ജൂലൈ മാസത്തോടെ യുഎഇയിൽ പ്രവാസികളുടെയും സ്വദേശികളുടെയും ദൈനംദിന ജീവിതത്തെ നേരിട്ട് ബാധിക്കുന്ന നിരവധി മാറ്റങ്ങൾ പ്രാബല്യത്തിൽ വന്നു. ഗതാഗതം, കോൺസുലർ സേവനങ്ങൾ, ബിസിനസ്, പാർക്കിങ്, വിദ്യാഭ്യാസം തുടങ്ങി വിവിധ മേഖലകളിലായി പുതിയ സംവിധാനങ്ങളും നിയമങ്ങളും നടപ്പിലാക്കുകയാണ് അധികൃതർ.

ഇത്തിഹാദ് റെയിൽ യാത്രാ സർവീസ് ആരംഭിച്ചു

യുഎഇയുടെ ആദ്യ യാത്രാ റെയിൽ സർവീസ് ഔദ്യോഗികമായി ആരംഭിച്ചതോടെ അബുദാബിയിൽ നിന്ന് ഫുജൈറയിലേക്കുള്ള യാത്രകൾ കൂടുതൽ എളുപ്പമായി. ആദ്യ ദിവസങ്ങളിൽ തന്നെ വൻ തോതിൽ ടിക്കറ്റ് ബുക്കിങ് രേഖപ്പെടുത്തിയതോടെ രാജ്യത്തെ മറ്റ് എമിറേറ്റുകളിലേക്കും ഘട്ടംഘട്ടമായി സർവീസ് വ്യാപിപ്പിക്കാനാണ് പദ്ധതി.

ഇന്ത്യൻ പ്രവാസികൾക്ക് പുതിയ കോൺസുലർ സേവന സംവിധാനം

ജൂലൈ 1 മുതൽ യുഎഇയിലെ ഇന്ത്യൻ പാസ്‌പോർട്ട്, വിസ, അറ്റസ്റ്റേഷൻ ഉൾപ്പെടെയുള്ള കോൺസുലർ സേവനങ്ങൾ പുതിയ സേവനദാതാവായ അൽഹിന്ദ് ടൂർസ് ആൻഡ് ട്രാവൽസിന്റെ കീഴിലേക്ക് മാറി. ഏഴ് എമിറേറ്റുകളിലായി 16 ഇന്ത്യൻ കോൺസുലർ ആപ്ലിക്കേഷൻ സെന്ററുകൾ (ICAC) പ്രവർത്തനം ആരംഭിക്കും. ഇതിനൊപ്പം ഇന്ത്യ പ്രഖ്യാപിച്ച പുതുക്കിയ പാസ്‌പോർട്ട് ഫീസും പ്രാബല്യത്തിൽ വന്നു.

ബിസിനസ് മേഖലയിൽ ഇ-ഇൻവോയ്സിങ് പരീക്ഷണം

രാജ്യത്തെ നികുതി സംവിധാനം കൂടുതൽ ഡിജിറ്റലാക്കുന്നതിന്റെ ഭാഗമായി ഇ-ഇൻവോയ്സിങ് പദ്ധതിയുടെ ആദ്യഘട്ടം ജൂലൈയിൽ ആരംഭിച്ചു. വാർഷികമായി 50 ദശലക്ഷം ദിർഹത്തിലധികം വിറ്റുവരവുള്ള സ്ഥാപനങ്ങളെയാണ് ആദ്യഘട്ടത്തിൽ ഉൾപ്പെടുത്തിയിരിക്കുന്നത്. ഭാവിയിൽ എല്ലാ സ്ഥാപനങ്ങൾക്കും ഇത് നിർബന്ധമാക്കാനാണ് പദ്ധതി.

