അന്താരാഷ്ട്ര യാത്രാസ്വാതന്ത്ര്യം ഇന്നും ആഗോള അസമത്വത്തിന്റെ വ്യക്തമായ സൂചകമായി തുടരുന്നതായി പുതിയ പഠനം വ്യക്തമാക്കുന്നു. മുൻകൂട്ടി വിസയില്ലാതെ എത്ര രാജ്യങ്ങളിലേക്ക് പ്രവേശിക്കാമെന്ന മാനദണ്ഡത്തെ അടിസ്ഥാനമാക്കിയാണ് ഒരു രാജ്യത്തിന്റെ പാസ്‌പോർട്ട് കരുത്ത് നിശ്ചയിക്കുന്നത്. 2026ലെ കണക്കുകൾ പ്രകാരം ചില രാജ്യങ്ങളിലെ പൗരന്മാർക്ക് 180-ലധികം രാജ്യങ്ങളിലേക്ക് വിസയില്ലാതെ യാത്ര ചെയ്യാൻ സാധിക്കുമ്പോൾ, പട്ടികയിൽ പിന്നിലുള്ള രാജ്യങ്ങൾക്ക് 40ൽ താഴെ രാജ്യങ്ങളിലേക്ക് മാത്രമാണ് പ്രവേശനാനുമതി.

ഹെൻലി പാസ്‌പോർട്ട് പുറത്തിറക്കിയ 2026ലെ ഇൻഡക്സ് പ്രകാരം ലോകത്തിലെ ഏറ്റവും കുറഞ്ഞ യാത്രാസ്വാതന്ത്ര്യമുള്ള രാജ്യങ്ങൾ താഴെപ്പറയുന്നവയാണ്:

റാങ്ക് 94: എറിത്രിയ, ഉത്തര കൊറിയ, പലസ്തീൻ – 38 രാജ്യങ്ങൾ
അന്താരാഷ്ട്ര ഉപരോധങ്ങൾ, രാഷ്ട്രീയ സാഹചര്യങ്ങൾ, അതിർത്തി നിയന്ത്രണങ്ങൾ എന്നിവയാണ് പ്രധാന തടസ്സങ്ങൾ.

റാങ്ക് 95: ബംഗ്ലാദേശ് – 37 രാജ്യങ്ങൾ
വിസ ഇളവ് കരാറുകളുടെ കുറവും വിസ കാലാവധി കഴിഞ്ഞ് താമസിക്കുന്നതിനെക്കുറിച്ചുള്ള ആശങ്കകളും ബാധകമാണ്.

റാങ്ക് 96: നേപ്പാൾ – 35 രാജ്യങ്ങൾ
പരിമിതമായ നയതന്ത്ര സ്വാധീനവും വിസ ഇളവ് കരാറുകളുടെ അഭാവവുമാണ് പ്രധാന കാരണം.

റാങ്ക് 97: സൊമാലിയ – 33 രാജ്യങ്ങൾ
ദീർഘകാല ആഭ്യന്തര സംഘർഷങ്ങളും സുരക്ഷാ പ്രശ്നങ്ങളും രാജ്യത്തിന്റെ അന്താരാഷ്ട്ര പ്രതിഛായയെ ബാധിക്കുന്നു.

റാങ്ക് 98: പാക്കിസ്ഥാൻ, യെമൻ – 31 രാജ്യങ്ങൾ
യുദ്ധ സാഹചര്യങ്ങളും സുരക്ഷാ ആശങ്കകളും കുടിയേറ്റ നിയന്ത്രണങ്ങളും തിരിച്ചടിയാകുന്നു.

റാങ്ക് 99: ഇറാഖ് – 29 രാജ്യങ്ങൾ
സംഘർഷങ്ങളുടെ ബാക്കിപത്രവും ശക്തമായ സുരക്ഷാ പരിശോധനകളും യാത്രാസൗകര്യത്തെ ബാധിക്കുന്നു.

റാങ്ക് 100: സിറിയ – 26 രാജ്യങ്ങൾ
ആഭ്യന്തര യുദ്ധവും സാമ്പത്തിക പ്രതിസന്ധിയും പട്ടികയിൽ താഴെയെത്താൻ കാരണമായി.

റാങ്ക് 101: അഫ്ഗാനിസ്ഥാൻ – 24 രാജ്യങ്ങൾ
2026ലെ പട്ടികയിൽ ഏറ്റവും ദുർബലമായ പാസ്‌പോർട്ട് അഫ്ഗാനിസ്താന്റേതാണ്. രാഷ്ട്രീയ അസ്ഥിരതയും പരിമിതമായ നയതന്ത്ര ബന്ധങ്ങളും വിസയില്ലാത്ത പ്രവേശനത്തിന് വലിയ നിയന്ത്രണങ്ങളുണ്ടാക്കുന്നു.

നയതന്ത്ര ബന്ധങ്ങൾ, ആഭ്യന്തര സുരക്ഷ, രാഷ്ട്രീയ സ്ഥിരത എന്നിവയാണ് പാസ്‌പോർട്ട് കരുത്തിനെ സ്വാധീനിക്കുന്ന പ്രധാന ഘടകങ്ങൾ. യാത്രാസൗകര്യങ്ങളിലെ ഈ കുറവ് ദീർഘമായ വിസ നടപടിക്രമങ്ങൾക്കും ഉയർന്ന ചെലവുകൾക്കും കാരണമാകുന്നതായി റിപ്പോർട്ട് ചൂണ്ടിക്കാട്ടുന്നു.