എബോള വൈറസിനെക്കുറിച്ചുള്ള തെറ്റായ പ്രചാരണങ്ങൾക്കും അഭ്യൂഹങ്ങൾക്കും എതിരെ മുന്നറിയിപ്പുമായി യുഎഇ ആരോഗ്യ-പ്രതിരോധ മന്ത്രാലയം (MoHAP). ആഫ്രിക്കയിലെ ചില രാജ്യങ്ങളിൽ എബോള കേസുകൾ റിപ്പോർട്ട് ചെയ്യപ്പെടുന്ന സാഹചര്യത്തിൽ പൊതുജനങ്ങൾ ഔദ്യോഗിക സ്രോതസ്സുകളിൽ നിന്നുള്ള വിവരങ്ങൾ മാത്രം വിശ്വസിക്കണമെന്നും വ്യാജ വാർത്തകൾ പ്രചരിപ്പിക്കുന്നത് ഒഴിവാക്കണമെന്നും മന്ത്രാലയം ആവശ്യപ്പെട്ടു.

എബോളയെക്കുറിച്ച് സമൂഹത്തിൽ വ്യാപകമായി പ്രചരിക്കുന്ന അഞ്ച് പ്രധാന തെറ്റിദ്ധാരണകളാണ് മന്ത്രാലയം വിശദീകരിച്ചത്.

1. എബോള വായുവിലൂടെ പകരുമോ?
   കോവിഡ്-19 പോലെ എബോള വായുവിലൂടെ പകരുമെന്ന ധാരണ തെറ്റാണ്. രോഗബാധിതന്റെ രക്തം, ഉമിനീർ, ഛർദ്ദി തുടങ്ങിയ ശരീരസ്രവങ്ങളുമായോ മലിനമായ വസ്തുക്കളുമായോ നേരിട്ടുള്ള സമ്പർക്കത്തിലൂടെയാണ് വൈറസ് പകരുന്നത്.
2. വിദേശയാത്ര ചെയ്യുന്ന എല്ലാവർക്കും അപകടസാധ്യത കൂടുതലാണോ?
   സാധാരണ അന്താരാഷ്ട്ര യാത്രക്കാരിൽ രോഗബാധയുടെ സാധ്യത വളരെ കുറവാണ്. രോഗബാധിതരുമായി നേരിട്ടുള്ള സമ്പർക്കം പുലർത്തുന്നവർക്കാണ് പ്രധാന അപകടസാധ്യത.
3. ലക്ഷണങ്ങൾ പ്രകടമാകുന്നതിന് മുമ്പ് രോഗം പകരുമോ?
   രോഗലക്ഷണങ്ങൾ തുടങ്ങുന്നതിന് മുമ്പ് രോഗബാധിതർ സാധാരണയായി മറ്റുള്ളവരിലേക്ക് വൈറസ് പകരാറില്ലെന്ന് ആരോഗ്യവിദഗ്ധർ വ്യക്തമാക്കുന്നു.
4. എബോള ആഗോള മഹാമാരിയായി മാറിയിട്ടുണ്ടോ?
   ഇതുവരെ ഉണ്ടായ ഒരു എബോള വ്യാപനവും ആഗോള മഹാമാരിയായി (Pandemic) പ്രഖ്യാപിച്ചിട്ടില്ല. നിലവിലെ ആഗോള ആരോഗ്യ വിലയിരുത്തലുകളും പൊതുജനാരോഗ്യത്തിന് ആഗോളതലത്തിൽ കുറഞ്ഞ അപകടസാധ്യത മാത്രമാണ് ചൂണ്ടിക്കാണിക്കുന്നത്.
5. യുഎഇയിൽ മുൻകരുതൽ സംവിധാനങ്ങൾ ഇല്ലേയെന്ന്?
   ഈ ധാരണയും തെറ്റാണെന്ന് മന്ത്രാലയം വ്യക്തമാക്കി. വിമാനത്താവളങ്ങളിലെ നിരീക്ഷണ സംവിധാനങ്ങൾ, ആരോഗ്യ സ്ഥാപനങ്ങളിലെ സജ്ജീകരണങ്ങൾ, രോഗനിരീക്ഷണ ശൃംഖലകൾ എന്നിവ ഉൾപ്പെടെ എല്ലാ മുൻകരുതൽ സംവിധാനങ്ങളും രാജ്യത്ത് സജീവമാണെന്ന് അധികൃതർ അറിയിച്ചു.

പൊതുജനാരോഗ്യവുമായി ബന്ധപ്പെട്ട വിഷയങ്ങളിൽ സോഷ്യൽ മീഡിയയിലെ അഭ്യൂഹങ്ങൾ വിശ്വസിക്കരുതെന്നും, ആരോഗ്യ മന്ത്രാലയം, ദേശീയ ദുരന്തനിവാരണ അതോറിറ്റി തുടങ്ങിയ ഔദ്യോഗിക ഏജൻസികളുടെ അറിയിപ്പുകൾ മാത്രം പിന്തുടരണമെന്നും മന്ത്രാലയം ആവർത്തിച്ചു.യുഎഇയിലെ വാർത്തകളും തൊഴിൽ അവസരങ്ങളും അതിവേഗം അറിയാൻ വാട്സ്ആപ്പ് ഗ്രൂപ്പിൽ അംഗമാവുക https://chat.whatsapp.com/Dbf59JLetgBECJpr5UZOuZ?mode=gi_t

‘സ്ഫോടന ശബ്ദ’മുണ്ടാക്കുന്ന വാഹനങ്ങൾക്കെതിരെ യുഎഇയിൽ കർശന നടപടി; പിഴയും 12 ബ്ലാക്ക് പോയിന്റും

