പശ്ചിമേഷ്യയിലെ സുരക്ഷാ സാഹചര്യം പൂർണമായും സാധാരണ നിലയിലാകാത്ത സാഹചര്യത്തിൽ യുഎഇയിൽ നിന്ന് സർവീസ് നടത്തുന്ന നിരവധി അന്താരാഷ്ട്ര, ഗൾഫ് വിമാനക്കമ്പനികൾ സർവീസുകളിൽ മാറ്റം പ്രഖ്യാപിച്ചു. ചില റൂട്ടുകളിൽ വിമാനങ്ങൾ താൽക്കാലികമായി റദ്ദാക്കുകയോ നിർത്തിവെക്കുകയോ ചെയ്തിട്ടുണ്ട്. അതേസമയം, യുഎഇയിൽ നിന്ന് ഇന്ത്യയിലേക്ക് യാത്ര ചെയ്യുന്നവർക്ക് പുതിയ ആരോഗ്യ പ്രഖ്യാപന നടപടിയും നിർബന്ധമാക്കി.

സിംഗപ്പൂർ എയർലൈൻസും ബ്രിട്ടീഷ് എയർവേയ്സും ഇളവുകൾ പ്രഖ്യാപിച്ചു

സിംഗപ്പൂർ എയർലൈൻസ് സിംഗപ്പൂർ–ദുബൈ സർവീസുകൾ ഒക്ടോബർ 24 വരെ റദ്ദാക്കിയതായി അറിയിച്ചു. ബാധിക്കപ്പെട്ട യാത്രക്കാർക്ക് പൂർണ റീഫണ്ടോ യാത്ര മറ്റൊരു തീയതിയിലേക്ക് മാറ്റാനുള്ള അവസരമോ ലഭ്യമാക്കും. ബ്രിട്ടീഷ് എയർവേയ്സും ദുബായിലേക്കും ദുബായിൽ നിന്നുമുള്ള യാത്രക്കാർക്കായി ടിക്കറ്റ് മാറ്റത്തിനും റദ്ദാക്കലിനുമുള്ള പ്രത്യേക ഇളവുകൾ ഒക്ടോബർ 31 വരെ നീട്ടിയിട്ടുണ്ട്.

ഇന്ത്യയിലേക്ക് പോകുന്നവർക്ക് Air Suvidha 2.0 നിർബന്ധം

യുഎഇയിൽ നിന്ന് ഇന്ത്യയിലേക്ക് യാത്ര ചെയ്യുന്ന എല്ലാവരും യാത്രയ്ക്ക് മുമ്പ് Air Suvidha 2.0 ഡിജിറ്റൽ ഹെൽത്ത് ഡിക്ലറേഷൻ സമർപ്പിക്കണം. കൊങ്കോയിലും ഉഗാണ്ടയിലും എബോള (Bundibugyo) വൈറസ് വ്യാപനത്തെ തുടർന്ന് ലോകാരോഗ്യ സംഘടന പൊതുജനാരോഗ്യ അടിയന്തരാവസ്ഥ പ്രഖ്യാപിച്ചതിന്റെ പശ്ചാത്തലത്തിലാണ് ഈ തീരുമാനം. യാത്രയ്ക്ക് 24 മണിക്കൂർ മുമ്പുവരെ ഓൺലൈനായി ഫോം പൂരിപ്പിക്കാം. ഇന്ത്യയിലെത്തുമ്പോൾ ഡൗൺലോഡ് ചെയ്ത ഡിജിറ്റൽ ഡിക്ലറേഷൻ കാണിച്ചാൽ മതിയാകും. പ്രത്യേക പേപ്പർ ഫോം ഇനി ആവശ്യമില്ല.

സൗദി റൂട്ടുകളിൽ ഇപ്പോഴും നിയന്ത്രണം

മിസൈൽ, ഡ്രോൺ ആക്രമണങ്ങൾക്ക് പിന്നാലെ സൗദിയിലെ അബ്ഹ അന്താരാഷ്ട്ര വിമാനത്താവളത്തിന്റെ പ്രവർത്തനം ക്രമേണ സാധാരണ നിലയിലേക്ക് മടങ്ങുന്നുണ്ടെങ്കിലും ചില സർവീസുകൾ ഇപ്പോഴും റദ്ദാക്കിയ നിലയിലാണ്. ഫ്ലൈദുബൈ, ഖത്തർ എയർവേയ്സ്, സൗദിയ എന്നിവയുടെ ചില സർവീസുകൾക്ക് നിയന്ത്രണം തുടരുന്നതിനാൽ യാത്രയ്ക്ക് മുമ്പ് വിമാനത്തിന്റെ നിലവിലെ സ്റ്റാറ്റസ് പരിശോധിക്കണമെന്ന് യാത്രക്കാർക്ക് നിർദേശം നൽകിയിട്ടുണ്ട്.

