Malayali man dies in prison; വാഹനത്തിൽ നിരോധിത വസ്തുക്കൾ കണ്ടെത്തിയെന്നാരോപിച്ച് ജയിലിലടയ്ക്കപ്പെട്ട മലയാളി യുവാവ് റിയാദിൽ അന്തരിച്ചു. കൊല്ലം പുനലൂർ സ്വദേശി സജീദ് ജമാലുദ്ദീൻ (42) ആണ് കിങ് സൗദ് മെഡിക്കൽ സിറ്റിയിൽ ചികിത്സയിലിരിക്കെ മരണപ്പെട്ടത്. എട്ടു വർഷമായി സൗദിയിൽ ഡ്രൈവറായി ജോലി ചെയ്തുവരികയായിരുന്നു സജീദ്. 2024 ഒക്ടോബറിൽ നടന്ന വാഹന പരിശോധനയ്ക്കിടെയാണ് ഇദ്ദേഹം പിടിയിലാകുന്നത്. തന്റെ വാഹനത്തിലുണ്ടായിരുന്നത് നിരോധിത വസ്തുക്കളാണെന്ന കാര്യം സജീദ് അറിഞ്ഞിരുന്നില്ലെന്ന് പറയപ്പെടുന്നുവെങ്കിലും, കോടതിയിൽ നിരപരാധിത്വം തെളിയിക്കാൻ സാധിച്ചില്ല. തുടർന്ന് അദ്ദേഹത്തിന് ഏഴു വർഷത്തെ തടവുശിക്ഷ വിധിക്കുകയായിരുന്നു. ശിക്ഷാ കാലാവധിയുടെ ഒരു വർഷം പൂർത്തിയായപ്പോഴാണ് സജീദ് ജയിലിൽ വെച്ച് രക്തം ഛർദ്ദിച്ചത്. തുടർന്ന് നടത്തിയ പരിശോധനയിൽ കരൾ അർബുദം (ലിവർ ക്യാൻസർ) സ്ഥിരീകരിച്ചു. ആരോഗ്യനില വഷളായതോടെ കിങ് സൗദ് മെഡിക്കൽ സിറ്റിയിലേക്ക് മാറ്റുകയും, അവസാന രണ്ടു മാസക്കാലം തീവ്രപരിചരണ വിഭാഗത്തിൽ (ഐ.സി.യു) ചികിത്സയിലുമായിരുന്നു. അമ്മയും രണ്ട് സഹോദരിമാരും അടങ്ങുന്നതാണ് സജീദിന്റെ കുടുംബം. പ്രവാസ ജീവിതത്തിൽ അപ്രതീക്ഷിതമായി നേരിടേണ്ടി വന്ന നിയമക്കുരുക്കും മാരകരോഗവും സജീദിന്റെ ജീവിതം തകർത്തു. സജീദിന്റെ വേർപാട് കുടുംബത്തിന് തീരാനഷ്ടമാണ് സമ്മാനിച്ചിരിക്കുന്നത്. മൃതദേഹം നാട്ടിലെത്തിക്കുന്നതിനുള്ള നടപടികൾ ‘കേളി കലാസാംസ്കാരിക വേദി’യുടെ ജീവകാരുണ്യ വിഭാഗത്തിന്റെ നേതൃത്വത്തിൽ പൂർത്തിയാക്കി. ഇന്ത്യൻ എംബസിയുടെ സഹായത്തോടെ ദമാം വഴിയാണ് മൃതദേഹം നാട്ടിലെത്തിക്കുന്നത്. കേളി ജീവകാരുണ്യ വിഭാഗം വൈസ് ചെയർമാൻ നാസർ പൊന്നാനിയുടെ നേതൃത്വത്തിലുള്ളവരാണ് തുടർനടപടികൾ ഏകോപിപ്പിച്ചത്.