UAE court; ജോലിയിൽ നിന്ന് പിരിച്ചുവിട്ടതിന് പിന്നാലെ കമ്പനി വാഹനം നിയമവിരുദ്ധമായി കൈവശം വെച്ച മുൻ ജീവനക്കാരന് യുഎഇ കോടതി 30,000 ദിർഹം (ഏകദേശം 6.8 ലക്ഷം രൂപ) പിഴ ചുമത്തി. അൽ ഐൻ ഫസ്റ്റ് ഇൻസ്റ്റൻസ് കോടതിയുടേതാണ് ഉത്തരവ്. ലേബർ തർക്കത്തിന്റെ പേരിൽ കമ്പനി വാഹനം വിട്ടുനൽകാതിരുന്നത് നിയമവിരുദ്ധമായ നടപടിയാണെന്ന് കോടതി നിരീക്ഷിച്ചു. ജോലിയിൽ നിന്ന് നീക്കം ചെയ്തതിനെ തുടർന്ന് വാഹനം തിരികെ നൽകാൻ കമ്പനി പലതവണ ആവശ്യപ്പെട്ടെങ്കിലും ജീവനക്കാരൻ തയ്യാറായിരുന്നില്ല. പകരം കാർ സ്വന്തം വീടിന് മുന്നിൽ പാർക്ക് ചെയ്യുകയും അത് വിട്ടുനൽകാൻ വിസമ്മതിക്കുകയുമായിരുന്നു. ഇതേത്തുടർന്നാണ് കമ്പനി സിവിൽ കോടതിയിൽ പരാതി നൽകിയത്.
വാഹനത്തിന്റെ താക്കോൽ തിരികെ നൽകണമെന്നും, നിയമവിരുദ്ധമായി വാഹനം കൈവശം വെച്ച ഓരോ ദിവസത്തേക്കും 100 ദിർഹം വീതം നഷ്ടപരിഹാരം നൽകണമെന്നും കമ്പനി ആവശ്യപ്പെട്ടു. കൂടാതെ, ബിസിനസ് പ്രവർത്തനങ്ങൾ തടസ്സപ്പെട്ടതുമൂലമുണ്ടായ നഷ്ടത്തിന് 50,000 ദിർഹം കൂടി നൽകണമെന്നും കമ്പനി വാദിച്ചു. തനിക്ക് ലഭിക്കാനുള്ള സെറ്റിൽമെന്റ് തുകയും മറ്റ് ആനുകൂല്യങ്ങളും കമ്പനി നൽകാൻ തയ്യാറാകാത്തതിനാലാണ് വാഹനം തിരികെ നൽകാത്തതെന്നായിരുന്നു ജീവനക്കാരന്റെ വാദം. ആനുകൂല്യങ്ങൾ ലഭിക്കുന്നത് വരെ കാർ ഒരു സുരക്ഷാ മാർഗമായി കരുതി കൈവശം വെക്കുകയായിരുന്നുവെന്നും ഇയാൾ കോടതിയിൽ പറഞ്ഞു. എന്നാൽ, ജീവനക്കാരന്റെ ഈ വാദം കോടതി പൂർണ്ണമായും തള്ളി. ലേബർ തർക്കങ്ങൾ നിലനിൽക്കുന്നു എന്ന കാരണത്താൽ നിയമം കയ്യിലെടുക്കാനോ കമ്പനിയുടെ ആസ്തികൾ നിയമവിരുദ്ധമായി പിടിച്ചുവെക്കാനോ ഒരു ജീവനക്കാരന് അവകാശമില്ലെന്ന് കോടതി വ്യക്തമാക്കി. ആനുകൂല്യങ്ങൾ ലഭിക്കാത്ത പക്ഷം മാനവശേഷി, സ്വദേശിവൽക്കരണ മന്ത്രാലയത്തിൽ (MoHRE) ഔദ്യോഗികമായി പരാതി നൽകുകയായിരുന്നു ചെയ്യേണ്ടിയിരുന്നതെന്ന് ജഡ്ജി ചൂണ്ടിക്കാട്ടി. കമ്പനിയുടെ ആസ്തി ഉപയോഗിക്കുന്നത് തടഞ്ഞതിലൂടെ ബിസിനസ്സിന് സാമ്പത്തിക നഷ്ടമുണ്ടാക്കിയെന്ന് കണ്ടെത്തിയ കോടതി, ആകെ 30,000 ദിർഹം നഷ്ടപരിഹാരമായി നൽകാൻ ഉത്തരവിടുകയായിരുന്നു. കൂടാതെ കേസുമായി ബന്ധപ്പെട്ട കോടതി ചെലവുകളും ഇയാൾ തന്നെ വഹിക്കണം. .യുഎഇയിലെ വാർത്തകളും തൊഴിൽ അവസരങ്ങളും അതിവേഗം അറിയാൻ വാട്സ്ആപ്പ് ഗ്രൂപ്പിൽ അംഗമാവുക https://chat.whatsapp.com/Dbf59JLetgBECJpr5UZOuZ?mode=gi_t

‘സ്ഫോടന ശബ്ദ’മുണ്ടാക്കുന്ന വാഹനങ്ങൾക്കെതിരെ യുഎഇയിൽ കർശന നടപടി; പിഴയും 12 ബ്ലാക്ക് പോയിന്റും

