ജീവനക്കാരുടെ ജോലി–സ്വകാര്യ ജീവിത സന്തുലിതാവസ്ഥ മെച്ചപ്പെടുത്തുന്നതിന് യുഎഇയിൽ വിവിധ തൊഴിൽ ആനുകൂല്യങ്ങളും സൗകര്യങ്ങളും വിപുലീകരിക്കുന്നു. കൂടുതൽ വഴക്കമുള്ള ജോലി ക്രമീകരണങ്ങൾ, കുടുംബത്തെ കേന്ദ്രീകരിച്ചുള്ള അവധികൾ, സാമൂഹിക സുരക്ഷ എന്നിവയ്ക്ക് പ്രാധാന്യം നൽകുന്ന നയങ്ങളാണ് നടപ്പാക്കുന്നത്. അബുദാബി സർക്കാരിന്റെ പുതിയ ഹ്യൂമൻ റിസോഴ്‌സസ് നിയമത്തിൽ ജീവനക്കാർക്ക് ഫ്ലെക്സിബിൾ ജോലി സമയം, റിമോട്ട് വർക്ക്, കംപ്രസ്ഡ് വർക്ക് ഷെഡ്യൂൾ തുടങ്ങിയ സൗകര്യങ്ങൾക്ക് പ്രാധാന്യം നൽകിയിട്ടുണ്ട്. മാതാപിതാക്കൾക്കുള്ള അവധികളും കുടുംബപരമായ ആവശ്യങ്ങൾക്കുള്ള പിന്തുണയും ഇതിൽ ഉൾപ്പെടുന്നു.

ജോലിക്കൊപ്പം കുടുംബജീവിതത്തിനും വ്യക്തിപരമായ ആവശ്യങ്ങൾക്കും സമയം കണ്ടെത്താൻ സഹായിക്കുന്ന രീതിയിലാണ് പുതിയ സംവിധാനങ്ങൾ രൂപകൽപ്പന ചെയ്തിരിക്കുന്നത്. വിവാഹം, ദുഃഖാചരണം, പരിചരണ ചുമതലകൾ തുടങ്ങിയ സാഹചര്യങ്ങൾക്കായുള്ള അവധി സൗകര്യങ്ങളും പുതുക്കിയ ചട്ടങ്ങളിൽ ഉൾപ്പെടുത്തിയിട്ടുണ്ട്. അതേസമയം, ജീവനക്കാരുടെ തൊഴിൽരീതികളിൽ കൂടുതൽ വഴക്കം കൊണ്ടുവരുന്നതിന്റെ ഭാഗമായി പാർട്ട് ടൈം, റിമോട്ട്, ഹൈബ്രിഡ് ജോലി രീതികൾക്കും യുഎഇയിൽ കൂടുതൽ പ്രാധാന്യം ലഭിക്കുന്നുണ്ട്. യുഎഇ പൗരന്മാരായ പാർട്ട് ടൈം ജീവനക്കാർക്ക് പെൻഷൻ പരിരക്ഷ വിപുലീകരിച്ച നടപടിയും അടുത്തിടെ പ്രഖ്യാപിച്ചിരുന്നു.

ജീവനക്കാരുടെ ക്ഷേമം ഉറപ്പാക്കുന്നതിന്റെ ഭാഗമായി ചൂട് കൂടുതലുള്ള കാലയളവിൽ പുറം ജോലികൾക്ക് നിയന്ത്രണം ഏർപ്പെടുത്തുന്ന മിഡ്‌ഡേ ബ്രേക്ക് നയവും വർഷംതോറും നടപ്പാക്കിവരുന്നു. 2026ൽ ജൂൺ 15 മുതൽ സെപ്റ്റംബർ 15 വരെ ഉച്ചയ്ക്ക് 12.30 മുതൽ 3 മണിവരെയാണ് നേരിട്ടുള്ള സൂര്യപ്രകാശത്തിൽ പുറം ജോലി നിരോധിച്ചത്. ജോലി സ്ഥലത്തെ സുരക്ഷയ്ക്കും ക്ഷേമത്തിനുമൊപ്പം ജീവനക്കാരുടെ സാമ്പത്തിക സുരക്ഷയും ഉറപ്പാക്കുകയാണ് ഈ നയങ്ങളുടെ പ്രധാന ലക്ഷ്യം. തൊഴിലാളികളുടെ ജീവിതനിലവാരം ഉയർത്തുന്നതിനും കൂടുതൽ മാനുഷികമായ തൊഴിൽ അന്തരീക്ഷം സൃഷ്ടിക്കുന്നതിനുമുള്ള നടപടികൾ യുഎഇ തുടരുകയാണ്.യുഎഇയിലെ വാർത്തകളും തൊഴിൽ അവസരങ്ങളും അതിവേഗം അറിയാൻ വാട്സ്ആപ്പ് ഗ്രൂപ്പിൽ അംഗമാവുക https://chat.whatsapp.com/Dbf59JLetgBECJpr5UZOuZ?mode=gi_t

‘സ്ഫോടന ശബ്ദ’മുണ്ടാക്കുന്ന വാഹനങ്ങൾക്കെതിരെ യുഎഇയിൽ കർശന നടപടി; പിഴയും 12 ബ്ലാക്ക് പോയിന്റും

