യുഎഇയിൽ 18 വയസ്സിന് താഴെയുള്ളവരുടെ വിവാഹത്തിന് കർശന നിയന്ത്രണങ്ങളും നിബന്ധനകളും ഏർപ്പെടുത്തിക്കൊണ്ട് നിയമപരിഷ്കാരം നിലവിൽ വന്നു. 18 വയസ്സ് തികയാത്ത ആൺകുട്ടികളുടെയോ പെൺകുട്ടികളുടെയോ വിവാഹം രജിസ്റ്റർ ചെയ്യുന്നത് നിയമപരമായി നിരോധിച്ചിട്ടുണ്ടെങ്കിലും, പ്രത്യേക സാഹചര്യങ്ങളിൽ കോടതിയുടെ അനുമതിയോടെ മാത്രം നൽകിയിരുന്ന ഇളവുകളിലാണ് ഇപ്പോൾ കടുത്ത നിയന്ത്രണങ്ങൾ കൊണ്ടുവന്നിരിക്കുന്നത്. വിവാഹം കുട്ടിയുടെ താൽപ്പര്യങ്ങൾക്കും സുരക്ഷയ്ക്കും അനുയോജ്യമാണെന്ന് ഉറപ്പുവരുത്താൻ വിപുലമായ പരിശോധനാ സംവിധാനങ്ങളാണ് ഒരുക്കിയിരിക്കുന്നത്.

പുതിയ നിയമപ്രകാരം ഇത്തരം വിവാഹ അപേക്ഷകൾ പരിശോധിക്കാൻ ഒരു പ്രത്യേക വിദഗ്ധ സമിതിയെ (Specialised Review Committee) നിയോഗിക്കും. ഈ സമിതി രണ്ട് കക്ഷികളുമായും നേരിട്ട് സംസാരിക്കുകയും അവരുടെ സാമ്പത്തിക, ആരോഗ്യ, മാനസിക നിലവാരത്തെക്കുറിച്ച് വിശദമായ റിപ്പോർട്ട് കോടതിക്ക് നൽകുകയും വേണം. കുട്ടിയുടെ അഭിപ്രായം ആരുടെയും സമ്മർദ്ദമില്ലാതെ സ്വതന്ത്രമായി കേൾക്കണമെന്നത് സമിതിയുടെ നിർബന്ധിത ചുമതലയാണ്. കൂടാതെ ശാരീരിക പക്വത തെളിയിക്കുന്ന മെഡിക്കൽ റിപ്പോർട്ട്, മാനസികാരോഗ്യ സർട്ടിഫിക്കറ്റ്, കുറ്റകൃത്യങ്ങളിൽ ഏർപ്പെട്ടിട്ടില്ലെന്ന് വ്യക്തമാക്കുന്ന പോലീസ് ക്ലിയറൻസ്, സാമ്പത്തിക ശേഷി തെളിയിക്കുന്ന രേഖകൾ എന്നിവയും ഹാജരാക്കണം.

കോടതി അപേക്ഷ നിരസിച്ചാൽ ആറുമാസത്തിന് ശേഷം മാത്രമേ പുതിയ അപേക്ഷ നൽകാൻ സാധിക്കൂ എന്ന നിബന്ധനയും പുതിയ നിയമത്തിലുണ്ട്. രാജ്യാന്തര മാനദണ്ഡങ്ങൾക്കനുസൃതമായി കുട്ടികളുടെ അവകാശങ്ങൾ സംരക്ഷിക്കുന്നതിനും നിർബന്ധിത വിവാഹങ്ങൾ തടയുന്നതിനുമാണ് യുഎഇ ഈ സുപ്രധാന നീക്കം നടത്തിയിരിക്കുന്നത്. നീതിന്യായ മന്ത്രാലയത്തിന്റെ നേരിട്ടുള്ള മേൽനോട്ടത്തിലായിരിക്കും ഇനി ഇത്തരം വിവാഹ അപേക്ഷകളിന്മേൽ തീരുമാനമെടുക്കുക.യുഎഇയിലെ വാർത്തകളും തൊഴിൽ അവസരങ്ങളും അതിവേഗം അറിയാൻ വാട്സ്ആപ്പ് ഗ്രൂപ്പിൽ അംഗമാവുക https://chat.whatsapp.com/DfsJVtpVohVHb4aFdLbW46?mode=wwt

