Emirates AI and biometrics; വിമാനയാത്രയിൽ യാത്രക്കാർ എന്തെങ്കിലും ആവശ്യപ്പെടുന്നതിനേക്കാൾ മുൻപ് തന്നെ അവരുടെ ആവശ്യങ്ങൾ കൃത്യമായി തിരിച്ചറിഞ്ഞ് സേവനം നൽകുന്ന അത്യാധുനിക സാങ്കേതിക വിപ്ലവത്തിനൊരുങ്ങി ദുബായുടെ പ്രമുഖ വിമാനക്കമ്പനിയായ എമിറേറ്റ്സ്. എ.ഐ ബയോമെട്രിക് സാങ്കേതികവിദ്യയും സംയോജിപ്പിച്ച് യാത്രക്കാരുടെ താത്പര്യങ്ങൾ മുൻകൂട്ടി മനസ്സിലാക്കുന്ന പദ്ധതികളാണ് എമിറേറ്റ്സ് ആവിഷ്കരിക്കുന്നത്. ഒരു യാത്രക്കാരൻ യാത്ര ആസൂത്രണം ചെയ്യുന്നത് മുതൽ യാത്ര കഴിഞ്ഞ് വീട്ടിലെത്തുന്നതുവരെയുള്ള മുഴുവൻ ഘട്ടങ്ങളിലും അതിനൂതനവും വ്യക്തിഗതവുമായ യാത്രാനുഭവം നൽകുകയാണ് കമ്പനിയുടെ ലക്ഷ്യം. എമിറേറ്റ്സ് ഗ്രൂപ്പിന്റെ വാർഷിക സാങ്കേതിക ഇന്നൊവേഷൻ ഫോറമായ ‘ഫോർസടെക്’ വേദിയിൽ സംസാരിക്കവെ എമിറേറ്റ്സ് ഇന്നൊവേഷൻ ആന്റ് ന്യൂ ടെക്നോളജീസ് വൈസ് പ്രസിഡന്റ് കീനൻ ഹംസയാണ് ഈ വിവരങ്ങൾ പങ്കുവെച്ചത്. യാത്രയ്ക്ക് മുൻപും വിമാനത്തിനകത്തും യാത്രയ്ക്ക് ശേഷവുമുള്ള ഓരോ ഘട്ടത്തിലും യാത്രക്കാരുമായി കൂടുതൽ മികച്ച ബന്ധം സ്ഥാപിക്കാനാണ് ശ്രമിക്കുന്നത്. യാത്രക്കാർ ആവശ്യപ്പെടുന്നതിന് മുൻപ് തന്നെ അവർക്ക് ഇഷ്ടമുള്ള ചായയോ കാപ്പിയോ സീറ്റിലെത്തിക്കാൻ പുതിയ സംവിധാനത്തിലൂടെ സാധിക്കും. എ.ഐ സാങ്കേതികവിദ്യ ഉപയോഗിച്ച് ഓരോ യാത്രക്കാരന്റെയും മുൻഗണനകളും യാത്രാരീതികളും ഉൾക്കൊള്ളുന്ന പ്രൊഫൈൽ തയ്യാറാക്കുകയും, വിമാനത്താവളത്തിലും വിമാനത്തിലും ബയോമെട്രിക് സംവിധാനത്തിലൂടെ ഇവരെ പെട്ടെന്ന് തിരിച്ചറിയുകയുമാണ് ചെയ്യുന്നത്.