ജനവാസ മേഖലകളിൽ അർദ്ധരാത്രിയിൽ സ്ഫോടനത്തിന് സമാനമായ ശബ്ദമുണ്ടാക്കി ജനങ്ങളിൽ പരിഭ്രാന്തി സൃഷ്ടിക്കുന്ന വിധത്തിൽ നിയമവിരുദ്ധമായി രൂപമാറ്റം വരുത്തിയ കാറുകളുടെയും മോട്ടോർ സൈക്കിളുകളുടെയും യുഎഇ പോലീസ് കർശന നടപടികൾ ആരംഭിച്ചു. മേഖലയിലെ സംഘർഷാവസ്ഥ വാർത്തകളിൽ നിറഞ്ഞുനിൽക്കുന്ന സാഹചര്യത്തിൽ ഇത്തരം വാഹനങ്ങളിൽ നിന്നുണ്ടാകുന്ന ‘ബാക്ക് ഫയർ’ ശബ്ദങ്ങൾ പലരും മിസൈൽ ആക്രമണമോ സ്ഫോടനമോ ആണെന്ന് തെറ്റിദ്ധരിച്ച് ഭീതിയിലായിരുന്നുവെന്ന് അധികൃതർ വ്യക്തമാക്കി. എഞ്ചിനുകളിൽ മാറ്റം വരുത്തി ഉദ്ദേശപൂർവ്വം ശക്തമായ ശബ്ദമുണ്ടാക്കുന്നത് പ്രധാനമായും കൗമാരക്കാരും യുവാക്കളുമാണെന്ന് അന്വേഷണത്തിൽ കണ്ടെത്തിയതായി പോലീസ് അറിയിച്ചു. റിപ്പോർട്ട് ചെയ്യപ്പെട്ട ശബ്ദങ്ങൾ വാഹനങ്ങളിൽ നിന്നുള്ളതാണെന്നും രാജ്യത്തിന്റെ സുരക്ഷയെ ബാധിക്കുന്ന യാതൊരു ഭീഷണിയും നിലവിലില്ലെന്നും അധികൃതർ ജനങ്ങളെ ആശ്വസിപ്പിച്ചു. യുഎഇ പൂർണ്ണമായും സുരക്ഷിതമാണെന്നും പോലീസ് വ്യക്തമാക്കി.

ദുബായ്, ഷാർജ തുടങ്ങിയ എമിറേറ്റുകളിലെ ജനവാസ പ്രദേശങ്ങളിൽ രാത്രികാല പോലീസ് പട്രോളിംഗ് ശക്തമാക്കിയിട്ടുണ്ട്. യുഎഇ ട്രാഫിക് നിയമപ്രകാരം അമിത ശബ്ദമുണ്ടാക്കുന്ന വാഹനങ്ങൾ ഓടിക്കുന്നവർക്ക് 2000 ദിർഹം പിഴയും 12 ബ്ലാക്ക് പോയിന്റുകളും ലഭിക്കും. കൂടാതെ വാഹനം പോലീസ് പിടിച്ചെടുക്കുകയും ചെയ്യും. അനധികൃതമായി രൂപമാറ്റം വരുത്തിയ വാഹനങ്ങൾ തിരികെ ലഭിക്കാൻ 10,000 ദിർഹം വരെ ഫീസ് നൽകേണ്ടിവരുമെന്നും അധികൃതർ അറിയിച്ചു. ഈ നടപടി കർശനമായി നടപ്പാക്കുന്നതിന് ദുബായ് പോലീസ് ഓപ്പറേഷൻസ് അസിസ്റ്റന്റ് കമാൻഡർ-ഇൻ-ചീഫ് മേജർ ജനറൽ സെയ്ഫ് മുഹൈർ അൽ മസ്‌റൂയിയും ഷാർജ പോലീസ് സെൻട്രൽ റീജിയൻ ഡയറക്ടർ ബ്രിഗേഡിയർ ഖലീഫ അൽ ഖസൂനിയും നേതൃത്വമൊരുക്കുന്നുണ്ട്. കുട്ടികൾ വാഹനങ്ങളിൽ അനധികൃത മാറ്റങ്ങൾ വരുത്തുന്നില്ലെന്ന് മാതാപിതാക്കൾ ശ്രദ്ധിക്കണമെന്നും അധികൃതർ അഭ്യർത്ഥിച്ചു. ഇത്തരം ശബ്ദശല്യം ഉണ്ടാക്കുന്ന വാഹനങ്ങളെക്കുറിച്ച് ഔദ്യോഗിക ചാനലുകൾ വഴി പോലീസിനെ അറിയിക്കണമെന്നും പൊതുജനങ്ങളോട് നിർദേശിച്ചിട്ടുണ്ട്. മേഖലയിലെ നിലവിലെ സാഹചര്യം പരിഗണിച്ച് ജനങ്ങളുടെ സമാധാനവും സുരക്ഷയും ഉറപ്പാക്കുക എന്ന ലക്ഷ്യത്തോടെയാണ് ഈ നടപടികൾ ശക്തമാക്കിയതെന്നും പോലീസ് അറിയിച്ചു. പോലീസിന്റെ ഈ ഇടപെടലിനെ പ്രവാസികളും സ്വദേശികളും സ്വാഗതം ചെയ്തിട്ടുണ്ട്.യുഎഇയിലെ വാർത്തകളും തൊഴിൽ അവസരങ്ങളും അതിവേഗം അറിയാൻ വാട്സ്ആപ്പ് ഗ്രൂപ്പിൽ അംഗമാവുhttps://chat.whatsapp.com/Dbf59JLetgBECJpr5UZOuZ?mode=gi_t