Abu Dhabi wastewater; മിക്ക ആന്റി-ഫംഗൽ മരുന്നുകളെയും പ്രതിരോധിക്കാൻ ശേഷിയുള്ള അതിമാരകവും അപൂർവവുമായ ഫംഗസിന്റെ വകഭേദം അബുദാബിയിലെ മലിനജലത്തിൽ കണ്ടെത്തി. മുൻകൂർ മുന്നറിയിപ്പ് നിരീക്ഷണ സംവിധാനത്തിലൂടെ കൃത്രിമ ബുദ്ധിയുടെ (AI) സഹായത്തോടെ നടത്തിയ പരിശോധനയിലാണ് യു.എ.ഇയിലെ ഗവേഷകർ ഈ സുപ്രധാന ശാസ്ത്രീയ നേട്ടം കൈവരിച്ചത്. അബുദാബി ക്വാളിറ്റി ആൻഡ് കോൺഫോർമിറ്റി കൗൺസിലിന്റെ സെൻട്രൽ ടെസ്റ്റിംഗ് ലബോറട്ടറിക്ക് കീഴിലുള്ള ‘റസീദ്’ വിഭാഗവും ആഗോള ഹെൽത്ത്‌കെയർ കമ്പനിയായ ‘M42’ ഉം സംയുക്തമായി നടത്തിയ പഠനത്തിലാണ് കണ്ടെത്തൽ. ‘കാൻഡിഡ ഓറിസ്’ എന്ന മാരക ഫംഗസ് രോഗകാരിയുടെ അപൂർവ വകഭേദമായ ‘ക്ലേഡ് 6’ ആണ് മലിനജലത്തിൽ നിന്ന് വിജയകരമായി വേർതിരിച്ചെടുത്തത്.

സാധാരണ ഉപയോഗിക്കുന്ന ഭൂരിഭാഗം ആന്റി-ഫംഗൽ മരുന്നുകളെയും അതിജീവിക്കാനുള്ള അസാധാരണ ശേഷിയാണ് കാൻഡിഡ ഓറിസ് ഫംഗസിനെ ആഗോളതലത്തിൽ ഭീതിജനകമാക്കുന്നത്. പ്രത്യേകിച്ച് ആശുപത്രികളിലും ആരോഗ്യ കേന്ദ്രങ്ങളിലും ഇത് വ്യാപിച്ചാൽ നിയന്ത്രിക്കുക ഏറെ ദുഷ്കരമാണ്. ഇതിന്റെ അപകടസാധ്യത കണക്കിലെടുത്ത് ലോകാരോഗ്യ സംഘടന (WHO) ഈ ഫംഗസിനെ അതീവ ഗുരുതരമായ പ്രയോറിറ്റി വിഭാഗത്തിലാണ് ഉൾപ്പെടുത്തിയിരിക്കുന്നത്. പ്രശസ്ത ശാസ്ത്ര ജേണലായ ‘നേച്ചർ’ ഗ്രൂപ്പിന്റെ ഭാഗമായ ‘കമ്മ്യൂണിക്കേഷൻസ് മെഡിസിനിൽ’ ഈ പഠന വിവരങ്ങൾ പ്രസിദ്ധീകരിച്ചിട്ടുണ്ട്. മലിനജലത്തിൽ ജനിതക അവശിഷ്ടങ്ങൾ കണ്ടെത്തുക മാത്രമല്ല, ഫംഗസിനെ നേരിട്ട് വേർതിരിച്ചെടുത്ത് ലബോറട്ടറിയിൽ ജീവനോടെ സ്ഥിരീകരിക്കുകയും ചെയ്തു എന്നതാണ് ഈ പഠനത്തിന്റെ പ്രധാന സവിശേഷത. ഇതിനായി 23,000-ലധികം മലിനജല സാമ്പിളുകളാണ് ശാസ്ത്രജ്ഞർ സൂക്ഷ്മ പരിശോധനയ്ക്ക് വിധേയമാക്കിയത്. ഹോൾ ജീനോം സീക്വൻസിംഗ് , ജനിതക ഘടനാ വിശകലനം, മരുന്നുകളെ പ്രതിരോധിക്കാനുള്ള ശേഷി പരിശോധിക്കൽ തുടങ്ങിയ അത്യാധുനിക സാങ്കേതിക വിദ്യകളാണ് ഇതിനായി ഉപയോഗിച്ചത്.