വീസ കാലാവധി കഴിഞ്ഞ പ്രവാസികൾക്ക് ആശ്വാസം; പുതിയ എൻട്രി പെർമിറ്റ് ഇല്ലാതെ യുഎഇയിലേക്ക് മടങ്ങാം

വിദേശത്തിരിക്കെ റസിഡൻസ് വീസ കാലാവധി കഴിഞ്ഞ യുഎഇ പ്രവാസികൾക്ക് പ്രത്യേക അനുമതിയോടെ രാജ്യത്തേക്ക് മടങ്ങാനുള്ള അവസരം ഒരുക്കി ഫെഡറൽ അതോറിറ്റി ഫോർ ഐഡന്റിറ്റി, സിറ്റിസൺഷിപ്, കസ്റ്റംസ് ആൻഡ് പോർട്ട് സെക്യൂരിറ്റി (ഐസിപി). പുതിയ എൻട്രി പെർമിറ്റ് ഇല്ലാതെയും ഇവർക്ക് യുഎഇയിൽ പ്രവേശിക്കാമെന്നാണ് അധികൃതർ അറിയിച്ചത്. 2026 ഫെബ്രുവരി 28നോ അതിനു ശേഷമോ വിദേശത്തിരിക്കെ വീസ കാലാവധി കഴിഞ്ഞവർക്കാണ് ഈ സൗകര്യം ബാധകമാകുക. പശ്ചിമേഷ്യയിലെ സംഘർഷാവസ്ഥയെ തുടർന്ന് പല രാജ്യങ്ങളിലും വിമാന സർവീസുകൾ നിർത്തിവച്ചതും വ്യോമപാതകൾ അടച്ചതുമാണ് പലർക്കും സമയത്ത് യുഎഇയിലേക്ക് മടങ്ങാൻ തടസ്സമായത്. ഈ സാഹചര്യത്തിൽ പ്രവാസികൾക്ക് സഹായകരമായ നടപടിയായാണ് പുതിയ തീരുമാനം.

മാർച്ച് 31 വരെയാണ് ഈ ഇളവ് അനുവദിച്ചിരിക്കുന്നത്. ഈ കാലയളവിനുള്ളിൽ വീസ കാലാവധി കഴിഞ്ഞ പ്രവാസികൾക്ക് യുഎഇയിലേക്ക് മടങ്ങിവരാൻ കഴിയും. കൂടാതെ ഈ കാലയളവിൽ ഉണ്ടായ ഓവർസ്റ്റേ പിഴ ഈടാക്കില്ലെന്നും അധികൃതർ വ്യക്തമാക്കി. രാജ്യത്ത് തിരിച്ചെത്തിയ ശേഷം നിയമപരമായ നടപടികൾ പൂർത്തിയാക്കി വീസ പുതുക്കി താമസ പദവി ശരിയാക്കാനുള്ള അവസരവും ലഭിക്കും. വിദേശങ്ങളിൽ കുടുങ്ങിയ പ്രവാസികൾക്ക് കുടുംബങ്ങളുമായി വീണ്ടും ഒന്നിക്കാൻ സഹായിക്കുന്ന മാനുഷികമായ നടപടിയാണിതെന്ന് ഐസിപി അറിയിച്ചു. യാത്ര തിരിക്കുന്നതിന് മുൻപ് വിമാന ടിക്കറ്റും മറ്റ് ആവശ്യമായ യാത്രാ രേഖകളും വിമാനക്കമ്പനിയുമായി ബന്ധപ്പെട്ട് ഉറപ്പാക്കണമെന്നും അധികൃതർ പ്രവാസികളെ ഓർമ്മിപ്പിച്ചു.യുഎഇയിലെ വാർത്തകളും തൊഴിൽ അവസരങ്ങളും അതിവേഗം അറിയാൻ വാട്സ്ആപ്പ് ഗ്രൂപ്പിൽ അംഗമാവുക https://chat.whatsapp.com/DfsJVtpVohVHb4aFdLbW46?mode=wwt