സൗഹൃദത്തിന്റെ പുറത്ത് വാഹനം കൈമാറിയ ഉടമയെ കബളിപ്പിച്ച് ട്രാഫിക് പിഴകളും സാലിക് ചാർജുകളും വരുത്തിക്കൂട്ടിയ യുവാവിന് ദുബായ് സിവിൽ കോടതി 7,500 ദിർഹം പിഴ ശിക്ഷ വിധിച്ചു. വാഹനം വാങ്ങാമെന്ന വാക്കാലുള്ള കരാറിന്മേലാണ് ഉടമ പ്രതിക്ക് കാർ കൈമാറിയത്. നിലവിലുള്ള പിഴകൾ അടച്ചുതീർക്കാമെന്നും തകർന്നുപോയ മറ്റൊരു വാഹനത്തിന്റെ അവശിഷ്ടങ്ങൾ പകരമായി നൽകാമെന്നുമായിരുന്നു ധാരണ. എന്നാൽ വാഹനം കൈക്കലാക്കിയ പ്രതി ഉടമസ്ഥാവകാശം മാറ്റാൻ സഹകരിക്കാതെ കാർ ഉപയോഗിക്കുന്നത് തുടരുകയായിരുന്നു.

പ്രതി വാഹനം ഉപയോഗിച്ച കാലയളവിൽ സാലിക് ചാർജും ട്രാഫിക് പിഴകളുമായി ആകെ 16,050 ദിർഹമാണ് വരുത്തിക്കൂട്ടിയത്. ഇതിനുപുറമെ ഉടമയുടെ പേരിൽ 35 ബ്ലാക്ക് പോയിന്റുകളും രേഖപ്പെടുത്തപ്പെട്ടു. വാഹനം അപകടത്തിൽപ്പെട്ടതിനെത്തുടർന്ന് വിപണി മൂല്യം ഇടിഞ്ഞതിന് 15,000 ദിർഹം കൂടി നഷ്ടപരിഹാരം വേണമെന്ന് ഉടമ വാട്ട്‌സ്ആപ്പ് സന്ദേശങ്ങൾ തെളിവായി ഹാജരാക്കി ആവശ്യപ്പെട്ടിരുന്നു. മറ്റൊരാൾക്ക് ഉപദ്രവമുണ്ടാക്കുന്ന തരത്തിൽ പ്രവർത്തിക്കുന്നവർ നഷ്ടപരിഹാരം നൽകാൻ ബാധ്യസ്ഥരാണെന്ന് വ്യക്തമാക്കിയ കോടതി, പ്രതി വരുത്തിക്കൂട്ടിയ പിഴകളിൽ 7,500 ദിർഹം ഉടമയ്ക്ക് നൽകാൻ ഉത്തരവിടുകയായിരുന്നു.

അതേസമയം വാഹനത്തിന്റെ മൂല്യം കുറഞ്ഞതുമായി ബന്ധപ്പെട്ട നഷ്ടപരിഹാരത്തിന് മതിയായ തെളിവില്ലാത്തതിനാൽ കോടതി ആ ആവശ്യം തള്ളി. കൂടാതെ ട്രാഫിക് പിഴകളും ബ്ലാക്ക് പോയിന്റുകളും ഉടമയുടെ പേരിൽ നിന്ന് മാറ്റണമെന്ന ആവശ്യവും കോടതി അംഗീകരിച്ചില്ല. ഔദ്യോഗിക രേഖകളിൽ ഉടമയായി തുടരുന്ന വ്യക്തിയുടെ പേരിൽത്തന്നെയാകും നിയമലംഘനങ്ങൾ രേഖപ്പെടുത്തുകയെന്നും അത് മുൻകാല പ്രാബല്യത്തോടെ മാറ്റാൻ കഴിയില്ലെന്നും കോടതി വിശദീകരിച്ചു. കോടതിയിൽ ഹാജരാകാത്ത പ്രതിക്കെതിരെ അദ്ദേഹത്തിന്റെ അഭാവത്തിലാണ് വിധി പുറപ്പെടുവിച്ചത്. കേസ് സംബന്ധമായ കോടതി ഫീസും മറ്റ് അനുബന്ധ ചെലവുകളും പ്രതി തന്നെ വഹിക്കണമെന്നും വിധിയിൽ പറയുന്നു.യുഎഇയിലെ വാർത്തകളും തൊഴിൽ അവസരങ്ങളും അതിവേഗം അറിയാൻ വാട്സ്ആപ്പ് ഗ്രൂപ്പിൽ അംഗമാവുക https://chat.whatsapp.com/Dbf59JLetgBECJpr5UZOuZ?mode=gi_t

‘സ്ഫോടന ശബ്ദ’മുണ്ടാക്കുന്ന വാഹനങ്ങൾക്കെതിരെ യുഎഇയിൽ കർശന നടപടി; പിഴയും 12 ബ്ലാക്ക് പോയിന്റും