ഈ മാറ്റങ്ങൾ വേഗത്തിലാക്കുന്നതിനായി എമിറേറ്റ്സ് തങ്ങളുടെ ഗവേഷണ-വികസന പ്രവർത്തനങ്ങൾ ശക്തമാക്കിയിട്ടുണ്ട്. കമ്പനിയുടെ റോബോട്ടിക്സ് വിഭാഗത്തിന്റെ ശേഷി കഴിഞ്ഞ ഒരു വർഷത്തിനിടെ ഇരട്ടിയായി വർധിച്ചു. വിമാന എഞ്ചിനുകൾ പരിശോധിക്കാൻ ഡ്രോണുകൾ ഉപയോഗിക്കുന്ന സംവിധാനവും, കാർഗോ വെയർഹൗസുകളിലെ റോബോട്ടിക്സ് പ്രവർത്തനങ്ങളും നിലവിൽ വിജയകരമായി പ്രവർത്തിക്കുന്നുണ്ട്. എന്നാൽ സാങ്കേതികവിദ്യ എത്രത്തോളം വളർന്നാലും ജീവനക്കാരുടെ നേരിട്ടുള്ള പരിചരണവും സേവനവും എമിറേറ്റ്സ് ഒഴിവാക്കില്ലെന്നും, ജീവനക്കാരുടെ കഠിനമായ സാധാരണ ജോലികൾ ലഘൂകരിക്കാൻ മാത്രമാണ് റോബോട്ടുകളെ ഉപയോഗിക്കുകയെന്നും അദ്ദേഹം വ്യക്തമാക്കി. എമിറേറ്റ്സും ദുബായ് ടൂറിസവും തമ്മിലുള്ള ശക്തമായ പങ്കാളിത്തവും ഈ സാങ്കേതിക മുന്നേറ്റങ്ങൾക്ക് കരുത്തുപകരുന്നുണ്ട്. യാത്രാ ഡാറ്റകൾ പങ്കുവെച്ചുകൊണ്ട് കൂടുതൽ സഞ്ചാരികളെ ദുബായിലേക്ക് ആകർഷിക്കാൻ ഇരു വിഭാഗങ്ങളും ഒന്നിച്ച് പ്രവർത്തിക്കുകയാണെന്ന് ദുബായ് ടൂറിസം ആൻഡ് കൊമേഴ്സ് മാർക്കറ്റിംഗ് സി.ഇ.ഒ ഇസ്സാം കാസിമും എമിറേറ്റ്സ് ചീഫ് കൊമേഴ്സ്യൽ ഓഫീസർ അദ്നാൻ കാസിമും വ്യക്തമാക്കി. മുൻപ് മറ്റ് രാജ്യങ്ങളിലേക്ക് പോകാനുള്ള ഒരു ട്രാൻസിറ്റ് കേന്ദ്രം മാത്രമായിരുന്ന ദുബായ്, ഇന്ന് ലോകത്തെ ഏറ്റവും പ്രധാനപ്പെട്ട സന്ദർശന കേന്ദ്രങ്ങളിലൊന്നായി മാറിയെന്നും എമിറേറ്റ്സ് അധികൃതർ കൂട്ടിച്ചേർത്തു. നിലവിൽ തങ്ങളുടെ ശൃംഖലയുടെ 98 ശതമാനവും സർവീസ് ശേഷിയുടെ 93 ശതമാനവും എമിറേറ്റ്സ് പൂർണ്ണമായും വീണ്ടെടുത്തിട്ടുണ്ട്. യുഎഇയിലെ വാർത്തകളും തൊഴിൽ അവസരങ്ങളും അതിവേഗം അറിയാൻ വാട്സ്ആപ്പ് ഗ്രൂപ്പിൽ അംഗമാവുക https://chat.whatsapp.com/Dbf59JLetgBECJpr5UZOuZ?mode=gi_t

‘സ്ഫോടന ശബ്ദ’മുണ്ടാക്കുന്ന വാഹനങ്ങൾക്കെതിരെ യുഎഇയിൽ കർശന നടപടി; പിഴയും 12 ബ്ലാക്ക് പോയിന്റും

ജനവാസ മേഖലകളിൽ അർദ്ധരാത്രിയിൽ സ്ഫോടനത്തിന് സമാനമായ ശബ്ദമുണ്ടാക്കി ജനങ്ങളിൽ പരിഭ്രാന്തി സൃഷ്ടിക്കുന്ന വിധത്തിൽ നിയമവിരുദ്ധമായി രൂപമാറ്റം വരുത്തിയ കാറുകളുടെയും മോട്ടോർ സൈക്കിളുകളുടെയും യുഎഇ പോലീസ് കർശന നടപടികൾ ആരംഭിച്ചു. മേഖലയിലെ സംഘർഷാവസ്ഥ വാർത്തകളിൽ നിറഞ്ഞുനിൽക്കുന്ന സാഹചര്യത്തിൽ ഇത്തരം വാഹനങ്ങളിൽ നിന്നുണ്ടാകുന്ന ‘ബാക്ക് ഫയർ’ ശബ്ദങ്ങൾ പലരും മിസൈൽ ആക്രമണമോ സ്ഫോടനമോ ആണെന്ന് തെറ്റിദ്ധരിച്ച് ഭീതിയിലായിരുന്നുവെന്ന് അധികൃതർ വ്യക്തമാക്കി. എഞ്ചിനുകളിൽ മാറ്റം വരുത്തി ഉദ്ദേശപൂർവ്വം ശക്തമായ ശബ്ദമുണ്ടാക്കുന്നത് പ്രധാനമായും കൗമാരക്കാരും യുവാക്കളുമാണെന്ന് അന്വേഷണത്തിൽ കണ്ടെത്തിയതായി പോലീസ് അറിയിച്ചു. റിപ്പോർട്ട് ചെയ്യപ്പെട്ട ശബ്ദങ്ങൾ വാഹനങ്ങളിൽ നിന്നുള്ളതാണെന്നും രാജ്യത്തിന്റെ സുരക്ഷയെ ബാധിക്കുന്ന യാതൊരു ഭീഷണിയും നിലവിലില്ലെന്നും അധികൃതർ ജനങ്ങളെ ആശ്വസിപ്പിച്ചു. യുഎഇ പൂർണ്ണമായും സുരക്ഷിതമാണെന്നും പോലീസ് വ്യക്തമാക്കി.

