ആഗോള ഡിജിറ്റൽ പേയ്‌മെന്റ് രംഗത്തെ പ്രമുഖരായ വിസ (Visa), യുഎഇയിലെ ഡിജിറ്റൽ വാണിജ്യ അവബോധവും പുതിയ സുരക്ഷാ ഭീഷണികളും വിലയിരുത്തുന്ന ‘സ്റ്റേ സെക്യൂർ’ (Stay Secure) വാർഷിക പഠന റിപ്പോർട്ട് പുറത്തുവിട്ടു. വേക്ക്ഫീൽഡ് റിസർച്ച് (Wakefield Research) നടത്തിയ ഈ പഠനം, ആർട്ടിഫിഷ്യൽ ഇന്റലിജൻസ് (AI) അധിഷ്ഠിത ഷോപ്പിംഗും സോഷ്യൽ മീഡിയ വഴിയുള്ള തട്ടിപ്പുകളും യുഎഇയിലെ ഉപഭോക്താക്കളെ എങ്ങനെ ബാധിക്കുന്നുവെന്ന് വ്യക്തമാക്കുന്നു.

യുഎഇയിലെ ഉപഭോക്താക്കൾ ഷോപ്പിംഗിനായി ആർട്ടിഫിഷ്യൽ ഇന്റലിജൻസ് (AI) ടൂളുകളെ വൻതോതിൽ ആശ്രയിക്കുന്നുണ്ടെന്ന് റിപ്പോർട്ട് വ്യക്തമാക്കുന്നു. ഏകദേശം 85% ഉപഭോക്താക്കൾ തങ്ങളുടെ ദൈനംദിന ഷോപ്പിംഗ് ആവശ്യങ്ങൾക്കായി എഐ ടൂളുകൾ ഉപയോഗിക്കുന്നുണ്ട്. ഇതിൽ 60% പേർ ഉൽപ്പന്നങ്ങളുടെ റേറ്റിംഗുകളും റിവ്യൂകളും പരിശോധിക്കാനും, 59% പേർ വില താരതമ്യം ചെയ്യാനും, 55% പേർ സമ്മാനങ്ങൾ തിരഞ്ഞെടുക്കാനുള്ള ആശയങ്ങൾക്കുമായാണ് പ്രധാനമായും എഐയെ ആശ്രയിക്കുന്നത്.

ഭൂരിഭാഗം ഉപഭോക്താക്കളും അതായത് 93% പേരും എഐ സാങ്കേതികവിദ്യ ഓൺലൈൻ ഷോപ്പിംഗ് കൂടുതൽ എളുപ്പമാക്കുന്നു എന്ന് സമ്മതിക്കുമ്പോഴും, എഐ വഴി നേരിട്ട് പണമിടപാടുകൾ നടത്താൻ 32% പേർക്ക് മാത്രമേ നിലവിൽ ധൈര്യമുള്ളൂ. അതേസമയം, തട്ടിപ്പുകൾ തിരിച്ചറിയാൻ എഐ സഹായിക്കുന്നുണ്ടെന്ന് 57% പേരും, ഭാവിയിലെ ഓൺലൈൻ തട്ടിപ്പുകളിൽ നിന്ന് സംരക്ഷണം നൽകാൻ എഐക്ക് കഴിയുമെന്ന് 85% പേരും ശക്തമായി വിശ്വസിക്കുന്നു.