ജനവാസ മേഖലകളിൽ അർദ്ധരാത്രിയിൽ സ്ഫോടനത്തിന് സമാനമായ ശബ്ദമുണ്ടാക്കി ജനങ്ങളിൽ പരിഭ്രാന്തി സൃഷ്ടിക്കുന്ന വിധത്തിൽ നിയമവിരുദ്ധമായി രൂപമാറ്റം വരുത്തിയ കാറുകളുടെയും മോട്ടോർ സൈക്കിളുകളുടെയും യുഎഇ പോലീസ് കർശന നടപടികൾ ആരംഭിച്ചു. മേഖലയിലെ സംഘർഷാവസ്ഥ വാർത്തകളിൽ നിറഞ്ഞുനിൽക്കുന്ന സാഹചര്യത്തിൽ ഇത്തരം വാഹനങ്ങളിൽ നിന്നുണ്ടാകുന്ന ‘ബാക്ക് ഫയർ’ ശബ്ദങ്ങൾ പലരും മിസൈൽ ആക്രമണമോ സ്ഫോടനമോ ആണെന്ന് തെറ്റിദ്ധരിച്ച് ഭീതിയിലായിരുന്നുവെന്ന് അധികൃതർ വ്യക്തമാക്കി. എഞ്ചിനുകളിൽ മാറ്റം വരുത്തി ഉദ്ദേശപൂർവ്വം ശക്തമായ ശബ്ദമുണ്ടാക്കുന്നത് പ്രധാനമായും കൗമാരക്കാരും യുവാക്കളുമാണെന്ന് അന്വേഷണത്തിൽ കണ്ടെത്തിയതായി പോലീസ് അറിയിച്ചു. റിപ്പോർട്ട് ചെയ്യപ്പെട്ട ശബ്ദങ്ങൾ വാഹനങ്ങളിൽ നിന്നുള്ളതാണെന്നും രാജ്യത്തിന്റെ സുരക്ഷയെ ബാധിക്കുന്ന യാതൊരു ഭീഷണിയും നിലവിലില്ലെന്നും അധികൃതർ ജനങ്ങളെ ആശ്വസിപ്പിച്ചു. യുഎഇ പൂർണ്ണമായും സുരക്ഷിതമാണെന്നും പോലീസ് വ്യക്തമാക്കി.

ദുബായ്, ഷാർജ തുടങ്ങിയ എമിറേറ്റുകളിലെ ജനവാസ പ്രദേശങ്ങളിൽ രാത്രികാല പോലീസ് പട്രോളിംഗ് ശക്തമാക്കിയിട്ടുണ്ട്. യുഎഇ ട്രാഫിക് നിയമപ്രകാരം അമിത ശബ്ദമുണ്ടാക്കുന്ന വാഹനങ്ങൾ ഓടിക്കുന്നവർക്ക് 2000 ദിർഹം പിഴയും 12 ബ്ലാക്ക് പോയിന്റുകളും ലഭിക്കും. കൂടാതെ വാഹനം പോലീസ് പിടിച്ചെടുക്കുകയും ചെയ്യും. അനധികൃതമായി രൂപമാറ്റം വരുത്തിയ വാഹനങ്ങൾ തിരികെ ലഭിക്കാൻ 10,000 ദിർഹം വരെ ഫീസ് നൽകേണ്ടിവരുമെന്നും അധികൃതർ അറിയിച്ചു. ഈ നടപടി കർശനമായി നടപ്പാക്കുന്നതിന് ദുബായ് പോലീസ് ഓപ്പറേഷൻസ് അസിസ്റ്റന്റ് കമാൻഡർ-ഇൻ-ചീഫ് മേജർ ജനറൽ സെയ്ഫ് മുഹൈർ അൽ മസ്‌റൂയിയും ഷാർജ പോലീസ് സെൻട്രൽ റീജിയൻ ഡയറക്ടർ ബ്രിഗേഡിയർ ഖലീഫ അൽ ഖസൂനിയും നേതൃത്വമൊരുക്കുന്നുണ്ട്. കുട്ടികൾ വാഹനങ്ങളിൽ അനധികൃത മാറ്റങ്ങൾ വരുത്തുന്നില്ലെന്ന് മാതാപിതാക്കൾ ശ്രദ്ധിക്കണമെന്നും അധികൃതർ അഭ്യർത്ഥിച്ചു. ഇത്തരം ശബ്ദശല്യം ഉണ്ടാക്കുന്ന വാഹനങ്ങളെക്കുറിച്ച് ഔദ്യോഗിക ചാനലുകൾ വഴി പോലീസിനെ അറിയിക്കണമെന്നും പൊതുജനങ്ങളോട് നിർദേശിച്ചിട്ടുണ്ട്. മേഖലയിലെ നിലവിലെ സാഹചര്യം പരിഗണിച്ച് ജനങ്ങളുടെ സമാധാനവും സുരക്ഷയും ഉറപ്പാക്കുക എന്ന ലക്ഷ്യത്തോടെയാണ് ഈ നടപടികൾ ശക്തമാക്കിയതെന്നും പോലീസ് അറിയിച്ചു. പോലീസിന്റെ ഈ ഇടപെടലിനെ പ്രവാസികളും സ്വദേശികളും സ്വാഗതം ചെയ്തിട്ടുണ്ട്.യുഎഇയിലെ വാർത്തകളും തൊഴിൽ അവസരങ്ങളും അതിവേഗം അറിയാൻ വാട്സ്ആപ്പ് ഗ്രൂപ്പിൽ അംഗമാവുhttps://chat.whatsapp.com/Dbf59JLetgBECJpr5UZOuZ?mode=gi_t