UAE School Fees Case; കുട്ടികളുടെ സ്കൂൾ ഫീസ് ഇനത്തിൽ ലക്ഷങ്ങൾ കുടിശ്ശിക വരുത്തിയ രക്ഷിതാവിനോട് 1,97,680 ദിർഹം (ഏകദേശം 45 ലക്ഷത്തിലധികം ഇന്ത്യൻ രൂപ) നൽകാൻ അബുദാബി കൊമേഴ്‌സ്യൽ കോടതി ഉത്തരവിട്ടു. രക്ഷിതാവിനൊപ്പം, ഫീസ് നൽകാനായി ഉപയോഗിച്ച ചെക്ക് ബുക്കിന്റെ ഉടമയായ യുവതിയും തുകയുടെ ഒരു ഭാഗം നൽകാൻ ബാധ്യസ്ഥയാണെന്ന് കോടതി വിധിച്ചു. മക്കളെ സ്വകാര്യ സ്കൂളിൽ ചേർത്ത ശേഷം ഫീസ് അടയ്ക്കുന്നതിൽ രക്ഷിതാവ് വീഴ്ച വരുത്തിയതിനെ തുടർന്നാണ് സ്കൂൾ അധികൃതർ നിയമനടപടി സ്വീകരിച്ചത്. ഫീസ് കുടിശ്ശികയുടെ ഭാഗമായി 1,42,800 ദിർഹത്തിന്റെ ഒരു ചെക്ക് നൽകിയിരുന്നുവെങ്കിലും, പണം പിൻവലിക്കാൻ കഴിയാത്ത വിധം തെറ്റായ രീതിയിൽ തയ്യാറാക്കിയതിനാലാണ് അത് മടങ്ങിയത്. ഈ ചെക്ക് ഒരു യുവതിയുടെ അക്കൗണ്ടിൽ നിന്നുള്ളതായിരുന്നു. ഫീസ് കുടിശ്ശികയായ 1,97,680 ദിർഹം പിതാവിൽ നിന്ന് ഈടാക്കി നൽകണമെന്നും, ചെക്ക് തുകയായ 1,42,800 ദിർഹത്തിന് യുവതിക്കും തുല്യ ഉത്തരവാദിത്തമുണ്ടെന്നും കാണിച്ചാണ് സ്കൂൾ സിവിൽ കേസ് ഫയൽ ചെയ്തത്. കൂടാതെ നഷ്ടപരിഹാരമായി 15,000 ദിർഹവും സ്കൂൾ ആവശ്യപ്പെട്ടിരുന്നു. തെളിവായി ഇൻവോയ്‌സുകൾ, അക്കൗണ്ട് സ്റ്റേറ്റ്‌മെന്റുകൾ, മടങ്ങിയ ചെക്കിന്റെ പകർപ്പ് എന്നിവ ഹാജരാക്കി. തനിക്ക് ഈ തർക്കത്തിൽ പങ്കില്ലെന്ന യുവതിയുടെ വാദം കോടതി തള്ളി. ചെക്ക് അവരുടെ അക്കൗണ്ടിൽ നിന്നുള്ളതാണെന്നും തുക കൈമാറിയെന്ന് തെളിയിക്കാൻ അവർക്ക് സാധിച്ചില്ലെന്നും കോടതി നിരീക്ഷിച്ചു. ഫീസ് അടച്ചുവെന്ന് തെളിയിക്കാൻ പിതാവിനും സാധിച്ചില്ല. തുടർന്ന്, ആകെ കുടിശ്ശികയായ 1,97,680 ദിർഹം സ്കൂളിന് നൽകാൻ കോടതി ഉത്തരവിട്ടു. ഇതിൽ ചെക്ക് തുകയായ 1,42,800 ദിർഹം പിതാവും യുവതിയും ചേർന്ന് നൽകണം. ഇതിനുപുറമെ, സ്കൂളിന് നഷ്ടപരിഹാരമായി 3,000 ദിർഹവും കോടതി ചെലവുകളും നിയമപരമായ ഫീസും നൽകാനും കോടതി നിർദ്ദേശിച്ചു. സ്കൂൾ ആവശ്യപ്പെട്ട മറ്റ് ചില നഷ്ടപരിഹാര അപേക്ഷകൾ കോടതി നിരസിച്ചു. യുഎഇയിലെ വാർത്തകളും തൊഴിൽ അവസരങ്ങളും അതിവേഗം അറിയാൻ വാട്സ്ആപ്പ് ഗ്രൂപ്പിൽ അംഗമാവുക https://chat.whatsapp.com/Dbf59JLetgBECJpr5UZOuZ?mode=gi_t

‘സ്ഫോടന ശബ്ദ’മുണ്ടാക്കുന്ന വാഹനങ്ങൾക്കെതിരെ യുഎഇയിൽ കർശന നടപടി; പിഴയും 12 ബ്ലാക്ക് പോയിന്റും