ജനവാസ മേഖലകളിൽ അർദ്ധരാത്രിയിൽ സ്ഫോടനത്തിന് സമാനമായ ശബ്ദമുണ്ടാക്കി ജനങ്ങളിൽ പരിഭ്രാന്തി സൃഷ്ടിക്കുന്ന വിധത്തിൽ നിയമവിരുദ്ധമായി രൂപമാറ്റം വരുത്തിയ കാറുകളുടെയും മോട്ടോർ സൈക്കിളുകളുടെയും യുഎഇ പോലീസ് കർശന നടപടികൾ ആരംഭിച്ചു. മേഖലയിലെ സംഘർഷാവസ്ഥ വാർത്തകളിൽ നിറഞ്ഞുനിൽക്കുന്ന സാഹചര്യത്തിൽ ഇത്തരം വാഹനങ്ങളിൽ നിന്നുണ്ടാകുന്ന ‘ബാക്ക് ഫയർ’ ശബ്ദങ്ങൾ പലരും മിസൈൽ ആക്രമണമോ സ്ഫോടനമോ ആണെന്ന് തെറ്റിദ്ധരിച്ച് ഭീതിയിലായിരുന്നുവെന്ന് അധികൃതർ വ്യക്തമാക്കി. എഞ്ചിനുകളിൽ മാറ്റം വരുത്തി ഉദ്ദേശപൂർവ്വം ശക്തമായ ശബ്ദമുണ്ടാക്കുന്നത് പ്രധാനമായും കൗമാരക്കാരും യുവാക്കളുമാണെന്ന് അന്വേഷണത്തിൽ കണ്ടെത്തിയതായി പോലീസ് അറിയിച്ചു. റിപ്പോർട്ട് ചെയ്യപ്പെട്ട ശബ്ദങ്ങൾ വാഹനങ്ങളിൽ നിന്നുള്ളതാണെന്നും രാജ്യത്തിന്റെ സുരക്ഷയെ ബാധിക്കുന്ന യാതൊരു ഭീഷണിയും നിലവിലില്ലെന്നും അധികൃതർ ജനങ്ങളെ ആശ്വസിപ്പിച്ചു. യുഎഇ പൂർണ്ണമായും സുരക്ഷിതമാണെന്നും പോലീസ് വ്യക്തമാക്കി.

ദുബായ്, ഷാർജ തുടങ്ങിയ എമിറേറ്റുകളിലെ ജനവാസ പ്രദേശങ്ങളിൽ രാത്രികാല പോലീസ് പട്രോളിംഗ് ശക്തമാക്കിയിട്ടുണ്ട്. യുഎഇ ട്രാഫിക് നിയമപ്രകാരം അമിത ശബ്ദമുണ്ടാക്കുന്ന വാഹനങ്ങൾ ഓടിക്കുന്നവർക്ക് 2000 ദിർഹം പിഴയും 12 ബ്ലാക്ക് പോയിന്റുകളും ലഭിക്കും. കൂടാതെ വാഹനം പോലീസ് പിടിച്ചെടുക്കുകയും ചെയ്യും. അനധികൃതമായി രൂപമാറ്റം വരുത്തിയ വാഹനങ്ങൾ തിരികെ ലഭിക്കാൻ 10,000 ദിർഹം വരെ ഫീസ് നൽകേണ്ടിവരുമെന്നും അധികൃതർ അറിയിച്ചു. ഈ നടപടി കർശനമായി നടപ്പാക്കുന്നതിന് ദുബായ് പോലീസ് ഓപ്പറേഷൻസ് അസിസ്റ്റന്റ് കമാൻഡർ-ഇൻ-ചീഫ് മേജർ ജനറൽ സെയ്ഫ് മുഹൈർ അൽ മസ്‌റൂയിയും ഷാർജ പോലീസ് സെൻട്രൽ റീജിയൻ ഡയറക്ടർ ബ്രിഗേഡിയർ ഖലീഫ അൽ ഖസൂനിയും നേതൃത്വമൊരുക്കുന്നുണ്ട്. കുട്ടികൾ വാഹനങ്ങളിൽ അനധികൃത മാറ്റങ്ങൾ വരുത്തുന്നില്ലെന്ന് മാതാപിതാക്കൾ ശ്രദ്ധിക്കണമെന്നും അധികൃതർ അഭ്യർത്ഥിച്ചു. ഇത്തരം ശബ്ദശല്യം ഉണ്ടാക്കുന്ന വാഹനങ്ങളെക്കുറിച്ച് ഔദ്യോഗിക ചാനലുകൾ വഴി പോലീസിനെ അറിയിക്കണമെന്നും പൊതുജനങ്ങളോട് നിർദേശിച്ചിട്ടുണ്ട്. മേഖലയിലെ നിലവിലെ സാഹചര്യം പരിഗണിച്ച് ജനങ്ങളുടെ സമാധാനവും സുരക്ഷയും ഉറപ്പാക്കുക എന്ന ലക്ഷ്യത്തോടെയാണ് ഈ നടപടികൾ ശക്തമാക്കിയതെന്നും പോലീസ് അറിയിച്ചു. പോലീസിന്റെ ഈ ഇടപെടലിനെ പ്രവാസികളും സ്വദേശികളും സ്വാഗതം ചെയ്തിട്ടുണ്ട്.യുഎഇയിലെ വാർത്തകളും തൊഴിൽ അവസരങ്ങളും അതിവേഗം അറിയാൻ വാട്സ്ആപ്പ് ഗ്രൂപ്പിൽ അംഗമാവുhttps://chat.whatsapp.com/Dbf59JLetgBECJpr5UZOuZ?mode=gi_t