Sharjah residential violations; എമിറേറ്റിലെ അനധികൃത താമസവും വിവിധ തരത്തിലുള്ള റസിഡൻഷ്യൽ നിയമലംഘനങ്ങളും കർശനമായി തടയുന്നതിനായി ഷാർജ പുതിയ സമിതി രൂപീകരിച്ചു. സർക്കാർ വകുപ്പുകളുടെ ഏകോപനം ശക്തമാക്കുന്നതിനും പരിശോധനകൾ ഊർജിതമാക്കുന്നതിനുമാണ് എക്സിക്യൂട്ടീവ് കൗൺസിലിന്റെ ഈ പുതിയ തീരുമാനം. ഷാർജ ഭരണാധികാരിയുടെ ഓഫീസിൽ, ഷാർജ കിരീടാവകാശിയും ഉപഭരണാധികാരിയും എക്സിക്യൂട്ടീവ് കൗൺസിൽ ചെയർമാനുമായ ഷെയ്ഖ് സുൽത്താൻ ബിൻ മുഹമ്മദ് ബിൻ സുൽത്താൻ അൽ ഖാസിമിയുടെ അധ്യക്ഷതയിൽ ചേർന്ന യോഗത്തിലാണ് ഈ സുപ്രധാന തീരുമാനം അംഗീകരിച്ചത്. ഷാർജ ഉപഭരണാധികാരികളും കൗൺസിൽ വൈസ് ചെയർമാൻമാരുമായ ഷെയ്ഖ് അബ്ദുല്ല ബിൻ സുൽത്താൻ അൽ ഖാസിമി, ഷെയ്ഖ് സുൽത്താൻ ബിൻ അഹമ്മദ് ബിൻ സുൽത്താൻ അൽ ഖാസിമി എന്നിവരും യോഗത്തിൽ സന്നിഹിതരായിരുന്നു.

മുനിസിപ്പാലിറ്റി കാര്യ വകുപ്പ് മേധാവിയുടെ അധ്യക്ഷതയിലായിരിക്കും പുതിയ ‘റെസിഡൻഷ്യൽ വയലേഷൻസ് കോംബാറ്റ് കമ്മിറ്റി പ്രവർത്തിക്കുക. ഷാർജ സിറ്റി മുൻസിപ്പാലിറ്റി, പബ്ലിക് പ്രോസിക്യൂഷൻ, ഷാർജ പൊലീസ്, സിവിൽ ഡിഫൻസ് അതോറിറ്റി, ഇലക്ട്രിസിറ്റി, വാട്ടർ ആൻഡ് ഗ്യാസ് അതോറിറ്റി (സേവ), സാമ്പത്തിക വികസന വകുപ്പ് എന്നിവയുടെ പ്രതിനിധികൾ സമിതിയിൽ അംഗങ്ങളായിരിക്കും. എമിറേറ്റിലെ വിവിധ നഗരങ്ങളിൽ അനധികൃത താമസവും ഭവനങ്ങളിലെ നിയമലംഘനങ്ങളും കണ്ടെത്തി തടയുക എന്നതാണ് ഈ സമിതിയുടെ പ്രധാന ലക്ഷ്യം. ഇതിനായി വിവിധ സർക്കാർ വകുപ്പുകളുടെ പരിശോധനാ നടപടികൾ ഏകോപിപ്പിക്കും. കൂടാതെ, കെട്ടിടങ്ങളുടെയും വീടുകളുടെയും അവസ്ഥയും ഉപയോഗവും സമിതി നിരന്തരം നിരീക്ഷിക്കും. ഉടമകളും വാടകക്കാരും നിയമപരമായ ചട്ടങ്ങളും വ്യവസ്ഥകളും കൃത്യമായി പാലിക്കുന്നുണ്ടെന്ന് ഉറപ്പുവരുത്താനും, നിയമലംഘനങ്ങൾ വഴി ഉണ്ടാകുന്ന പ്രത്യാഘാതങ്ങളും പിഴകളും ഒഴിവാക്കാനും ഇത് സഹായിക്കും.

യോഗത്തിൽ റെസിഡൻഷ്യൽ കമ്മിറ്റിക്കൊപ്പം ഷാർജ സഫാരിയുടെ അഞ്ചാം സീസണിന്റെ പ്രവർത്തനങ്ങളെക്കുറിച്ചുള്ള റിപ്പോർട്ടും കൗൺസിൽ വിലയിരുത്തി. 120-ലധികം വർഗ്ഗങ്ങളിൽപ്പെട്ട 50,000-ത്തിലധികം മൃഗങ്ങളുള്ള ഷാർജ സഫാരി, വന്യജീവി സംരക്ഷണത്തിനും പരിസ്ഥിതി ടൂറിസത്തിനും നൽകുന്ന സംഭാവനകൾ യോഗം എടുത്തുപറഞ്ഞു. സഫാരിയുടെ ബ്രീഡിംഗ് പ്രോഗ്രാമിലൂടെ അപൂർവ്വയിനം മൃഗങ്ങൾ ഉൾപ്പെടെ 150-ലധികം പുതിയ കുഞ്ഞുങ്ങൾ പിറന്നതായും റിപ്പോർട്ടിൽ വ്യക്തമാക്കുന്നു. യുഎഇയിലെ വാർത്തകളും തൊഴിൽ അവസരങ്ങളും അതിവേഗം അറിയാൻ വാട്സ്ആപ്പ് ഗ്രൂപ്പിൽ അംഗമാവുക https://chat.whatsapp.com/Dbf59JLetgBECJpr5UZOuZ?mode=gi_t

‘സ്ഫോടന ശബ്ദ’മുണ്ടാക്കുന്ന വാഹനങ്ങൾക്കെതിരെ യുഎഇയിൽ കർശന നടപടി; പിഴയും 12 ബ്ലാക്ക് പോയിന്റും

