ഇന്ത്യൻ വിമാനക്കമ്പനിയായ ഇൻഡിഗോയുടെ വെബ്സൈറ്റിൽ ബുധനാഴ്ച ഉണ്ടായ സാങ്കേതിക തകരാറിനെ തുടർന്ന് ചില ഉപഭോക്താക്കൾക്ക് വിമാന ടിക്കറ്റുകൾ ബുക്ക് ചെയ്യാൻ സാധിച്ചില്ല. വിമാനങ്ങൾക്കായി തിരയുമ്പോൾ “No data available” എന്ന സന്ദേശമാണ് ചിലർക്ക് ലഭിച്ചത്.

പ്രധാന റിസർവേഷൻ പ്ലാറ്റ്‌ഫോമിൽ ഇടയ്ക്കിടെ സാങ്കേതിക പ്രശ്നങ്ങൾ നേരിടുന്നതായി ഇൻഡിഗോ എക്‌സിലൂടെ അറിയിച്ചു. ഇതുമൂലം ചില ഉപഭോക്താക്കൾക്ക് ഓൺലൈൻ സേവനങ്ങൾ ഉപയോഗിക്കുന്നതിൽ ബുദ്ധിമുട്ടുണ്ടാകാമെന്നും കമ്പനി വ്യക്തമാക്കി.

പ്രശ്നം എത്രയും വേഗം പരിഹരിക്കുന്നതിനായി ബന്ധപ്പെട്ട പങ്കാളിയുമായി ചേർന്ന് സാങ്കേതിക സംഘം പ്രവർത്തിച്ചുവരികയാണെന്ന് ഇൻഡിഗോ അറിയിച്ചു. അടിയന്തര യാത്രാ സഹായം ആവശ്യമുള്ളവർക്ക് കോൺടാക്ട് സെന്ററുമായി ബന്ധപ്പെടാനും കമ്പനി നിർദേശിച്ചു. ഉടൻ യാത്ര ചെയ്യേണ്ടതില്ലാത്ത യാത്രക്കാർ കുറച്ച് സമയത്തിന് ശേഷം ഇൻഡിഗോയുടെ വെബ്സൈറ്റോ മൊബൈൽ ആപ്പോ വീണ്ടും പരിശോധിക്കണമെന്നും വിമാനക്കമ്പനി അഭ്യർഥിച്ചു. സാങ്കേതിക തകരാറിനെ തുടർന്നുണ്ടായ അസൗകര്യത്തിൽ ഖേദം പ്രകടിപ്പിച്ച ഇൻഡിഗോ, ഉപഭോക്താക്കളുടെ ക്ഷമയ്ക്കും സഹകരണത്തിനും നന്ദി അറിയിച്ചു.