മതിയായ ഈടില്ലാതെ അനുവദിച്ച വായ്പകൾ തിരിച്ചുപിടിക്കാൻ ബാങ്കുകൾക്ക് നിയമപരമായ അവകാശമില്ലെന്ന് വ്യക്തമാക്കുന്ന നിർണായക വിധി അബുദാബി കൊമേഴ്സ്യൽ കോടതി പുറപ്പെടുവിച്ചു. ഒരു യുവതിയിൽ നിന്നും അവരുടെ ഗ്യാരന്ററിൽ നിന്നുമായി 9,49,938 ദിർഹം ഈടാക്കണമെന്നാവശ്യപ്പെട്ട് ബാങ്ക് നൽകിയ ഹർജി കോടതി തള്ളി. വായ്പ തുകയും മുടങ്ങിയ തീയതി മുതൽ ഒമ്പത് ശതമാനം പലിശയും നിയമച്ചെലവുകളും ഉൾപ്പെടുത്തി തിരിച്ചുപിടിക്കണമെന്നായിരുന്നു ബാങ്കിന്റെ ആവശ്യം. വായ്പാ കരാർ, അക്കൗണ്ട് സ്റ്റേറ്റ്‌മെന്റുകൾ, ഗ്യാരന്റി രേഖകൾ എന്നിവ ബാങ്ക് കോടതിയിൽ ഹാജരാക്കിയിരുന്നുവെങ്കിലും, വായ്പ അനുവദിക്കുന്ന സമയത്ത് ആവശ്യമായ നിയമപരമായ സുരക്ഷാ ഉറപ്പുകൾ ബാങ്ക് നേടിയിട്ടില്ലെന്ന് കോടതി കണ്ടെത്തി.

2025ലെ ഫെഡറൽ ഡിക്രി നിയമത്തിലെ വ്യവസ്ഥകൾ പ്രകാരം, ലൈസൻസുള്ള സാമ്പത്തിക സ്ഥാപനങ്ങൾ വായ്പ അനുവദിക്കുമ്പോൾ മതിയായ ഈടുകൾ ഉറപ്പാക്കേണ്ടത് നിർബന്ധമാണെന്ന് കോടതി ചൂണ്ടിക്കാട്ടി. ആവശ്യമായ ഗ്യാരന്റികളില്ലാതെ അനുവദിച്ച വായ്പകൾ തിരിച്ചുപിടിക്കാൻ കോടതികളെയോ ആർബിട്രേഷൻ സംവിധാനങ്ങളെയോ സമീപിക്കാൻ ബാങ്കുകൾക്ക് അവകാശമില്ലെന്നും വിധിയിൽ വ്യക്തമാക്കി. പൂർണമായ വായ്പ തുകയ്ക്ക് ഒറ്റ ചെക്ക് ഈടായി സ്വീകരിക്കുന്നത് അംഗീകരിക്കാനാവില്ലെന്നും, വായ്പ ഗഡുക്കളായി തിരിച്ചടയ്ക്കുന്ന സാഹചര്യത്തിൽ ഓരോ ഗഡുവിനും തുല്യമായ ചെക്കുകൾ വേണമെന്നും കോടതി നിർദേശിച്ചു. കൂടാതെ, ഈ ചെക്കുകളുടെ ആകെ മൂല്യം വായ്പ തുകയുടെ 120 ശതമാനം കവിയാൻ പാടില്ലെന്നും വ്യക്തമാക്കി.

കരാറുകൾ ഇരുപക്ഷത്തിനും ബാധകമാണെങ്കിലും അവ നിലവിലുള്ള നിയമങ്ങളോടും പൊതുതാൽപര്യങ്ങളോടും പൊരുത്തപ്പെടണം എന്നത് നിർബന്ധമാണെന്നും കോടതി ഓർമ്മിപ്പിച്ചു. ഈ കേസിൽ നിയമാനുസൃതമായ സുരക്ഷാ മാനദണ്ഡങ്ങൾ പാലിക്കാതിരുന്നത് ബാങ്കിന്റെ വീഴ്ചയാണെന്ന് വിലയിരുത്തിയ കോടതി, ബാങ്കിന്റെ ഹർജി തള്ളുകയും കേസുമായി ബന്ധപ്പെട്ട നിയമച്ചെലവുകൾ ബാങ്ക് തന്നെ വഹിക്കണമെന്നും ഉത്തരവിട്ടു.യുഎഇയിലെ വാർത്തകളും തൊഴിൽ അവസരങ്ങളും അതിവേഗം അറിയാൻ വാട്സ്ആപ്പ് ഗ്രൂപ്പിൽ അംഗമാവുക https://chat.whatsapp.com/Dbf59JLetgBECJpr5UZOuZ?mode=gi_t

‘സ്ഫോടന ശബ്ദ’മുണ്ടാക്കുന്ന വാഹനങ്ങൾക്കെതിരെ യുഎഇയിൽ കർശന നടപടി; പിഴയും 12 ബ്ലാക്ക് പോയിന്റും

