ഗുണനിലവാര പരിശോധനയിൽ മലിനീകരണത്തിന്റെ സൂചനകളും വിദേശവസ്തുക്കളും കണ്ടെത്തിയതിനെത്തുടർന്ന് മൂന്ന് പാളികളുള്ള നീല സർജിക്കൽ ഫേസ് മാസ്കുകളുടെ ഒരു ബാച്ച് യുഎഇ വിപണിയിൽനിന്ന് തിരിച്ചുവിളിക്കാൻ അധികൃതർ ഉത്തരവിട്ടു. ‘Nin 160 FMB-NML Facemask C G Blue 3PLY’ എന്ന ഉൽപ്പന്നത്തിന്റെ ബാച്ച് നമ്പർ 20251015 ആണ് മുൻകരുതൽ നടപടിയുടെ ഭാഗമായി പിൻവലിക്കുന്നത്. ഉൽപ്പന്നത്തിന്റെ ഗുണനിലവാരത്തെക്കുറിച്ച് പരാതി ലഭിച്ചതിനു പിന്നാലെ നടത്തിയ പരിശോധനയിലാണ് പ്രശ്നങ്ങൾ കണ്ടെത്തിയത്. എമിറേറ്റ്സ് ഡ്രഗ് എസ്റ്റാബ്ലിഷ്മെന്റാണ് (EDE) ബാച്ച് തിരിച്ചുവിളിക്കാൻ നിർദേശം നൽകിയത്. ദുബായിലെ സ്വകാര്യ ആരോഗ്യ മേഖലയിലെ ആശുപത്രികൾക്കും ക്ലിനിക്കുകൾക്കും മറ്റ് ആരോഗ്യസ്ഥാപനങ്ങൾക്കും ദുബായ് ഹെൽത്ത് അതോറിറ്റി (DHA) ഇതുസംബന്ധിച്ച സർക്കുലറും പുറത്തിറക്കി.

ഉപയോഗവും വിൽപനയും ഉടൻ നിർത്തണം

പ്രശ്നം കണ്ടെത്തിയ ബാച്ചിലുള്ള മാസ്കുകളുടെ വിൽപന, വിതരണം, ഉപയോഗം എന്നിവ ഉടൻ നിർത്താനാണ് ആരോഗ്യസ്ഥാപനങ്ങൾക്കും വിതരണക്കാർക്കും നൽകിയിരിക്കുന്ന നിർദേശം. കൈവശമുള്ള സ്റ്റോക്ക് പ്രത്യേകം മാറ്റിവെച്ച് ക്വാറന്റൈനിൽ സൂക്ഷിക്കണം. തുടർന്ന് ഇവ വിതരണക്കാരന് തിരികെ നൽകുകയും ചെയ്ത നടപടികളുടെ രേഖകൾ സൂക്ഷിക്കുകയും വേണം. യുഎഇയിൽ ഇതിനകം വിതരണം ചെയ്ത മാസ്കുകൾ വിപണിയിൽനിന്ന് പിൻവലിക്കാനും ബാക്കിയുള്ള സ്റ്റോക്ക് വേർതിരിച്ച് സൂക്ഷിക്കാനും വിതരണക്കാരോട് അധികൃതർ ആവശ്യപ്പെട്ടിട്ടുണ്ട്. ഇറക്കുമതി ചെയ്തതും വിതരണം ചെയ്തതും തിരിച്ചുവിളിച്ചതും ശേഷിക്കുന്നതുമായ മാസ്കുകളുടെ കണക്കുകളും വിതരണ കേന്ദ്രങ്ങളുടെ പട്ടികയും സമർപ്പിക്കണം.

പൊതുജനങ്ങൾ എന്തുചെയ്യണം?

ബാച്ച് നമ്പർ 20251015 ഉള്ള മാസ്കുകൾ വാങ്ങിയവർ അവയുടെ ഉപയോഗം ഉടൻ നിർത്തണം. വാങ്ങിയ കടയിലേക്കോ വിതരണക്കാരനിലേക്കോ തിരികെ നൽകാനാണ് അധികൃതർ നിർദേശിച്ചിരിക്കുന്നത്. ഉൽപ്പന്നവുമായി ബന്ധപ്പെട്ട ഗുണനിലവാര പ്രശ്നങ്ങളോ ആരോഗ്യപ്രശ്നങ്ങളോ ശ്രദ്ധയിൽപ്പെട്ടാൽ ഔദ്യോഗിക റിപ്പോർട്ടിങ് സംവിധാനങ്ങളിലൂടെ അറിയിക്കണമെന്നും അധികൃതർ വ്യക്തമാക്കി.യുഎഇയിലെ വാർത്തകളും തൊഴിൽ അവസരങ്ങളും അതിവേഗം അറിയാൻ വാട്സ്ആപ്പ് ഗ്രൂപ്പിൽ അംഗമാവുക https://chat.whatsapp.com/Dbf59JLetgBECJpr5UZOuZ?mode=gi_t

‘സ്ഫോടന ശബ്ദ’മുണ്ടാക്കുന്ന വാഹനങ്ങൾക്കെതിരെ യുഎഇയിൽ കർശന നടപടി; പിഴയും 12 ബ്ലാക്ക് പോയിന്റും

