പതിവ് ഞായറാഴ്ച ക്രിക്കറ്റ് മത്സരത്തിനിടെ കുഴഞ്ഞുവീണ് മരിച്ച ദുബായ് പ്രവാസി മുഹമ്മദ് സഫ്‌വാൻ ഷാനുവിന് (38) നൂറുകണക്കിന് ആളുകളുടെ സാന്നിധ്യത്തിൽ അന്ത്യാഞ്ജലി അർപ്പിച്ചു. തിങ്കളാഴ്ച അസർ നമസ്‌കാരത്തിന് ശേഷം അൽ ഖുസൈസ് ശ്മശാനത്തിൽ നടന്ന മയ്യത്ത് നമസ്‌കാരത്തിലും സംസ്കാര ചടങ്ങുകളിലും ബന്ധുക്കളും സുഹൃത്തുക്കളും കമ്മ്യൂണിറ്റി അംഗങ്ങളും പങ്കെടുത്തു. മകന്റെ അന്ത്യകർമങ്ങളിൽ പങ്കെടുക്കാനായി സഫ്‌വാന്റെ മാതാപിതാക്കൾ ഇന്ത്യയിൽ നിന്ന് ദുബായിലെത്തി. കർണാടകയിലെ ഭട്കൽ സ്വദേശിയായ സഫ്‌വാൻ കഴിഞ്ഞ 15 വർഷമായി യുഎഇയിൽ താമസിച്ചുവരികയായിരുന്നു. ഭാര്യയും മൂന്ന് ആൺമക്കളും നാല് മാസം പ്രായമുള്ള ഒരു പെൺകുഞ്ഞും ഉൾപ്പെടുന്നതാണ് കുടുംബം.

ശനിയാഴ്ച വൈകുന്നേരം സുഹൃത്തുക്കൾക്കൊപ്പം ദുബായ് വാട്ടർഫ്രണ്ട് മാർക്കറ്റിൽ പോയി മീനും മറ്റ് സാധനങ്ങളും വാങ്ങിയ ശേഷമാണ് പതിവുപോലെ ഞായറാഴ്ചത്തെ ക്രിക്കറ്റ് മത്സരത്തിനായി അദ്ദേഹം തയ്യാറെടുത്തതെന്ന് സുഹൃത്തുക്കൾ ഓർമ്മിക്കുന്നു. വർഷങ്ങളായി എല്ലാ ഞായറാഴ്ചകളിലും സുഹൃത്തുക്കൾക്കൊപ്പം ക്രിക്കറ്റ് കളിക്കുന്നത് സഫ്‌വാന്റെ ജീവിതത്തിന്റെ ഭാഗമായിരുന്നു. എന്നാൽ ഞായറാഴ്ച രാവിലെ 7.10ഓടെ ബാറ്റിംഗ് ചെയ്യുന്നതിനിടെ സഫ്‌വാൻ പെട്ടെന്ന് പിച്ചിൽ കുഴഞ്ഞുവീഴുകയായിരുന്നു. സഹതാരങ്ങൾ ഉടൻ തന്നെ ഓടിയെത്തി പ്രാഥമിക ശുശ്രൂഷ നൽകുകയും ആംബുലൻസ് വിളിക്കുകയും ചെയ്തു.

“എല്ലാ ഞായറാഴ്ചയും ഞങ്ങൾ ഒരുമിച്ച് ക്രിക്കറ്റ് കളിക്കാറുണ്ട്. ശനിയാഴ്ച വൈകുന്നേരവും ഞങ്ങൾ ഒരുമിച്ചായിരുന്നു. യാതൊരു ആരോഗ്യപ്രശ്നവും അദ്ദേഹത്തിന് ഉണ്ടായിരുന്നില്ല. പിറ്റേന്ന് രാവിലെ ഒരേ കാറിലാണ് ഞങ്ങൾ ഗ്രൗണ്ടിലേക്ക് പോയത്. എല്ലാം സാധാരണപോലെയായിരുന്നു,” അടുത്ത സുഹൃത്തായ നബീൽ കാരിക്കൽ പറഞ്ഞു. സിപിആർ നൽകിയ ശേഷം ആശുപത്രിയിലേക്ക് കൊണ്ടുപോയെങ്കിലും ആശുപത്രിയിലെത്തും മുമ്പ് തന്നെ മരണം സംഭവിച്ചതായി ഡോക്ടർമാർ സ്ഥിരീകരിച്ചുവെന്നും അദ്ദേഹം കൂട്ടിച്ചേർത്തു.

