UAE Sunday passport collection; യുഎഇയിലെ ഇന്ത്യൻ പ്രവാസികൾക്ക് ആശ്വാസകരമായ പുതിയ പ്രഖ്യാപനവുമായി അൽഹിന്ദ് ഗ്ലോബൽ സർവീസസ്. ഇനി മുതൽ പ്രവൃത്തി ദിവസങ്ങളിൽ ജോലിയിൽ നിന്ന് അവധിയെടുക്കാതെ തന്നെ ഞായറാഴ്ചകളിൽ പാസ്പോർട്ടുകൾ കൈപ്പറ്റാം. യുഎഇയിലുടനീളം അൽഹിന്ദ് നടത്തുന്ന 16 ഇന്ത്യൻ കോൺസുലാർ ആപ്ലിക്കേഷൻ സെന്ററുകളിലും (ICAC) ഇതിനായി ഞായറാഴ്ചകളിൽ പ്രത്യേക കൗണ്ടറുകൾ ആരംഭിച്ചു. ഞായറാഴ്ചകളിൽ രാവിലെ 10 മുതൽ ഉച്ചയ്ക്ക് 12 മണി വരെയാണ് ഈ സൗകര്യം ലഭ്യമാകുക. ജോലിത്തിരക്ക് കാരണം സാധാരണ പ്രവൃത്തിദിനങ്ങളിൽ പാസ്പോർട്ട് നേരിട്ട് വാങ്ങാനോ കൊറിയർ കൈപ്പറ്റാനോ സാധിക്കാത്ത പ്രവാസികളുടെ നിരന്തര പരാതികൾ പരിഗണിച്ചാണ് പുതിയ നടപടി.
പാസ്പോർട്ട് പുതുക്കൽ, സാക്ഷ്യപ്പെടുത്തൽ (അറ്റസ്റ്റേഷൻ), മറ്റ് കോൺസുലാർ സേവനങ്ങൾ എന്നിവ കഴിഞ്ഞ ജൂലൈ 22-നാണ് അൽഹിന്ദ് പൂർണ്ണമായി ഏറ്റെടുത്തത്. 2025 നവംബറിൽ തന്നെ കേരളം ആസ്ഥാനമായുള്ള അൽഹിന്ദിന് ഇതിനുള്ള കരാർ ലഭിച്ചിരുന്നെങ്കിലും, ടെൻഡർ നടപടികൾക്കെതിരെ ചിലർ കോടതിയെ സമീപിച്ചതിനെത്തുടർന്ന് സേവനം ആരംഭിക്കുന്നത് വൈകുകയായിരുന്നു. ഈ കാലയളവിൽ 15 വർഷത്തിന് ശേഷം ആദ്യമായി ഇന്ത്യൻ മിഷനുകൾ നേരിട്ടാണ് കോൺസുലാർ സേവനങ്ങൾ നൽകിയത്. ഇത് കടുത്ത തിരക്കിനും വലിയ തോതിൽ അപേക്ഷകൾ കെട്ടിക്കിടക്കുന്നതിനും കാരണമായിരുന്നു. തുടർന്ന് ചുമതലയേറ്റ അൽഹിന്ദ്, നിലവിലുണ്ടായിരുന്ന മുഴുവൻ ബാക്ക്ലോഗുകളും (100 ശതമാനം അപേക്ഷകളും) പൂർണ്ണമായും തീർപ്പാക്കിയതായി വ്യക്തമാക്കി. ഇപ്പോൾ എല്ലാ കേന്ദ്രങ്ങളിലും സുഗമമായും കൃത്യസമയത്തും അപ്പോയിന്റ്മെന്റുകളും സേവനങ്ങളും ലഭ്യമാണ്.
