ദുബായ്: റമദാൻ മാസത്തിന്റെ മറവിൽ ആഡംബര കാറുടമകളെ കേന്ദ്രീകരിച്ച് ഭിക്ഷാടനം നടത്തിവന്ന ഒരാളെ ദുബായ് പോലീസ് പിടികൂടി. അറസ്റ്റ് ചെയ്യുമ്പോൾ ഇയാളുടെ പക്കൽ നിന്നും 20,000 ദിർഹത്തോളം പോലീസ് കണ്ടെടുത്തു. ദുബായ് പോലീസ് നടപ്പിലാക്കുന്ന ‘ഭിക്ഷാടന വിരുദ്ധ’ കാമ്പയിന്റെ ഭാഗമായാണ് ഈ നടപടി.

പാർക്കിംഗ് ഏരിയകളിലും ട്രാഫിക് സിഗ്നലുകളിലും നിർത്തിയിടുന്ന ആഡംബര കാറുകളെയാണ് ഇയാൾ പ്രധാനമായും ലക്ഷ്യമിട്ടിരുന്നത്. താൻ വലിയ സാമ്പത്തിക പ്രയാസത്തിലാണെന്നും ഭക്ഷണത്തിന് പോലും പണമില്ലെന്നും വ്യാജമായി പറഞ്ഞ് കാറുടമകളുടെ സഹതാപം പിടിച്ചുപറ്റുകയായിരുന്നു ഇയാളുടെ രീതി. പള്ളികൾ, ആശുപത്രികൾ, മാർക്കറ്റുകൾ എന്നിവിടങ്ങളിൽ ഇത്തരം വ്യാജ കഥകൾ നിരത്തി ആളുകളെ കബളിപ്പിക്കുന്നത് ഇത്തരക്കാരുടെ പതിവാണെന്ന് ദുബായ് പോലീസ് മുന്നറിയിപ്പ് നൽകി.

യുഎഇ നിയമപ്രകാരം ഭിക്ഷാടനം ഒരു ഗുരുതരമായ ക്രിമിനൽ കുറ്റമാണ്. ഓൺലൈൻ വഴിയോ നേരിട്ടോ ഭിക്ഷാടനം നടത്തുന്നവർക്ക് മൂന്ന് മാസം വരെ തടവോ അല്ലെങ്കിൽ കുറഞ്ഞത് 10,000 ദിർഹം പിഴയോ ലഭിക്കാം. അർഹരായവർക്ക് സഹായം എത്തിക്കാൻ രാജ്യത്ത് ഔദ്യോഗിക ചാരിറ്റി സംഘടനകൾ നിലവിലുണ്ടെന്നും, തെരുവിലോ സോഷ്യൽ മീഡിയ വഴിയോ പണം ആവശ്യപ്പെടുന്നവർക്ക് നൽകി വഞ്ചിക്കപ്പെടരുതെന്നും അധികൃതർ ഓർമ്മിപ്പിച്ചു.

ഇത്തരം തട്ടിപ്പുകൾ ശ്രദ്ധയിൽപ്പെട്ടാൽ ഉടൻ തന്നെ 901 എന്ന ടോൾ ഫ്രീ നമ്പരിലോ, ദുബായ് പോലീസ് ആപ്പിലെ ‘Police Eye’ സർവീസ് വഴിയോ, ഔദ്യോഗിക E-Crime പ്ലാറ്റ്‌ഫോം വഴിയോ റിപ്പോർട്ട് ചെയ്യാവുന്നതാണ്. ഔദ്യോഗിക ചാനലുകൾ വഴി മാത്രം സംഭാവനകൾ നൽകി ഇത്തരം സാമൂഹിക വിപത്തുകളെ തടയാൻ പൊതുജനങ്ങൾ സഹകരിക്കണമെന്ന് പോലീസ് ആവശ്യപ്പെട്ടു.യുഎഇയിലെ വാർത്തകളും തൊഴിൽ അവസരങ്ങളും അതിവേഗം അറിയാൻ വാട്സ്ആപ്പ് ഗ്രൂപ്പിൽ അംഗമാവുക https://chat.whatsapp.com/DfsJVtpVohVHb4aFdLbW46?mode=wwt

റമസാനിൽ വിലക്കയറ്റത്തിന് ‘ബ്രേക്ക്’! വിപണിയിൽ പിടിമുറുക്കി യുഎഇ; ഓരോ സാധനത്തിനും വിലവിവരപ്പട്ടിക നിർബന്ധം

റമസാൻ മാസത്തെ മുന്നോടിയായി വിപണിയിലെ വിലക്കയറ്റം തടയാൻ ശക്തമായ ഇടപെടലുമായി യുഎഇ സാമ്പത്തിക മന്ത്രാലയം രംഗത്ത്. കൃത്രിമ ക്ഷാമം സൃഷ്ടിക്കുന്ന പ്രവണതകൾക്കും അനാവശ്യമായ വില വർധനയ്ക്കും കർശന നിയന്ത്രണങ്ങളാണ് പ്രഖ്യാപിച്ചത്. 1,000 ചതുരശ്ര മീറ്ററിലധികം വിസ്തീർണമുള്ള എല്ലാ റീട്ടെയിൽ കടകളിലും ഓരോ ഉൽപ്പന്നത്തിന്റെയും ആകെ വിലയ്ക്കൊപ്പം യൂണിറ്റ് വില (ഉദാഹരണത്തിന് കിലോയ്ക്ക് എത്ര) വ്യക്തമായി പ്രദർശിപ്പിക്കണമെന്ന് മന്ത്രാലയം നിർദേശിച്ചു. ഉപഭോക്താക്കൾക്ക് വ്യക്തമായ വില താരതമ്യം സാധ്യമാക്കുക എന്നതാണ് ലക്ഷ്യം. ഓൺലൈൻ വ്യാപാര സ്ഥാപനങ്ങൾക്കും ഈ നിർദേശം ബാധകമാണ്. അബ്ദുല്ല ബിൻ തൗഖ് അൽ മർറി യുഎഇ സാമ്പത്തിക-വിനോദസഞ്ചാര മന്ത്രിയും ഉപഭോക്തൃ സംരക്ഷണ സമിതി അധ്യക്ഷനും, രാജ്യത്തെ ഭക്ഷ്യശേഖരം സുരക്ഷിതമാണെന്നും ദീർഘകാല വിതരണത്തിൽ തടസ്സമുണ്ടാകില്ലെന്നും വ്യക്തമാക്കി. വിപണിയിലെ അവശ്യവസ്തുക്കളുടെ ലഭ്യതയും വിലസ്ഥിരതയും വിലയിരുത്താൻ അദ്ദേഹം എമിറേറ്റ്‌സ് കോ-ഓപറേറ്റീവ് സൊസൈറ്റി, സ്പിന്നീസ് തുടങ്ങിയ പ്രധാന ഔട്ട്‌ലെറ്റുകൾ സന്ദർശിച്ചു. 2022 ലെ കാബിനറ്റ് പ്രമേയം (നമ്പർ 120) പ്രകാരം, ഉൽപ്പന്നങ്ങളുടെ ആകെ വിലയ്ക്കൊപ്പം യൂണിറ്റ് വിലയും നിർബന്ധമായും പ്രദർശിപ്പിക്കണം. നിയമലംഘനം കണ്ടെത്തിയാൽ പൊതുജനങ്ങൾക്ക് പരാതി നൽകാം.

ഇതിനോടകം തന്നെ പാചകഎണ്ണ, മുട്ട, പാൽ ഉൽപ്പന്നങ്ങൾ, അരി, പഞ്ചസാര, ചിക്കൻ, ഗോതമ്പ് തുടങ്ങിയ അടിസ്ഥാന സാധനങ്ങൾക്ക് മുൻകൂർ അനുമതിയില്ലാതെ വില വർധിപ്പിക്കുന്നത് മന്ത്രാലയം നിരോധിച്ചിട്ടുണ്ട്. റമസാൻ പ്രത്യേക ഓഫറുകളും ഡിസ്കൗണ്ടുകളും യാഥാർഥ്യമാണോയെന്ന് ഉറപ്പാക്കാൻ വിപണിയിൽ നേരിട്ടുള്ള നിരീക്ഷണവും തുടരും. വിപണിയിൽ ന്യായമായ മത്സരം ഉറപ്പാക്കുകയും അനാവശ്യ വിലക്കയറ്റം തടയുകയും ചെയ്യുക എന്നതാണ് ഈ നടപടികളുടെ പ്രധാന ലക്ഷ്യമെന്ന് മന്ത്രി വ്യക്തമാക്കി. റമസാൻ മാസപ്പിറവി നിരീക്ഷണത്തിനായി ചൊവ്വാഴ്ച കമ്മിറ്റി യോഗം ചേരാനിരിക്കെയാണ് മന്ത്രാലയത്തിന്റെ ഈ അടിയന്തര ഇടപെടൽ.യുഎഇയിലെ വാർത്തകളും തൊഴിൽ അവസരങ്ങളും അതിവേഗം അറിയാൻ വാട്സ്ആപ്പ് ഗ്രൂപ്പിൽ അംഗമാവുക https://chat.whatsapp.com/DfsJVtpVohVHb4aFdLbW46?mode=wwt