVC), ദുബായ് മറീന, ബിസിനസ് ബേ, ഡൗൺടൗൺ ദുബായ് എന്നിവിടങ്ങളിലാണ് വാടക നിരക്ക് കുതിച്ചുയർന്നത്. കുടുംബങ്ങൾക്കിടയിൽ വില്ലകൾക്കും ടൗൺഹൗസുകൾക്കുമാണ് പ്രിയം കൂടുന്നത്.

വളർച്ചയ്ക്ക് പിന്നിലെ കാരണങ്ങൾ

ദുബായിലെ സാമ്പത്തിക അജണ്ടയായ ‘ഡി33’, ആകർഷകമായ ഗോൾഡൻ വിസ പരിഷ്കാരങ്ങൾ എന്നിവ കൂടുതൽ ആളുകളെ ദുബായിലേക്ക് എത്തിക്കുന്നു. ടൂറിസം രംഗത്തെ വളർച്ച ഷോർട്ട് ടേം വാടക വിപണിക്കും ഉണർവേകി. കൂടാതെ സ്മാർട്ട് റെന്റൽ ഇൻഡക്സ് പോലുള്ള സംവിധാനങ്ങൾ വിപണിയിലെ സുതാര്യത ഉറപ്പാക്കിയതും ഈ മുന്നേറ്റത്തിന് കാരണമായി.യുഎഇയിലെ വാർത്തകളും തൊഴിൽ അവസരങ്ങളും അതിവേഗം അറിയാൻ വാട്സ്ആപ്പ് ഗ്രൂപ്പിൽ അംഗമാവുക https://chat.whatsapp.com/DfsJVtpVohVHb4aFdLbW46?mode=wwt

റമസാനിൽ വിലക്കയറ്റത്തിന് ‘ബ്രേക്ക്’! വിപണിയിൽ പിടിമുറുക്കി യുഎഇ; ഓരോ സാധനത്തിനും വിലവിവരപ്പട്ടിക നിർബന്ധം

റമസാൻ മാസത്തെ മുന്നോടിയായി വിപണിയിലെ വിലക്കയറ്റം തടയാൻ ശക്തമായ ഇടപെടലുമായി യുഎഇ സാമ്പത്തിക മന്ത്രാലയം രംഗത്ത്. കൃത്രിമ ക്ഷാമം സൃഷ്ടിക്കുന്ന പ്രവണതകൾക്കും അനാവശ്യമായ വില വർധനയ്ക്കും കർശന നിയന്ത്രണങ്ങളാണ് പ്രഖ്യാപിച്ചത്. 1,000 ചതുരശ്ര മീറ്ററിലധികം വിസ്തീർണമുള്ള എല്ലാ റീട്ടെയിൽ കടകളിലും ഓരോ ഉൽപ്പന്നത്തിന്റെയും ആകെ വിലയ്ക്കൊപ്പം യൂണിറ്റ് വില (ഉദാഹരണത്തിന് കിലോയ്ക്ക് എത്ര) വ്യക്തമായി പ്രദർശിപ്പിക്കണമെന്ന് മന്ത്രാലയം നിർദേശിച്ചു. ഉപഭോക്താക്കൾക്ക് വ്യക്തമായ വില താരതമ്യം സാധ്യമാക്കുക എന്നതാണ് ലക്ഷ്യം. ഓൺലൈൻ വ്യാപാര സ്ഥാപനങ്ങൾക്കും ഈ നിർദേശം ബാധകമാണ്. അബ്ദുല്ല ബിൻ തൗഖ് അൽ മർറി യുഎഇ സാമ്പത്തിക-വിനോദസഞ്ചാര മന്ത്രിയും ഉപഭോക്തൃ സംരക്ഷണ സമിതി അധ്യക്ഷനും, രാജ്യത്തെ ഭക്ഷ്യശേഖരം സുരക്ഷിതമാണെന്നും ദീർഘകാല വിതരണത്തിൽ തടസ്സമുണ്ടാകില്ലെന്നും വ്യക്തമാക്കി. വിപണിയിലെ അവശ്യവസ്തുക്കളുടെ ലഭ്യതയും വിലസ്ഥിരതയും വിലയിരുത്താൻ അദ്ദേഹം എമിറേറ്റ്‌സ് കോ-ഓപറേറ്റീവ് സൊസൈറ്റി, സ്പിന്നീസ് തുടങ്ങിയ പ്രധാന ഔട്ട്‌ലെറ്റുകൾ സന്ദർശിച്ചു. 2022 ലെ കാബിനറ്റ് പ്രമേയം (നമ്പർ 120) പ്രകാരം, ഉൽപ്പന്നങ്ങളുടെ ആകെ വിലയ്ക്കൊപ്പം യൂണിറ്റ് വിലയും നിർബന്ധമായും പ്രദർശിപ്പിക്കണം. നിയമലംഘനം കണ്ടെത്തിയാൽ പൊതുജനങ്ങൾക്ക് പരാതി നൽകാം.

ഇതിനോടകം തന്നെ പാചകഎണ്ണ, മുട്ട, പാൽ ഉൽപ്പന്നങ്ങൾ, അരി, പഞ്ചസാര, ചിക്കൻ, ഗോതമ്പ് തുടങ്ങിയ അടിസ്ഥാന സാധനങ്ങൾക്ക് മുൻകൂർ അനുമതിയില്ലാതെ വില വർധിപ്പിക്കുന്നത് മന്ത്രാലയം നിരോധിച്ചിട്ടുണ്ട്. റമസാൻ പ്രത്യേക ഓഫറുകളും ഡിസ്കൗണ്ടുകളും യാഥാർഥ്യമാണോയെന്ന് ഉറപ്പാക്കാൻ വിപണിയിൽ നേരിട്ടുള്ള നിരീക്ഷണവും തുടരും. വിപണിയിൽ ന്യായമായ മത്സരം ഉറപ്പാക്കുകയും അനാവശ്യ വിലക്കയറ്റം തടയുകയും ചെയ്യുക എന്നതാണ് ഈ നടപടികളുടെ പ്രധാന ലക്ഷ്യമെന്ന് മന്ത്രി വ്യക്തമാക്കി. റമസാൻ മാസപ്പിറവി നിരീക്ഷണത്തിനായി ചൊവ്വാഴ്ച കമ്മിറ്റി യോഗം ചേരാനിരിക്കെയാണ് മന്ത്രാലയത്തിന്റെ ഈ അടിയന്തര ഇടപെടൽ.യുഎഇയിലെ വാർത്തകളും തൊഴിൽ അവസരങ്ങളും അതിവേഗം അറിയാൻ വാട്സ്ആപ്പ് ഗ്രൂപ്പിൽ അംഗമാവുക https://chat.whatsapp.com/DfsJVtpVohVHb4aFdLbW46?mode=wwt