യുഎഇ എയർലൈൻസുകളുടെ നിലവിലെ സ്ഥിതി

എമിറേറ്റ്സ് നിലവിൽ വലിയ തോതിലുള്ള സർവീസ് റദ്ദാക്കലുകൾ പ്രഖ്യാപിച്ചിട്ടില്ല. വേനൽക്കാല തിരക്ക് കണക്കിലെടുത്ത് യാത്രക്കാർ നേരത്തെ വിമാനത്താവളത്തിലെത്തുകയും ഓൺലൈൻ ചെക്ക്-ഇൻ പൂർത്തിയാക്കുകയും ചെയ്യണമെന്ന് കമ്പനി അറിയിച്ചു. ഇത്തിഹാദ് എയർവേയ്സ് അബുദാബി–ബഹ്റൈൻ സർവീസ് ബഹ്റൈൻ വിമാനത്താവളം താൽക്കാലികമായി അടച്ചതിനെ തുടർന്ന് തിരിച്ചുവിളിക്കുകയും അന്നത്തെ ബഹ്റൈൻ സർവീസുകൾ റദ്ദാക്കുകയും ചെയ്തു. മനില സർവീസുകളിൽ സാങ്കേതിക പ്രശ്നം മൂലം വൈകലും റിപ്പോർട്ട് ചെയ്തിട്ടുണ്ട്. അതേസമയം, എയർ അറേബ്യ ഷാർജയിൽ നിന്ന് റോം, ലണ്ടൻ ഗാറ്റ്‌വിക്ക് എന്നിവിടങ്ങളിലേക്കുള്ള പുതിയ സർവീസുകൾ ആരംഭിച്ചു.

മറ്റ് വിമാനക്കമ്പനികളിലും നിയന്ത്രണം
-എയർ കാനഡ – ദുബൈ സർവീസ് ഒക്ടോബർ 24 വരെ നിർത്തിവെച്ചു.
-ലുഫ്താൻസ ഗ്രൂപ്പ് – ദുബൈ സർവീസുകൾ സെപ്റ്റംബർ 13 വരെയും ചില പശ്ചിമേഷ്യൻ റൂട്ടുകൾ ഒക്ടോബർ 24 വരെയും റദ്ദാക്കി.
-കെഎൽഎം – ദുബൈ, റിയാദ്, ദമ്മാം സർവീസുകൾ ഓഗസ്റ്റ് 23 വരെ നിർത്തിവെച്ചു.
-കാഥേ പസഫിക് – ദുബൈ, റിയാദ് സർവീസുകൾ ഓഗസ്റ്റ് 31 വരെ റദ്ദാക്കി.
-ഫിലിപ്പൈൻ എയർലൈൻസ് – ദുബൈ സർവീസുകൾ ഒക്ടോബർ 2 വരെ നിർത്തിവെച്ചിട്ടുണ്ട്.

ഇന്ത്യൻ വിമാനക്കമ്പനികൾ

ഇൻഡിഗോ നിലവിൽ ഗൾഫ് സർവീസുകൾ തുടരുന്നുണ്ടെങ്കിലും മേഖലയിലെ സാഹചര്യം നിരന്തരം നിരീക്ഷിച്ചുവരികയാണെന്ന് അറിയിച്ചു. എയർ ഇന്ത്യ, എയർ ഇന്ത്യ എക്സ്പ്രസ് എന്നിവയും സർവീസുകൾ തുടരുന്നുണ്ടെങ്കിലും വ്യോമപാതയിലെ നിയന്ത്രണങ്ങൾ കാരണം ചില വിമാനങ്ങളുടെ സമയക്രമത്തിൽ മാറ്റങ്ങളോ വൈകലുകളോ ഉണ്ടായേക്കാമെന്ന് യാത്രക്കാർക്ക് മുന്നറിയിപ്പ്.യുഎഇയിലെ വാർത്തകളും തൊഴിൽ അവസരങ്ങളും അതിവേഗം അറിയാൻ വാട്സ്ആപ്പ് ഗ്രൂപ്പിൽ അംഗമാവുക https://chat.whatsapp.com/Dbf59JLetgBECJpr5UZOuZ?mode=gi_t

‘സ്ഫോടന ശബ്ദ’മുണ്ടാക്കുന്ന വാഹനങ്ങൾക്കെതിരെ യുഎഇയിൽ കർശന നടപടി; പിഴയും 12 ബ്ലാക്ക് പോയിന്റും

