Salik Parking Management; ദുബായിലെ ടോൾ ഗേറ്റ് ഓപ്പറേറ്ററായ സാലിക് കമ്പനി നഗരത്തിലെ പ്രമുഖ ഫ്രീ സോണുകളിലേക്ക് തങ്ങളുടെ സേവനം വ്യാപിപ്പിക്കുന്നു. ദുബായ് ഇന്റഗ്രേറ്റഡ് ഇക്കണോമിക് സോൺസ് അതോറിറ്റിയുമായി ചേർന്ന് പുതിയ ആക്സസ് കൺട്രോൾ, പാർക്കിംഗ് മാനേജ്‌മെന്റ് സംവിധാനങ്ങൾ ഏർപ്പെടുത്താനാണ് തീരുമാനം. ദുബായ് എയർപോർട്ട് ഫ്രീസോൺ, ദുബായ് സിലിക്കൺ ഒയാസിസ്, ദുബായ് കൊമേഴ്‌സിറ്റി എന്നിവിടങ്ങളിലെ പാർക്കിംഗ് ഇടങ്ങളിലാണ് സാലിക്കിന്റെ അത്യാധുനിക സംവിധാനം നടപ്പിലാക്കുന്നത്. ബാരിയറുകളില്ലാത്ത സാങ്കേതികവിദ്യ ഉപയോഗിക്കുന്നതിലൂടെ ഗതാഗതക്കുരുക്ക് ഒഴിവാക്കാനും പാർക്കിംഗ് മേഖലകൾ കൂടുതൽ കാര്യക്ഷമമായി നിയന്ത്രിക്കാനും സാധിക്കുമെന്നാണ് കമ്പനി പ്രതീക്ഷിക്കുന്നത്. ഈ പുതിയ പദ്ധതി സാലിക്കിനെ കേവലം ഒരു ടോൾ പിരിവ് കമ്പനി എന്നതിലുപരി ഒരു സംയോജിത മൊബിലിറ്റി സൊല്യൂഷൻ പ്രൊവൈഡറായി മാറ്റുമെന്ന് സിഇഒ ഇബ്രാഹിം സുൽത്താൻ അൽ ഹദ്ദാദ് വ്യക്തമാക്കി. ദുബായ് ഇക്കണോമിക് അജണ്ടയുടെ ഭാഗമായുള്ള ഡിജിറ്റൽ പരിവർത്തനത്തിനും നഗരത്തിന്റെ അടിസ്ഥാന സൗകര്യ വികസനത്തിനും ഈ സഹകരണം മുതൽക്കൂട്ടാകും. ബിസിനസ്സ് മേഖലകളിൽ കൂടുതൽ ആധുനികമായ സേവനങ്ങൾ ലഭ്യമാക്കാൻ ഈ പങ്കാളിത്തം സഹായിക്കുമെന്ന് ഡി.ഐ.ഇ.സെഡ് ചീഫ് ഓഫീസർ എൻജിനീയർ മുഅമ്മർ അൽ കത്തീരിയും അറിയിച്ചു. റോഡ് ടോൾ പിരിവിന് പുറമെ പാർക്കിംഗ് പെയ്‌മെന്റ് രംഗത്തും സാലിക് സജീവമാവുകയാണ്. നേരത്തെ ദുബായ് ഹാർബറിലും സമാനമായ രീതിയിൽ ടിക്കറ്റുകളോ പണമോ ഇല്ലാതെ സാലിക് അക്കൗണ്ട് വഴി നേരിട്ട് പാർക്കിംഗ് ചാർജ് അടയ്ക്കാനുള്ള സംവിധാനം കമ്പനി ആരംഭിച്ചിരുന്നു. ദുബായിൽ ടോൾ ഗേറ്റുകൾ നിയന്ത്രിക്കുന്ന സാലിക്കിന് 2071 വരെ നഗരത്തിലെ ടോൾ സംവിധാനം നിയന്ത്രിക്കാനുള്ള അവകാശമുണ്ട്. ഇതിനിടെ ടോൾ നിരക്കുകളിലും ടാഗ് ആക്ടിവേഷൻ ഫീസിലും നിശ്ചിത ശതമാനം വാറ്റ് ഏർപ്പെടുത്തുന്നതായും കമ്പനി അടുത്തിടെ വ്യക്തമാക്കിയിരുന്നു. യുഎഇയിലെ വാർത്തകളും തൊഴിൽ അവസരങ്ങളും അതിവേഗം അറിയാൻ വാട്സ്ആപ്പ് ഗ്രൂപ്പിൽ അംഗമാവുക https://chat.whatsapp.com/Dbf59JLetgBECJpr5UZOuZ?mode=gi_t

‘സ്ഫോടന ശബ്ദ’മുണ്ടാക്കുന്ന വാഹനങ്ങൾക്കെതിരെ യുഎഇയിൽ കർശന നടപടി; പിഴയും 12 ബ്ലാക്ക് പോയിന്റും

