ഓസ്ട്രേലിയൻ ക്രിക്കറ്റ് ഇതിഹാസം ബ്രെറ്റ് ലീക്ക് ദുബൈ ഇപ്പോൾ വെറും താമസസ്ഥലം മാത്രമല്ല, സ്വന്തം വീടായി മാറിയിരിക്കുകയാണ്. കുടുംബത്തോടൊപ്പം ദുബൈയിൽ താമസം തുടങ്ങി ഒരു വർഷം പിന്നിടുമ്പോൾ നഗരത്തിന്റെ സുരക്ഷിതത്വവും ജീവിതശൈലിയും അദ്ദേഹം തുറന്നുപുകഴ്ത്തി. പ്രാദേശിക സംഘർഷങ്ങളും ആശങ്കകളും നിലനിന്നിട്ടും ദുബൈ വിട്ടുപോകണമെന്ന ചിന്ത പോലും ഉണ്ടായിട്ടില്ലെന്ന് ബ്രെറ്റ് ലീ വ്യക്തമാക്കി. കഴിഞ്ഞ ഏതാനും ആഴ്ചകളിൽ നിരവധി സുഹൃത്തുക്കൾ ഓസ്ട്രേലിയയിലേക്ക് മടങ്ങാൻ ആവശ്യപ്പെട്ടെങ്കിലും യു.എ.ഇയിലെ ഭരണനേതൃത്വത്തിലും സുരക്ഷാ സംവിധാനങ്ങളിലും തനിക്ക് പൂർണ വിശ്വാസമുണ്ടെന്ന് അദ്ദേഹം പറഞ്ഞു. “ജീവിക്കാൻ ഏറ്റവും സുരക്ഷിതമായ സ്ഥലങ്ങളിലൊന്നാണ് ദുബൈ” എന്നും ലീ കൂട്ടിച്ചേർത്തു. ഭാര്യ ലാനയ്ക്കും മക്കൾക്കുമൊപ്പം ദുബൈയിലേക്ക് മാറിയത് സാമ്പത്തിക നേട്ടങ്ങൾക്കോ സെലിബ്രിറ്റി ജീവിതത്തിനോ വേണ്ടിയല്ലെന്നും, മികച്ച ജീവിതശൈലിയും കുടുംബസുരക്ഷയും കുട്ടികൾക്ക് ആഗോള വീക്ഷണം നൽകുന്നതുമാണ് പ്രധാന കാരണങ്ങളെന്നും ലീ വിശദീകരിച്ചു. വിവിധ രാജ്യങ്ങളിൽ നിന്നുള്ള കുട്ടികളോടൊപ്പം പഠിക്കാനും കളിക്കാനുമുള്ള അവസരം മക്കൾക്ക് ലഭിക്കുന്നതിൽ സന്തോഷമുണ്ടെന്നും അദ്ദേഹം പറഞ്ഞു.

രണ്ട് വർഷം മുമ്പ് ആരെങ്കിലും ദുബൈയിൽ സ്ഥിരതാമസമാക്കുമോ എന്ന് ചോദിച്ചിരുന്നെങ്കിൽ താൻ ചിരിക്കുമായിരുന്നുവെന്ന് ലീ പറഞ്ഞു. എന്നാൽ ഇന്ന് ദുബൈയെ “ട്രാൻസിറ്റ് സിറ്റി” ആയി കാണുന്നില്ലെന്നും, “ഇതാണ് ഇപ്പോൾ എന്റെ വീട്” എന്നുമാണ് അദ്ദേഹത്തിന്റെ പ്രതികരണം. കളിക്കളത്തിലെ ആക്രമണോത്സുകത ഒരു “ഗെയിം ഫേസ്” മാത്രമായിരുന്നുവെന്നും യഥാർത്ഥ ജീവിതത്തിൽ താൻ വളരെ വ്യത്യസ്തനാണെന്നും ലീ അഭിമുഖത്തിൽ തുറന്നുപറഞ്ഞു. ഇപ്പോൾ കുടുംബജീവിതം, ആരോഗ്യം, സംഗീതം, കുട്ടികളുടെ ഭാവി എന്നിവയ്ക്കാണ് കൂടുതൽ പ്രാധാന്യം നൽകുന്നതെന്നും അദ്ദേഹം കൂട്ടിച്ചേർത്തു.യുഎഇയിലെ വാർത്തകളും തൊഴിൽ അവസരങ്ങളും അതിവേഗം അറിയാൻ വാട്സ്ആപ്പ് ഗ്രൂപ്പിൽ അംഗമാവുക https://chat.whatsapp.com/Dbf59JLetgBECJpr5UZOuZ?mode=gi_t

‘സ്ഫോടന ശബ്ദ’മുണ്ടാക്കുന്ന വാഹനങ്ങൾക്കെതിരെ യുഎഇയിൽ കർശന നടപടി; പിഴയും 12 ബ്ലാക്ക് പോയിന്റും

