വേനലവധിക്കാലത്ത് നാട്ടിലേക്ക് യാത്ര തിരിക്കുന്ന യുഎഇ പ്രവാസികൾ നിർബന്ധമായും കൈവശം കരുതേണ്ട പ്രധാന രേഖയാണ് ഒറിജിനൽ എമിറേറ്റ്സ് ഐഡി. ഇന്ത്യയിലോ കാനഡയിലോ ഉൾപ്പെടെ ലോകത്തിന്റെ ഏത് രാജ്യത്തുനിന്ന് യുഎഇയിലേക്ക് മടങ്ങുന്നവരോടും വിമാനത്തിൽ കയറുന്നതിന് മുമ്പ് എയർലൈൻ അധികൃതർ ഒറിജിനൽ എമിറേറ്റ്സ് ഐഡി ആവശ്യപ്പെടുന്ന സാഹചര്യമാണ് നിലവിലുള്ളത്. പാസ്‌പോർട്ടിലെ റസിഡൻസ് വിസ സ്റ്റാമ്പിംഗ് സംവിധാനം അവസാനിപ്പിച്ച് എമിറേറ്റ്സ് ഐഡിയെ ഔദ്യോഗിക താമസരേഖയാക്കിയതോടെയാണ് ഈ പരിശോധന നിർബന്ധമായത്. എന്നാൽ പലരും ഡിജിറ്റൽ കോപ്പിയോ മൊബൈലിലെ ചിത്രമോ മതിയെന്ന് കരുതി ഒറിജിനൽ കാർഡ് നാട്ടിലേക്ക് കൊണ്ടുപോകാൻ മറക്കുന്നത് യാത്ര മുടങ്ങാൻ വരെ കാരണമാകുന്നുണ്ട്.

അടുത്തിടെ ഷാർജയിൽ താമസിക്കുന്ന ഒരു ഇന്ത്യൻ പ്രവാസി അവധിക്ക് നാട്ടിലെത്തി മംഗളൂരു വിമാനത്താവളത്തിൽ നിന്ന് യുഎഇയിലേക്ക് മടങ്ങാൻ എത്തിയപ്പോഴാണ് എമിറേറ്റ്സ് ഐഡി കൈവശമില്ലെന്ന് തിരിച്ചറിഞ്ഞത്. ഒറിജിനൽ കാർഡ് ഇല്ലാത്തതിനാൽ വിമാനത്തിൽ കയറാൻ അനുമതി ലഭിച്ചില്ല. തുടർന്ന് യുഎഇയിൽ നിന്ന് കൊറിയർ വഴി ഐഡി എത്താൻ അഞ്ച് ദിവസം കാത്തിരിക്കേണ്ടി വന്നതോടെ ജോലി നഷ്ടപ്പെടുകയും ശമ്പള നഷ്ടവും നേരിടുകയും ചെയ്തു. സമാനമായ മറ്റൊരു സംഭവത്തിൽ, കേരളത്തിൽ നിന്ന് മടങ്ങിയിരുന്ന മറ്റൊരു പ്രവാസി UAE Pass ആപ്പിലെ ഡിജിറ്റൽ എമിറേറ്റ്സ് ഐഡിയും റസിഡൻസ് വിസയുടെ കോപ്പിയും കാണിച്ചിട്ടും യാത്ര അനുവദിച്ചില്ല. ഒറിജിനൽ ഫിസിക്കൽ എമിറേറ്റ്സ് ഐഡി കാർഡ് നിർബന്ധമാണെന്ന് എയർലൈൻ അധികൃതർ വ്യക്തമാക്കി.

പ്ലൂട്ടോ ട്രാവൽസ് മാർക്കറ്റിംഗ് ഡയറക്ടർ സ്വപ്ന ഐദാസാനിയുടെ വാക്കുകളിൽ, യുഎഇയിൽ നിന്ന് പുറപ്പെടുമ്പോൾ ഈ രേഖ പരിശോധിക്കാത്ത സാഹചര്യങ്ങളുണ്ടാകാമെങ്കിലും, ഇന്ത്യയിലെ മുംബൈ, ഡൽഹി ഉൾപ്പെടെയുള്ള വിമാനത്താവളങ്ങളിൽ യുഎഇയിലേക്ക് മടങ്ങുന്ന യാത്രക്കാരോട് ഒറിജിനൽ എമിറേറ്റ്സ് ഐഡി ആവശ്യപ്പെടുന്നത് പതിവാണ്. ഫോണിലെ ഫോട്ടോ, സ്കാൻ കോപ്പി, ഫോട്ടോകോപ്പി എന്നിവയ്ക്ക് പകരം ഒറിജിനൽ കാർഡ് തന്നെ വേണമെന്നാണ് നിർദേശം. musafir.com വൈസ് പ്രസിഡന്റ് റിതിൻ ഷേത്ത് വ്യക്തമാക്കുന്നതനുസരിച്ച്, ഈ നിബന്ധന ഇന്ത്യയിൽ നിന്ന് മാത്രം മടങ്ങുന്നവർക്കല്ല. കാനഡ, യൂറോപ്പ്, മറ്റ് രാജ്യങ്ങൾ എന്നിവിടങ്ങളിൽ നിന്ന് യുഎഇയിലേക്ക് മടങ്ങുന്ന എല്ലാ റസിഡൻസ് വിസയുള്ള പ്രവാസികൾക്കും ഇത് ബാധകമാണ്.

എന്തുകൊണ്ടാണ് ഒറിജിനൽ എമിറേറ്റ്സ് ഐഡി നിർബന്ധമായത്?

ഇത് പുതിയ നിയമമല്ല. 2022 മുതൽ യുഎഇയിൽ പാസ്‌പോർട്ടിൽ റസിഡൻസ് വിസ സ്റ്റിക്കർ പതിക്കുന്ന സംവിധാനം അവസാനിപ്പിച്ചിരുന്നു. പകരം എമിറേറ്റ്സ് ഐഡിയെ ഔദ്യോഗിക താമസരേഖയായി അംഗീകരിക്കുകയായിരുന്നു. ഇതോടെ, പാസ്‌പോർട്ടിൽ വിസ സ്റ്റാമ്പ് ഇല്ലാത്തതിനാൽ യാത്രക്കാരന്റെ റസിഡൻസ് സ്റ്റാറ്റസും വിസയുടെ സാധുതയും പരിശോധിക്കാൻ അന്താരാഷ്ട്ര വിമാനത്താവളങ്ങളിലെ എയർലൈൻ ഉദ്യോഗസ്ഥർ ആശ്രയിക്കുന്നത് ഒറിജിനൽ എമിറേറ്റ്സ് ഐഡിയെയാണ്. അതുകൊണ്ട് അവധിക്ക് നാട്ടിലേക്ക് പോകുന്ന യുഎഇ പ്രവാസികൾ, പാസ്‌പോർട്ടിനൊപ്പം ഒറിജിനൽ എമിറേറ്റ്സ് ഐഡിയും നിർബന്ധമായും കൈവശം കരുതണമെന്ന് ട്രാവൽ വിദഗ്ധർ മുന്നറിയിപ്പ് നൽകുന്നു. ചെറിയൊരു അശ്രദ്ധ പോലും യാത്ര മുടങ്ങാനും സാമ്പത്തിക നഷ്ടത്തിനും തൊഴിൽ പ്രതിസന്ധികൾക്കും കാരണമാകാം.യുഎഇയിലെ വാർത്തകളും തൊഴിൽ അവസരങ്ങളും അതിവേഗം അറിയാൻ വാട്സ്ആപ്പ് ഗ്രൂപ്പിൽ അംഗമാവുക https://chat.whatsapp.com/Dbf59JLetgBECJpr5UZOuZ?mode=gi_t

‘സ്ഫോടന ശബ്ദ’മുണ്ടാക്കുന്ന വാഹനങ്ങൾക്കെതിരെ യുഎഇയിൽ കർശന നടപടി; പിഴയും 12 ബ്ലാക്ക് പോയിന്റും