ജനവാസ മേഖലകളിൽ അർദ്ധരാത്രിയിൽ സ്ഫോടനത്തിന് സമാനമായ ശബ്ദമുണ്ടാക്കി ജനങ്ങളിൽ പരിഭ്രാന്തി സൃഷ്ടിക്കുന്ന വിധത്തിൽ നിയമവിരുദ്ധമായി രൂപമാറ്റം വരുത്തിയ കാറുകളുടെയും മോട്ടോർ സൈക്കിളുകളുടെയും യുഎഇ പോലീസ് കർശന നടപടികൾ ആരംഭിച്ചു. മേഖലയിലെ സംഘർഷാവസ്ഥ വാർത്തകളിൽ നിറഞ്ഞുനിൽക്കുന്ന സാഹചര്യത്തിൽ ഇത്തരം വാഹനങ്ങളിൽ നിന്നുണ്ടാകുന്ന ‘ബാക്ക് ഫയർ’ ശബ്ദങ്ങൾ പലരും മിസൈൽ ആക്രമണമോ സ്ഫോടനമോ ആണെന്ന് തെറ്റിദ്ധരിച്ച് ഭീതിയിലായിരുന്നുവെന്ന് അധികൃതർ വ്യക്തമാക്കി. എഞ്ചിനുകളിൽ മാറ്റം വരുത്തി ഉദ്ദേശപൂർവ്വം ശക്തമായ ശബ്ദമുണ്ടാക്കുന്നത് പ്രധാനമായും കൗമാരക്കാരും യുവാക്കളുമാണെന്ന് അന്വേഷണത്തിൽ കണ്ടെത്തിയതായി പോലീസ് അറിയിച്ചു. റിപ്പോർട്ട് ചെയ്യപ്പെട്ട ശബ്ദങ്ങൾ വാഹനങ്ങളിൽ നിന്നുള്ളതാണെന്നും രാജ്യത്തിന്റെ സുരക്ഷയെ ബാധിക്കുന്ന യാതൊരു ഭീഷണിയും നിലവിലില്ലെന്നും അധികൃതർ ജനങ്ങളെ ആശ്വസിപ്പിച്ചു. യുഎഇ പൂർണ്ണമായും സുരക്ഷിതമാണെന്നും പോലീസ് വ്യക്തമാക്കി.

ദുബായ്, ഷാർജ തുടങ്ങിയ എമിറേറ്റുകളിലെ ജനവാസ പ്രദേശങ്ങളിൽ രാത്രികാല പോലീസ് പട്രോളിംഗ് ശക്തമാക്കിയിട്ടുണ്ട്. യുഎഇ ട്രാഫിക് നിയമപ്രകാരം അമിത ശബ്ദമുണ്ടാക്കുന്ന വാഹനങ്ങൾ ഓടിക്കുന്നവർക്ക് 2000 ദിർഹം പിഴയും 12 ബ്ലാക്ക് പോയിന്റുകളും ലഭിക്കും. കൂടാതെ വാഹനം പോലീസ് പിടിച്ചെടുക്കുകയും ചെയ്യും. അനധികൃതമായി രൂപമാറ്റം വരുത്തിയ വാഹനങ്ങൾ തിരികെ ലഭിക്കാൻ 10,000 ദിർഹം വരെ ഫീസ് നൽകേണ്ടിവരുമെന്നും അധികൃതർ അറിയിച്ചു. ഈ നടപടി കർശനമായി നടപ്പാക്കുന്നതിന് ദുബായ് പോലീസ് ഓപ്പറേഷൻസ് അസിസ്റ്റന്റ് കമാൻഡർ-ഇൻ-ചീഫ് മേജർ ജനറൽ സെയ്ഫ് മുഹൈർ അൽ മസ്‌റൂയിയും ഷാർജ പോലീസ് സെൻട്രൽ റീജിയൻ ഡയറക്ടർ ബ്രിഗേഡിയർ ഖലീഫ അൽ ഖസൂനിയും നേതൃത്വമൊരുക്കുന്നുണ്ട്. കുട്ടികൾ വാഹനങ്ങളിൽ അനധികൃത മാറ്റങ്ങൾ വരുത്തുന്നില്ലെന്ന് മാതാപിതാക്കൾ ശ്രദ്ധിക്കണമെന്നും അധികൃതർ അഭ്യർത്ഥിച്ചു. ഇത്തരം ശബ്ദശല്യം ഉണ്ടാക്കുന്ന വാഹനങ്ങളെക്കുറിച്ച് ഔദ്യോഗിക ചാനലുകൾ വഴി പോലീസിനെ അറിയിക്കണമെന്നും പൊതുജനങ്ങളോട് നിർദേശിച്ചിട്ടുണ്ട്. മേഖലയിലെ നിലവിലെ സാഹചര്യം പരിഗണിച്ച് ജനങ്ങളുടെ സമാധാനവും സുരക്ഷയും ഉറപ്പാക്കുക എന്ന ലക്ഷ്യത്തോടെയാണ് ഈ നടപടികൾ ശക്തമാക്കിയതെന്നും പോലീസ് അറിയിച്ചു. പോലീസിന്റെ ഈ ഇടപെടലിനെ പ്രവാസികളും സ്വദേശികളും സ്വാഗതം ചെയ്തിട്ടുണ്ട്.യുഎഇയിലെ വാർത്തകളും തൊഴിൽ അവസരങ്ങളും അതിവേഗം അറിയാൻ വാട്സ്ആപ്പ് ഗ്രൂപ്പിൽ അംഗമാവുhttps://chat.whatsapp.com/Dbf59JLetgBECJpr5UZOuZ?mode=gi_t