യുഎഇയിൽ ബാങ്ക് വായ്പകൾ ലഭിക്കാനുള്ള സാധ്യതയെ മാത്രമല്ല, ദൈനംദിന ജീവിതത്തിലെ പല സുപ്രധാന കാര്യങ്ങളെയും ക്രെഡിറ്റ് സ്കോർ നേരിട്ട് സ്വാധീനിക്കുന്നതായി സാമ്പത്തിക വിദഗ്ധർ മുന്നറിയിപ്പ് നൽകുന്നു. കുറഞ്ഞ ക്രെഡിറ്റ് സ്കോർ ഉള്ളവർക്ക് വായ്പകളും ക്രെഡിറ്റ് കാർഡുകളും ലഭിക്കുന്നതിൽ ബുദ്ധിമുട്ട് നേരിടുന്നതിനൊപ്പം മറ്റ് സാമ്പത്തിക സേവനങ്ങളിലും നിയന്ത്രണങ്ങൾ നേരിടേണ്ടി വരാം. അൽ ഇത്തിഹാദ് ക്രെഡിറ്റ് ബ്യൂറോ (AECB) തയ്യാറാക്കുന്ന ക്രെഡിറ്റ് റിപ്പോർട്ടും സ്കോറുമാണ് യുഎഇയിലെ വ്യക്തികളുടെ സാമ്പത്തിക വിശ്വാസ്യത വിലയിരുത്തുന്നതിനുള്ള പ്രധാന മാനദണ്ഡം. വായ്പ തിരിച്ചടവുകൾ, ക്രെഡിറ്റ് കാർഡ് ഉപയോഗം, ബില്ലുകൾ അടയ്ക്കുന്ന രീതി എന്നിവയുടെ അടിസ്ഥാനത്തിലാണ് സ്കോർ നിർണയിക്കുന്നത്.

ക്രെഡിറ്റ് സ്കോർ കുറവാണെങ്കിൽ ബാങ്കുകൾ വായ്പാ അപേക്ഷകൾ നിരസിക്കാനോ ഉയർന്ന പലിശ നിരക്ക് ഈടാക്കാനോ സാധ്യതയുണ്ട്. ചില സാഹചര്യങ്ങളിൽ വാഹന വായ്പ, ഭവന വായ്പ, വ്യക്തിഗത വായ്പ തുടങ്ങിയ സേവനങ്ങൾ ലഭിക്കുന്നതും പ്രയാസകരമാകും. വായ്പകളിൽ മാത്രം ഇത് ഒതുങ്ങുന്നില്ല. ചില സാമ്പത്തിക സ്ഥാപനങ്ങളും സേവനദാതാക്കളും ഉപഭോക്താവിന്റെ ക്രെഡിറ്റ് ചരിത്രം പരിശോധിച്ച ശേഷമാണ് സേവനങ്ങൾ അനുവദിക്കുന്നത്. അതിനാൽ മോശം ക്രെഡിറ്റ് റെക്കോർഡ് സാമ്പത്തിക ഇടപാടുകളെ വ്യാപകമായി ബാധിക്കാം.

സമയബന്ധിതമായി വായ്പാ ഗഡുക്കളും ക്രെഡിറ്റ് കാർഡ് കുടിശികകളും അടയ്ക്കുക, അമിതമായ കടബാധ്യത ഒഴിവാക്കുക, ക്രെഡിറ്റ് ഉപയോഗം നിയന്ത്രണവിധേയമാക്കുക എന്നിവയിലൂടെ മികച്ച ക്രെഡിറ്റ് സ്കോർ നിലനിർത്താൻ സാധിക്കുമെന്ന് സാമ്പത്തിക വിദഗ്ധർ നിർദേശിക്കുന്നു. സാമ്പത്തിക സ്ഥിരതയും ഭാവിയിലെ വായ്പാ സാധ്യതകളും ഉറപ്പാക്കാൻ വ്യക്തികൾ തങ്ങളുടെ ക്രെഡിറ്റ് റിപ്പോർട്ടുകൾ ഇടയ്ക്കിടെ പരിശോധിക്കുകയും സാമ്പത്തിക അച്ചടക്കം പാലിക്കുകയും ചെയ്യേണ്ടത് അനിവാര്യമാണെന്നും വിദഗ്ധർ ഓർമ്മിപ്പിച്ചു.യുഎഇയിലെ വാർത്തകളും തൊഴിൽ അവസരങ്ങളും അതിവേഗം അറിയാൻ വാട്സ്ആപ്പ് ഗ്രൂപ്പിൽ അംഗമാവുക https://chat.whatsapp.com/Dbf59JLetgBECJpr5UZOuZ?mode=gi_t

‘സ്ഫോടന ശബ്ദ’മുണ്ടാക്കുന്ന വാഹനങ്ങൾക്കെതിരെ യുഎഇയിൽ കർശന നടപടി; പിഴയും 12 ബ്ലാക്ക് പോയിന്റും

