UAE petrol prices October; സെപ്റ്റംബറിലെ ഭൂരിഭാഗം ദിവസങ്ങളിലും ആഗോള വിപണിയിൽ ക്രൂഡ് ഓയിൽ വില ബാരലിന് 100 ഡോളറിന് മുകളിൽ തുടർന്ന പശ്ചാത്തലത്തിൽ, ഒക്ടോബറിൽ യുഎഇയിൽ പെട്രോൾ വില വീണ്ടും വർധിച്ചേക്കുമെന്ന് സൂചന. യുഎസ്-ഇറാൻ സംഘർഷം, ഹോർമുസ് കടലിടുക്ക് വഴിയുള്ള ചരക്കുനീക്കത്തിലെ തടസ്സങ്ങൾ, സൗദി അറേബ്യയുടെ ഊർജ കേന്ദ്രങ്ങൾക്ക് നേരെയുണ്ടായ ഹൂതി ആക്രമണങ്ങൾ എന്നിവയാണ് സെപ്റ്റംബറിൽ ആഗോളതലത്തിൽ ക്രൂഡ് ഓയിൽ വില ഉയർന്ന നിലവാരത്തിൽ തുടരാൻ കാരണമായത്. ഈ മാസത്തെ ഭൂരിഭാഗം ദിവസങ്ങളിലും ബ്രെന്റ് ക്രൂഡ് വ്യാപാരം അവസാനിച്ചത് ബാരലിന് 100 ഡോളറിന് മുകളിലാണ്. ഓഗസ്റ്റിൽ ബാരലിന് ശരാശരി 87.7 ഡോളറായിരുന്ന എണ്ണവില സെപ്റ്റംബറിൽ 101 ഡോളറിന് മുകളിലെത്തി. ആഗോള വിപണിയിലെ മാറ്റങ്ങൾക്ക് അനുസൃതമായാണ് യുഎഇയിൽ എല്ലാ മാസവും ഇന്ധനവില നിശ്ചയിക്കുന്നത് എന്നതിനാൽ, അടുത്ത മാസത്തെ നിരക്കുകളിലും ഇതിന്റെ പ്രതിഫലനമുണ്ടാകും. 2015-ലാണ് രാജ്യാന്തര വിപണി നിരക്കുകൾക്ക് അനുസൃതമായി യുഎഇ പ്രാദേശിക ഇന്ധനവില നിയന്ത്രണം എടുത്തുകളഞ്ഞത്. തുടർന്ന് എല്ലാ മാസാവസാനവും അടുത്ത മാസത്തേക്കുള്ള പുതിയ നിരക്കുകൾ പ്രഖ്യാപിച്ചുവരുന്നു. സെപ്റ്റംബർ മാസത്തിൽ ലിറ്ററിന് ഏകദേശം 20 ഫിൽസ് (0.20 ദിർഹം) വീതമാണ് ഇന്ധനങ്ങൾക്ക് വർധിപ്പിച്ചത്. നിലവിൽ സൂപ്പർ 98 പെട്രോളിന് ലിറ്ററിന് 3.8 ദിർഹവും, സ്പെഷ്യൽ 95-ന് 3.69 ദിർഹവും, ഇ-പ്ലസ് 91-ന് 3.61 ദിർഹവുമാണ് യുഎഇയിലെ നിരക്ക്. അതേസമയം, വ്യാഴാഴ്ച രാവിലെ ബ്രെന്റ് ക്രൂഡ് ഓയിൽ വില ബാരലിന് 103.2 ഡോളറിലും, ഡബ്ല്യു.ടി.ഐ (WTI) വില 92.19 ഡോളറിലുമാണ് വ്യാപാരം നടക്കുന്നത്.
യുഎസ്-ഇറാൻ സംഘർഷത്തിന് നയതന്ത്ര പരിഹാരം കണ്ടെത്താനുള്ള ശ്രമങ്ങളിലാണ് ഇപ്പോൾ വിപണി കൂടുതൽ ശ്രദ്ധ കേന്ദ്രീകരിക്കുന്നതെന്ന് സെഞ്ചുറി ഫിനാൻഷ്യൽ ചീഫ് ഇൻവെസ്റ്റ്മെന്റ് ഓഫീസർ വിജയ് വലേച്ച പറഞ്ഞു. സമീപദിവസങ്ങളിലുണ്ടായ ഇടിവ് ജൂണിന് ശേഷമുള്ള ഏറ്റവും ദൈർഘ്യമേറിയ വിലക്കുറവിലേക്ക് ബ്രെന്റിനെ നയിച്ചിട്ടുണ്ട്. കൂടാതെ ഹോർമുസ് കടലിടുക്കിലൂടെയുള്ള എണ്ണനീക്കം മെച്ചപ്പെട്ടത് വിതരണവുമായി ബന്ധപ്പെട്ട അടിയന്തര ആശങ്കകൾക്ക് ഒരുപരിധി വരെ ആശ്വാസം നൽകിയിട്ടുണ്ടെന്നും അദ്ദേഹം വ്യക്തമാക്കി.