ഷാർജയിൽ പെയ്ഡ് പാർക്കിങ് സമയം വർധിപ്പിച്ചു

ഷാർജയിൽ പൊതുപാർക്കിങ്ങിന്റെ ഫീസ് ഈടാക്കുന്ന സമയം ഇനി അർധരാത്രി 12 മണിവരെ നീട്ടി. നഗരത്തിലെ ഗതാഗത നിയന്ത്രണവും പാർക്കിങ് സൗകര്യവും കൂടുതൽ കാര്യക്ഷമമാക്കുക എന്ന ലക്ഷ്യത്തോടെയാണ് പുതിയ തീരുമാനം.

സ്കൂളുകൾക്ക് വേനലവധി

യുഎഇയിലെ സ്കൂളുകൾ ജൂലൈ ആദ്യവാരത്തോടെ ദീർഘമായ വേനലവധിയിലേക്ക് കടന്നു. പുതിയ അധ്യയന വർഷം ഓഗസ്റ്റ് അവസാനത്തോടെ ആരംഭിക്കുമെന്നാണ് വിദ്യാഭ്യാസ കലണ്ടർ വ്യക്തമാക്കുന്നത്.

ദുബായ് സമ്മർ സർപ്രൈസസ് ആരംഭിച്ചു

ഷോപ്പിങ് പ്രേമികൾ കാത്തിരുന്ന ‘ദുബായ് സമ്മർ സർപ്രൈസസ്’ ജൂലൈയിൽ ആരംഭിച്ചു. രണ്ട് മാസത്തോളം നീളുന്ന മേളയിൽ വമ്പൻ ഓഫറുകൾ, സമ്മാന പദ്ധതികൾ, വിനോദ പരിപാടികൾ എന്നിവ ഒരുക്കിയിട്ടുണ്ട്..യുഎഇയിലെ വാർത്തകളും തൊഴിൽ അവസരങ്ങളും അതിവേഗം അറിയാൻ വാട്സ്ആപ്പ് ഗ്രൂപ്പിൽ അംഗമാവുക https://chat.whatsapp.com/Dbf59JLetgBECJpr5UZOuZ?mode=gi_t

‘സ്ഫോടന ശബ്ദ’മുണ്ടാക്കുന്ന വാഹനങ്ങൾക്കെതിരെ യുഎഇയിൽ കർശന നടപടി; പിഴയും 12 ബ്ലാക്ക് പോയിന്റും

ജനവാസ മേഖലകളിൽ അർദ്ധരാത്രിയിൽ സ്ഫോടനത്തിന് സമാനമായ ശബ്ദമുണ്ടാക്കി ജനങ്ങളിൽ പരിഭ്രാന്തി സൃഷ്ടിക്കുന്ന വിധത്തിൽ നിയമവിരുദ്ധമായി രൂപമാറ്റം വരുത്തിയ കാറുകളുടെയും മോട്ടോർ സൈക്കിളുകളുടെയും യുഎഇ പോലീസ് കർശന നടപടികൾ ആരംഭിച്ചു. മേഖലയിലെ സംഘർഷാവസ്ഥ വാർത്തകളിൽ നിറഞ്ഞുനിൽക്കുന്ന സാഹചര്യത്തിൽ ഇത്തരം വാഹനങ്ങളിൽ നിന്നുണ്ടാകുന്ന ‘ബാക്ക് ഫയർ’ ശബ്ദങ്ങൾ പലരും മിസൈൽ ആക്രമണമോ സ്ഫോടനമോ ആണെന്ന് തെറ്റിദ്ധരിച്ച് ഭീതിയിലായിരുന്നുവെന്ന് അധികൃതർ വ്യക്തമാക്കി. എഞ്ചിനുകളിൽ മാറ്റം വരുത്തി ഉദ്ദേശപൂർവ്വം ശക്തമായ ശബ്ദമുണ്ടാക്കുന്നത് പ്രധാനമായും കൗമാരക്കാരും യുവാക്കളുമാണെന്ന് അന്വേഷണത്തിൽ കണ്ടെത്തിയതായി പോലീസ് അറിയിച്ചു. റിപ്പോർട്ട് ചെയ്യപ്പെട്ട ശബ്ദങ്ങൾ വാഹനങ്ങളിൽ നിന്നുള്ളതാണെന്നും രാജ്യത്തിന്റെ സുരക്ഷയെ ബാധിക്കുന്ന യാതൊരു ഭീഷണിയും നിലവിലില്ലെന്നും അധികൃതർ ജനങ്ങളെ ആശ്വസിപ്പിച്ചു. യുഎഇ പൂർണ്ണമായും സുരക്ഷിതമാണെന്നും പോലീസ് വ്യക്തമാക്കി.