യുഎഇയിൽ സോഷ്യൽ മീഡിയ വഴിയുള്ള വിപണനം (Social Commerce) അതിവേഗം വളരുകയാണ്. നിലവിൽ 69% ഉപഭോക്താക്കളും സോഷ്യൽ മീഡിയ പ്ലാറ്റ്‌ഫോമുകൾ വഴി നേരിട്ട് ഉൽപ്പന്നങ്ങൾ വാങ്ങുന്നുണ്ട്. എന്നാൽ, ഇതാണ് സൈബർ കുറ്റവാളികൾക്ക് ഏറ്റവും വലിയ അവസരമൊരുക്കുന്നത്. കഴിഞ്ഞ ഒരു വർഷത്തിനിടെ പഠനത്തിൽ പങ്കെടുത്ത 46% പേർക്ക് ഓൺലൈൻ സാമ്പത്തിക തട്ടിപ്പുകൾ നേരിടേണ്ടി വന്നിട്ടുണ്ട്. ഇതിൽ 38% തട്ടിപ്പുകളും സോഷ്യൽ മീഡിയ വഴിയാണ് നടന്നത്. വെബ്‌സൈറ്റുകൾ, ഓൺലൈൻ മാർക്കറ്റ് പ്ലേസുകൾ, ഷോപ്പിംഗ് ആപ്പുകൾ എന്നിവയേക്കാൾ കൂടുതൽ തട്ടിപ്പുകൾ നടക്കുന്നത് സോഷ്യൽ മീഡിയ പ്ലാറ്റ്‌ഫോമുകളിലാണെന്ന് റിപ്പോർട്ട് വ്യക്തമാക്കുന്നു.

കുട്ടികളുടെ ഡിജിറ്റൽ സുരക്ഷയിലും ഗുരുതരമായ ആശങ്കകൾ നിലനിൽക്കുന്നുണ്ട്. 80% രക്ഷിതാക്കളും തങ്ങളുടെ കുട്ടികൾക്ക് ഓൺലൈൻ തട്ടിപ്പുകൾ തിരിച്ചറിയാൻ അറിയില്ലെന്ന് സമ്മതിക്കുന്നു. 67% കുട്ടികൾ ഇതിനകം തന്നെ ഓൺലൈൻ ഗെയിമിംഗ് പ്ലാറ്റ്‌ഫോമുകളിലോ ഷോപ്പിംഗിലോ തട്ടിപ്പിന് ഇരയായിട്ടുമുണ്ട്. യുഎഇയിലെ 33% രക്ഷിതാക്കളും തങ്ങളുടെ മേൽനോട്ടമില്ലാതെ ഡിജിറ്റൽ വാലറ്റുകളും മൊബൈൽ പേയ്‌മെന്റ് ആപ്പുകളും ഉപയോഗിക്കാൻ കുട്ടികളെ അനുവദിക്കുന്നു എന്നതും ശ്രദ്ധേയമാണ്.

ഓൺലൈൻ തട്ടിപ്പുകളിൽ നിന്നുള്ള സംരക്ഷണത്തിന്റെ ഉത്തരവാദിത്തം ആർക്കാണെന്ന കാര്യത്തിൽ ഉപഭോക്താക്കൾക്കിടയിൽ വ്യത്യസ്തമായ അഭിപ്രായങ്ങളാണുള്ളത്. ഭൂരിഭാഗം പേരും സ്വന്തം ഉത്തരവാദിത്തമായി ഇതിനെ കാണുന്നില്ല. ബാങ്കുകൾക്കും ധനകാര്യ സ്ഥാപനങ്ങൾക്കും 36% ഉത്തരവാദിത്തം ഉണ്ടെന്ന് ഉപഭോക്താക്കൾ കരുതുന്നു. സമാനമായി ഗവൺമെന്റിനും നിയന്ത്രണ ഏജൻസികൾക്കും 36% ഉത്തരവാദിത്തവും, പേയ്‌മെന്റ് സേവന ദാതാക്കൾക്ക് 34% ഉത്തരവാദിത്തവും ഉണ്ടെന്നാണ് ഉപഭോക്താക്കളുടെ വിലയിരുത്തൽ. എന്നാൽ ഉപഭോക്താക്കൾക്ക് സ്വയം ഇതിൽ 19% ഉത്തരവാദിത്തം മാത്രമേയുള്ളൂ എന്നാണ് പഠനം പറയുന്നത്.

