Dubai Traffic Violation; അശ്രദ്ധമായി വാഹനം ഓടിക്കുകയും പെട്ടെന്ന് വെട്ടിച്ചതിനെത്തുടർന്ന് ബൈക്ക് മറിഞ്ഞ് അപകടമുണ്ടാകുകയും ചെയ്ത സംഭവത്തിൽ ഏഷ്യക്കാരനായ യുവാവിനെതിരെ ദുബായ് ട്രാഫിക് കോടതി ശിക്ഷാ നടപടികൾ സ്വീകരിച്ചു. പിഴയ്ക്ക് പുറമെ ഇയാളുടെ ഡ്രൈവിംഗ് ലൈസൻസ് മൂന്ന് മാസത്തേക്ക് സസ്‌പെൻഡ് ചെയ്യാനും കോടതി ഉത്തരവിട്ടു. ദുബായിലെ ഒരു പ്രധാന റോഡിൽ ബൈക്ക് മറിഞ്ഞുണ്ടായ അപകടത്തെക്കുറിച്ച് വിവരം ലഭിച്ചതനുസരിച്ച് പോലീസ് പട്രോൾ സംഘം സ്ഥലത്തെത്തി പരിശോധന നടത്തി. ഡ്രൈവർ വേണ്ടത്ര ശ്രദ്ധയില്ലാതെ വാഹനം ഓടിച്ചതും പെട്ടെന്ന് വാഹനം വെട്ടിച്ചതുമാണ് അപകടത്തിന് കാരണമായതെന്ന് പോലീസ് തയ്യാറാക്കിയ ട്രാഫിക് സ്‌കെച്ചിൽ നിന്നും വ്യക്തമായി. ബൈക്കിന്റെ മുൻഭാഗത്തിനും ഇടതുവശത്തിനും അപകടത്തിൽ കേടുപാടുകൾ സംഭവിച്ചിരുന്നു. അപകടത്തെക്കുറിച്ചുള്ള അന്വേഷണത്തിനിടെയാണ് വാഹനത്തിന്റെ നിയമപരമായ രേഖകളിലും വീഴ്ച കണ്ടെത്തിയത്. ബൈക്കിന്റെ രജിസ്‌ട്രേഷൻ കാലാവധി കഴിഞ്ഞ വർഷം അവസാനിച്ചിരുന്നു. കൂടാതെ ഇൻഷുറൻസ് പരിരക്ഷയില്ലാതെയാണ് വാഹനം പൊതുനിരത്തിലിറക്കിയതെന്നും അധികൃതർ കണ്ടെത്തി. ഇവ ഓരോന്നും പ്രത്യേകം നിയമലംഘനങ്ങളായി കോടതി കണക്കാക്കി. തന്റെ ഭാഗത്തുനിന്നുണ്ടായ പിഴവുകൾ ഡ്രൈവർ കോടതിയിൽ സമ്മതിച്ചു. അശ്രദ്ധമായി വാഹനം ഓടിച്ച് നാശനഷ്ടമുണ്ടാക്കിയതിനും, കാലാവധി കഴിഞ്ഞ രജിസ്‌ട്രേഷനും ഇൻഷുറൻസുമില്ലാതെ ബൈക്ക് നിരത്തിലിറക്കിയതിനും കോടതി വെവ്വേറെ പിഴകൾ ചുമത്തി. വിധി വരുന്ന തീയതി മുതൽ മൂന്ന് മാസത്തേക്ക് ലൈസൻസ് ഉപയോഗിക്കുന്നതിനും വിലക്കുണ്ട്. ട്രാഫിക് സുരക്ഷാ മാനദണ്ഡങ്ങൾ പാലിക്കുന്നതിൽ വീഴ്ച വരുത്തുന്നവർക്കെതിരെ കർശന നടപടി തുടരുമെന്ന് അധികൃതർ വ്യക്തമാക്കി. യുഎഇയിലെ വാർത്തകളും തൊഴിൽ അവസരങ്ങളും അതിവേഗം അറിയാൻ വാട്സ്ആപ്പ് ഗ്രൂപ്പിൽ അംഗമാവുക https://chat.whatsapp.com/Dbf59JLetgBECJpr5UZOuZ?mode=gi_t

‘സ്ഫോടന ശബ്ദ’മുണ്ടാക്കുന്ന വാഹനങ്ങൾക്കെതിരെ യുഎഇയിൽ കർശന നടപടി; പിഴയും 12 ബ്ലാക്ക് പോയിന്റും