ദുബായ്, ഷാർജ തുടങ്ങിയ എമിറേറ്റുകളിലെ ജനവാസ പ്രദേശങ്ങളിൽ രാത്രികാല പോലീസ് പട്രോളിംഗ് ശക്തമാക്കിയിട്ടുണ്ട്. യുഎഇ ട്രാഫിക് നിയമപ്രകാരം അമിത ശബ്ദമുണ്ടാക്കുന്ന വാഹനങ്ങൾ ഓടിക്കുന്നവർക്ക് 2000 ദിർഹം പിഴയും 12 ബ്ലാക്ക് പോയിന്റുകളും ലഭിക്കും. കൂടാതെ വാഹനം പോലീസ് പിടിച്ചെടുക്കുകയും ചെയ്യും. അനധികൃതമായി രൂപമാറ്റം വരുത്തിയ വാഹനങ്ങൾ തിരികെ ലഭിക്കാൻ 10,000 ദിർഹം വരെ ഫീസ് നൽകേണ്ടിവരുമെന്നും അധികൃതർ അറിയിച്ചു. ഈ നടപടി കർശനമായി നടപ്പാക്കുന്നതിന് ദുബായ് പോലീസ് ഓപ്പറേഷൻസ് അസിസ്റ്റന്റ് കമാൻഡർ-ഇൻ-ചീഫ് മേജർ ജനറൽ സെയ്ഫ് മുഹൈർ അൽ മസ്‌റൂയിയും ഷാർജ പോലീസ് സെൻട്രൽ റീജിയൻ ഡയറക്ടർ ബ്രിഗേഡിയർ ഖലീഫ അൽ ഖസൂനിയും നേതൃത്വമൊരുക്കുന്നുണ്ട്. കുട്ടികൾ വാഹനങ്ങളിൽ അനധികൃത മാറ്റങ്ങൾ വരുത്തുന്നില്ലെന്ന് മാതാപിതാക്കൾ ശ്രദ്ധിക്കണമെന്നും അധികൃതർ അഭ്യർത്ഥിച്ചു. ഇത്തരം ശബ്ദശല്യം ഉണ്ടാക്കുന്ന വാഹനങ്ങളെക്കുറിച്ച് ഔദ്യോഗിക ചാനലുകൾ വഴി പോലീസിനെ അറിയിക്കണമെന്നും പൊതുജനങ്ങളോട് നിർദേശിച്ചിട്ടുണ്ട്. മേഖലയിലെ നിലവിലെ സാഹചര്യം പരിഗണിച്ച് ജനങ്ങളുടെ സമാധാനവും സുരക്ഷയും ഉറപ്പാക്കുക എന്ന ലക്ഷ്യത്തോടെയാണ് ഈ നടപടികൾ ശക്തമാക്കിയതെന്നും പോലീസ് അറിയിച്ചു. പോലീസിന്റെ ഈ ഇടപെടലിനെ പ്രവാസികളും സ്വദേശികളും സ്വാഗതം ചെയ്തിട്ടുണ്ട്.യുഎഇയിലെ വാർത്തകളും തൊഴിൽ അവസരങ്ങളും അതിവേഗം അറിയാൻ വാട്സ്ആപ്പ് ഗ്രൂപ്പിൽ അംഗമാവുhttps://chat.whatsapp.com/Dbf59JLetgBECJpr5UZOuZ?mode=gi_t