കൂടാതെ, സംശയാസ്പദമായ ഇടപാടുകൾ നടക്കുമ്പോൾ ബാങ്കുകളിൽ നിന്നോ പേയ്‌മെന്റ് ആപ്പുകളിൽ നിന്നോ ലഭിക്കുന്ന തത്സമയ അലേർട്ടുകളാണ് (Real-time alerts) തങ്ങൾക്ക് ഏറ്റവും കൂടുതൽ സുരക്ഷിതത്വം നൽകുന്നതെന്ന് 60% ഉപഭോക്താക്കൾ വ്യക്തമാക്കി.

ഓൺലൈൻ ഷോപ്പിംഗും സോഷ്യൽ മീഡിയ വിപണിയും അതിവേഗം വളരുമ്പോൾ, തട്ടിപ്പുകാരുടെ രീതികളും കൂടുതൽ അത്യാധുനികമാകുകയാണെന്ന് വിസ ജിസിസി റിസ്ക് മേധാവി ദിവ്യജ്യോതി സെൻ പറഞ്ഞു. സുരക്ഷയ്ക്കായി ഉപഭോക്താക്കൾ ബാങ്കുകളെയും പേയ്‌മെന്റ് ദാതാക്കളെയും വിശ്വസിക്കുന്നതിനാൽ, ഡിജിറ്റൽ ഇടപാടുകളുടെ സുരക്ഷയും വിശ്വാസ്യതയും വർദ്ധിപ്പിക്കുന്നതിനുള്ള ശക്തമായ സംവിധാനങ്ങൾ ഒരുക്കുന്നതിനാണ് വിസ മുൻഗണന നൽകുന്നതെന്നും അദ്ദേഹം കൂട്ടിച്ചേർത്തു.യുഎഇയിലെ വാർത്തകളും തൊഴിൽ അവസരങ്ങളും അതിവേഗം അറിയാൻ വാട്സ്ആപ്പ് ഗ്രൂപ്പിൽ അംഗമാവുക https://chat.whatsapp.com/Dbf59JLetgBECJpr5UZOuZ?mode=gi_t

‘സ്ഫോടന ശബ്ദ’മുണ്ടാക്കുന്ന വാഹനങ്ങൾക്കെതിരെ യുഎഇയിൽ കർശന നടപടി; പിഴയും 12 ബ്ലാക്ക് പോയിന്റും

ജനവാസ മേഖലകളിൽ അർദ്ധരാത്രിയിൽ സ്ഫോടനത്തിന് സമാനമായ ശബ്ദമുണ്ടാക്കി ജനങ്ങളിൽ പരിഭ്രാന്തി സൃഷ്ടിക്കുന്ന വിധത്തിൽ നിയമവിരുദ്ധമായി രൂപമാറ്റം വരുത്തിയ കാറുകളുടെയും മോട്ടോർ സൈക്കിളുകളുടെയും യുഎഇ പോലീസ് കർശന നടപടികൾ ആരംഭിച്ചു. മേഖലയിലെ സംഘർഷാവസ്ഥ വാർത്തകളിൽ നിറഞ്ഞുനിൽക്കുന്ന സാഹചര്യത്തിൽ ഇത്തരം വാഹനങ്ങളിൽ നിന്നുണ്ടാകുന്ന ‘ബാക്ക് ഫയർ’ ശബ്ദങ്ങൾ പലരും മിസൈൽ ആക്രമണമോ സ്ഫോടനമോ ആണെന്ന് തെറ്റിദ്ധരിച്ച് ഭീതിയിലായിരുന്നുവെന്ന് അധികൃതർ വ്യക്തമാക്കി. എഞ്ചിനുകളിൽ മാറ്റം വരുത്തി ഉദ്ദേശപൂർവ്വം ശക്തമായ ശബ്ദമുണ്ടാക്കുന്നത് പ്രധാനമായും കൗമാരക്കാരും യുവാക്കളുമാണെന്ന് അന്വേഷണത്തിൽ കണ്ടെത്തിയതായി പോലീസ് അറിയിച്ചു. റിപ്പോർട്ട് ചെയ്യപ്പെട്ട ശബ്ദങ്ങൾ വാഹനങ്ങളിൽ നിന്നുള്ളതാണെന്നും രാജ്യത്തിന്റെ സുരക്ഷയെ ബാധിക്കുന്ന യാതൊരു ഭീഷണിയും നിലവിലില്ലെന്നും അധികൃതർ ജനങ്ങളെ ആശ്വസിപ്പിച്ചു. യുഎഇ പൂർണ്ണമായും സുരക്ഷിതമാണെന്നും പോലീസ് വ്യക്തമാക്കി.