ഫോം പൂരിപ്പിക്കൽ, ഫോട്ടോയെടുക്കൽ, ഫോട്ടോകോപ്പികൾ, കൊറിയർ തുടങ്ങിയ എല്ലാ സേവനങ്ങളും ഉൾപ്പെടെ 19 ദിർഹം മാത്രമാണ് നിശ്ചിത നിരക്കായി അൽഹിന്ദ് ഈടാക്കുന്നത്. ഈ സേവനങ്ങളെല്ലാം കേന്ദ്രങ്ങളിൽ തന്നെ ലഭ്യമായതിനാൽ മറ്റ് പുറം ഏജൻസികളെ ആശ്രയിക്കേണ്ടതില്ല. അപ്പോയിന്റ്മെന്റ് ബുക്കിംഗിന്റെ പേരിൽ വൻ തുക ഈടാക്കുന്ന വ്യാജ ഏജന്റുമാർക്കെതിരെ പ്രവാസികൾ ജാഗ്രത പാലിക്കണമെന്ന് ദുബായിലെ പുതിയ ഇന്ത്യൻ കോൺസൽ ജനറൽ ഡോ. ഇ. വിഷ്ണു വർധൻ റെഡ്ഡി കഴിഞ്ഞ മാസം മുന്നറിയിപ്പ് നൽകിയിരുന്നു. ഇടനിലക്കാരുടെ ചൂഷണം ഒഴിവാക്കാനും കേന്ദ്രങ്ങളിലേക്കുള്ള അനാവശ്യ യാത്രകൾ ഒഴിവാക്കാനും പാസ്പോർട്ട് സേവനങ്ങളിൽ കൂടുതൽ സാങ്കേതികവിദ്യകൾ ഉടൻ ഉൾപ്പെടുത്തുമെന്നും അദ്ദേഹം വ്യക്തമാക്കിയിരുന്നു.
അൽഹിന്ദിന്റെ ഔദ്യോഗിക വെബ്സൈറ്റ് വഴി ഓൺലൈനായി അപ്പോയിന്റ്മെന്റുകൾ ബുക്ക് ചെയ്യാം. തിങ്കൾ മുതൽ ശനി വരെയുള്ള ദിവസങ്ങളിൽ രാവിലെ 9 മണിക്കും രാത്രി 9 മണിക്കും പുതിയ സ്ലോട്ടുകൾ ലഭ്യമാകും. എല്ലാ കേന്ദ്രങ്ങളും രാവിലെ 8 മുതൽ വൈകുന്നേരം 6 വരെ പ്രവർത്തിക്കും. നിശ്ചിത അപ്പോയിന്റ്മെന്റ് സമയത്തിന് 15 മിനിറ്റ് മുമ്പ് മാത്രമേ അപേക്ഷകർക്ക് കേന്ദ്രങ്ങളിലേക്ക് പ്രവേശനം അനുവദിക്കൂ. അപേക്ഷകരുടെ കാത്തിരിപ്പ് സമയം കുറയ്ക്കുന്നതിനായി ബർദുബായ് കേന്ദ്രത്തിൽ മാത്രം 45 കൗണ്ടറുകൾ സജ്ജീകരിച്ചിട്ടുണ്ട്. യുഎഇയിലെ വാർത്തകളും തൊഴിൽ അവസരങ്ങളും അതിവേഗം അറിയാൻ വാട്സ്ആപ്പ് ഗ്രൂപ്പിൽ അംഗമാവുക https://chat.whatsapp.com/Dbf59JLetgBECJpr5UZOuZ?mode=gi_t
‘സ്ഫോടന ശബ്ദ’മുണ്ടാക്കുന്ന വാഹനങ്ങൾക്കെതിരെ യുഎഇയിൽ കർശന നടപടി; പിഴയും 12 ബ്ലാക്ക് പോയിന്റും
ജനവാസ മേഖലകളിൽ അർദ്ധരാത്രിയിൽ സ്ഫോടനത്തിന് സമാനമായ ശബ്ദമുണ്ടാക്കി ജനങ്ങളിൽ പരിഭ്രാന്തി സൃഷ്ടിക്കുന്ന വിധത്തിൽ നിയമവിരുദ്ധമായി രൂപമാറ്റം വരുത്തിയ കാറുകളുടെയും മോട്ടോർ സൈക്കിളുകളുടെയും യുഎഇ പോലീസ് കർശന നടപടികൾ ആരംഭിച്ചു. മേഖലയിലെ സംഘർഷാവസ്ഥ വാർത്തകളിൽ നിറഞ്ഞുനിൽക്കുന്ന സാഹചര്യത്തിൽ ഇത്തരം വാഹനങ്ങളിൽ നിന്നുണ്ടാകുന്ന ‘ബാക്ക് ഫയർ’ ശബ്ദങ്ങൾ പലരും മിസൈൽ ആക്രമണമോ സ്ഫോടനമോ ആണെന്ന് തെറ്റിദ്ധരിച്ച് ഭീതിയിലായിരുന്നുവെന്ന് അധികൃതർ വ്യക്തമാക്കി. എഞ്ചിനുകളിൽ മാറ്റം വരുത്തി ഉദ്ദേശപൂർവ്വം ശക്തമായ ശബ്ദമുണ്ടാക്കുന്നത് പ്രധാനമായും കൗമാരക്കാരും യുവാക്കളുമാണെന്ന് അന്വേഷണത്തിൽ കണ്ടെത്തിയതായി പോലീസ് അറിയിച്ചു. റിപ്പോർട്ട് ചെയ്യപ്പെട്ട ശബ്ദങ്ങൾ വാഹനങ്ങളിൽ നിന്നുള്ളതാണെന്നും രാജ്യത്തിന്റെ സുരക്ഷയെ ബാധിക്കുന്ന യാതൊരു ഭീഷണിയും നിലവിലില്ലെന്നും അധികൃതർ ജനങ്ങളെ ആശ്വസിപ്പിച്ചു. യുഎഇ പൂർണ്ണമായും സുരക്ഷിതമാണെന്നും പോലീസ് വ്യക്തമാക്കി.