15 വർഷം മുമ്പ് ദുബായിലെത്തിയ സഫ്‌വാൻ ആദ്യം സ്വകാര്യ സ്ഥാപനത്തിൽ ജോലി ചെയ്തിരുന്നു. എട്ട് വർഷത്തെ സേവനത്തിന് ശേഷം സ്വന്തമായി ബിസിനസ് ആരംഭിച്ച അദ്ദേഹം കഠിനാധ്വാനിയും എല്ലാവരോടും സൗഹൃദപരമായി ഇടപെടുന്ന വ്യക്തിയുമായിരുന്നുവെന്ന് സുഹൃത്തുക്കൾ പറയുന്നു. സഫ്‌വാനെ ബാല്യകാലം മുതൽ പരിചയമുള്ള നവായത്ത് കമ്മ്യൂണിറ്റി നേതാവ് മുനീരി അതീഖുർ റഹ്മാൻ, ക്രിക്കറ്റിനോടുള്ള അദ്ദേഹത്തിന്റെ അടങ്ങാത്ത ആവേശവും സമൂഹത്തോടുള്ള ആത്മാർത്ഥമായ ഇടപെടലും എന്നും ഓർമിക്കപ്പെടുമെന്ന് പറഞ്ഞു.യുഎഇയിലെ വാർത്തകളും തൊഴിൽ അവസരങ്ങളും അതിവേഗം അറിയാൻ വാട്സ്ആപ്പ് ഗ്രൂപ്പിൽ അംഗമാവുക https://chat.whatsapp.com/Dbf59JLetgBECJpr5UZOuZ?mode=gi_t

‘സ്ഫോടന ശബ്ദ’മുണ്ടാക്കുന്ന വാഹനങ്ങൾക്കെതിരെ യുഎഇയിൽ കർശന നടപടി; പിഴയും 12 ബ്ലാക്ക് പോയിന്റും

ജനവാസ മേഖലകളിൽ അർദ്ധരാത്രിയിൽ സ്ഫോടനത്തിന് സമാനമായ ശബ്ദമുണ്ടാക്കി ജനങ്ങളിൽ പരിഭ്രാന്തി സൃഷ്ടിക്കുന്ന വിധത്തിൽ നിയമവിരുദ്ധമായി രൂപമാറ്റം വരുത്തിയ കാറുകളുടെയും മോട്ടോർ സൈക്കിളുകളുടെയും യുഎഇ പോലീസ് കർശന നടപടികൾ ആരംഭിച്ചു. മേഖലയിലെ സംഘർഷാവസ്ഥ വാർത്തകളിൽ നിറഞ്ഞുനിൽക്കുന്ന സാഹചര്യത്തിൽ ഇത്തരം വാഹനങ്ങളിൽ നിന്നുണ്ടാകുന്ന ‘ബാക്ക് ഫയർ’ ശബ്ദങ്ങൾ പലരും മിസൈൽ ആക്രമണമോ സ്ഫോടനമോ ആണെന്ന് തെറ്റിദ്ധരിച്ച് ഭീതിയിലായിരുന്നുവെന്ന് അധികൃതർ വ്യക്തമാക്കി. എഞ്ചിനുകളിൽ മാറ്റം വരുത്തി ഉദ്ദേശപൂർവ്വം ശക്തമായ ശബ്ദമുണ്ടാക്കുന്നത് പ്രധാനമായും കൗമാരക്കാരും യുവാക്കളുമാണെന്ന് അന്വേഷണത്തിൽ കണ്ടെത്തിയതായി പോലീസ് അറിയിച്ചു. റിപ്പോർട്ട് ചെയ്യപ്പെട്ട ശബ്ദങ്ങൾ വാഹനങ്ങളിൽ നിന്നുള്ളതാണെന്നും രാജ്യത്തിന്റെ സുരക്ഷയെ ബാധിക്കുന്ന യാതൊരു ഭീഷണിയും നിലവിലില്ലെന്നും അധികൃതർ ജനങ്ങളെ ആശ്വസിപ്പിച്ചു. യുഎഇ പൂർണ്ണമായും സുരക്ഷിതമാണെന്നും പോലീസ് വ്യക്തമാക്കി.

