അവധിക്കാല യാത്രയോ നാട്ടിൽ നിന്നുള്ള യുഎഇയിലേക്കുള്ള മടക്കയാത്രയോ ആണെങ്കിൽ, സ്യൂട്ട്കേസ് അടയ്ക്കും മുൻപ് ഒരിക്കൽ കൂടി അതിനുള്ളിലെ സാധനങ്ങൾ പരിശോധിക്കുന്നത് നല്ലതാണ്. വിമാനത്താവളത്തിലെ സുരക്ഷാ പരിശോധനയ്ക്കിടെ സാധനങ്ങൾ പിടിച്ചെടുക്കപ്പെടുകയോ യാത്ര വൈകുകയോ ചെയ്യാതിരിക്കാൻ യുഎഇയുടെ കസ്റ്റംസ്-വിമാന നിയമങ്ങൾ അറിഞ്ഞിരിക്കണം.

സ്യൂട്ട്കേസിൽ ഇവയുണ്ടെങ്കിൽ ഒന്ന് ശ്രദ്ധിക്കണം; യുഎഇയിലേക്ക് കൊണ്ടുപോകുന്നതിന് വിലക്കോ കർശന നിയന്ത്രണമോ ഉള്ള 20 സാധനങ്ങൾ:

1. വീട്ടിൽ പാകം ചെയ്ത ഭക്ഷണം
വീട്ടിൽ തയ്യാറാക്കിയ പാകം ചെയ്ത ഭക്ഷണങ്ങൾ യുഎഇയിലേക്ക് കൊണ്ടുവരുന്നതിന് നിയന്ത്രണങ്ങളുണ്ട്. കുടുംബത്തിനായി തയ്യാറാക്കിയതാണെന്ന കാരണത്താൽ എല്ലാത്തരം ഭക്ഷണവും അനുവദനീയമാകണമെന്നില്ല.

2. പോപ്പി വിത്തുകൾ
പാചകത്തിൽ ഉപയോഗിക്കുന്ന ചില പോപ്പി വിത്തുകൾ പോലും യുഎഇയിലെ മയക്കുമരുന്ന് നിയന്ത്രണങ്ങളുടെ പരിധിയിൽ വരാം. അതിനാൽ ഇവ കൊണ്ടുവരുന്നത് ഒഴിവാക്കുന്നതാണ് സുരക്ഷിതം.

3. ദുറിയാൻ, ജാക്ക്ഫ്രൂട്ട് പോലുള്ള രൂക്ഷഗന്ധമുള്ള പഴങ്ങൾ
വിമാനക്കമ്പനികളുടെ പ്രത്യേക നിയന്ത്രണങ്ങൾ കാരണം ഇത്തരം പഴങ്ങൾ ചില സർവീസുകളിൽ നിരോധിച്ചിട്ടുണ്ട്.

4. ശീതീകരണം ആവശ്യമായ ഭക്ഷണങ്ങൾ
പെട്ടെന്ന് കേടാകുന്ന മാംസ ഉൽപ്പന്നങ്ങൾ, ഫ്രോസൺ ഭക്ഷണം, ഡ്രൈ ഐസ് തുടങ്ങിയവയ്ക്ക് പ്രത്യേക നിയന്ത്രണങ്ങളുണ്ട്.

5. പന്നിയിറച്ചി ഉൽപ്പന്നങ്ങൾ
പന്നിയിറച്ചി ഉപയോഗിച്ചുള്ള ഭക്ഷണങ്ങൾക്കും ചില ജെലാറ്റിൻ ഉൽപ്പന്നങ്ങൾക്കും എയർലൈൻ, കസ്റ്റംസ് നിയന്ത്രണങ്ങൾ ബാധകമാണ്.

6. ചില പലചരക്ക് സാധനങ്ങൾ
ഉണങ്ങിയ തേങ്ങ, കൊപ്ര തുടങ്ങിയവയ്ക്ക് നിയന്ത്രണങ്ങളുണ്ട്. മുളകുപൊടി പോലുള്ള പൊടികൾ ക്യാബിൻ ബാഗേജിൽ അനുവദിക്കാത്ത സാഹചര്യങ്ങളുണ്ടെങ്കിലും ചെക്ക്ഡ് ബാഗേജിൽ നിശ്ചിത വ്യവസ്ഥകളോടെ അനുവദിച്ചേക്കാം. നെയ്യും പാചക എണ്ണയും അളവ് പരിധിക്ക് വിധേയമാണ്.

7. വാണിജ്യ അളവിലുള്ള ഭക്ഷ്യവസ്തുക്കൾ
വലിയ തോതിൽ ഭക്ഷണസാധനങ്ങൾ വ്യക്തിഗത ഉപയോഗത്തിനെന്ന പേരിൽ കൊണ്ടുവരുന്നത് പ്രശ്നങ്ങൾക്ക് ഇടയാക്കാം.

8. സൂപ്പ്, സോസ്, ജാം തുടങ്ങിയ ദ്രാവക ഭക്ഷണങ്ങൾ
ക്യാബിൻ ബാഗേജിൽ ഇവ ലിക്വിഡ് നിയന്ത്രണങ്ങൾക്ക് വിധേയമാണ്. വലിയ അളവിലുള്ള കണ്ടെയ്‌നറുകൾ സാധാരണയായി ചെക്ക്ഡ് ബാഗേജിലാക്കണം.

9. ശിശുഭക്ഷണവും പ്രത്യേക ഡയറ്റ് ഉൽപ്പന്നങ്ങളും
കുഞ്ഞുങ്ങൾക്കുള്ള ഭക്ഷണമോ പ്രത്യേക ആവശ്യങ്ങൾക്കുള്ള ഭക്ഷണ/മെഡിക്കൽ ഉൽപ്പന്നങ്ങളോ കൊണ്ടുപോകുമ്പോൾ ആവശ്യമായ രേഖകൾ കൈവശം സൂക്ഷിക്കുന്നത് നല്ലതാണ്.

