യുഎഇയിലെ പ്രമുഖ ‘ബൈ നൗ, പേ ലേറ്റർ’ (BNPL) സേവനദാതാക്കളായ ടാബിയുടെ സാങ്കേതിക പിഴവ് നിരവധി ഉപഭോക്താക്കളെ ആശയക്കുഴപ്പത്തിലാക്കി. 5,000 ദിർഹം വിലമതിക്കുന്ന എമിറേറ്റ്സ് വിമാനയാത്രാ വൗച്ചർ നേടിയതായി അറിയിച്ച ഇമെയിൽ ലഭിച്ചവർക്ക്, മണിക്കൂറുകൾക്കകം അത് തെറ്റായി അയച്ച സന്ദേശമായിരുന്നുവെന്ന് കമ്പനി അറിയിച്ചതോടെയാണ് സംഭവം ശ്രദ്ധേയമായത്. ജൂൺ 26-ന് യുഎഇയിലെ നിരവധി ഉപഭോക്താക്കൾക്ക് “You won an Emirates voucher” എന്ന തലക്കെട്ടോടെയാണ് ഇമെയിൽ ലഭിച്ചത്. എമിറേറ്റ്സ് ഫ്ലൈറ്റ് വൗച്ചർ റാഫിൾ വിജയികളിൽ ഒരാളാണ് തങ്ങളെന്നും 5,000 ദിർഹം മൂല്യമുള്ള യാത്രാ വൗച്ചർ ലഭിക്കുമെന്നും സന്ദേശത്തിൽ പറഞ്ഞിരുന്നു. സമ്മാനം ലഭ്യമാക്കുന്നതിനായി ഡെലിവറി വിവരങ്ങൾ രേഖപ്പെടുത്താനും ഇമെയിലിൽ നിർദേശിച്ചിരുന്നു. എന്നാൽ, അധികം വൈകാതെ തന്നെ ടാബി മറ്റൊരു ഇമെയിൽ അയച്ച് മുൻ സന്ദേശം സാങ്കേതിക പിഴവിനെ തുടർന്നാണ് തെറ്റായി ഉപഭോക്താക്കൾക്ക് ലഭിച്ചതെന്ന് വ്യക്തമാക്കി. സംഭവത്തിൽ ഖേദം പ്രകടിപ്പിച്ച കമ്പനി, ഉപഭോക്താക്കളുടെ പ്രതീക്ഷകൾ അനാവശ്യമായി ഉയർത്തിയതിന് പൂർണ ഉത്തരവാദിത്തം ഏറ്റെടുക്കുന്നതായും അറിയിച്ചു.

“നല്ലൊരു വാർത്ത കേട്ടതിന് ശേഷം അത് യാഥാർഥ്യമല്ലെന്ന് അറിയുമ്പോൾ ഉണ്ടാകുന്ന നിരാശ ഞങ്ങൾ മനസ്സിലാക്കുന്നു. ഈ പിഴവിൽ ഞങ്ങൾ ആത്മാർത്ഥമായി ക്ഷമ ചോദിക്കുന്നു,” എന്നായിരുന്നു കമ്പനി ഉപഭോക്താക്കൾക്ക് അയച്ച വിശദീകരണ സന്ദേശത്തിൽ പറഞ്ഞത്. ആദ്യ ഇമെയിൽ വിശ്വസിച്ച് ഡെലിവറി വിവരങ്ങൾ നൽകിയവർക്ക് ആശങ്കപ്പെടേണ്ട സാഹചര്യമില്ലെന്നും ടാബി വ്യക്തമാക്കി. ഉപഭോക്താക്കൾ നൽകിയ വിവരങ്ങൾ മറ്റൊരു ആവശ്യത്തിനും ഉപയോഗിച്ചിട്ടില്ലെന്നും അവ സുരക്ഷിതമായി കൈകാര്യം ചെയ്ത് പൂർണമായും ഇല്ലാതാക്കാനുള്ള നടപടികൾ സ്വീകരിച്ചിട്ടുണ്ടെന്നും കമ്പനി അറിയിച്ചു. ഇത്തരത്തിലുള്ള പിഴവുകൾ ഭാവിയിൽ ആവർത്തിക്കാതിരിക്കാൻ സംഭവത്തെക്കുറിച്ച് വിശദമായ അന്വേഷണം നടത്തുമെന്നും ടാബി ഉറപ്പ് നൽകി.

