ദുബായ് സമ്മർ സർപ്രൈസസ് (DSS) 2026ന്റെ ഭാഗമായി ഇന്ന് (ജൂലൈ 2) വെറും 12 മണിക്കൂർ മാത്രം നീളുന്ന പ്രത്യേക മെഗാ ഫ്ലാഷ് സെയിൽ സംഘടിപ്പിച്ചു. രാവിലെ 10 മുതൽ രാത്രി 10 വരെ നടക്കുന്ന ഈ ഓഫറിൽ 100-ലധികം പ്രമുഖ ദേശീയ-അന്തർദേശീയ ബ്രാൻഡുകളുടെ ഉൽപ്പന്നങ്ങൾക്ക് 90 ശതമാനം വരെ വിലക്കിഴിവാണ് ഉപഭോക്താക്കൾക്ക് ലഭിക്കുന്നത്. മജിദ് അൽ ഫുത്തൈം ഗ്രൂപ്പിന്റെ പ്രധാന ഷോപ്പിംഗ് കേന്ദ്രങ്ങളായ മാൾ ഓഫ് ദി എമിറേറ്റ്സ്, സിറ്റി സെന്റർ മിർദിഫ്, സിറ്റി സെന്റർ ദെയ്‌റ എന്നിവ ഉൾപ്പെടെയുള്ള നിരവധി മാളുകളിലാണ് ഫ്ലാഷ് സെയിൽ നടക്കുന്നത്. ഫാഷൻ, ചെരുപ്പുകൾ, സൗന്ദര്യവർധക വസ്തുക്കൾ, ഗൃഹോപകരണങ്ങൾ, ലൈഫ്‌സ്റ്റൈൽ ഉൽപ്പന്നങ്ങൾ തുടങ്ങി വിവിധ വിഭാഗങ്ങളിലെ സാധനങ്ങൾക്ക് വമ്പൻ ഓഫറുകൾ ഒരുക്കിയിട്ടുണ്ട്.

ഫ്ലാഷ് സെയിലിനൊപ്പം പ്രത്യേക സമ്മാന പദ്ധതിയും ഒരുക്കിയിട്ടുണ്ട്. പങ്കെടുക്കുന്ന സ്റ്റോറുകളിൽ നിന്ന് 300 ദിർഹമോ അതിൽ കൂടുതലോ വിലയ്ക്ക് സാധനങ്ങൾ വാങ്ങുന്നവർക്ക് ‘SHARE Millionaire’ നറുക്കെടുപ്പിൽ പങ്കെടുക്കാൻ അവസരം ലഭിക്കും. നിബന്ധനകൾ പാലിച്ച് വാങ്ങലുകൾ രജിസ്റ്റർ ചെയ്യുന്നവർക്ക് ഈ സമ്മാന പദ്ധതിയുടെ ഭാഗമാകാം. ജൂലൈ 2 മുതൽ ഓഗസ്റ്റ് അവസാനം വരെ നടക്കുന്ന ദുബായ് സമ്മർ സർപ്രൈസസിന്റെ ഉദ്ഘാടന പരിപാടിയായാണ് ഈ 12 മണിക്കൂർ ഫ്ലാഷ് സെയിൽ സംഘടിപ്പിച്ചിരിക്കുന്നത്. വരും ആഴ്ചകളിലും വിവിധ വിഭാഗങ്ങളിലെ ഉൽപ്പന്നങ്ങൾക്ക് പ്രത്യേക ഓഫറുകൾ, നറുക്കെടുപ്പുകൾ, വിനോദ പരിപാടികൾ, കുടുംബ ആഘോഷങ്ങൾ എന്നിവ ഉൾപ്പെടുന്ന നിരവധി പ്രമോഷനുകൾ ദുബായിലുടനീളം നടക്കും.