ജനവാസ മേഖലകളിൽ അർദ്ധരാത്രിയിൽ സ്ഫോടനത്തിന് സമാനമായ ശബ്ദമുണ്ടാക്കി ജനങ്ങളിൽ പരിഭ്രാന്തി സൃഷ്ടിക്കുന്ന വിധത്തിൽ നിയമവിരുദ്ധമായി രൂപമാറ്റം വരുത്തിയ കാറുകളുടെയും മോട്ടോർ സൈക്കിളുകളുടെയും യുഎഇ പോലീസ് കർശന നടപടികൾ ആരംഭിച്ചു. മേഖലയിലെ സംഘർഷാവസ്ഥ വാർത്തകളിൽ നിറഞ്ഞുനിൽക്കുന്ന സാഹചര്യത്തിൽ ഇത്തരം വാഹനങ്ങളിൽ നിന്നുണ്ടാകുന്ന ‘ബാക്ക് ഫയർ’ ശബ്ദങ്ങൾ പലരും മിസൈൽ ആക്രമണമോ സ്ഫോടനമോ ആണെന്ന് തെറ്റിദ്ധരിച്ച് ഭീതിയിലായിരുന്നുവെന്ന് അധികൃതർ വ്യക്തമാക്കി. എഞ്ചിനുകളിൽ മാറ്റം വരുത്തി ഉദ്ദേശപൂർവ്വം ശക്തമായ ശബ്ദമുണ്ടാക്കുന്നത് പ്രധാനമായും കൗമാരക്കാരും യുവാക്കളുമാണെന്ന് അന്വേഷണത്തിൽ കണ്ടെത്തിയതായി പോലീസ് അറിയിച്ചു. റിപ്പോർട്ട് ചെയ്യപ്പെട്ട ശബ്ദങ്ങൾ വാഹനങ്ങളിൽ നിന്നുള്ളതാണെന്നും രാജ്യത്തിന്റെ സുരക്ഷയെ ബാധിക്കുന്ന യാതൊരു ഭീഷണിയും നിലവിലില്ലെന്നും അധികൃതർ ജനങ്ങളെ ആശ്വസിപ്പിച്ചു. യുഎഇ പൂർണ്ണമായും സുരക്ഷിതമാണെന്നും പോലീസ് വ്യക്തമാക്കി.

ദുബായ്, ഷാർജ തുടങ്ങിയ എമിറേറ്റുകളിലെ ജനവാസ പ്രദേശങ്ങളിൽ രാത്രികാല പോലീസ് പട്രോളിംഗ് ശക്തമാക്കിയിട്ടുണ്ട്. യുഎഇ ട്രാഫിക് നിയമപ്രകാരം അമിത ശബ്ദമുണ്ടാക്കുന്ന വാഹനങ്ങൾ ഓടിക്കുന്നവർക്ക് 2000 ദിർഹം പിഴയും 12 ബ്ലാക്ക് പോയിന്റുകളും ലഭിക്കും. കൂടാതെ വാഹനം പോലീസ് പിടിച്ചെടുക്കുകയും ചെയ്യും. അനധികൃതമായി രൂപമാറ്റം വരുത്തിയ വാഹനങ്ങൾ തിരികെ ലഭിക്കാൻ 10,000 ദിർഹം വരെ ഫീസ് നൽകേണ്ടിവരുമെന്നും അധികൃതർ അറിയിച്ചു. ഈ നടപടി കർശനമായി നടപ്പാക്കുന്നതിന് ദുബായ് പോലീസ് ഓപ്പറേഷൻസ് അസിസ്റ്റന്റ് കമാൻഡർ-ഇൻ-ചീഫ് മേജർ ജനറൽ സെയ്ഫ് മുഹൈർ അൽ മസ്‌റൂയിയും ഷാർജ പോലീസ് സെൻട്രൽ റീജിയൻ ഡയറക്ടർ ബ്രിഗേഡിയർ ഖലീഫ അൽ ഖസൂനിയും നേതൃത്വമൊരുക്കുന്നുണ്ട്. കുട്ടികൾ വാഹനങ്ങളിൽ അനധികൃത മാറ്റങ്ങൾ വരുത്തുന്നില്ലെന്ന് മാതാപിതാക്കൾ ശ്രദ്ധിക്കണമെന്നും അധികൃതർ അഭ്യർത്ഥിച്ചു. ഇത്തരം ശബ്ദശല്യം ഉണ്ടാക്കുന്ന വാഹനങ്ങളെക്കുറിച്ച് ഔദ്യോഗിക ചാനലുകൾ വഴി പോലീസിനെ അറിയിക്കണമെന്നും പൊതുജനങ്ങളോട് നിർദേശിച്ചിട്ടുണ്ട്. മേഖലയിലെ നിലവിലെ സാഹചര്യം പരിഗണിച്ച് ജനങ്ങളുടെ സമാധാനവും സുരക്ഷയും ഉറപ്പാക്കുക എന്ന ലക്ഷ്യത്തോടെയാണ് ഈ നടപടികൾ ശക്തമാക്കിയതെന്നും പോലീസ് അറിയിച്ചു. പോലീസിന്റെ ഈ ഇടപെടലിനെ പ്രവാസികളും സ്വദേശികളും സ്വാഗതം ചെയ്തിട്ടുണ്ട്.യുഎഇയിലെ വാർത്തകളും തൊഴിൽ അവസരങ്ങളും അതിവേഗം അറിയാൻ വാട്സ്ആപ്പ് ഗ്രൂപ്പിൽ അംഗമാവുhttps://chat.whatsapp.com/Dbf59JLetgBECJpr5UZOuZ?mode=gi_t