ദുബായ്, ഷാർജ തുടങ്ങിയ എമിറേറ്റുകളിലെ ജനവാസ പ്രദേശങ്ങളിൽ രാത്രികാല പോലീസ് പട്രോളിംഗ് ശക്തമാക്കിയിട്ടുണ്ട്. യുഎഇ ട്രാഫിക് നിയമപ്രകാരം അമിത ശബ്ദമുണ്ടാക്കുന്ന വാഹനങ്ങൾ ഓടിക്കുന്നവർക്ക് 2000 ദിർഹം പിഴയും 12 ബ്ലാക്ക് പോയിന്റുകളും ലഭിക്കും. കൂടാതെ വാഹനം പോലീസ് പിടിച്ചെടുക്കുകയും ചെയ്യും. അനധികൃതമായി രൂപമാറ്റം വരുത്തിയ വാഹനങ്ങൾ തിരികെ ലഭിക്കാൻ 10,000 ദിർഹം വരെ ഫീസ് നൽകേണ്ടിവരുമെന്നും അധികൃതർ അറിയിച്ചു. ഈ നടപടി കർശനമായി നടപ്പാക്കുന്നതിന് ദുബായ് പോലീസ് ഓപ്പറേഷൻസ് അസിസ്റ്റന്റ് കമാൻഡർ-ഇൻ-ചീഫ് മേജർ ജനറൽ സെയ്ഫ് മുഹൈർ അൽ മസ്‌റൂയിയും ഷാർജ പോലീസ് സെൻട്രൽ റീജിയൻ ഡയറക്ടർ ബ്രിഗേഡിയർ ഖലീഫ അൽ ഖസൂനിയും നേതൃത്വമൊരുക്കുന്നുണ്ട്. കുട്ടികൾ വാഹനങ്ങളിൽ അനധികൃത മാറ്റങ്ങൾ വരുത്തുന്നില്ലെന്ന് മാതാപിതാക്കൾ ശ്രദ്ധിക്കണമെന്നും അധികൃതർ അഭ്യർത്ഥിച്ചു. ഇത്തരം ശബ്ദശല്യം ഉണ്ടാക്കുന്ന വാഹനങ്ങളെക്കുറിച്ച് ഔദ്യോഗിക ചാനലുകൾ വഴി പോലീസിനെ അറിയിക്കണമെന്നും പൊതുജനങ്ങളോട് നിർദേശിച്ചിട്ടുണ്ട്. മേഖലയിലെ നിലവിലെ സാഹചര്യം പരിഗണിച്ച് ജനങ്ങളുടെ സമാധാനവും സുരക്ഷയും ഉറപ്പാക്കുക എന്ന ലക്ഷ്യത്തോടെയാണ് ഈ നടപടികൾ ശക്തമാക്കിയതെന്നും പോലീസ് അറിയിച്ചു. പോലീസിന്റെ ഈ ഇടപെടലിനെ പ്രവാസികളും സ്വദേശികളും സ്വാഗതം ചെയ്തിട്ടുണ്ട്.യുഎഇയിലെ വാർത്തകളും തൊഴിൽ അവസരങ്ങളും അതിവേഗം അറിയാൻ വാട്സ്ആപ്പ് ഗ്രൂപ്പിൽ അംഗമാവുhttps://chat.whatsapp.com/Dbf59JLetgBECJpr5UZOuZ?mode=gi_t