ജനവാസ മേഖലകളിൽ അർദ്ധരാത്രിയിൽ സ്ഫോടനത്തിന് സമാനമായ ശബ്ദമുണ്ടാക്കി ജനങ്ങളിൽ പരിഭ്രാന്തി സൃഷ്ടിക്കുന്ന വിധത്തിൽ നിയമവിരുദ്ധമായി രൂപമാറ്റം വരുത്തിയ കാറുകളുടെയും മോട്ടോർ സൈക്കിളുകളുടെയും യുഎഇ പോലീസ് കർശന നടപടികൾ ആരംഭിച്ചു. മേഖലയിലെ സംഘർഷാവസ്ഥ വാർത്തകളിൽ നിറഞ്ഞുനിൽക്കുന്ന സാഹചര്യത്തിൽ ഇത്തരം വാഹനങ്ങളിൽ നിന്നുണ്ടാകുന്ന ‘ബാക്ക് ഫയർ’ ശബ്ദങ്ങൾ പലരും മിസൈൽ ആക്രമണമോ സ്ഫോടനമോ ആണെന്ന് തെറ്റിദ്ധരിച്ച് ഭീതിയിലായിരുന്നുവെന്ന് അധികൃതർ വ്യക്തമാക്കി. എഞ്ചിനുകളിൽ മാറ്റം വരുത്തി ഉദ്ദേശപൂർവ്വം ശക്തമായ ശബ്ദമുണ്ടാക്കുന്നത് പ്രധാനമായും കൗമാരക്കാരും യുവാക്കളുമാണെന്ന് അന്വേഷണത്തിൽ കണ്ടെത്തിയതായി പോലീസ് അറിയിച്ചു. റിപ്പോർട്ട് ചെയ്യപ്പെട്ട ശബ്ദങ്ങൾ വാഹനങ്ങളിൽ നിന്നുള്ളതാണെന്നും രാജ്യത്തിന്റെ സുരക്ഷയെ ബാധിക്കുന്ന യാതൊരു ഭീഷണിയും നിലവിലില്ലെന്നും അധികൃതർ ജനങ്ങളെ ആശ്വസിപ്പിച്ചു. യുഎഇ പൂർണ്ണമായും സുരക്ഷിതമാണെന്നും പോലീസ് വ്യക്തമാക്കി.

ദുബായ്, ഷാർജ തുടങ്ങിയ എമിറേറ്റുകളിലെ ജനവാസ പ്രദേശങ്ങളിൽ രാത്രികാല പോലീസ് പട്രോളിംഗ് ശക്തമാക്കിയിട്ടുണ്ട്. യുഎഇ ട്രാഫിക് നിയമപ്രകാരം അമിത ശബ്ദമുണ്ടാക്കുന്ന വാഹനങ്ങൾ ഓടിക്കുന്നവർക്ക് 2000 ദിർഹം പിഴയും 12 ബ്ലാക്ക് പോയിന്റുകളും ലഭിക്കും. കൂടാതെ വാഹനം പോലീസ് പിടിച്ചെടുക്കുകയും ചെയ്യും. അനധികൃതമായി രൂപമാറ്റം വരുത്തിയ വാഹനങ്ങൾ തിരികെ ലഭിക്കാൻ 10,000 ദിർഹം വരെ ഫീസ് നൽകേണ്ടിവരുമെന്നും അധികൃതർ അറിയിച്ചു. ഈ നടപടി കർശനമായി നടപ്പാക്കുന്നതിന് ദുബായ് പോലീസ് ഓപ്പറേഷൻസ് അസിസ്റ്റന്റ് കമാൻഡർ-ഇൻ-ചീഫ് മേജർ ജനറൽ സെയ്ഫ് മുഹൈർ അൽ മസ്‌റൂയിയും ഷാർജ പോലീസ് സെൻട്രൽ റീജിയൻ ഡയറക്ടർ ബ്രിഗേഡിയർ ഖലീഫ അൽ ഖസൂനിയും നേതൃത്വമൊരുക്കുന്നുണ്ട്. കുട്ടികൾ വാഹനങ്ങളിൽ അനധികൃത മാറ്റങ്ങൾ വരുത്തുന്നില്ലെന്ന് മാതാപിതാക്കൾ ശ്രദ്ധിക്കണമെന്നും അധികൃതർ അഭ്യർത്ഥിച്ചു. ഇത്തരം ശബ്ദശല്യം ഉണ്ടാക്കുന്ന വാഹനങ്ങളെക്കുറിച്ച് ഔദ്യോഗിക ചാനലുകൾ വഴി പോലീസിനെ അറിയിക്കണമെന്നും പൊതുജനങ്ങളോട് നിർദേശിച്ചിട്ടുണ്ട്. മേഖലയിലെ നിലവിലെ സാഹചര്യം പരിഗണിച്ച് ജനങ്ങളുടെ സമാധാനവും സുരക്ഷയും ഉറപ്പാക്കുക എന്ന ലക്ഷ്യത്തോടെയാണ് ഈ നടപടികൾ ശക്തമാക്കിയതെന്നും പോലീസ് അറിയിച്ചു. പോലീസിന്റെ ഈ ഇടപെടലിനെ പ്രവാസികളും സ്വദേശികളും സ്വാഗതം ചെയ്തിട്ടുണ്ട്.യുഎഇയിലെ വാർത്തകളും തൊഴിൽ അവസരങ്ങളും അതിവേഗം അറിയാൻ വാട്സ്ആപ്പ് ഗ്രൂപ്പിൽ അംഗമാവുhttps://chat.whatsapp.com/Dbf59JLetgBECJpr5UZOuZ?mode=gi_t