ജനവാസ മേഖലകളിൽ അർദ്ധരാത്രിയിൽ സ്ഫോടനത്തിന് സമാനമായ ശബ്ദമുണ്ടാക്കി ജനങ്ങളിൽ പരിഭ്രാന്തി സൃഷ്ടിക്കുന്ന വിധത്തിൽ നിയമവിരുദ്ധമായി രൂപമാറ്റം വരുത്തിയ കാറുകളുടെയും മോട്ടോർ സൈക്കിളുകളുടെയും യുഎഇ പോലീസ് കർശന നടപടികൾ ആരംഭിച്ചു. മേഖലയിലെ സംഘർഷാവസ്ഥ വാർത്തകളിൽ നിറഞ്ഞുനിൽക്കുന്ന സാഹചര്യത്തിൽ ഇത്തരം വാഹനങ്ങളിൽ നിന്നുണ്ടാകുന്ന ‘ബാക്ക് ഫയർ’ ശബ്ദങ്ങൾ പലരും മിസൈൽ ആക്രമണമോ സ്ഫോടനമോ ആണെന്ന് തെറ്റിദ്ധരിച്ച് ഭീതിയിലായിരുന്നുവെന്ന് അധികൃതർ വ്യക്തമാക്കി. എഞ്ചിനുകളിൽ മാറ്റം വരുത്തി ഉദ്ദേശപൂർവ്വം ശക്തമായ ശബ്ദമുണ്ടാക്കുന്നത് പ്രധാനമായും കൗമാരക്കാരും യുവാക്കളുമാണെന്ന് അന്വേഷണത്തിൽ കണ്ടെത്തിയതായി പോലീസ് അറിയിച്ചു. റിപ്പോർട്ട് ചെയ്യപ്പെട്ട ശബ്ദങ്ങൾ വാഹനങ്ങളിൽ നിന്നുള്ളതാണെന്നും രാജ്യത്തിന്റെ സുരക്ഷയെ ബാധിക്കുന്ന യാതൊരു ഭീഷണിയും നിലവിലില്ലെന്നും അധികൃതർ ജനങ്ങളെ ആശ്വസിപ്പിച്ചു. യുഎഇ പൂർണ്ണമായും സുരക്ഷിതമാണെന്നും പോലീസ് വ്യക്തമാക്കി.

ദുബായ്, ഷാർജ തുടങ്ങിയ എമിറേറ്റുകളിലെ ജനവാസ പ്രദേശങ്ങളിൽ രാത്രികാല പോലീസ് പട്രോളിംഗ് ശക്തമാക്കിയിട്ടുണ്ട്. യുഎഇ ട്രാഫിക് നിയമപ്രകാരം അമിത ശബ്ദമുണ്ടാക്കുന്ന വാഹനങ്ങൾ ഓടിക്കുന്നവർക്ക് 2000 ദിർഹം പിഴയും 12 ബ്ലാക്ക് പോയിന്റുകളും ലഭിക്കും. കൂടാതെ വാഹനം പോലീസ് പിടിച്ചെടുക്കുകയും ചെയ്യും. അനധികൃതമായി രൂപമാറ്റം വരുത്തിയ വാഹനങ്ങൾ തിരികെ ലഭിക്കാൻ 10,000 ദിർഹം വരെ ഫീസ് നൽകേണ്ടിവരുമെന്നും അധികൃതർ അറിയിച്ചു. ഈ നടപടി കർശനമായി നടപ്പാക്കുന്നതിന് ദുബായ് പോലീസ് ഓപ്പറേഷൻസ് അസിസ്റ്റന്റ് കമാൻഡർ-ഇൻ-ചീഫ് മേജർ ജനറൽ സെയ്ഫ് മുഹൈർ അൽ മസ്‌റൂയിയും ഷാർജ പോലീസ് സെൻട്രൽ റീജിയൻ ഡയറക്ടർ ബ്രിഗേഡിയർ ഖലീഫ അൽ ഖസൂനിയും നേതൃത്വമൊരുക്കുന്നുണ്ട്. കുട്ടികൾ വാഹനങ്ങളിൽ അനധികൃത മാറ്റങ്ങൾ വരുത്തുന്നില്ലെന്ന് മാതാപിതാക്കൾ ശ്രദ്ധിക്കണമെന്നും അധികൃതർ അഭ്യർത്ഥിച്ചു. ഇത്തരം ശബ്ദശല്യം ഉണ്ടാക്കുന്ന വാഹനങ്ങളെക്കുറിച്ച് ഔദ്യോഗിക ചാനലുകൾ വഴി പോലീസിനെ അറിയിക്കണമെന്നും പൊതുജനങ്ങളോട് നിർദേശിച്ചിട്ടുണ്ട്. മേഖലയിലെ നിലവിലെ സാഹചര്യം പരിഗണിച്ച് ജനങ്ങളുടെ സമാധാനവും സുരക്ഷയും ഉറപ്പാക്കുക എന്ന ലക്ഷ്യത്തോടെയാണ് ഈ നടപടികൾ ശക്തമാക്കിയതെന്നും പോലീസ് അറിയിച്ചു. പോലീസിന്റെ ഈ ഇടപെടലിനെ പ്രവാസികളും സ്വദേശികളും സ്വാഗതം ചെയ്തിട്ടുണ്ട്.യുഎഇയിലെ വാർത്തകളും തൊഴിൽ അവസരങ്ങളും അതിവേഗം അറിയാൻ വാട്സ്ആപ്പ് ഗ്രൂപ്പിൽ അംഗമാവുhttps://chat.whatsapp.com/Dbf59JLetgBECJpr5UZOuZ?mode=gi_t