ജനവാസ മേഖലകളിൽ അർദ്ധരാത്രിയിൽ സ്ഫോടനത്തിന് സമാനമായ ശബ്ദമുണ്ടാക്കി ജനങ്ങളിൽ പരിഭ്രാന്തി സൃഷ്ടിക്കുന്ന വിധത്തിൽ നിയമവിരുദ്ധമായി രൂപമാറ്റം വരുത്തിയ കാറുകളുടെയും മോട്ടോർ സൈക്കിളുകളുടെയും യുഎഇ പോലീസ് കർശന നടപടികൾ ആരംഭിച്ചു. മേഖലയിലെ സംഘർഷാവസ്ഥ വാർത്തകളിൽ നിറഞ്ഞുനിൽക്കുന്ന സാഹചര്യത്തിൽ ഇത്തരം വാഹനങ്ങളിൽ നിന്നുണ്ടാകുന്ന ‘ബാക്ക് ഫയർ’ ശബ്ദങ്ങൾ പലരും മിസൈൽ ആക്രമണമോ സ്ഫോടനമോ ആണെന്ന് തെറ്റിദ്ധരിച്ച് ഭീതിയിലായിരുന്നുവെന്ന് അധികൃതർ വ്യക്തമാക്കി. എഞ്ചിനുകളിൽ മാറ്റം വരുത്തി ഉദ്ദേശപൂർവ്വം ശക്തമായ ശബ്ദമുണ്ടാക്കുന്നത് പ്രധാനമായും കൗമാരക്കാരും യുവാക്കളുമാണെന്ന് അന്വേഷണത്തിൽ കണ്ടെത്തിയതായി പോലീസ് അറിയിച്ചു. റിപ്പോർട്ട് ചെയ്യപ്പെട്ട ശബ്ദങ്ങൾ വാഹനങ്ങളിൽ നിന്നുള്ളതാണെന്നും രാജ്യത്തിന്റെ സുരക്ഷയെ ബാധിക്കുന്ന യാതൊരു ഭീഷണിയും നിലവിലില്ലെന്നും അധികൃതർ ജനങ്ങളെ ആശ്വസിപ്പിച്ചു. യുഎഇ പൂർണ്ണമായും സുരക്ഷിതമാണെന്നും പോലീസ് വ്യക്തമാക്കി.

ദുബായ്, ഷാർജ തുടങ്ങിയ എമിറേറ്റുകളിലെ ജനവാസ പ്രദേശങ്ങളിൽ രാത്രികാല പോലീസ് പട്രോളിംഗ് ശക്തമാക്കിയിട്ടുണ്ട്. യുഎഇ ട്രാഫിക് നിയമപ്രകാരം അമിത ശബ്ദമുണ്ടാക്കുന്ന വാഹനങ്ങൾ ഓടിക്കുന്നവർക്ക് 2000 ദിർഹം പിഴയും 12 ബ്ലാക്ക് പോയിന്റുകളും ലഭിക്കും. കൂടാതെ വാഹനം പോലീസ് പിടിച്ചെടുക്കുകയും ചെയ്യും. അനധികൃതമായി രൂപമാറ്റം വരുത്തിയ വാഹനങ്ങൾ തിരികെ ലഭിക്കാൻ 10,000 ദിർഹം വരെ ഫീസ് നൽകേണ്ടിവരുമെന്നും അധികൃതർ അറിയിച്ചു. ഈ നടപടി കർശനമായി നടപ്പാക്കുന്നതിന് ദുബായ് പോലീസ് ഓപ്പറേഷൻസ് അസിസ്റ്റന്റ് കമാൻഡർ-ഇൻ-ചീഫ് മേജർ ജനറൽ സെയ്ഫ് മുഹൈർ അൽ മസ്‌റൂയിയും ഷാർജ പോലീസ് സെൻട്രൽ റീജിയൻ ഡയറക്ടർ ബ്രിഗേഡിയർ ഖലീഫ അൽ ഖസൂനിയും നേതൃത്വമൊരുക്കുന്നുണ്ട്. കുട്ടികൾ വാഹനങ്ങളിൽ അനധികൃത മാറ്റങ്ങൾ വരുത്തുന്നില്ലെന്ന് മാതാപിതാക്കൾ ശ്രദ്ധിക്കണമെന്നും അധികൃതർ അഭ്യർത്ഥിച്ചു. ഇത്തരം ശബ്ദശല്യം ഉണ്ടാക്കുന്ന വാഹനങ്ങളെക്കുറിച്ച് ഔദ്യോഗിക ചാനലുകൾ വഴി പോലീസിനെ അറിയിക്കണമെന്നും പൊതുജനങ്ങളോട് നിർദേശിച്ചിട്ടുണ്ട്. മേഖലയിലെ നിലവിലെ സാഹചര്യം പരിഗണിച്ച് ജനങ്ങളുടെ സമാധാനവും സുരക്ഷയും ഉറപ്പാക്കുക എന്ന ലക്ഷ്യത്തോടെയാണ് ഈ നടപടികൾ ശക്തമാക്കിയതെന്നും പോലീസ് അറിയിച്ചു. പോലീസിന്റെ ഈ ഇടപെടലിനെ പ്രവാസികളും സ്വദേശികളും സ്വാഗതം ചെയ്തിട്ടുണ്ട്.യുഎഇയിലെ വാർത്തകളും തൊഴിൽ അവസരങ്ങളും അതിവേഗം അറിയാൻ വാട്സ്ആപ്പ് ഗ്രൂപ്പിൽ അംഗമാവുhttps://chat.whatsapp.com/Dbf59JLetgBECJpr5UZOuZ?mode=gi_t