Dubai Metro Etihad Rail; ദുബായ് മെട്രോയിൽനിന്ന് ഇത്തിഹാദ് റെയിൽവേ സ്റ്റേഷനിലേക്ക് ഇനി ബസ്സോ ടാക്സിയോ ആശ്രയിക്കാതെ നേരിട്ട് നടന്നെത്താം. മെട്രോ റെഡ് ലൈനിലെ ജുമൈറ ഗോൾഫ് എസ്റ്റേറ്റ്സ് സ്റ്റേഷനെയും ഇത്തിഹാദ് റെയിലിന്റെ ദുബായ് അൽ യലായിസ് (Al Yalayis) പാസഞ്ചർ സ്റ്റേഷനെയും പരസ്പരം ബന്ധിപ്പിക്കുന്ന പുതിയ എയർകണ്ടീഷൻഡ് കാൽനടപ്പാലം പ്രവർത്തനസജ്ജമായി. വ്യാഴാഴ്ചയാണ് പുതിയ മേൽപ്പാലം പൊതുജനങ്ങൾക്കായി തുറന്നുകൊടുത്തത്. ഇതോടെ ദുബായ് മെട്രോയിലെത്തുന്ന യാത്രക്കാർക്ക് അബുദാബി, ഫുജൈറ എന്നിവിടങ്ങളിലേക്കുള്ള ഇത്തിഹാദ് റെയിൽ ട്രെയിൻ സർവീസുകളിലേക്ക് റോഡിലിറങ്ങാതെ തന്നെ അതിവേഗം പ്രവേശിക്കാനാകും. ഇതുവരെ ഇരു സ്റ്റേഷനുകൾക്കുമിടയിൽ യാത്ര ചെയ്യുന്നതിനായി മെട്രോ സ്റ്റേഷന് പുറത്തുനിന്നുള്ള ഷട്ടിൽ ബസുകളെയായിരുന്നു പ്രധാനമായും ആശ്രയിച്ചിരുന്നത്. ജുമൈറ ഗോൾഫ് എസ്റ്റേറ്റ്സ് മെട്രോ സ്റ്റേഷനിലെ എക്സിറ്റ് 1, എക്സിറ്റ് 2 എന്നിവ വഴി യാത്രക്കാർക്ക് ഈ മേൽപ്പാലത്തിലേക്ക് പ്രവേശിക്കാം. പൂർണമായും ശീതീകരിച്ചതും അടച്ചുറപ്പുള്ളതുമായ ഈ പാതയിൽ യാത്രക്കാരുടെ സൗകര്യാർഥം എസ്‌കലേറ്ററുകളും മൂവിങ് വാക്ക്‌വേകളും സജ്ജീകരിച്ചിട്ടുണ്ട്. മെട്രോ സ്റ്റേഷനിൽനിന്ന് ഇത്തിഹാദ് റെയിൽവേ സ്റ്റേഷനിലേക്ക് നടന്നെത്താൻ വെറും 5 മുതൽ 7 മിനിറ്റ് വരെ സമയം മതിയാകും. പുതിയ പാലം തുറന്നെങ്കിലും നിലവിലെ സൗജന്യ ഷട്ടിൽ ബസ് സർവീസ് പൂർണമായി നിർത്തില്ല. കൂടുതൽ ലഗേജുകൾ ഉള്ളവർക്കും കുട്ടികളുമായി യാത്ര ചെയ്യുന്നവർക്കും നടക്കാൻ താല്പര്യമില്ലാത്തവർക്കും തുടർന്നും ഷട്ടിൽ ബസുകൾ ഉപയോഗിക്കാമെന്ന് അധികൃതർ വ്യക്തമാക്കി. ദുബായ് മെട്രോ, ആർ.ടി.എ (RTA) ബസുകൾ, ഇത്തിഹാദ് റെയിൽ എന്നീ മൂന്ന് പ്രധാന പൊതുഗതാഗത സംവിധാനങ്ങളെ ഒരൊറ്റ കേന്ദ്രത്തിൽ പരസ്പരം ബന്ധിപ്പിക്കാൻ സാധിച്ചുവെന്നതാണ് ഈ പദ്ധതിയുടെ പ്രധാന നേട്ടം. സെപ്റ്റംബർ 30-നാണ് ഇത്തിഹാദ് റെയിലിന്റെ ദുബായ് അൽ യലായിസ് സ്റ്റേഷൻ പ്രവർത്തനം ആരംഭിച്ചത്. പുതിയ കാൽനടപ്പാലം കൂടി പ്രവർത്തനക്ഷമമായതോടെ എമിറേറ്റുകൾക്കിടയിലുള്ള യാത്ര കൂടുതൽ ആയാസരഹിതമായി മാറും.