Kuwait Teachers Brawl കുവൈത്ത് സിറ്റി: സ്‌കൂളിലെ ജോലിസ്ഥലത്തുണ്ടായ തർക്കത്തെ തുടർന്ന് സഹപ്രവർത്തകയെ ശാരീരികമായി ആക്രമിച്ചെന്ന കേസിൽ ആരോപണവിധേയയായ അധ്യാപികയെ കുവൈറ്റ് മിസ്ഡെമീനർ കോടതി കുറ്റവിമുക്തയാക്കി. സ്‌കൂളിൽ പുസ്തക പെട്ടികളും ചാക്കുകളും മാറ്റാൻ തൊഴിലാളികൾ പ്രവേശിച്ചതുമായി ബന്ധപ്പെട്ടുണ്ടായ വഴക്കിന് പിന്നാലെയായിരുന്നു പരാതിക്കാരിയായ അധ്യാപിക സഹപ്രവർത്തകയ്ക്കെതിരെ ക്രിമിനൽ കേസ് ഫയൽ ചെയ്തത്. തൊഴിൽ സ്ഥലത്തിന് പുറത്തുവെച്ച് പ്രതി തന്നെയടിച്ച് തള്ളിയിട്ടെന്നും തോളിന് പരിക്കേറ്റെന്നും ആരോപിച്ച് പരാതിക്കാരി മെഡിക്കൽ റിപ്പോർട്ട് ഉൾപ്പെടെ കോടതിയിൽ ഹാജരാക്കിയിരുന്നു. പ്രതിയായ അധ്യാപികയ്ക്ക് വേണ്ടി അഭിഭാഷകനായ മുഹമ്മദ് ബാഖർ കോടതിയിൽ ഹാജരായി. ആരോപണം പൂർണ്ണമായും അടിസ്ഥാനരഹിതമാണെന്നും പ്രതി കുറ്റം ചെയ്തിട്ടുണ്ടെന്ന് തെളിയിക്കാൻ വാദിഭാഗത്തിന് സാധിച്ചിട്ടില്ലെന്നും അദ്ദേഹം വാദിച്ചു. അധ്യാപികമാർ തമ്മിൽ വാഗ്വാദം നടന്നതായി കണ്ടുവെന്ന് സാക്ഷികൾ സ്ഥിരീകരിച്ചെങ്കിലും, പ്രതി പരാതിക്കാരിയെ ശാരീരികമായി ആക്രമിക്കുന്നത് കണ്ടതായി ആരും മൊഴി നൽകിയിട്ടില്ല. പൊലീസ് നടത്തിയ പ്രാഥമിക അന്വേഷണത്തിലും പരാതിക്കാരിയെ ആക്രമിച്ചെന്ന വാദത്തിന് തക്ക തെളിവുകളൊന്നും കണ്ടെത്താനായില്ല. പ്രതി കുറ്റം നിഷേധിച്ചത് സാക്ഷിമൊഴികളുമായും പൊലീസ് അന്വേഷണ റിപ്പോർട്ടുമായും പൂർണ്ണമായും ഒത്തുപോകുന്നുണ്ടെന്ന് ജഡ്ജി നിരീക്ഷിച്ചു. കുറ്റം ചെയ്തതായി സംശയത്തിന് ഇടയില്ലാത്തവിധം തെളിയിക്കാൻ കേസ് ഫയലിൽ വ്യക്തമായ തെളിവുകളില്ലെന്ന് വ്യക്തമാക്കിയ കോടതി, ക്രിമിനൽ നടപടിക്രമങ്ങളിലെ ആർട്ടിക്കിൾ 172 അനുസരിച്ച് അധ്യാപികയെ പൂർണ്ണമായും വെറുതെവിട്ടു. അതേസമയം, കേസുമായി ബന്ധപ്പെട്ട സിവിൽ നഷ്ടപരിഹാര ക്ലെയിം പരിഗണിക്കാൻ തങ്ങൾക്ക് അധികാരമില്ലെന്ന് ചൂണ്ടിക്കാട്ടിയ കോടതി, വിഷയം ബന്ധപ്പെട്ട മജിസ്‌ട്രേറ്റ് കോടതിയിലേക്ക് മാറ്റാനും ഉത്തരവിട്ടു.