യുഎഇയിലെ വിദ്യാഭ്യാസമേഖലയിൽ ആയിരക്കണക്കിന് വിദ്യാർഥികൾക്ക് അവസരങ്ങളുടെ വാതിൽ തുറന്ന പ്രമുഖ പ്രവാസി മലയാളി സംരംഭകൻ ഡാനിയൽ ലാസർ (84) അന്തരിച്ചു. ലാസർ ഗ്രൂപ്പിന്റെയും നോർത്ത് പോയിന്റ് എജ്യുക്കേഷൻ ഗ്രൂപ്പ് ഓഫ് സ്കൂൾസിന്റെയും സ്ഥാപകനായ അദ്ദേഹം കേരളത്തിൽ വെച്ചാണ് അന്തരിച്ചത്. ഒക്ടോബർ 14 ബുധനാഴ്ചയായിരുന്നു അന്ത്യം. അദ്ദേഹത്തിന്റെ വിയോഗത്തിൽ യുഎഇയിലെ വിദ്യാഭ്യാസ-പ്രവാസി സമൂഹം അനുശോചനം രേഖപ്പെടുത്തി.

സാധാരണക്കാരനായി യുഎഇയിലെത്തിയ ഡാനിയൽ ലാസറിന്റെ ജീവിതയാത്ര പ്രതിസന്ധികളെ അതിജീവിച്ച് വിജയം നേടിയതിന്റെ ഉദാഹരണമാണ്. പൂണെയിൽ ടാറ്റ ഗ്രൂപ്പിൽ ഇലക്ട്രിക്കൽ എൻജിനീയറായി ജോലി ചെയ്തിരുന്ന അദ്ദേഹം സുരക്ഷിതമായ ജോലി ഉപേക്ഷിച്ചാണ് പുതിയ സ്വപ്നങ്ങളുമായി ഗൾഫിലേക്ക് യാത്ര തിരിച്ചത്. 1968 ഏപ്രിൽ എട്ടിന് ഗുജറാത്തിൽനിന്ന് ചെറുബോട്ടിൽ അറബിക്കടൽ കടന്ന അദ്ദേഹത്തിന് പത്തുദിവസത്തെ സാഹസിക യാത്രയ്ക്കൊടുവിൽ ഖോർഫക്കാനിലെത്താനായി.

യുഎഇയിൽ വൈദ്യുതിമേഖലയിൽ ജോലി ആരംഭിച്ച ഡാനിയൽ ലാസർ പിന്നീട് സംരംഭകത്വത്തിലേക്ക് ചുവടുവെച്ചു. 1969-ൽ ലാസർ ഗ്രൂപ്പിന് തുടക്കമിട്ട അദ്ദേഹം നിർമാണം, ഫസിലിറ്റി മാനേജ്മെന്റ്, വസ്ത്രവ്യാപാരം തുടങ്ങിയ മേഖലകളിലും സാന്നിധ്യം ഉറപ്പിച്ചു. എന്നാൽ വരുംതലമുറകൾക്ക് പ്രയോജനപ്പെടുന്ന വിദ്യാഭ്യാസ സ്ഥാപനങ്ങൾ കെട്ടിപ്പടുക്കുക എന്നതായിരുന്നു അദ്ദേഹത്തിന്റെ പ്രധാന ദൗത്യങ്ങളിലൊന്ന്.

ഭാര്യ ശോശാമ്മ ലാസറിനൊപ്പം ചേർന്നാണ് അദ്ദേഹം വിദ്യാഭ്യാസമേഖലയിൽ ശ്രദ്ധേയമായ പ്രവർത്തനങ്ങൾക്ക് തുടക്കമിട്ടത്. 1985-ൽ അജ്മാനിൽ ലിറ്റിൽ ഫ്ലവർ നഴ്സറി ആരംഭിച്ചു. പിന്നീട് ഇത് അജ്മാൻ ഇന്റർമീഡിയറ്റ് ഇംഗ്ലീഷ് സ്കൂളായി വളർന്നു. ഇന്ന് ദ് റോയൽ അക്കാദമി എന്ന പേരിൽ അറിയപ്പെടുന്ന ഈ സ്ഥാപനം ഉൾപ്പെടെ മൂന്ന് സ്കൂളുകളാണ് നോർത്ത് പോയിന്റ് എജ്യുക്കേഷൻ ഗ്രൂപ്പിന് കീഴിൽ പ്രവർത്തിക്കുന്നത്. അജ്മാനിലെ ദ് ബ്ലൂമിങ്ടൺ അക്കാദമിയും ഷാർജയിലെ ദ് ഹോപ് ഇംഗ്ലീഷ് സ്കൂളുമാണ് മറ്റ് സ്ഥാപനങ്ങൾ.

പ്രവാസി കുട്ടികൾക്ക് മിതമായ ചെലവിൽ മികച്ച വിദ്യാഭ്യാസം ലഭ്യമാക്കുക എന്ന ലക്ഷ്യമാണ് അദ്ദേഹത്തിന്റെ പ്രവർത്തനങ്ങൾക്ക് കരുത്തായത്. അക്കാദമിക മികവിനൊപ്പം നല്ല സ്വഭാവം, മൂല്യബോധം, കരുണ എന്നിവയും കുട്ടികളിൽ വളർത്തേണ്ടതുണ്ടെന്ന് അദ്ദേഹം വിശ്വസിച്ചിരുന്നു. വിദ്യാർഥികൾ ജീവിതത്തിൽ വിജയിച്ചുനിൽക്കുന്നത് കാണുന്നതാണ് ഏറ്റവും വലിയ സന്തോഷമെന്ന് അദ്ദേഹം പലപ്പോഴും വ്യക്തമാക്കിയിരുന്നു.

തനിക്ക് അവസരങ്ങൾ നൽകിയ യുഎഇയോടുള്ള നന്ദി വിദ്യാഭ്യാസ സേവനങ്ങളിലൂടെ തിരിച്ചുനൽകിയ ഡാനിയൽ ലാസറിന്റെ സംഭാവനകൾ നിരവധി വിദ്യാർഥികളുടെയും കുടുംബങ്ങളുടെയും ജീവിതത്തെ സ്വാധീനിച്ചു. അദ്ദേഹത്തിന്റെ വിയോഗത്തിൽ വിവിധ സ്കൂളുകളിലെ അധ്യാപകരും വിദ്യാർഥികളും ജീവനക്കാരും ആദരാഞ്ജലികൾ അർപ്പിച്ചു.

 ഭാര്യ ശോശാമ്മ ലാസർ, മകൻ ലാൻസൺ ലാസർ, മകൾ ലിൻസി ഡിസൂസ എന്നിവരാണ് കുടുംബാംഗങ്ങൾ. പിതാവ് മുന്നോട്ടുവെച്ച വിദ്യാഭ്യാസ ദർശനവും സേവനമനോഭാവവും മകൻ ലാൻസൺ ലാസറിന്റെ നേതൃത്വത്തിൽ നോർത്ത് പോയിന്റ് എജ്യുക്കേഷൻ ഗ്രൂപ്പ് തുടരുകയാണ്.