ജനവാസ മേഖലകളിൽ അർദ്ധരാത്രിയിൽ സ്ഫോടനത്തിന് സമാനമായ ശബ്ദമുണ്ടാക്കി ജനങ്ങളിൽ പരിഭ്രാന്തി സൃഷ്ടിക്കുന്ന വിധത്തിൽ നിയമവിരുദ്ധമായി രൂപമാറ്റം വരുത്തിയ കാറുകളുടെയും മോട്ടോർ സൈക്കിളുകളുടെയും യുഎഇ പോലീസ് കർശന നടപടികൾ ആരംഭിച്ചു. മേഖലയിലെ സംഘർഷാവസ്ഥ വാർത്തകളിൽ നിറഞ്ഞുനിൽക്കുന്ന സാഹചര്യത്തിൽ ഇത്തരം വാഹനങ്ങളിൽ നിന്നുണ്ടാകുന്ന ‘ബാക്ക് ഫയർ’ ശബ്ദങ്ങൾ പലരും മിസൈൽ ആക്രമണമോ സ്ഫോടനമോ ആണെന്ന് തെറ്റിദ്ധരിച്ച് ഭീതിയിലായിരുന്നുവെന്ന് അധികൃതർ വ്യക്തമാക്കി. എഞ്ചിനുകളിൽ മാറ്റം വരുത്തി ഉദ്ദേശപൂർവ്വം ശക്തമായ ശബ്ദമുണ്ടാക്കുന്നത് പ്രധാനമായും കൗമാരക്കാരും യുവാക്കളുമാണെന്ന് അന്വേഷണത്തിൽ കണ്ടെത്തിയതായി പോലീസ് അറിയിച്ചു. റിപ്പോർട്ട് ചെയ്യപ്പെട്ട ശബ്ദങ്ങൾ വാഹനങ്ങളിൽ നിന്നുള്ളതാണെന്നും രാജ്യത്തിന്റെ സുരക്ഷയെ ബാധിക്കുന്ന യാതൊരു ഭീഷണിയും നിലവിലില്ലെന്നും അധികൃതർ ജനങ്ങളെ ആശ്വസിപ്പിച്ചു. യുഎഇ പൂർണ്ണമായും സുരക്ഷിതമാണെന്നും പോലീസ് വ്യക്തമാക്കി.

ദുബായ്, ഷാർജ തുടങ്ങിയ എമിറേറ്റുകളിലെ ജനവാസ പ്രദേശങ്ങളിൽ രാത്രികാല പോലീസ് പട്രോളിംഗ് ശക്തമാക്കിയിട്ടുണ്ട്. യുഎഇ ട്രാഫിക് നിയമപ്രകാരം അമിത ശബ്ദമുണ്ടാക്കുന്ന വാഹനങ്ങൾ ഓടിക്കുന്നവർക്ക് 2000 ദിർഹം പിഴയും 12 ബ്ലാക്ക് പോയിന്റുകളും ലഭിക്കും. കൂടാതെ വാഹനം പോലീസ് പിടിച്ചെടുക്കുകയും ചെയ്യും. അനധികൃതമായി രൂപമാറ്റം വരുത്തിയ വാഹനങ്ങൾ തിരികെ ലഭിക്കാൻ 10,000 ദിർഹം വരെ ഫീസ് നൽകേണ്ടിവരുമെന്നും അധികൃതർ അറിയിച്ചു. ഈ നടപടി കർശനമായി നടപ്പാക്കുന്നതിന് ദുബായ് പോലീസ് ഓപ്പറേഷൻസ് അസിസ്റ്റന്റ് കമാൻഡർ-ഇൻ-ചീഫ് മേജർ ജനറൽ സെയ്ഫ് മുഹൈർ അൽ മസ്‌റൂയിയും ഷാർജ പോലീസ് സെൻട്രൽ റീജിയൻ ഡയറക്ടർ ബ്രിഗേഡിയർ ഖലീഫ അൽ ഖസൂനിയും നേതൃത്വമൊരുക്കുന്നുണ്ട്. കുട്ടികൾ വാഹനങ്ങളിൽ അനധികൃത മാറ്റങ്ങൾ വരുത്തുന്നില്ലെന്ന് മാതാപിതാക്കൾ ശ്രദ്ധിക്കണമെന്നും അധികൃതർ അഭ്യർത്ഥിച്ചു. ഇത്തരം ശബ്ദശല്യം ഉണ്ടാക്കുന്ന വാഹനങ്ങളെക്കുറിച്ച് ഔദ്യോഗിക ചാനലുകൾ വഴി പോലീസിനെ അറിയിക്കണമെന്നും പൊതുജനങ്ങളോട് നിർദേശിച്ചിട്ടുണ്ട്. മേഖലയിലെ നിലവിലെ സാഹചര്യം പരിഗണിച്ച് ജനങ്ങളുടെ സമാധാനവും സുരക്ഷയും ഉറപ്പാക്കുക എന്ന ലക്ഷ്യത്തോടെയാണ് ഈ നടപടികൾ ശക്തമാക്കിയതെന്നും പോലീസ് അറിയിച്ചു. പോലീസിന്റെ ഈ ഇടപെടലിനെ പ്രവാസികളും സ്വദേശികളും സ്വാഗതം ചെയ്തിട്ടുണ്ട്.യുഎഇയിലെ വാർത്തകളും തൊഴിൽ അവസരങ്ങളും അതിവേഗം അറിയാൻ വാട്സ്ആപ്പ് ഗ്രൂപ്പിൽ അംഗമാവുhttps://chat.whatsapp.com/Dbf59JLetgBECJpr5UZOuZ?mode=gi_t