UAE weather fog rain;യുഎഇയിൽ ഞായറാഴ്ച കാലാവസ്ഥ പൊതുവെ തെളിഞ്ഞതോ ഭാഗികമായി മേഘാവൃതമോ ആയിരിക്കുമെന്ന് നാഷണൽ സെന്റർ ഓഫ് മെറ്റീരിയോളജി (എൻ.സി.എം) അറിയിച്ചു. രാജ്യത്തിന്റെ കിഴക്കൻ, തെക്കൻ പ്രദേശങ്ങളിൽ മേഘങ്ങൾ രൂപപ്പെടാൻ സാധ്യതയുണ്ട്. ഉച്ചയോടെ ഈ മേഘങ്ങൾ ശക്തിപ്രാപിക്കുകയും ചിലയിടങ്ങളിൽ മഴ പെയ്യാനുള്ള സാധ്യതയുണ്ടെന്നും കാലാവസ്ഥാ നിരീക്ഷണ കേന്ദ്രം വ്യക്തമാക്കി. അബുദാബിയിൽ ഉയർന്ന താപനില 41 ഡിഗ്രി സെൽഷ്യസ് വരെയും ദുബായിൽ 40 ഡിഗ്രി സെൽഷ്യസും ഷാർജയിൽ 39 ഡിഗ്രി സെൽഷ്യസും വരെ എത്താാം. മറ്റ് എമിറേറ്റുകളിൽ താപനില താരതമ്യേന കുറവായിരിക്കും. ഞായറാഴ്ച രാവിലെ ഒമ്പത് മണി വരെ രാജ്യത്തിന്റെ ചില തീരദേശങ്ങളിലും ഉൾപ്രദേശങ്ങളിലും, പ്രത്യേകിച്ചും പടിഞ്ഞാറൻ ഭാഗങ്ങളിൽ കനത്ത മൂടൽമഞ്ഞിന് സാധ്യതയുണ്ട്. ഇത് കാരണം അന്തരീക്ഷത്തിലെ ദൃശ്യപരത ഗണ്യമായി കുറയാൻ ഇടയുണ്ടെന്നും അധികൃതർ ജാഗ്രതാ നിർദ്ദേശം നൽകി. രാത്രിയാകുന്നതോടെ ചില തീരദേശങ്ങളിലും ഉൾപ്രദേശങ്ങളിലും അന്തരീക്ഷ ഈർപ്പം വർദ്ധിക്കുകയും, തിങ്കളാഴ്ച രാവിലെയോടെ വീണ്ടും മൂടൽമഞ്ഞോ പുകമഞ്ഞോ രൂപപ്പെടാൻ ഇടയാക്കുകയും ചെയ്യും. മണിക്കൂറിൽ 10 മുതൽ 20 കിലോമീറ്റർ വരെ വേഗതയിലും (ചില സമയങ്ങളിൽ 30 കിലോമീറ്റർ വരെ വേഗതയിലും) തെക്കുപടിഞ്ഞാറ് നിന്ന് വടക്കുപടിഞ്ഞാറ് ദിശയിലേക്ക് കാറ്റ് വീശിയടിക്കാൻ സാധ്യതയുണ്ട്. അറേബ്യൻ ഗൾഫിലും ഒമാൻ കടലിലും കടൽ പൊതുവെ ശാന്തമായിരിക്കും.