ദുബായ്, ഷാർജ തുടങ്ങിയ എമിറേറ്റുകളിലെ ജനവാസ പ്രദേശങ്ങളിൽ രാത്രികാല പോലീസ് പട്രോളിംഗ് ശക്തമാക്കിയിട്ടുണ്ട്. യുഎഇ ട്രാഫിക് നിയമപ്രകാരം അമിത ശബ്ദമുണ്ടാക്കുന്ന വാഹനങ്ങൾ ഓടിക്കുന്നവർക്ക് 2000 ദിർഹം പിഴയും 12 ബ്ലാക്ക് പോയിന്റുകളും ലഭിക്കും. കൂടാതെ വാഹനം പോലീസ് പിടിച്ചെടുക്കുകയും ചെയ്യും. അനധികൃതമായി രൂപമാറ്റം വരുത്തിയ വാഹനങ്ങൾ തിരികെ ലഭിക്കാൻ 10,000 ദിർഹം വരെ ഫീസ് നൽകേണ്ടിവരുമെന്നും അധികൃതർ അറിയിച്ചു. ഈ നടപടി കർശനമായി നടപ്പാക്കുന്നതിന് ദുബായ് പോലീസ് ഓപ്പറേഷൻസ് അസിസ്റ്റന്റ് കമാൻഡർ-ഇൻ-ചീഫ് മേജർ ജനറൽ സെയ്ഫ് മുഹൈർ അൽ മസ്‌റൂയിയും ഷാർജ പോലീസ് സെൻട്രൽ റീജിയൻ ഡയറക്ടർ ബ്രിഗേഡിയർ ഖലീഫ അൽ ഖസൂനിയും നേതൃത്വമൊരുക്കുന്നുണ്ട്. കുട്ടികൾ വാഹനങ്ങളിൽ അനധികൃത മാറ്റങ്ങൾ വരുത്തുന്നില്ലെന്ന് മാതാപിതാക്കൾ ശ്രദ്ധിക്കണമെന്നും അധികൃതർ അഭ്യർത്ഥിച്ചു. ഇത്തരം ശബ്ദശല്യം ഉണ്ടാക്കുന്ന വാഹനങ്ങളെക്കുറിച്ച് ഔദ്യോഗിക ചാനലുകൾ വഴി പോലീസിനെ അറിയിക്കണമെന്നും പൊതുജനങ്ങളോട് നിർദേശിച്ചിട്ടുണ്ട്. മേഖലയിലെ നിലവിലെ സാഹചര്യം പരിഗണിച്ച് ജനങ്ങളുടെ സമാധാനവും സുരക്ഷയും ഉറപ്പാക്കുക എന്ന ലക്ഷ്യത്തോടെയാണ് ഈ നടപടികൾ ശക്തമാക്കിയതെന്നും പോലീസ് അറിയിച്ചു. പോലീസിന്റെ ഈ ഇടപെടലിനെ പ്രവാസികളും സ്വദേശികളും സ്വാഗതം ചെയ്തിട്ടുണ്ട്.യുഎഇയിലെ വാർത്തകളും തൊഴിൽ അവസരങ്ങളും അതിവേഗം അറിയാൻ വാട്സ്ആപ്പ് ഗ്രൂപ്പിൽ അംഗമാവുhttps://chat.whatsapp.com/Dbf59JLetgBECJpr5UZOuZ?mode=gi_t