ദുബായ്, ഷാർജ തുടങ്ങിയ എമിറേറ്റുകളിലെ ജനവാസ പ്രദേശങ്ങളിൽ രാത്രികാല പോലീസ് പട്രോളിംഗ് ശക്തമാക്കിയിട്ടുണ്ട്. യുഎഇ ട്രാഫിക് നിയമപ്രകാരം അമിത ശബ്ദമുണ്ടാക്കുന്ന വാഹനങ്ങൾ ഓടിക്കുന്നവർക്ക് 2000 ദിർഹം പിഴയും 12 ബ്ലാക്ക് പോയിന്റുകളും ലഭിക്കും. കൂടാതെ വാഹനം പോലീസ് പിടിച്ചെടുക്കുകയും ചെയ്യും. അനധികൃതമായി രൂപമാറ്റം വരുത്തിയ വാഹനങ്ങൾ തിരികെ ലഭിക്കാൻ 10,000 ദിർഹം വരെ ഫീസ് നൽകേണ്ടിവരുമെന്നും അധികൃതർ അറിയിച്ചു. ഈ നടപടി കർശനമായി നടപ്പാക്കുന്നതിന് ദുബായ് പോലീസ് ഓപ്പറേഷൻസ് അസിസ്റ്റന്റ് കമാൻഡർ-ഇൻ-ചീഫ് മേജർ ജനറൽ സെയ്ഫ് മുഹൈർ അൽ മസ്‌റൂയിയും ഷാർജ പോലീസ് സെൻട്രൽ റീജിയൻ ഡയറക്ടർ ബ്രിഗേഡിയർ ഖലീഫ അൽ ഖസൂനിയും നേതൃത്വമൊരുക്കുന്നുണ്ട്. കുട്ടികൾ വാഹനങ്ങളിൽ അനധികൃത മാറ്റങ്ങൾ വരുത്തുന്നില്ലെന്ന് മാതാപിതാക്കൾ ശ്രദ്ധിക്കണമെന്നും അധികൃതർ അഭ്യർത്ഥിച്ചു. ഇത്തരം ശബ്ദശല്യം ഉണ്ടാക്കുന്ന വാഹനങ്ങളെക്കുറിച്ച് ഔദ്യോഗിക ചാനലുകൾ വഴി പോലീസിനെ അറിയിക്കണമെന്നും പൊതുജനങ്ങളോട് നിർദേശിച്ചിട്ടുണ്ട്. മേഖലയിലെ നിലവിലെ സാഹചര്യം പരിഗണിച്ച് ജനങ്ങളുടെ സമാധാനവും സുരക്ഷയും ഉറപ്പാക്കുക എന്ന ലക്ഷ്യത്തോടെയാണ് ഈ നടപടികൾ ശക്തമാക്കിയതെന്നും പോലീസ് അറിയിച്ചു. പോലീസിന്റെ ഈ ഇടപെടലിനെ പ്രവാസികളും സ്വദേശികളും സ്വാഗതം ചെയ്തിട്ടുണ്ട്.യുഎഇയിലെ വാർത്തകളും തൊഴിൽ അവസരങ്ങളും അതിവേഗം അറിയാൻ വാട്സ്ആപ്പ് ഗ്രൂപ്പിൽ അംഗമാവുhttps://chat.whatsapp.com/Dbf59JLetgBECJpr5UZOuZ?mode=gi_t