Water Tasting Trends; “വെള്ളത്തിന് രുചിയോ മണമോ ഇല്ല” എന്ന പഴയ സ്കൂൾ പഠനങ്ങളെല്ലാം തിരുത്തിക്കുറിച്ചുകൊണ്ട് യുഎഇയിൽ പുതിയൊരു ലൈഫ്‌സ്റ്റൈൽ ട്രെൻഡ് തരംഗമാകുന്നു. ലോകത്തിന്റെ വിവിധ ഭാഗങ്ങളിൽ നിന്നുള്ള അപൂർവ്വ ധാതുക്കൾ അടങ്ങിയ വെള്ളത്തിന്റെ രുചിയും ഗുണങ്ങളും അനുഭവിച്ചറിയുന്ന ‘വാട്ടർ ടേസ്റ്റിങ്’ (Water Tasting) രീതിയാണ് ഇപ്പോൾ പ്രവാസികൾക്കിടയിലും യുഎഇയിലെ പ്രമുഖരിലും ചർച്ചയാകുന്നത്. വൈൻ ടേസ്റ്റിങ് പോലെ തന്നെ ഓരോ വെള്ളത്തിലെയും ലോഹാംശം, കൈപ്പില്ലാത്ത മധുരം, കട്ടി എന്നിവ തിരിച്ചറിഞ്ഞ് ആസ്വദിച്ചു കുടിക്കുന്ന രീതിയാണിത്. ഇതിനായി എലൈറ്റ് പാർട്ടികളിൽ ‘വാട്ടർ ബാറുകൾ’ വരെ സജീവമായിട്ടുണ്ട്. കാപ്പിയുടെയോ ആൽക്കഹോളിന്റെയോ രുചിഭേദങ്ങൾ തിരിച്ചറിയുന്ന വിദഗ്ദ്ധരെ പോലെ, കുടിവെള്ളത്തിന്റെ ഉത്ഭവവും മിനറൽ അളവും വിശകലനം ചെയ്യുന്ന ‘വാട്ടർ സോമലിയെ’മാരും ഈ രംഗത്ത് സജീവമാണ്.

ആഡംബരം എന്നാൽ കേവലം വിലകൂടിയ സാധനങ്ങൾ പ്രദർശിപ്പിക്കൽ മാത്രമല്ലെന്നും, മറക്കാൻ കഴിയാത്ത അനുഭവങ്ങൾ സൃഷ്ടിക്കലാണെന്നും വിശ്വസിക്കുന്ന ദുബായ് പോലുള്ള നഗരങ്ങളിൽ ഈ ട്രെൻഡിന് വലിയ സ്വീകാര്യതയാണ് ലഭിക്കുന്നതെന്ന് ദുബായിലേക്ക് മാറിയ വാട്ടർ സോമലിയെ ടിമോ ബോഷ് വ്യക്തമാക്കുന്നു. കോർപറേറ്റ് പാർട്ടികൾ, റോയൽ ഫാമിലി ഇവന്റുകൾ, ഫിഫ ലോകകപ്പ് ഫാൻ സോണുകൾ എന്നിവിടങ്ങളിലെല്ലാം ഇത്തരം വാട്ടർ ടേസ്റ്റിങ് സെഷനുകൾ ഇതിനോടകം അരങ്ങേറിയിട്ടുണ്ട്. ഓൺലൈൻ സ്റ്റോറുകളിൽ ഗുണനിലവാരമുള്ള പ്രകൃതിദത്ത മിനറൽ വാട്ടറുകൾക്ക് 9.50 ദിർഹം മുതൽ 40 ദിർഹം വരെയാണെങ്കിൽ, യുഎഇയിലെ പ്രമുഖ ഫൈൻ ഡൈനിങ് റെസ്റ്റോറന്റുകളിൽ ഒരു ബോട്ടിലിന് 80 മുതൽ 90 ദിർഹം വരെയും (ഏകദേശം 2,000 രൂപയ്ക്ക് മുകളിൽ), അപൂർവ്വ ശേഖരത്തിലുള്ള വെള്ളത്തിന് ഇതിലും കൂടിയ വിലയുമാണ് ഈടാക്കുന്നത്. മദ്യത്തിലും പഞ്ചസാരയടങ്ങിയ കോക്ക്‌ടെയിലുകളിലും നിന്ന് മാറി ചിന്തിക്കുന്ന പുതിയ തലമുറയും ആരോഗ്യ ബോധമുള്ളവരും വാട്ടർ ടേസ്റ്റിംഗിനെ വലിയൊരു വിപ്ലവമായാണ് കാണുന്നത്. ജിസിസിയിലെ രാജകുടുംബാംഗങ്ങളും വ്യവസായികളും അടക്കമുള്ള വിഐപികൾ തങ്ങളുടെ വിദേശ യാത്രകളിൽ ഇഷ്ടപ്പെട്ട പ്രത്യേക വാട്ടർ ബ്രാൻഡുകൾ സ്വന്തം നാടുകളിലേക്ക് എത്തിക്കാനായി വാട്ടർ സോമലിയെമാരെ സമീപിക്കുന്നുണ്ട്. മിഡിൽ ഈസ്റ്റിൽ വളരെ പതുക്കെയാണെങ്കിലും വൻകിട കോർപറേറ്റ് ഇവന്റുകളിലൂടെ ഈ സംസ്കാരം വൻ ജനപ്രീതി നേടിക്കൊണ്ടിരിക്കുകയാണ്. യുഎഇയിലെ വാർത്തകളും തൊഴിൽ അവസരങ്ങളും അതിവേഗം അറിയാൻ വാട്സ്ആപ്പ് ഗ്രൂപ്പിൽ അംഗമാവുക https://chat.whatsapp.com/Dbf59JLetgBECJpr5UZOuZ?mode=gi_t

‘സ്ഫോടന ശബ്ദ’മുണ്ടാക്കുന്ന വാഹനങ്ങൾക്കെതിരെ യുഎഇയിൽ കർശന നടപടി; പിഴയും 12 ബ്ലാക്ക് പോയിന്റും

ജനവാസ മേഖലകളിൽ അർദ്ധരാത്രിയിൽ സ്ഫോടനത്തിന് സമാനമായ ശബ്ദമുണ്ടാക്കി ജനങ്ങളിൽ പരിഭ്രാന്തി സൃഷ്ടിക്കുന്ന വിധത്തിൽ നിയമവിരുദ്ധമായി രൂപമാറ്റം വരുത്തിയ കാറുകളുടെയും മോട്ടോർ സൈക്കിളുകളുടെയും യുഎഇ പോലീസ് കർശന നടപടികൾ ആരംഭിച്ചു. മേഖലയിലെ സംഘർഷാവസ്ഥ വാർത്തകളിൽ നിറഞ്ഞുനിൽക്കുന്ന സാഹചര്യത്തിൽ ഇത്തരം വാഹനങ്ങളിൽ നിന്നുണ്ടാകുന്ന ‘ബാക്ക് ഫയർ’ ശബ്ദങ്ങൾ പലരും മിസൈൽ ആക്രമണമോ സ്ഫോടനമോ ആണെന്ന് തെറ്റിദ്ധരിച്ച് ഭീതിയിലായിരുന്നുവെന്ന് അധികൃതർ വ്യക്തമാക്കി. എഞ്ചിനുകളിൽ മാറ്റം വരുത്തി ഉദ്ദേശപൂർവ്വം ശക്തമായ ശബ്ദമുണ്ടാക്കുന്നത് പ്രധാനമായും കൗമാരക്കാരും യുവാക്കളുമാണെന്ന് അന്വേഷണത്തിൽ കണ്ടെത്തിയതായി പോലീസ് അറിയിച്ചു. റിപ്പോർട്ട് ചെയ്യപ്പെട്ട ശബ്ദങ്ങൾ വാഹനങ്ങളിൽ നിന്നുള്ളതാണെന്നും രാജ്യത്തിന്റെ സുരക്ഷയെ ബാധിക്കുന്ന യാതൊരു ഭീഷണിയും നിലവിലില്ലെന്നും അധികൃതർ ജനങ്ങളെ ആശ്വസിപ്പിച്ചു. യുഎഇ പൂർണ്ണമായും സുരക്ഷിതമാണെന്നും പോലീസ് വ്യക്തമാക്കി. ദുബായ്, ഷാർജ തുടങ്ങിയ എമിറേറ്റുകളിലെ ജനവാസ പ്രദേശങ്ങളിൽ രാത്രികാല പോലീസ് പട്രോളിംഗ് ശക്തമാക്കിയിട്ടുണ്ട്. യുഎഇ ട്രാഫിക് നിയമപ്രകാരം അമിത ശബ്ദമുണ്ടാക്കുന്ന വാഹനങ്ങൾ ഓടിക്കുന്നവർക്ക് 2000 ദിർഹം പിഴയും 12 ബ്ലാക്ക് പോയിന്റുകളും ലഭിക്കും. കൂടാതെ വാഹനം പോലീസ് പിടിച്ചെടുക്കുകയും ചെയ്യും. അനധികൃതമായി രൂപമാറ്റം വരുത്തിയ വാഹനങ്ങൾ തിരികെ ലഭിക്കാൻ 10,000 ദിർഹം വരെ ഫീസ് നൽകേണ്ടിവരുമെന്നും അധികൃതർ അറിയിച്ചു. ഈ നടപടി കർശനമായി നടപ്പാക്കുന്നതിന് ദുബായ് പോലീസ് ഓപ്പറേഷൻസ് അസിസ്റ്റന്റ് കമാൻഡർ-ഇൻ-ചീഫ് മേജർ ജനറൽ സെയ്ഫ് മുഹൈർ അൽ മസ്‌റൂയിയും ഷാർജ പോലീസ് സെൻട്രൽ റീജിയൻ ഡയറക്ടർ ബ്രിഗേഡിയർ ഖലീഫ അൽ ഖസൂനിയും നേതൃത്വമൊരുക്കുന്നുണ്ട്. കുട്ടികൾ വാഹനങ്ങളിൽ അനധികൃത മാറ്റങ്ങൾ വരുത്തുന്നില്ലെന്ന് മാതാപിതാക്കൾ ശ്രദ്ധിക്കണമെന്നും അധികൃതർ അഭ്യർത്ഥിച്ചു. ഇത്തരം ശബ്ദശല്യം ഉണ്ടാക്കുന്ന വാഹനങ്ങളെക്കുറിച്ച് ഔദ്യോഗിക ചാനലുകൾ വഴി പോലീസിനെ അറിയിക്കണമെന്നും പൊതുജനങ്ങളോട് നിർദേശിച്ചിട്ടുണ്ട്. മേഖലയിലെ നിലവിലെ സാഹചര്യം പരിഗണിച്ച് ജനങ്ങളുടെ സമാധാനവും സുരക്ഷയും ഉറപ്പാക്കുക എന്ന ലക്ഷ്യത്തോടെയാണ് ഈ നടപടികൾ ശക്തമാക്കിയതെന്നും പോലീസ് അറിയിച്ചു. പോലീസിന്റെ ഈ ഇടപെടലിനെ പ്രവാസികളും സ്വദേശികളും സ്വാഗതം ചെയ്തിട്ടുണ്ട്.യുഎഇയിലെ വാർത്തകളും തൊഴിൽ അവസരങ്ങളും അതിവേഗം അറിയാൻ വാട്സ്ആപ്പ് ഗ്രൂപ്പിൽ അംഗമാവുhttps://chat.whatsapp.com/Dbf59JLetgBECJpr5UZOuZ?mode=gi_t