ജനവാസ മേഖലകളിൽ അർദ്ധരാത്രിയിൽ സ്ഫോടനത്തിന് സമാനമായ ശബ്ദമുണ്ടാക്കി ജനങ്ങളിൽ പരിഭ്രാന്തി സൃഷ്ടിക്കുന്ന വിധത്തിൽ നിയമവിരുദ്ധമായി രൂപമാറ്റം വരുത്തിയ കാറുകളുടെയും മോട്ടോർ സൈക്കിളുകളുടെയും യുഎഇ പോലീസ് കർശന നടപടികൾ ആരംഭിച്ചു. മേഖലയിലെ സംഘർഷാവസ്ഥ വാർത്തകളിൽ നിറഞ്ഞുനിൽക്കുന്ന സാഹചര്യത്തിൽ ഇത്തരം വാഹനങ്ങളിൽ നിന്നുണ്ടാകുന്ന ‘ബാക്ക് ഫയർ’ ശബ്ദങ്ങൾ പലരും മിസൈൽ ആക്രമണമോ സ്ഫോടനമോ ആണെന്ന് തെറ്റിദ്ധരിച്ച് ഭീതിയിലായിരുന്നുവെന്ന് അധികൃതർ വ്യക്തമാക്കി. എഞ്ചിനുകളിൽ മാറ്റം വരുത്തി ഉദ്ദേശപൂർവ്വം ശക്തമായ ശബ്ദമുണ്ടാക്കുന്നത് പ്രധാനമായും കൗമാരക്കാരും യുവാക്കളുമാണെന്ന് അന്വേഷണത്തിൽ കണ്ടെത്തിയതായി പോലീസ് അറിയിച്ചു. റിപ്പോർട്ട് ചെയ്യപ്പെട്ട ശബ്ദങ്ങൾ വാഹനങ്ങളിൽ നിന്നുള്ളതാണെന്നും രാജ്യത്തിന്റെ സുരക്ഷയെ ബാധിക്കുന്ന യാതൊരു ഭീഷണിയും നിലവിലില്ലെന്നും അധികൃതർ ജനങ്ങളെ ആശ്വസിപ്പിച്ചു. യുഎഇ പൂർണ്ണമായും സുരക്ഷിതമാണെന്നും പോലീസ് വ്യക്തമാക്കി. ദുബായ്, ഷാർജ തുടങ്ങിയ എമിറേറ്റുകളിലെ ജനവാസ പ്രദേശങ്ങളിൽ രാത്രികാല പോലീസ് പട്രോളിംഗ് ശക്തമാക്കിയിട്ടുണ്ട്. യുഎഇ ട്രാഫിക് നിയമപ്രകാരം അമിത ശബ്ദമുണ്ടാക്കുന്ന വാഹനങ്ങൾ ഓടിക്കുന്നവർക്ക് 2000 ദിർഹം പിഴയും 12 ബ്ലാക്ക് പോയിന്റുകളും ലഭിക്കും. കൂടാതെ വാഹനം പോലീസ് പിടിച്ചെടുക്കുകയും ചെയ്യും. അനധികൃതമായി രൂപമാറ്റം വരുത്തിയ വാഹനങ്ങൾ തിരികെ ലഭിക്കാൻ 10,000 ദിർഹം വരെ ഫീസ് നൽകേണ്ടിവരുമെന്നും അധികൃതർ അറിയിച്ചു. ഈ നടപടി കർശനമായി നടപ്പാക്കുന്നതിന് ദുബായ് പോലീസ് ഓപ്പറേഷൻസ് അസിസ്റ്റന്റ് കമാൻഡർ-ഇൻ-ചീഫ് മേജർ ജനറൽ സെയ്ഫ് മുഹൈർ അൽ മസ്‌റൂയിയും ഷാർജ പോലീസ് സെൻട്രൽ റീജിയൻ ഡയറക്ടർ ബ്രിഗേഡിയർ ഖലീഫ അൽ ഖസൂനിയും നേതൃത്വമൊരുക്കുന്നുണ്ട്. കുട്ടികൾ വാഹനങ്ങളിൽ അനധികൃത മാറ്റങ്ങൾ വരുത്തുന്നില്ലെന്ന് മാതാപിതാക്കൾ ശ്രദ്ധിക്കണമെന്നും അധികൃതർ അഭ്യർത്ഥിച്ചു. ഇത്തരം ശബ്ദശല്യം ഉണ്ടാക്കുന്ന വാഹനങ്ങളെക്കുറിച്ച് ഔദ്യോഗിക ചാനലുകൾ വഴി പോലീസിനെ അറിയിക്കണമെന്നും പൊതുജനങ്ങളോട് നിർദേശിച്ചിട്ടുണ്ട്. മേഖലയിലെ നിലവിലെ സാഹചര്യം പരിഗണിച്ച് ജനങ്ങളുടെ സമാധാനവും സുരക്ഷയും ഉറപ്പാക്കുക എന്ന ലക്ഷ്യത്തോടെയാണ് ഈ നടപടികൾ ശക്തമാക്കിയതെന്നും പോലീസ് അറിയിച്ചു. പോലീസിന്റെ ഈ ഇടപെടലിനെ പ്രവാസികളും സ്വദേശികളും സ്വാഗതം ചെയ്തിട്ടുണ്ട്.യുഎഇയിലെ വാർത്തകളും തൊഴിൽ അവസരങ്ങളും അതിവേഗം അറിയാൻ വാട്സ്ആപ്പ് ഗ്രൂപ്പിൽ അംഗമാവുhttps://chat.whatsapp.com/Dbf59JLetgBECJpr5UZOuZ?mode=gi_t