യുഎഇയിൽ താമസിക്കുന്ന പ്രവാസികൾക്ക് മാതാപിതാക്കളെ സ്പോൺസർ ചെയ്ത് റെസിഡൻസ് വിസ ലഭ്യമാക്കാൻ ആവശ്യമായ രേഖകളും നടപടിക്രമങ്ങളും സംബന്ധിച്ച് ഇമിഗ്രേഷൻ വിദഗ്ധർ വിശദീകരണം നൽകി. മാതാപിതാക്കൾ സ്വതവേ ‘ആശ്രിതർ’ (Dependents) എന്ന വിഭാഗത്തിൽ ഉൾപ്പെടാത്തതിനാൽ, അവർ പൂർണമായും അപേക്ഷകനെ ആശ്രയിച്ചാണ് കഴിയുന്നതെന്ന് തെളിയിക്കുന്ന രേഖകൾ സമർപ്പിക്കേണ്ടത് നിർബന്ധമാണ്.

അപേക്ഷ ദുബൈയിലെ ജനറൽ ഡയറക്ടറേറ്റ് ഓഫ് റെസിഡൻസി ആൻഡ് ഫോറിനേഴ്സ് അഫയേഴ്സ് (GDRFA) അല്ലെങ്കിൽ ഫെഡറൽ അതോറിറ്റി ഫോർ ഐഡന്റിറ്റി, സിറ്റിസൺഷിപ്പ്, കസ്റ്റംസ് ആൻഡ് പോർട്ട് സെക്യൂരിറ്റി (ICP) വഴിയാണ് സമർപ്പിക്കേണ്ടത്.

ആവശ്യമായ പ്രധാന രേഖകൾ

1. ആശ്രിതത്വ സത്യവാങ്മൂലം

മാതാപിതാക്കളുടെ ഏക സംരക്ഷകൻ അപേക്ഷകനാണെന്നും സ്വന്തം രാജ്യത്ത് അവരെ പരിചരിക്കാൻ മറ്റാരുമില്ലെന്നും വ്യക്തമാക്കുന്ന സത്യവാങ്മൂലം സ്വന്തം രാജ്യത്തിന്റെ യുഎഇയിലെ എംബസിയിലോ കോൺസുലേറ്റിലോ നിന്ന് ലഭിക്കണം.

ഈ രേഖ യുഎഇ വിദേശകാര്യ മന്ത്രാലയത്തിന്റെ (MOFA) സാക്ഷ്യപ്പെടുത്തലും അംഗീകൃത വിവർത്തകൻ തയ്യാറാക്കിയ അറബിക് പരിഭാഷയും സഹിതം സമർപ്പിക്കണം.

2. ബന്ധവും കുടുംബ വിവരങ്ങളും തെളിയിക്കുന്ന രേഖകൾ

• അപേക്ഷകനുമായുള്ള ബന്ധം തെളിയിക്കുന്ന സാക്ഷ്യപ്പെടുത്തിയ ജനന സർട്ടിഫിക്കറ്റ്.
• സാധാരണയായി മാതാപിതാക്കളെ ഒരുമിച്ചാണ് സ്പോൺസർ ചെയ്യേണ്ടത്.
• മാതാപിതാക്കളിൽ ഒരാൾ മരണപ്പെട്ടിട്ടുണ്ടെങ്കിൽ മരണ സർട്ടിഫിക്കറ്റും, വിവാഹമോചിതരാണെങ്കിൽ വിവാഹമോചന സർട്ടിഫിക്കറ്റും സമർപ്പിക്കണം.
• ഈ രേഖകൾക്കും MOFA അറ്റസ്റ്റേഷനും അറബിക് വിവർത്തനവും നിർബന്ധമാണ്.

3. സാമ്പത്തികവും താമസവുമായി ബന്ധപ്പെട്ട യോഗ്യത

ശമ്പളം:

• പ്രതിമാസം കുറഞ്ഞത് 20,000 ദിർഹം ശമ്പളം ഉണ്ടായിരിക്കണം.
• തൊഴിലുടമ താമസസൗകര്യം നൽകുന്നുണ്ടെങ്കിൽ 19,000 ദിർഹം ശമ്പളം മതിയാകും.

ഇതിനായി:

• കഴിഞ്ഞ 3 മുതൽ 6 മാസം വരെയുള്ള ബാങ്ക് സ്റ്റേറ്റ്‌മെന്റ്
• സാക്ഷ്യപ്പെടുത്തിയ തൊഴിൽ കരാർ അല്ലെങ്കിൽ ശമ്പള സർട്ടിഫിക്കറ്റ് എന്നിവ സമർപ്പിക്കണം.

താമസ സൗകര്യം:

• രജിസ്റ്റർ ചെയ്ത വാടക കരാർ (ഉദാഹരണത്തിന് ദുബൈയിലെ Ejari) നിർബന്ധമാണ്.
• സാധാരണയായി രണ്ട് ബെഡ്റൂമോ അതിൽ കൂടുതലോ (2 BHK) ഉള്ള താമസസൗകര്യമാണ് മാതാപിതാക്കളെ സ്പോൺസർ ചെയ്യാൻ ആവശ്യപ്പെടുന്നത്.

4. മെഡിക്കൽ, മറ്റ് രേഖകൾ

• സ്പോൺസറുടെയും മാതാപിതാക്കളുടെയും കുറഞ്ഞത് ആറ് മാസത്തെ കാലാവധിയുള്ള പാസ്‌പോർട്ടുകൾ
• സ്പോൺസറുടെ എമിറേറ്റ്സ് ഐഡി
• യുഎഇയിൽ നടത്തിയ മെഡിക്കൽ ഫിറ്റ്‌നസ് പരിശോധനയുടെ റിപ്പോർട്ട്
• ആരോഗ്യ ഇൻഷുറൻസ് രേഖ

അപേക്ഷ നൽകും മുമ്പ് ശ്രദ്ധിക്കേണ്ടത്

എല്ലാ രേഖകളും ആവശ്യമായ രീതിയിൽ സാക്ഷ്യപ്പെടുത്തിയതും അറബിയിലേക്ക് വിവർത്തനം ചെയ്തതുമാണെന്ന് ഉറപ്പാക്കണം. രേഖകളിൽ പിഴവുകളോ അപൂർണതയോ ഇല്ലെങ്കിൽ അപേക്ഷാ നടപടികൾ വേഗത്തിൽ പൂർത്തിയാക്കാൻ സാധിക്കുമെന്ന് ഇമിഗ്രേഷൻ വിദഗ്ധർ നിർദേശിക്കുന്നു.