യഥാർത്ഥത്തിൽ ടാബി കാർഡ് ഉപയോക്താക്കൾക്കായി നടത്തിയ പ്രമോഷൻ ക്യാമ്പയിനിന്റെ ഭാഗമായിരുന്നു 5,000 ദിർഹം വിലമതിക്കുന്ന എമിറേറ്റ്സ് ഫ്ലൈറ്റ് വൗച്ചർ റാഫിൾ. മത്സരത്തിൽ പങ്കെടുക്കാനുള്ള അവസാന തീയതി ജൂൺ 21 ആയിരുന്നു. ടാബി കാർഡ് ഉപയോഗിച്ച് കുറഞ്ഞത് 500 ദിർഹമെങ്കിലും ചെലവഴിച്ചവർക്ക് മാത്രമാണ് റാഫിളിൽ ഒരു എൻട്രിക്ക് അർഹത ലഭിച്ചിരുന്നത്.
എന്നാൽ, തെറ്റായി ഇമെയിൽ ലഭിച്ചവരിൽ പലരും ടാബി കാർഡ് ഉടമകൾ പോലും അല്ലെന്നും അവർ മത്സരത്തിൽ പങ്കെടുത്തിട്ടില്ലെന്നും റിപ്പോർട്ടുകൾ വ്യക്തമാക്കുന്നു. സംഭവത്തെക്കുറിച്ച് എമിറേറ്റ്സ് എയർലൈൻസിന്റെ ഭാഗത്തുനിന്ന് ഇതുവരെ ഔദ്യോഗിക പ്രതികരണമൊന്നും ലഭ്യമായിട്ടില്ല..യുഎഇയിലെ വാർത്തകളും തൊഴിൽ അവസരങ്ങളും അതിവേഗം അറിയാൻ വാട്സ്ആപ്പ് ഗ്രൂപ്പിൽ അംഗമാവുക https://chat.whatsapp.com/Dbf59JLetgBECJpr5UZOuZ?mode=gi_t

‘സ്ഫോടന ശബ്ദ’മുണ്ടാക്കുന്ന വാഹനങ്ങൾക്കെതിരെ യുഎഇയിൽ കർശന നടപടി; പിഴയും 12 ബ്ലാക്ക് പോയിന്റും

ജനവാസ മേഖലകളിൽ അർദ്ധരാത്രിയിൽ സ്ഫോടനത്തിന് സമാനമായ ശബ്ദമുണ്ടാക്കി ജനങ്ങളിൽ പരിഭ്രാന്തി സൃഷ്ടിക്കുന്ന വിധത്തിൽ നിയമവിരുദ്ധമായി രൂപമാറ്റം വരുത്തിയ കാറുകളുടെയും മോട്ടോർ സൈക്കിളുകളുടെയും യുഎഇ പോലീസ് കർശന നടപടികൾ ആരംഭിച്ചു. മേഖലയിലെ സംഘർഷാവസ്ഥ വാർത്തകളിൽ നിറഞ്ഞുനിൽക്കുന്ന സാഹചര്യത്തിൽ ഇത്തരം വാഹനങ്ങളിൽ നിന്നുണ്ടാകുന്ന ‘ബാക്ക് ഫയർ’ ശബ്ദങ്ങൾ പലരും മിസൈൽ ആക്രമണമോ സ്ഫോടനമോ ആണെന്ന് തെറ്റിദ്ധരിച്ച് ഭീതിയിലായിരുന്നുവെന്ന് അധികൃതർ വ്യക്തമാക്കി. എഞ്ചിനുകളിൽ മാറ്റം വരുത്തി ഉദ്ദേശപൂർവ്വം ശക്തമായ ശബ്ദമുണ്ടാക്കുന്നത് പ്രധാനമായും കൗമാരക്കാരും യുവാക്കളുമാണെന്ന് അന്വേഷണത്തിൽ കണ്ടെത്തിയതായി പോലീസ് അറിയിച്ചു. റിപ്പോർട്ട് ചെയ്യപ്പെട്ട ശബ്ദങ്ങൾ വാഹനങ്ങളിൽ നിന്നുള്ളതാണെന്നും രാജ്യത്തിന്റെ സുരക്ഷയെ ബാധിക്കുന്ന യാതൊരു ഭീഷണിയും നിലവിലില്ലെന്നും അധികൃതർ ജനങ്ങളെ ആശ്വസിപ്പിച്ചു. യുഎഇ പൂർണ്ണമായും സുരക്ഷിതമാണെന്നും പോലീസ് വ്യക്തമാക്കി.