ജനവാസ മേഖലകളിൽ അർദ്ധരാത്രിയിൽ സ്ഫോടനത്തിന് സമാനമായ ശബ്ദമുണ്ടാക്കി ജനങ്ങളിൽ പരിഭ്രാന്തി സൃഷ്ടിക്കുന്ന വിധത്തിൽ നിയമവിരുദ്ധമായി രൂപമാറ്റം വരുത്തിയ കാറുകളുടെയും മോട്ടോർ സൈക്കിളുകളുടെയും യുഎഇ പോലീസ് കർശന നടപടികൾ ആരംഭിച്ചു. മേഖലയിലെ സംഘർഷാവസ്ഥ വാർത്തകളിൽ നിറഞ്ഞുനിൽക്കുന്ന സാഹചര്യത്തിൽ ഇത്തരം വാഹനങ്ങളിൽ നിന്നുണ്ടാകുന്ന ‘ബാക്ക് ഫയർ’ ശബ്ദങ്ങൾ പലരും മിസൈൽ ആക്രമണമോ സ്ഫോടനമോ ആണെന്ന് തെറ്റിദ്ധരിച്ച് ഭീതിയിലായിരുന്നുവെന്ന് അധികൃതർ വ്യക്തമാക്കി. എഞ്ചിനുകളിൽ മാറ്റം വരുത്തി ഉദ്ദേശപൂർവ്വം ശക്തമായ ശബ്ദമുണ്ടാക്കുന്നത് പ്രധാനമായും കൗമാരക്കാരും യുവാക്കളുമാണെന്ന് അന്വേഷണത്തിൽ കണ്ടെത്തിയതായി പോലീസ് അറിയിച്ചു. റിപ്പോർട്ട് ചെയ്യപ്പെട്ട ശബ്ദങ്ങൾ വാഹനങ്ങളിൽ നിന്നുള്ളതാണെന്നും രാജ്യത്തിന്റെ സുരക്ഷയെ ബാധിക്കുന്ന യാതൊരു ഭീഷണിയും നിലവിലില്ലെന്നും അധികൃതർ ജനങ്ങളെ ആശ്വസിപ്പിച്ചു. യുഎഇ പൂർണ്ണമായും സുരക്ഷിതമാണെന്നും പോലീസ് വ്യക്തമാക്കി. ദുബായ്, ഷാർജ തുടങ്ങിയ എമിറേറ്റുകളിലെ ജനവാസ പ്രദേശങ്ങളിൽ രാത്രികാല പോലീസ് പട്രോളിംഗ് ശക്തമാക്കിയിട്ടുണ്ട്. യുഎഇ ട്രാഫിക് നിയമപ്രകാരം അമിത ശബ്ദമുണ്ടാക്കുന്ന വാഹനങ്ങൾ ഓടിക്കുന്നവർക്ക് 2000 ദിർഹം പിഴയും 12 ബ്ലാക്ക് പോയിന്റുകളും ലഭിക്കും. കൂടാതെ വാഹനം പോലീസ് പിടിച്ചെടുക്കുകയും ചെയ്യും. അനധികൃതമായി രൂപമാറ്റം വരുത്തിയ വാഹനങ്ങൾ തിരികെ ലഭിക്കാൻ 10,000 ദിർഹം വരെ ഫീസ് നൽകേണ്ടിവരുമെന്നും അധികൃതർ അറിയിച്ചു. ഈ നടപടി കർശനമായി നടപ്പാക്കുന്നതിന് ദുബായ് പോലീസ് ഓപ്പറേഷൻസ് അസിസ്റ്റന്റ് കമാൻഡർ-ഇൻ-ചീഫ് മേജർ ജനറൽ സെയ്ഫ് മുഹൈർ അൽ മസ്‌റൂയിയും ഷാർജ പോലീസ് സെൻട്രൽ റീജിയൻ ഡയറക്ടർ ബ്രിഗേഡിയർ ഖലീഫ അൽ ഖസൂനിയും നേതൃത്വമൊരുക്കുന്നുണ്ട്. കുട്ടികൾ വാഹനങ്ങളിൽ അനധികൃത മാറ്റങ്ങൾ വരുത്തുന്നില്ലെന്ന് മാതാപിതാക്കൾ ശ്രദ്ധിക്കണമെന്നും അധികൃതർ അഭ്യർത്ഥിച്ചു. ഇത്തരം ശബ്ദശല്യം ഉണ്ടാക്കുന്ന വാഹനങ്ങളെക്കുറിച്ച് ഔദ്യോഗിക ചാനലുകൾ വഴി പോലീസിനെ അറിയിക്കണമെന്നും പൊതുജനങ്ങളോട് നിർദേശിച്ചിട്ടുണ്ട്. മേഖലയിലെ നിലവിലെ സാഹചര്യം പരിഗണിച്ച് ജനങ്ങളുടെ സമാധാനവും സുരക്ഷയും ഉറപ്പാക്കുക എന്ന ലക്ഷ്യത്തോടെയാണ് ഈ നടപടികൾ ശക്തമാക്കിയതെന്നും പോലീസ് അറിയിച്ചു. പോലീസിന്റെ ഈ ഇടപെടലിനെ പ്രവാസികളും സ്വദേശികളും സ്വാഗതം ചെയ്തിട്ടുണ്ട്.യുഎഇയിലെ വാർത്തകളും തൊഴിൽ അവസരങ്ങളും അതിവേഗം അറിയാൻ വാട്സ്ആപ്പ് ഗ്രൂപ്പിൽ അംഗമാവുhttps://chat.whatsapp.com/Dbf59JLetgBECJpr5UZOuZ?mode=gi_t