ആശുപത്രികളിൽ ആളുകൾക്ക് രോഗം ബാധിച്ചതിന് ശേഷം നടത്തുന്ന ക്ലിനിക്കൽ പരിശോധനകൾക്കൊപ്പം തന്നെ, ഇത്തരം മലിനജല നിരീക്ഷണങ്ങളും പൊതുജനാരോഗ്യ രംഗത്ത് വിപ്ലവകരമായ മാറ്റങ്ങൾ കൊണ്ടുവരുമെന്ന് ഗവേഷകർ ചൂണ്ടിക്കാട്ടുന്നു. സമൂഹത്തിൽ രോഗങ്ങൾ പടരുന്നതിന് മുൻപ് തന്നെ അപകടകരമായ രോഗകാരികളെയും അവയുടെ മരുന്ന് പ്രതിരോധ ശേഷികളെയും തിരിച്ചറിയാൻ ഈ സംവിധാനം സഹായിക്കും. ഈ കണ്ടെത്തൽ കാൻഡിഡ ഓറിസിന്റെ ജനിതക വൈവിധ്യത്തെക്കുറിച്ചും ആശുപത്രികൾക്ക് പുറത്തുള്ള അതിന്റെ സാന്നിധ്യത്തെക്കുറിച്ചും ആഗോളതലത്തിൽ പുതിയ അറിവ് നൽകുന്നുവെന്ന് പഠനത്തിന് നേതൃത്വം നൽകിയ മലയാളി ശാസ്ത്രജ്ഞനും M42-വിലെ സീനിയർ മൈക്രോബയോളജിസ്റ്റുമായ ഡോ. ഭുവനേഷ് ഷൺമുഖം ഉൾപ്പെടെയുള്ള ഗവേഷകർ വ്യക്തമാക്കി. ഭാവിയിൽ ഉണ്ടായേക്കാവുന്ന വലിയ ആരോഗ്യപ്രതിസന്ധികളെ മുൻകൂട്ടി കണ്ട് പ്രതിരോധിക്കാൻ ഇത്തരം കൃത്രിമബുദ്ധി അധിഷ്ഠിത പാരിസ്ഥിതിക നിരീക്ഷണ സംവിധാനങ്ങൾ രാജ്യത്തിന് കരുത്തേകുമെന്നാണ് വിലയിരുത്തൽ. യുഎഇയിലെ വാർത്തകളും തൊഴിൽ അവസരങ്ങളും അതിവേഗം അറിയാൻ വാട്സ്ആപ്പ് ഗ്രൂപ്പിൽ അംഗമാവുക https://chat.whatsapp.com/Dbf59JLetgBECJpr5UZOuZ?mode=gi_t

‘സ്ഫോടന ശബ്ദ’മുണ്ടാക്കുന്ന വാഹനങ്ങൾക്കെതിരെ യുഎഇയിൽ കർശന നടപടി; പിഴയും 12 ബ്ലാക്ക് പോയിന്റും

ജനവാസ മേഖലകളിൽ അർദ്ധരാത്രിയിൽ സ്ഫോടനത്തിന് സമാനമായ ശബ്ദമുണ്ടാക്കി ജനങ്ങളിൽ പരിഭ്രാന്തി സൃഷ്ടിക്കുന്ന വിധത്തിൽ നിയമവിരുദ്ധമായി രൂപമാറ്റം വരുത്തിയ കാറുകളുടെയും മോട്ടോർ സൈക്കിളുകളുടെയും യുഎഇ പോലീസ് കർശന നടപടികൾ ആരംഭിച്ചു. മേഖലയിലെ സംഘർഷാവസ്ഥ വാർത്തകളിൽ നിറഞ്ഞുനിൽക്കുന്ന സാഹചര്യത്തിൽ ഇത്തരം വാഹനങ്ങളിൽ നിന്നുണ്ടാകുന്ന ‘ബാക്ക് ഫയർ’ ശബ്ദങ്ങൾ പലരും മിസൈൽ ആക്രമണമോ സ്ഫോടനമോ ആണെന്ന് തെറ്റിദ്ധരിച്ച് ഭീതിയിലായിരുന്നുവെന്ന് അധികൃതർ വ്യക്തമാക്കി. എഞ്ചിനുകളിൽ മാറ്റം വരുത്തി ഉദ്ദേശപൂർവ്വം ശക്തമായ ശബ്ദമുണ്ടാക്കുന്നത് പ്രധാനമായും കൗമാരക്കാരും യുവാക്കളുമാണെന്ന് അന്വേഷണത്തിൽ കണ്ടെത്തിയതായി പോലീസ് അറിയിച്ചു. റിപ്പോർട്ട് ചെയ്യപ്പെട്ട ശബ്ദങ്ങൾ വാഹനങ്ങളിൽ നിന്നുള്ളതാണെന്നും രാജ്യത്തിന്റെ സുരക്ഷയെ ബാധിക്കുന്ന യാതൊരു ഭീഷണിയും നിലവിലില്ലെന്നും അധികൃതർ ജനങ്ങളെ ആശ്വസിപ്പിച്ചു. യുഎഇ പൂർണ്ണമായും സുരക്ഷിതമാണെന്നും പോലീസ് വ്യക്തമാക്കി. ദുബായ്, ഷാർജ തുടങ്ങിയ എമിറേറ്റുകളിലെ ജനവാസ പ്രദേശങ്ങളിൽ രാത്രികാല പോലീസ് പട്രോളിംഗ് ശക്തമാക്കിയിട്ടുണ്ട്. യുഎഇ ട്രാഫിക് നിയമപ്രകാരം അമിത ശബ്ദമുണ്ടാക്കുന്ന വാഹനങ്ങൾ ഓടിക്കുന്നവർക്ക് 2000 ദിർഹം പിഴയും 12 ബ്ലാക്ക് പോയിന്റുകളും ലഭിക്കും. കൂടാതെ വാഹനം പോലീസ് പിടിച്ചെടുക്കുകയും ചെയ്യും. അനധികൃതമായി രൂപമാറ്റം വരുത്തിയ വാഹനങ്ങൾ തിരികെ ലഭിക്കാൻ 10,000 ദിർഹം വരെ ഫീസ് നൽകേണ്ടിവരുമെന്നും അധികൃതർ അറിയിച്ചു. ഈ നടപടി കർശനമായി നടപ്പാക്കുന്നതിന് ദുബായ് പോലീസ് ഓപ്പറേഷൻസ് അസിസ്റ്റന്റ് കമാൻഡർ-ഇൻ-ചീഫ് മേജർ ജനറൽ സെയ്ഫ് മുഹൈർ അൽ മസ്‌റൂയിയും ഷാർജ പോലീസ് സെൻട്രൽ റീജിയൻ ഡയറക്ടർ ബ്രിഗേഡിയർ ഖലീഫ അൽ ഖസൂനിയും നേതൃത്വമൊരുക്കുന്നുണ്ട്. കുട്ടികൾ വാഹനങ്ങളിൽ അനധികൃത മാറ്റങ്ങൾ വരുത്തുന്നില്ലെന്ന് മാതാപിതാക്കൾ ശ്രദ്ധിക്കണമെന്നും അധികൃതർ അഭ്യർത്ഥിച്ചു. ഇത്തരം ശബ്ദശല്യം ഉണ്ടാക്കുന്ന വാഹനങ്ങളെക്കുറിച്ച് ഔദ്യോഗിക ചാനലുകൾ വഴി പോലീസിനെ അറിയിക്കണമെന്നും പൊതുജനങ്ങളോട് നിർദേശിച്ചിട്ടുണ്ട്. മേഖലയിലെ നിലവിലെ സാഹചര്യം പരിഗണിച്ച് ജനങ്ങളുടെ സമാധാനവും സുരക്ഷയും ഉറപ്പാക്കുക എന്ന ലക്ഷ്യത്തോടെയാണ് ഈ നടപടികൾ ശക്തമാക്കിയതെന്നും പോലീസ് അറിയിച്ചു. പോലീസിന്റെ ഈ ഇടപെടലിനെ പ്രവാസികളും സ്വദേശികളും സ്വാഗതം ചെയ്തിട്ടുണ്ട്.യുഎഇയിലെ വാർത്തകളും തൊഴിൽ അവസരങ്ങളും അതിവേഗം അറിയാൻ വാട്സ്ആപ്പ് ഗ്രൂപ്പിൽ അംഗമാവുhttps://chat.whatsapp.com/Dbf59JLetgBECJpr5UZOuZ?mode=gi_t