ദുബായ്, ഷാർജ തുടങ്ങിയ എമിറേറ്റുകളിലെ ജനവാസ പ്രദേശങ്ങളിൽ രാത്രികാല പോലീസ് പട്രോളിംഗ് ശക്തമാക്കിയിട്ടുണ്ട്. യുഎഇ ട്രാഫിക് നിയമപ്രകാരം അമിത ശബ്ദമുണ്ടാക്കുന്ന വാഹനങ്ങൾ ഓടിക്കുന്നവർക്ക് 2000 ദിർഹം പിഴയും 12 ബ്ലാക്ക് പോയിന്റുകളും ലഭിക്കും. കൂടാതെ വാഹനം പോലീസ് പിടിച്ചെടുക്കുകയും ചെയ്യും. അനധികൃതമായി രൂപമാറ്റം വരുത്തിയ വാഹനങ്ങൾ തിരികെ ലഭിക്കാൻ 10,000 ദിർഹം വരെ ഫീസ് നൽകേണ്ടിവരുമെന്നും അധികൃതർ അറിയിച്ചു. ഈ നടപടി കർശനമായി നടപ്പാക്കുന്നതിന് ദുബായ് പോലീസ് ഓപ്പറേഷൻസ് അസിസ്റ്റന്റ് കമാൻഡർ-ഇൻ-ചീഫ് മേജർ ജനറൽ സെയ്ഫ് മുഹൈർ അൽ മസ്റൂയിയും ഷാർജ പോലീസ് സെൻട്രൽ റീജിയൻ ഡയറക്ടർ ബ്രിഗേഡിയർ ഖലീഫ അൽ ഖസൂനിയും നേതൃത്വമൊരുക്കുന്നുണ്ട്. കുട്ടികൾ വാഹനങ്ങളിൽ അനധികൃത മാറ്റങ്ങൾ വരുത്തുന്നില്ലെന്ന് മാതാപിതാക്കൾ ശ്രദ്ധിക്കണമെന്നും അധികൃതർ അഭ്യർത്ഥിച്ചു. ഇത്തരം ശബ്ദശല്യം ഉണ്ടാക്കുന്ന വാഹനങ്ങളെക്കുറിച്ച് ഔദ്യോഗിക ചാനലുകൾ വഴി പോലീസിനെ അറിയിക്കണമെന്നും പൊതുജനങ്ങളോട് നിർദേശിച്ചിട്ടുണ്ട്. മേഖലയിലെ നിലവിലെ സാഹചര്യം പരിഗണിച്ച് ജനങ്ങളുടെ സമാധാനവും സുരക്ഷയും ഉറപ്പാക്കുക എന്ന ലക്ഷ്യത്തോടെയാണ് ഈ നടപടികൾ ശക്തമാക്കിയതെന്നും പോലീസ് അറിയിച്ചു. പോലീസിന്റെ ഈ ഇടപെടലിനെ പ്രവാസികളും സ്വദേശികളും സ്വാഗതം ചെയ്തിട്ടുണ്ട്.യുഎഇയിലെ വാർത്തകളും തൊഴിൽ അവസരങ്ങളും അതിവേഗം അറിയാൻ വാട്സ്ആപ്പ് ഗ്രൂപ്പിൽ അംഗമാവുhttps://chat.whatsapp.com/Dbf59JLetgBECJpr5UZOuZ?mode=gi_t