10. സംസം വെള്ളം
സംസം വെള്ളത്തിന് പ്രത്യേക പാക്കേജിംഗ്, അളവ്, യാത്രാ നിബന്ധനകൾ ബാധകമാണ്. അംഗീകൃത കേന്ദ്രത്തിൽ നിന്ന് ലഭിക്കുന്ന സീൽ ചെയ്ത പാക്കേജുകൾ മാത്രമേ അനുവദിക്കൂ.

11. പടക്കങ്ങളും സ്ഫോടകവസ്തുക്കളും
പടക്കങ്ങൾ, വെടിമരുന്ന്, ഫ്ലെയറുകൾ തുടങ്ങിയവ വിമാനത്തിൽ കൊണ്ടുപോകുന്നത് കർശനമായി നിരോധിച്ചിട്ടുണ്ട്.

12. പെപ്പർ സ്പ്രേയും ടേസറുകളും
സ്വയംരക്ഷയ്ക്കായി ഉപയോഗിക്കുന്ന ഇത്തരം ഉപകരണങ്ങൾ വിമാനത്തിൽ അനുവദനീയമല്ല.

13. ഹോവർബോർഡുകൾ
മോട്ടോറും ലിഥിയം ബാറ്ററിയുമുള്ള സെൽഫ്-ബാലൻസിങ് ഉപകരണങ്ങൾക്ക് കർശന നിയന്ത്രണമുണ്ട്; ബാറ്ററി നീക്കം ചെയ്താലും എല്ലാ സാഹചര്യങ്ങളിലും യാത്ര അനുവദിക്കണമെന്നില്ല.

14. മോട്ടോറൈസ്ഡ് സ്യൂട്ട്കേസുകൾ
റൈഡ് ചെയ്യാവുന്ന ഇലക്ട്രിക് ലഗേജുകൾക്കും സ്മാർട്ട് ബാഗുകൾക്കും ബാറ്ററിയുമായി ബന്ധപ്പെട്ട പ്രത്യേക വ്യവസ്ഥകളുണ്ട്.

15. പവർ ബാങ്കുകൾ
പവർ ബാങ്കുകൾ ചെക്ക്ഡ് ബാഗേജിൽ ഇടരുത്. അനുവദനീയമായ ശേഷിയുടെ പരിധിക്കുള്ളിൽ ഉള്ളവ ക്യാബിൻ ബാഗേജിൽ മാത്രമാണ് സാധാരണയായി കൊണ്ടുപോകേണ്ടത്.

16. സ്പെയർ ബാറ്ററികൾ
സ്പെയർ ലിഥിയം ബാറ്ററികൾ സുരക്ഷിതമായി പാക്ക് ചെയ്ത് ക്യാബിൻ ബാഗേജിൽ, ബന്ധപ്പെട്ട എയർലൈനിന്റെ നിർദേശപ്രകാരം മാത്രമേ കൊണ്ടുപോകാവൂ.

17. ഉയർന്ന ശേഷിയുള്ള ലിഥിയം ബാറ്ററികൾ
അനുവദിച്ച പരിധിക്ക് മുകളിലുള്ള ബാറ്ററികൾക്ക് എയർലൈനിന്റെ മുൻകൂർ അനുമതി ആവശ്യമായി വരാം.

18. ഇ-സിഗരറ്റുകൾ
ഇ-സിഗരറ്റുകളും വേപ്പിങ് ഉപകരണങ്ങളും ചെക്ക്ഡ് ബാഗേജിൽ ഇടാൻ പാടില്ല; ഇവയ്ക്ക് ക്യാബിൻ ബാഗേജുമായി ബന്ധപ്പെട്ട പ്രത്യേക നിബന്ധനകളുണ്ട്.

19. കത്തികളും മൂർച്ചയുള്ള ഉപകരണങ്ങളും
കത്തി, വലിയ കത്രിക തുടങ്ങിയ മൂർച്ചയുള്ള വസ്തുക്കൾ ക്യാബിൻ ബാഗേജിൽ അനുവദനീയമല്ല. ബാധകമായ നിയമങ്ങൾക്കനുസരിച്ച് ചെക്ക്ഡ് ബാഗേജിലാണ് ഇവ പാക്ക് ചെയ്യേണ്ടത്.

20. അപകടകാരികളായ രാസവസ്തുക്കൾ
കത്തുന്ന ദ്രാവകങ്ങൾ, കംപ്രസ് ചെയ്ത വാതകങ്ങൾ, വിഷാംശമുള്ള വസ്തുക്കൾ, നശിപ്പിക്കുന്ന രാസവസ്തുക്കൾ തുടങ്ങിയ അപകടകാരികളായ വസ്തുക്കൾക്ക് വിമാനയാത്രയിൽ കർശന വിലക്കുണ്ട്.

ഓരോ എയർലൈനിന്റെയും ബാഗേജ് നിബന്ധനകളും യുഎഇ കസ്റ്റംസ് ചട്ടങ്ങളും ഒരുപോലെയായിരിക്കണമെന്നില്ല. അതിനാൽ സ്യൂട്ട്കേസ് പാക്ക് ചെയ്യുന്നതിന് മുമ്പ് നിങ്ങൾ യാത്ര ചെയ്യുന്ന എയർലൈനിന്റെയും യുഎഇയിലെ ഔദ്യോഗിക കസ്റ്റംസ് അധികൃതരുടെയും ഏറ്റവും പുതിയ നിർദേശങ്ങൾ പരിശോധിച്ച് ഉറപ്പാക്കുക.