എങ്കിലും ഈ വർഷം ബ്രെന്റ് ക്രൂഡ് വിലയിൽ ഇതുവരെ ഏകദേശം 70 ശതമാനത്തോളം വർധന രേഖപ്പെടുത്തിയിട്ടുണ്ട്. മിഡിൽ ഈസ്റ്റിലെ ഊർജ കേന്ദ്രങ്ങൾ നേരിടുന്ന ഭീഷണികളും റഷ്യൻ എണ്ണശാലകൾക്ക് നേരെയുള്ള ആക്രമണങ്ങളും കാരണം എണ്ണ വിതരണ ശൃംഖല ഇപ്പോഴും ദുർബലാവസ്ഥയിലാണെന്ന് അദ്ദേഹം കൂട്ടിച്ചേർത്തു.
സമീപകാല ആക്രമണങ്ങൾക്ക് ശേഷം ഈസ്റ്റ്-വെസ്റ്റ് പൈപ്പ്ലൈൻ പൂർണ്ണതോതിലാക്കാനുള്ള ശ്രമങ്ങൾ സൗദി അറേബ്യ ഇപ്പോഴും തുടരുകയാണ്. ഒപ്പം ഹോർമുസ് ഒഴിവാക്കിക്കൊണ്ടുള്ള മറ്റ് വഴികളെക്കുറിച്ചുള്ള അനിശ്ചിതത്വം ഈ സമുദ്രപാതയുടെ പ്രാധാന്യം വ്യക്തമാക്കുന്നു. നിലവിൽ നയതന്ത്ര ശ്രമങ്ങളും ചരക്കുനീക്കം മെച്ചപ്പെടുന്നതും വിലയെ സ്വാധീനിക്കുന്നുണ്ടെങ്കിലും, വിതരണത്തിലെ അനിശ്ചിതത്വങ്ങൾ നിലനിൽക്കുന്നതിനാൽ ബാരലിന് 100 ഡോളർ നിലവാരം വിപണിക്ക് വളരെ നിർണായകമാണ്. നിലവിലെ വിലയിടിവ് തുടരുമോ അതോ വില വീണ്ടും ഉയരുമോ എന്ന് കാത്തിരുന്ന് കാണേണ്ടതുണ്ടെന്നും വിജയ് വലേച്ച ചൂണ്ടിക്കാട്ടി. യുഎഇയിലെ വാർത്തകളും തൊഴിൽ അവസരങ്ങളും അതിവേഗം അറിയാൻ വാട്സ്ആപ്പ് ഗ്രൂപ്പിൽ അംഗമാവുക https://chat.whatsapp.com/Dbf59JLetgBECJpr5UZOuZ?mode=gi_t
‘സ്ഫോടന ശബ്ദ’മുണ്ടാക്കുന്ന വാഹനങ്ങൾക്കെതിരെ യുഎഇയിൽ കർശന നടപടി; പിഴയും 12 ബ്ലാക്ക് പോയിന്റും
ജനവാസ മേഖലകളിൽ അർദ്ധരാത്രിയിൽ സ്ഫോടനത്തിന് സമാനമായ ശബ്ദമുണ്ടാക്കി ജനങ്ങളിൽ പരിഭ്രാന്തി സൃഷ്ടിക്കുന്ന വിധത്തിൽ നിയമവിരുദ്ധമായി രൂപമാറ്റം വരുത്തിയ കാറുകളുടെയും മോട്ടോർ സൈക്കിളുകളുടെയും യുഎഇ പോലീസ് കർശന നടപടികൾ ആരംഭിച്ചു. മേഖലയിലെ സംഘർഷാവസ്ഥ വാർത്തകളിൽ നിറഞ്ഞുനിൽക്കുന്ന സാഹചര്യത്തിൽ ഇത്തരം വാഹനങ്ങളിൽ നിന്നുണ്ടാകുന്ന ‘ബാക്ക് ഫയർ’ ശബ്ദങ്ങൾ പലരും മിസൈൽ ആക്രമണമോ സ്ഫോടനമോ ആണെന്ന് തെറ്റിദ്ധരിച്ച് ഭീതിയിലായിരുന്നുവെന്ന് അധികൃതർ വ്യക്തമാക്കി. എഞ്ചിനുകളിൽ മാറ്റം വരുത്തി ഉദ്ദേശപൂർവ്വം ശക്തമായ ശബ്ദമുണ്ടാക്കുന്നത് പ്രധാനമായും കൗമാരക്കാരും യുവാക്കളുമാണെന്ന് അന്വേഷണത്തിൽ കണ്ടെത്തിയതായി പോലീസ് അറിയിച്ചു. റിപ്പോർട്ട് ചെയ്യപ്പെട്ട ശബ്ദങ്ങൾ വാഹനങ്ങളിൽ നിന്നുള്ളതാണെന്നും രാജ്യത്തിന്റെ സുരക്ഷയെ ബാധിക്കുന്ന യാതൊരു ഭീഷണിയും നിലവിലില്ലെന്നും അധികൃതർ ജനങ്ങളെ ആശ്വസിപ്പിച്ചു. യുഎഇ പൂർണ്ണമായും സുരക്ഷിതമാണെന്നും പോലീസ് വ്യക്തമാക്കി.