ദുബായ്, ഷാർജ തുടങ്ങിയ എമിറേറ്റുകളിലെ ജനവാസ പ്രദേശങ്ങളിൽ രാത്രികാല പോലീസ് പട്രോളിംഗ് ശക്തമാക്കിയിട്ടുണ്ട്. യുഎഇ ട്രാഫിക് നിയമപ്രകാരം അമിത ശബ്ദമുണ്ടാക്കുന്ന വാഹനങ്ങൾ ഓടിക്കുന്നവർക്ക് 2000 ദിർഹം പിഴയും 12 ബ്ലാക്ക് പോയിന്റുകളും ലഭിക്കും. കൂടാതെ വാഹനം പോലീസ് പിടിച്ചെടുക്കുകയും ചെയ്യും. അനധികൃതമായി രൂപമാറ്റം വരുത്തിയ വാഹനങ്ങൾ തിരികെ ലഭിക്കാൻ 10,000 ദിർഹം വരെ ഫീസ് നൽകേണ്ടിവരുമെന്നും അധികൃതർ അറിയിച്ചു. ഈ നടപടി കർശനമായി നടപ്പാക്കുന്നതിന് ദുബായ് പോലീസ് ഓപ്പറേഷൻസ് അസിസ്റ്റന്റ് കമാൻഡർ-ഇൻ-ചീഫ് മേജർ ജനറൽ സെയ്ഫ് മുഹൈർ അൽ മസ്‌റൂയിയും ഷാർജ പോലീസ് സെൻട്രൽ റീജിയൻ ഡയറക്ടർ ബ്രിഗേഡിയർ ഖലീഫ അൽ ഖസൂനിയും നേതൃത്വമൊരുക്കുന്നുണ്ട്. കുട്ടികൾ വാഹനങ്ങളിൽ അനധികൃത മാറ്റങ്ങൾ വരുത്തുന്നില്ലെന്ന് മാതാപിതാക്കൾ ശ്രദ്ധിക്കണമെന്നും അധികൃതർ അഭ്യർത്ഥിച്ചു. ഇത്തരം ശബ്ദശല്യം ഉണ്ടാക്കുന്ന വാഹനങ്ങളെക്കുറിച്ച് ഔദ്യോഗിക ചാനലുകൾ വഴി പോലീസിനെ അറിയിക്കണമെന്നും പൊതുജനങ്ങളോട് നിർദേശിച്ചിട്ടുണ്ട്. മേഖലയിലെ നിലവിലെ സാഹചര്യം പരിഗണിച്ച് ജനങ്ങളുടെ സമാധാനവും സുരക്ഷയും ഉറപ്പാക്കുക എന്ന ലക്ഷ്യത്തോടെയാണ് ഈ നടപടികൾ ശക്തമാക്കിയതെന്നും പോലീസ് അറിയിച്ചു. പോലീസിന്റെ ഈ ഇടപെടലിനെ പ്രവാസികളും സ്വദേശികളും സ്വാഗതം ചെയ്തിട്ടുണ്ട്.യുഎഇയിലെ വാർത്തകളും തൊഴിൽ അവസരങ്ങളും അതിവേഗം അറിയാൻ വാട്സ്ആപ്പ് ഗ്രൂപ്പിൽ അംഗമാവുhttps://chat.whatsapp.com/Dbf59JLetgBECJpr5UZOuZ?mode=gi_t