യുഎഇയിൽ ഇന്ന് (ഞായറാഴ്ച) പൊതുവെ തെളിഞ്ഞതോ ഭാഗികമായി മേഘാവൃതമായതോ ആയ കാലാവസ്ഥയായിരിക്കുമെന്ന് ദേശീയ കാലാവസ്ഥാ കേന്ദ്രം അറിയിച്ചു. ഉച്ചയ്ക്ക് ശേഷം രാജ്യത്തിന്റെ കിഴക്കൻ മേഖലകളിൽ മഴയ്ക്ക് സാധ്യതയുള്ള സംവഹന മേഘങ്ങൾ രൂപപ്പെടാനിടയുണ്ട്. ഉൾപ്രദേശങ്ങളിൽ പകൽ താപനില 41 മുതൽ 46 ഡിഗ്രി സെൽഷ്യസ് വരെയും തീരപ്രദേശങ്ങളിൽ 36 മുതൽ 41 ഡിഗ്രി സെൽഷ്യസ് വരെയും ഉയരാൻ സാധ്യതയുണ്ട്. മലയോര മേഖലകളിൽ 32 മുതൽ 38 ഡിഗ്രി സെൽഷ്യസ് വരെയാണ് താപനില പ്രതീക്ഷിക്കുന്നത്.

രാത്രിയിലും തിങ്കളാഴ്ച പുലർച്ചെയും ചില തീരദേശ, ഉൾപ്രദേശങ്ങളിൽ അന്തരീക്ഷ ഈർപ്പം വർധിക്കാനിടയുണ്ട്. ഇതുമൂലം മൂടൽമഞ്ഞോ നേർത്ത മഞ്ഞോ രൂപപ്പെടാൻ സാധ്യതയുണ്ട്.

പൊതുവെ നേരിയതോ മിതമായതോ ആയ കാറ്റ് വീശുമെങ്കിലും മേഘാവൃതമായ സാഹചര്യങ്ങളിൽ കാറ്റിന്റെ ശക്തി വർധിക്കാനും പൊടിക്കാറ്റ് അനുഭവപ്പെടാനും സാധ്യതയുണ്ട്. അറേബ്യൻ ഗൾഫിലും ഒമാൻ കടലിലും കടൽ പൊതുവെ ശാന്തമായിരിക്കും.

കിഴക്കൻ ഭാഗത്തെ ഉപരിതല ന്യൂനമർദ്ദത്തിന്റെയും പടിഞ്ഞാറൻ ഭാഗത്തെ ഉയർന്ന മർദ്ദ വ്യവസ്ഥയുടെയും സ്വാധീനമാണ് നിലവിലെ കാലാവസ്ഥയ്ക്ക് കാരണമെന്നാണ് വിലയിരുത്തൽ.

വരും ദിവസങ്ങളിലും സമാനമായ കാലാവസ്ഥ തുടരുമെന്ന് പ്രവചനം. തിങ്കളാഴ്ചയും ഭാഗികമായി മേഘാവൃതമായ ആകാശവും കിഴക്കൻ മേഖലകളിൽ മേഘ രൂപീകരണത്തിനും സാധ്യതയുണ്ട്. രാത്രിയിലും ചൊവ്വാഴ്ച പുലർച്ചെയും ഈർപ്പമുള്ള കാലാവസ്ഥ തുടരും.

മണിക്കൂറിൽ 10 മുതൽ 25 കിലോമീറ്റർ വരെ വേഗത്തിൽ വീശുന്ന കാറ്റ് ചില സമയങ്ങളിൽ 35 കിലോമീറ്റർ വരെയും ചൊവ്വാഴ്ച 40 കിലോമീറ്റർ വരെയും ശക്തമാകാൻ സാധ്യതയുണ്ട്. ഇതോടെ അറേബ്യൻ ഗൾഫിന്റെ പടിഞ്ഞാറൻ ഭാഗങ്ങളിൽ കടൽ ചിലപ്പോൾ പ്രക്ഷുബ്ധമാകാം. അതേസമയം, ഒമാൻ കടൽ പൊതുവെ ശാന്തമായി തുടരും.