India-Kuwait Media Connectകുവൈത്തിലെ മാധ്യമപ്രവർത്തകരുമായുള്ള ബന്ധം കൂടുതൽ ശക്തമാക്കുന്നതിനും ഇരുരാജ്യങ്ങളും തമ്മിലുള്ള ഉഭയകക്ഷി സൗഹൃദം കൂടുതൽ മെച്ചപ്പെടുത്തുന്നതിനുമായി ‘ഇന്ത്യ-കുവൈത്ത് മീഡിയ കണക്ട്’ എന്ന പുതിയ പ്ലാറ്റ്‌ഫോമിന് ഇന്ത്യൻ എംബസി തുടക്കം കുറിച്ചു. കുവൈത്തിലെ ഇന്ത്യൻ അംബാസഡർ പരമിത ത്രിപാഠിയാണ് പദ്ധതി ഔദ്യോഗികമായി ഉദ്ഘാടനം ചെയ്തത്. ‘പങ്കാളിത്തം, കാഴ്ചപ്പാടുകൾ, സാധ്യതകൾ’ എന്ന പ്രമേയത്തിൽ ദി സെന്റ് റെജിസ് കുവൈത്ത് ഹോട്ടലിൽ സംഘടിപ്പിച്ച ചടങ്ങിലാണ് പദ്ധതിക്ക് തുടക്കമായത്. കുവൈത്തിലെ പ്രമുഖ മാധ്യമ സ്ഥാപനങ്ങളുടെ പ്രതിനിധികൾ ചടങ്ങിൽ പങ്കെടുത്തു. ഇന്ത്യയും കുവൈത്തും തമ്മിലുള്ള ബന്ധം ചരിത്രപരമായ വേരുകളുള്ളതാണെന്നും ജനങ്ങൾ തമ്മിലുള്ള ആത്മബന്ധമാണ് ഇതിന്റെ അടിത്തറയെന്നും ചടങ്ങിൽ സംസാരിച്ച അംബാസഡർ പരമിത ത്രിപാഠി പറഞ്ഞു. ഇരുസമൂഹങ്ങളെയും കൂടുതൽ അടുപ്പിക്കുന്നതിൽ മാധ്യമങ്ങൾക്ക് നിർണായക പങ്കുണ്ട്. വാർത്തകൾ അതിവേഗം അതിർത്തികൾ കടക്കുന്ന ഇന്നത്തെ ഡിജിറ്റൽ കാലഘട്ടത്തിൽ കൃത്യവും സന്തുലിതവുമായ മാധ്യമപ്രവർത്തനത്തിനും ക്രിയാത്മകമായ ആശയവിനിമയങ്ങൾക്കും വലിയ പ്രാധാന്യമുണ്ട്. വാണിജ്യം, സംസ്കാരം, വിദ്യാഭ്യാസം, വിനോദസഞ്ചാരം, നൂതനാശയങ്ങൾ, സാങ്കേതികവിദ്യ തുടങ്ങിയ വിവിധ മേഖലകളിലെ വിവരങ്ങളും സാധ്യതകളും പങ്കുവെക്കാൻ ഈ വേദി അവസരമൊരുക്കുമെന്നും അവർ വ്യക്തമാക്കി.
ഈ സംരംഭത്തിന്റെ ഭാഗമായി എല്ലാ മാസത്തിലെയും അവസാന പ്രവൃത്തിദിനത്തിൽ മാധ്യമപ്രവർത്തകരുമായി എംബസി സൗഹൃദകൂടിക്കാഴ്ച നടത്താൻ പദ്ധതിയിടുന്നുണ്ട്. എംബസിയുടെ പ്രവർത്തനങ്ങൾ, ഇന്ത്യയിലെ പുതിയ വികസനങ്ങൾ, ഇരുരാജ്യങ്ങളുടെയും നയതന്ത്ര ബന്ധങ്ങൾ, സുപ്രധാന പ്രാദേശിക-ആഗോള വിഷയങ്ങൾ എന്നിവ ഈ കൂടിക്കാഴ്ചകളിൽ ചർച്ച ചെയ്യും. ഇതിനുപുറമെ, എല്ലാ മാസവും ‘ഇന്ത്യ-കുവൈത്ത് മീഡിയ കണക്ട്’ എന്ന പേരിൽ ഒരു ഡിജിറ്റൽ വാർത്താപത്രികയും എംബസി പുറത്തിറക്കും. ഇന്ത്യയുടെ സാമ്പത്തിക വളർച്ച, നയതന്ത്ര മുന്നേറ്റങ്ങൾ, കുവൈത്തിൽ എംബസി നടത്തുന്ന സാംസ്കാരിക-വിദ്യാഭ്യാസ പ്രവർത്തനങ്ങൾ എന്നിവ ഇതിൽ ഉൾപ്പെടുത്തും. എംബസിയുടെ വരാനിരിക്കുന്ന പരിപാടികളെക്കുറിച്ചുള്ള വിവരങ്ങളും ഇതിലൂടെ ലഭ്യമാക്കും. ആർട്ടിഫിഷ്യൽ ഇന്റലിജൻസ് (AI), അത്യാധുനിക സാങ്കേതികവിദ്യകൾ തുടങ്ങിയ മേഖലകളിൽ ഇന്ത്യയും കുവൈത്തും തമ്മിലുള്ള സഹകരണ സാധ്യതകൾ ചർച്ചയിലാണെന്ന് അംബാസഡർ വ്യക്തമാക്കി. സയൻസ് ആൻഡ് ടെക്നോളജി സംയുക്ത പ്രവർത്തക സമിതിയുടെ യോഗത്തിൽ ഇക്കാര്യം ഉയർന്നുവന്നിരുന്നു. എഐ, ഡാറ്റാ സെന്ററുകൾ എന്നീ മേഖലകളിൽ ഇരുരാജ്യങ്ങൾക്കും സഹകരിക്കാൻ മികച്ച സാധ്യതകളുണ്ടെന്നും അവർ കൂട്ടിച്ചേർത്തു.