ദുബായ്, ഷാർജ തുടങ്ങിയ എമിറേറ്റുകളിലെ ജനവാസ പ്രദേശങ്ങളിൽ രാത്രികാല പോലീസ് പട്രോളിംഗ് ശക്തമാക്കിയിട്ടുണ്ട്. യുഎഇ ട്രാഫിക് നിയമപ്രകാരം അമിത ശബ്ദമുണ്ടാക്കുന്ന വാഹനങ്ങൾ ഓടിക്കുന്നവർക്ക് 2000 ദിർഹം പിഴയും 12 ബ്ലാക്ക് പോയിന്റുകളും ലഭിക്കും. കൂടാതെ വാഹനം പോലീസ് പിടിച്ചെടുക്കുകയും ചെയ്യും. അനധികൃതമായി രൂപമാറ്റം വരുത്തിയ വാഹനങ്ങൾ തിരികെ ലഭിക്കാൻ 10,000 ദിർഹം വരെ ഫീസ് നൽകേണ്ടിവരുമെന്നും അധികൃതർ അറിയിച്ചു. ഈ നടപടി കർശനമായി നടപ്പാക്കുന്നതിന് ദുബായ് പോലീസ് ഓപ്പറേഷൻസ് അസിസ്റ്റന്റ് കമാൻഡർ-ഇൻ-ചീഫ് മേജർ ജനറൽ സെയ്ഫ് മുഹൈർ അൽ മസ്റൂയിയും ഷാർജ പോലീസ് സെൻട്രൽ റീജിയൻ ഡയറക്ടർ ബ്രിഗേഡിയർ ഖലീഫ അൽ ഖസൂനിയും നേതൃത്വമൊരുക്കുന്നുണ്ട്. കുട്ടികൾ വാഹനങ്ങളിൽ അനധികൃത മാറ്റങ്ങൾ വരുത്തുന്നില്ലെന്ന് മാതാപിതാക്കൾ ശ്രദ്ധിക്കണമെന്നും അധികൃതർ അഭ്യർത്ഥിച്ചു. ഇത്തരം ശബ്ദശല്യം ഉണ്ടാക്കുന്ന വാഹനങ്ങളെക്കുറിച്ച് ഔദ്യോഗിക ചാനലുകൾ വഴി പോലീസിനെ അറിയിക്കണമെന്നും പൊതുജനങ്ങളോട് നിർദേശിച്ചിട്ടുണ്ട്. മേഖലയിലെ നിലവിലെ സാഹചര്യം പരിഗണിച്ച് ജനങ്ങളുടെ സമാധാനവും സുരക്ഷയും ഉറപ്പാക്കുക എന്ന ലക്ഷ്യത്തോടെയാണ് ഈ നടപടികൾ ശക്തമാക്കിയതെന്നും പോലീസ് അറിയിച്ചു. പോലീസിന്റെ ഈ ഇടപെടലിനെ പ്രവാസികളും സ്വദേശികളും സ്വാഗതം ചെയ്തിട്ടുണ്ട്.യുഎഇയിലെ വാർത്തകളും തൊഴിൽ അവസരങ്ങളും അതിവേഗം അറിയാൻ വാട്സ്ആപ്പ് ഗ്രൂപ്പിൽ അംഗമാവുhttps://chat.whatsapp.com/Dbf59JLetgBECJpr5UZOuZ?mode=gi_t