ജനവാസ മേഖലകളിൽ അർദ്ധരാത്രിയിൽ സ്ഫോടനത്തിന് സമാനമായ ശബ്ദമുണ്ടാക്കി ജനങ്ങളിൽ പരിഭ്രാന്തി സൃഷ്ടിക്കുന്ന വിധത്തിൽ നിയമവിരുദ്ധമായി രൂപമാറ്റം വരുത്തിയ കാറുകളുടെയും മോട്ടോർ സൈക്കിളുകളുടെയും യുഎഇ പോലീസ് കർശന നടപടികൾ ആരംഭിച്ചു. മേഖലയിലെ സംഘർഷാവസ്ഥ വാർത്തകളിൽ നിറഞ്ഞുനിൽക്കുന്ന സാഹചര്യത്തിൽ ഇത്തരം വാഹനങ്ങളിൽ നിന്നുണ്ടാകുന്ന ‘ബാക്ക് ഫയർ’ ശബ്ദങ്ങൾ പലരും മിസൈൽ ആക്രമണമോ സ്ഫോടനമോ ആണെന്ന് തെറ്റിദ്ധരിച്ച് ഭീതിയിലായിരുന്നുവെന്ന് അധികൃതർ വ്യക്തമാക്കി. എഞ്ചിനുകളിൽ മാറ്റം വരുത്തി ഉദ്ദേശപൂർവ്വം ശക്തമായ ശബ്ദമുണ്ടാക്കുന്നത് പ്രധാനമായും കൗമാരക്കാരും യുവാക്കളുമാണെന്ന് അന്വേഷണത്തിൽ കണ്ടെത്തിയതായി പോലീസ് അറിയിച്ചു. റിപ്പോർട്ട് ചെയ്യപ്പെട്ട ശബ്ദങ്ങൾ വാഹനങ്ങളിൽ നിന്നുള്ളതാണെന്നും രാജ്യത്തിന്റെ സുരക്ഷയെ ബാധിക്കുന്ന യാതൊരു ഭീഷണിയും നിലവിലില്ലെന്നും അധികൃതർ ജനങ്ങളെ ആശ്വസിപ്പിച്ചു. യുഎഇ പൂർണ്ണമായും സുരക്ഷിതമാണെന്നും പോലീസ് വ്യക്തമാക്കി.

ദുബായ്, ഷാർജ തുടങ്ങിയ എമിറേറ്റുകളിലെ ജനവാസ പ്രദേശങ്ങളിൽ രാത്രികാല പോലീസ് പട്രോളിംഗ് ശക്തമാക്കിയിട്ടുണ്ട്. യുഎഇ ട്രാഫിക് നിയമപ്രകാരം അമിത ശബ്ദമുണ്ടാക്കുന്ന വാഹനങ്ങൾ ഓടിക്കുന്നവർക്ക് 2000 ദിർഹം പിഴയും 12 ബ്ലാക്ക് പോയിന്റുകളും ലഭിക്കും. കൂടാതെ വാഹനം പോലീസ് പിടിച്ചെടുക്കുകയും ചെയ്യും. അനധികൃതമായി രൂപമാറ്റം വരുത്തിയ വാഹനങ്ങൾ തിരികെ ലഭിക്കാൻ 10,000 ദിർഹം വരെ ഫീസ് നൽകേണ്ടിവരുമെന്നും അധികൃതർ അറിയിച്ചു. ഈ നടപടി കർശനമായി നടപ്പാക്കുന്നതിന് ദുബായ് പോലീസ് ഓപ്പറേഷൻസ് അസിസ്റ്റന്റ് കമാൻഡർ-ഇൻ-ചീഫ് മേജർ ജനറൽ സെയ്ഫ് മുഹൈർ അൽ മസ്‌റൂയിയും ഷാർജ പോലീസ് സെൻട്രൽ റീജിയൻ ഡയറക്ടർ ബ്രിഗേഡിയർ ഖലീഫ അൽ ഖസൂനിയും നേതൃത്വമൊരുക്കുന്നുണ്ട്. കുട്ടികൾ വാഹനങ്ങളിൽ അനധികൃത മാറ്റങ്ങൾ വരുത്തുന്നില്ലെന്ന് മാതാപിതാക്കൾ ശ്രദ്ധിക്കണമെന്നും അധികൃതർ അഭ്യർത്ഥിച്ചു. ഇത്തരം ശബ്ദശല്യം ഉണ്ടാക്കുന്ന വാഹനങ്ങളെക്കുറിച്ച് ഔദ്യോഗിക ചാനലുകൾ വഴി പോലീസിനെ അറിയിക്കണമെന്നും പൊതുജനങ്ങളോട് നിർദേശിച്ചിട്ടുണ്ട്. മേഖലയിലെ നിലവിലെ സാഹചര്യം പരിഗണിച്ച് ജനങ്ങളുടെ സമാധാനവും സുരക്ഷയും ഉറപ്പാക്കുക എന്ന ലക്ഷ്യത്തോടെയാണ് ഈ നടപടികൾ ശക്തമാക്കിയതെന്നും പോലീസ് അറിയിച്ചു. പോലീസിന്റെ ഈ ഇടപെടലിനെ പ്രവാസികളും സ്വദേശികളും സ്വാഗതം ചെയ്തിട്ടുണ്ട്.യുഎഇയിലെ വാർത്തകളും തൊഴിൽ അവസരങ്ങളും അതിവേഗം അറിയാൻ വാട്സ്ആപ്പ് ഗ്രൂപ്പിൽ അംഗമാവുhttps://chat.whatsapp.com/Dbf59JLetgBECJpr5UZOuZ?mode=gi_t