ജനവാസ മേഖലകളിൽ അർദ്ധരാത്രിയിൽ സ്ഫോടനത്തിന് സമാനമായ ശബ്ദമുണ്ടാക്കി ജനങ്ങളിൽ പരിഭ്രാന്തി സൃഷ്ടിക്കുന്ന വിധത്തിൽ നിയമവിരുദ്ധമായി രൂപമാറ്റം വരുത്തിയ കാറുകളുടെയും മോട്ടോർ സൈക്കിളുകളുടെയും യുഎഇ പോലീസ് കർശന നടപടികൾ ആരംഭിച്ചു. മേഖലയിലെ സംഘർഷാവസ്ഥ വാർത്തകളിൽ നിറഞ്ഞുനിൽക്കുന്ന സാഹചര്യത്തിൽ ഇത്തരം വാഹനങ്ങളിൽ നിന്നുണ്ടാകുന്ന ‘ബാക്ക് ഫയർ’ ശബ്ദങ്ങൾ പലരും മിസൈൽ ആക്രമണമോ സ്ഫോടനമോ ആണെന്ന് തെറ്റിദ്ധരിച്ച് ഭീതിയിലായിരുന്നുവെന്ന് അധികൃതർ വ്യക്തമാക്കി. എഞ്ചിനുകളിൽ മാറ്റം വരുത്തി ഉദ്ദേശപൂർവ്വം ശക്തമായ ശബ്ദമുണ്ടാക്കുന്നത് പ്രധാനമായും കൗമാരക്കാരും യുവാക്കളുമാണെന്ന് അന്വേഷണത്തിൽ കണ്ടെത്തിയതായി പോലീസ് അറിയിച്ചു. റിപ്പോർട്ട് ചെയ്യപ്പെട്ട ശബ്ദങ്ങൾ വാഹനങ്ങളിൽ നിന്നുള്ളതാണെന്നും രാജ്യത്തിന്റെ സുരക്ഷയെ ബാധിക്കുന്ന യാതൊരു ഭീഷണിയും നിലവിലില്ലെന്നും അധികൃതർ ജനങ്ങളെ ആശ്വസിപ്പിച്ചു. യുഎഇ പൂർണ്ണമായും സുരക്ഷിതമാണെന്നും പോലീസ് വ്യക്തമാക്കി.

ദുബായ്, ഷാർജ തുടങ്ങിയ എമിറേറ്റുകളിലെ ജനവാസ പ്രദേശങ്ങളിൽ രാത്രികാല പോലീസ് പട്രോളിംഗ് ശക്തമാക്കിയിട്ടുണ്ട്. യുഎഇ ട്രാഫിക് നിയമപ്രകാരം അമിത ശബ്ദമുണ്ടാക്കുന്ന വാഹനങ്ങൾ ഓടിക്കുന്നവർക്ക് 2000 ദിർഹം പിഴയും 12 ബ്ലാക്ക് പോയിന്റുകളും ലഭിക്കും. കൂടാതെ വാഹനം പോലീസ് പിടിച്ചെടുക്കുകയും ചെയ്യും. അനധികൃതമായി രൂപമാറ്റം വരുത്തിയ വാഹനങ്ങൾ തിരികെ ലഭിക്കാൻ 10,000 ദിർഹം വരെ ഫീസ് നൽകേണ്ടിവരുമെന്നും അധികൃതർ അറിയിച്ചു. ഈ നടപടി കർശനമായി നടപ്പാക്കുന്നതിന് ദുബായ് പോലീസ് ഓപ്പറേഷൻസ് അസിസ്റ്റന്റ് കമാൻഡർ-ഇൻ-ചീഫ് മേജർ ജനറൽ സെയ്ഫ് മുഹൈർ അൽ മസ്‌റൂയിയും ഷാർജ പോലീസ് സെൻട്രൽ റീജിയൻ ഡയറക്ടർ ബ്രിഗേഡിയർ ഖലീഫ അൽ ഖസൂനിയും നേതൃത്വമൊരുക്കുന്നുണ്ട്. കുട്ടികൾ വാഹനങ്ങളിൽ അനധികൃത മാറ്റങ്ങൾ വരുത്തുന്നില്ലെന്ന് മാതാപിതാക്കൾ ശ്രദ്ധിക്കണമെന്നും അധികൃതർ അഭ്യർത്ഥിച്ചു. ഇത്തരം ശബ്ദശല്യം ഉണ്ടാക്കുന്ന വാഹനങ്ങളെക്കുറിച്ച് ഔദ്യോഗിക ചാനലുകൾ വഴി പോലീസിനെ അറിയിക്കണമെന്നും പൊതുജനങ്ങളോട് നിർദേശിച്ചിട്ടുണ്ട്. മേഖലയിലെ നിലവിലെ സാഹചര്യം പരിഗണിച്ച് ജനങ്ങളുടെ സമാധാനവും സുരക്ഷയും ഉറപ്പാക്കുക എന്ന ലക്ഷ്യത്തോടെയാണ് ഈ നടപടികൾ ശക്തമാക്കിയതെന്നും പോലീസ് അറിയിച്ചു. പോലീസിന്റെ ഈ ഇടപെടലിനെ പ്രവാസികളും സ്വദേശികളും സ്വാഗതം ചെയ്തിട്ടുണ്ട്.യുഎഇയിലെ വാർത്തകളും തൊഴിൽ അവസരങ്ങളും അതിവേഗം അറിയാൻ വാട്സ്ആപ്പ് ഗ്രൂപ്പിൽ അംഗമാവുhttps://chat.whatsapp.com/Dbf59JLetgBECJpr5UZOuZ?mode=gi_t