UAE to Riyadh flight disruptions; യുഎഇയിൽനിന്ന് സൗദി അറേബ്യൻ തലസ്ഥാനമായ റിയാദിലേക്കുള്ള നേരിട്ടുള്ള വിമാന സർവീസുകൾ തടസ്സപ്പെട്ടതോടെ, ലക്ഷ്യസ്ഥാനത്ത് എത്തിച്ചേരാൻ മറ്റ് ഗൾഫ് നഗരങ്ങൾ വഴി മണിക്കൂറുകൾ നീളുന്ന റോഡ് യാത്രകൾ തെരഞ്ഞെടുക്കുകയാണ് യാത്രക്കാർ. സൗദിയിലെ വിമാനത്താവളങ്ങളെ ലക്ഷ്യമിട്ടുണ്ടായ ആക്രമണങ്ങളെ തുടർന്ന് റിയാദ് വിമാനത്താവളത്തിന്റെ പ്രവർത്തനം താൽക്കാലികമായി നിലച്ചതാണ് ഈ കടുത്ത യാത്രാപ്രതിസന്ധിക്ക് കാരണമായത്.
നേരിട്ടുള്ള സർവീസുകൾ ഇല്ലാതായതോടെ പ്രധാനമായും രണ്ട് പകരവഴികളാണ് യാത്രക്കാർ ഇപ്പോൾ ആശ്രയിക്കുന്നത്.
ദമാം വഴി റിയാദിലേക്ക്
യുഎഇയിൽനിന്ന് സൗദിയിലെ കിഴക്കൻ പ്രവിശ്യയായ ദമാമിലേക്ക് വിമാന മാർഗ്ഗം എത്തിച്ചേരുക. തുടർന്ന് അവിടെനിന്ന് ടാക്സിയിലോ മറ്റ് വാഹനങ്ങളിലോ 4 മണിക്കൂറോളം റോഡ് മാർഗ്ഗം സഞ്ചരിച്ച് റിയാദിൽ എത്തുക.
ബഹ്‌റൈൻ – കിങ് ഫഹദ് കോസ്‌വേ വഴി
ദുബായിൽനിന്ന് വിമാനമാർഗ്ഗം ബഹ്‌റൈനിലെ മനാമയിലെത്തുക. തുടർന്ന് ഇരുരാജ്യങ്ങളെയും ബന്ധിപ്പിക്കുന്ന കിങ് ഫഹദ് കോസ്‌വേ വഴി അതിർത്തി കടന്ന് 5 മുതൽ 6 മണിക്കൂർ വരെ കാർ യാത്ര ചെയ്ത് റിയാദിലേക്ക് തിരിക്കുക.
യാത്രയ്ക്കായി വലിയ തുക ചെലവഴിക്കേണ്ടി വരുന്നതിനൊപ്പം മണിക്കൂറുകൾ നീളുന്ന റോഡ് യാത്ര കടുത്ത ശാരീരിക ബുദ്ധിമുട്ടുകൾ ഉണ്ടാക്കുന്നതായും യാത്രക്കാർ പറയുന്നു.
യുകെയിൽ കുടുംബത്തോടൊപ്പം അവധി കഴിഞ്ഞ് റിയാദിലെ ജോലിസ്ഥലത്തേക്ക് മടങ്ങാനിരിക്കെയാണ് വിമാനത്താവളം അടച്ച വിവരമറിയുന്നത്. ഇതോടെ ദുബായിലെത്തി, അവിടെനിന്ന് മനാമയിലേക്ക് വിമാനം കയറുകയും തുടർന്ന് 6 മണിക്കൂർ കാറിൽ യാത്ര ചെയ്ത് റിയാദിലെത്തുകയുമാണ് ചെയ്തത് എന്ന് ലണ്ടൻ സ്വദേശിയായ പ്രവാസി തന്റെ ദുരനുഭവം പങ്കുവെച്ചു. റിയാദിലേക്കുള്ള വിമാന സർവീസുകൾ പൂർവസ്ഥിതിയിലാകാത്ത പക്ഷം വരും ദിവസങ്ങളിലും യാത്രക്കാരുടെ ഈ ദുരിതയാത്ര തുടരാനാണ് സാധ്യത. വിമാനടിക്കറ്റുകൾ ലഭിക്കാനുള്ള ബുദ്ധിമുട്ടും ഇരട്ടിയിലധികം വരുന്ന യാത്രാച്ചെലവും പ്രവാസികൾക്ക് വലിയ സാമ്പത്തിക ഭാരമാണ് സൃഷ്ടിക്കുന്നത്.