ജനവാസ മേഖലകളിൽ അർദ്ധരാത്രിയിൽ സ്ഫോടനത്തിന് സമാനമായ ശബ്ദമുണ്ടാക്കി ജനങ്ങളിൽ പരിഭ്രാന്തി സൃഷ്ടിക്കുന്ന വിധത്തിൽ നിയമവിരുദ്ധമായി രൂപമാറ്റം വരുത്തിയ കാറുകളുടെയും മോട്ടോർ സൈക്കിളുകളുടെയും യുഎഇ പോലീസ് കർശന നടപടികൾ ആരംഭിച്ചു. മേഖലയിലെ സംഘർഷാവസ്ഥ വാർത്തകളിൽ നിറഞ്ഞുനിൽക്കുന്ന സാഹചര്യത്തിൽ ഇത്തരം വാഹനങ്ങളിൽ നിന്നുണ്ടാകുന്ന ‘ബാക്ക് ഫയർ’ ശബ്ദങ്ങൾ പലരും മിസൈൽ ആക്രമണമോ സ്ഫോടനമോ ആണെന്ന് തെറ്റിദ്ധരിച്ച് ഭീതിയിലായിരുന്നുവെന്ന് അധികൃതർ വ്യക്തമാക്കി. എഞ്ചിനുകളിൽ മാറ്റം വരുത്തി ഉദ്ദേശപൂർവ്വം ശക്തമായ ശബ്ദമുണ്ടാക്കുന്നത് പ്രധാനമായും കൗമാരക്കാരും യുവാക്കളുമാണെന്ന് അന്വേഷണത്തിൽ കണ്ടെത്തിയതായി പോലീസ് അറിയിച്ചു. റിപ്പോർട്ട് ചെയ്യപ്പെട്ട ശബ്ദങ്ങൾ വാഹനങ്ങളിൽ നിന്നുള്ളതാണെന്നും രാജ്യത്തിന്റെ സുരക്ഷയെ ബാധിക്കുന്ന യാതൊരു ഭീഷണിയും നിലവിലില്ലെന്നും അധികൃതർ ജനങ്ങളെ ആശ്വസിപ്പിച്ചു. യുഎഇ പൂർണ്ണമായും സുരക്ഷിതമാണെന്നും പോലീസ് വ്യക്തമാക്കി.

ദുബായ്, ഷാർജ തുടങ്ങിയ എമിറേറ്റുകളിലെ ജനവാസ പ്രദേശങ്ങളിൽ രാത്രികാല പോലീസ് പട്രോളിംഗ് ശക്തമാക്കിയിട്ടുണ്ട്. യുഎഇ ട്രാഫിക് നിയമപ്രകാരം അമിത ശബ്ദമുണ്ടാക്കുന്ന വാഹനങ്ങൾ ഓടിക്കുന്നവർക്ക് 2000 ദിർഹം പിഴയും 12 ബ്ലാക്ക് പോയിന്റുകളും ലഭിക്കും. കൂടാതെ വാഹനം പോലീസ് പിടിച്ചെടുക്കുകയും ചെയ്യും. അനധികൃതമായി രൂപമാറ്റം വരുത്തിയ വാഹനങ്ങൾ തിരികെ ലഭിക്കാൻ 10,000 ദിർഹം വരെ ഫീസ് നൽകേണ്ടിവരുമെന്നും അധികൃതർ അറിയിച്ചു. ഈ നടപടി കർശനമായി നടപ്പാക്കുന്നതിന് ദുബായ് പോലീസ് ഓപ്പറേഷൻസ് അസിസ്റ്റന്റ് കമാൻഡർ-ഇൻ-ചീഫ് മേജർ ജനറൽ സെയ്ഫ് മുഹൈർ അൽ മസ്‌റൂയിയും ഷാർജ പോലീസ് സെൻട്രൽ റീജിയൻ ഡയറക്ടർ ബ്രിഗേഡിയർ ഖലീഫ അൽ ഖസൂനിയും നേതൃത്വമൊരുക്കുന്നുണ്ട്. കുട്ടികൾ വാഹനങ്ങളിൽ അനധികൃത മാറ്റങ്ങൾ വരുത്തുന്നില്ലെന്ന് മാതാപിതാക്കൾ ശ്രദ്ധിക്കണമെന്നും അധികൃതർ അഭ്യർത്ഥിച്ചു. ഇത്തരം ശബ്ദശല്യം ഉണ്ടാക്കുന്ന വാഹനങ്ങളെക്കുറിച്ച് ഔദ്യോഗിക ചാനലുകൾ വഴി പോലീസിനെ അറിയിക്കണമെന്നും പൊതുജനങ്ങളോട് നിർദേശിച്ചിട്ടുണ്ട്. മേഖലയിലെ നിലവിലെ സാഹചര്യം പരിഗണിച്ച് ജനങ്ങളുടെ സമാധാനവും സുരക്ഷയും ഉറപ്പാക്കുക എന്ന ലക്ഷ്യത്തോടെയാണ് ഈ നടപടികൾ ശക്തമാക്കിയതെന്നും പോലീസ് അറിയിച്ചു. പോലീസിന്റെ ഈ ഇടപെടലിനെ പ്രവാസികളും സ്വദേശികളും സ്വാഗതം ചെയ്തിട്ടുണ്ട്.യുഎഇയിലെ വാർത്തകളും തൊഴിൽ അവസരങ്ങളും അതിവേഗം അറിയാൻ വാട്സ്ആപ്പ് ഗ്രൂപ്പിൽ അംഗമാവുhttps://chat.whatsapp.com/Dbf59JLetgBECJpr5UZOuZ?mode=gi_t