മേഖലയിലെ പുതിയ സംഭവവികാസങ്ങളുടെ പശ്ചാത്തലത്തിൽ യുഎഇയിലെ താമസക്കാർക്കും സന്ദർശകർക്കും കഴിഞ്ഞ ദിവസം വീണ്ടും എമർജൻസി അലേർട്ടുകൾ ലഭിച്ചു. ഏപ്രിൽ എട്ടിലെ വെടിനിർത്തലിന് ശേഷം ഉണ്ടായ ചില മാറ്റങ്ങളെത്തുടർന്ന് മുൻകരുതൽ നടപടിയായാണ് അധികൃതർ ഈ സന്ദേശങ്ങൾ കൈമാറിയത്. ഇത്തരം സാഹചര്യങ്ങളിൽ പൊതുജനങ്ങൾ പാലിക്കേണ്ട സുരക്ഷാ മാർഗനിർദ്ദേശങ്ങൾ ദുബായ് മീഡിയ ഓഫീസ് വിശദമായി പുറത്തിറക്കിയിട്ടുണ്ട്. ജനങ്ങൾക്കിടയിലെ ആശയക്കുഴപ്പം ഒഴിവാക്കി കൃത്യമായ രീതിയിൽ പ്രതികരിക്കാൻ സഹായിക്കുന്നതിനാണ് ഈ നിർദ്ദേശങ്ങൾ.
അലേർട്ട് ലഭിക്കുമ്പോൾ നിങ്ങൾ വീടിനുള്ളിലോ ഓഫീസിനുള്ളിലോ ആണെങ്കിൽ ജനലുകൾ, ബാൽക്കണികൾ, പുറം ഭിത്തികൾ എന്നിവയിൽ നിന്ന് അകന്നുനിൽക്കാൻ പ്രത്യേകം ശ്രദ്ധിക്കണം. കെട്ടിടത്തിന്റെ ഉൾഭാഗത്തുള്ള കൂടുതൽ സുരക്ഷിതമായ മുറികളിലേക്ക് മാറുന്നതാണ് ഉചിതം. ലിഫ്റ്റുകൾ ഉപയോഗിക്കുന്നത് ഒഴിവാക്കി ഗോവണികൾ ഉപയോഗിക്കണം. കൂടാതെ ഗ്ലാസ് നിർമ്മിതികൾക്ക് സമീപം നിൽക്കുന്നത് അപകടസാധ്യത വർദ്ധിപ്പിക്കും.
നിങ്ങൾ പുറത്തോ വാഹനത്തിലോ ആണെങ്കിൽ ഏറ്റവും അടുത്തുള്ള സുരക്ഷിതമായ കെട്ടിടത്തിനുള്ളിലേക്ക് ഉടൻ പ്രവേശിക്കണം. വാഹനമോടിക്കുന്നവർ സുരക്ഷിതമായ ഒരിടത്ത് വാഹനം പാർക്ക് ചെയ്ത ശേഷം പുറത്തിറങ്ങി സുരക്ഷിത കേന്ദ്രത്തിലേക്ക് മാറേണ്ടതുണ്ട്. തുറസ്സായ സ്ഥലങ്ങളും കെട്ടിടങ്ങളുടെ പുറംഭാഗത്തെ ഭിത്തികളും ഒഴിവാക്കാൻ അധികൃതർ നിർദ്ദേശിക്കുന്നു.
ആഭ്യന്തര മന്ത്രാലയം ഔദ്യോഗികമായി ‘ഓൾ ക്ലിയർ’ സന്ദേശം നൽകുന്നത് വരെ സുരക്ഷിത സ്ഥാനത്ത് തന്നെ തുടരണം. അതിനുശേഷം മാത്രമേ സാധാരണ പ്രവർത്തനങ്ങൾ പുനരാരംഭിക്കാവൂ. ഔദ്യോഗിക ചാനലുകൾ വഴി വരുന്ന വിവരങ്ങൾ മാത്രം വിശ്വസിക്കണമെന്നും തെറ്റായ സന്ദേശങ്ങളോ വീഡിയോകളോ പ്രചരിപ്പിക്കരുതെന്നും ദുബായ് മീഡിയ ഓഫീസ് അഭ്യർത്ഥിച്ചു. നിലവിൽ ദുബായ് സുരക്ഷിതമാണെന്നും ഈ അലേർട്ടുകൾ മുൻകരുതൽ നടപടി മാത്രമാണെന്നും അധികൃതർ ആവർത്തിച്ചു വ്യക്തമാക്കിയിട്ടുണ്ട്. മലയാളം ഉൾപ്പെടെ ഏഴു ഭാഷകളിൽ ഈ മാർഗനിർദ്ദേശങ്ങൾ ലഭ്യമാണ്. യുഎഇയിലെ വാർത്തകളും തൊഴിൽ അവസരങ്ങളും അതിവേഗം അറിയാൻ വാട്സ്ആപ്പ് ഗ്രൂപ്പിൽ അംഗമാവുക https://chat.whatsapp.com/Dbf59JLetgBECJpr5UZOuZ?mode=gi_t
‘സ്ഫോടന ശബ്ദ’മുണ്ടാക്കുന്ന വാഹനങ്ങൾക്കെതിരെ യുഎഇയിൽ കർശന നടപടി; പിഴയും 12 ബ്ലാക്ക് പോയിന്റും
ജനവാസ മേഖലകളിൽ അർദ്ധരാത്രിയിൽ സ്ഫോടനത്തിന് സമാനമായ ശബ്ദമുണ്ടാക്കി ജനങ്ങളിൽ പരിഭ്രാന്തി സൃഷ്ടിക്കുന്ന വിധത്തിൽ നിയമവിരുദ്ധമായി രൂപമാറ്റം വരുത്തിയ കാറുകളുടെയും മോട്ടോർ സൈക്കിളുകളുടെയും യുഎഇ പോലീസ് കർശന നടപടികൾ ആരംഭിച്ചു. മേഖലയിലെ സംഘർഷാവസ്ഥ വാർത്തകളിൽ നിറഞ്ഞുനിൽക്കുന്ന സാഹചര്യത്തിൽ ഇത്തരം വാഹനങ്ങളിൽ നിന്നുണ്ടാകുന്ന ‘ബാക്ക് ഫയർ’ ശബ്ദങ്ങൾ പലരും മിസൈൽ ആക്രമണമോ സ്ഫോടനമോ ആണെന്ന് തെറ്റിദ്ധരിച്ച് ഭീതിയിലായിരുന്നുവെന്ന് അധികൃതർ വ്യക്തമാക്കി. എഞ്ചിനുകളിൽ മാറ്റം വരുത്തി ഉദ്ദേശപൂർവ്വം ശക്തമായ ശബ്ദമുണ്ടാക്കുന്നത് പ്രധാനമായും കൗമാരക്കാരും യുവാക്കളുമാണെന്ന് അന്വേഷണത്തിൽ കണ്ടെത്തിയതായി പോലീസ് അറിയിച്ചു. റിപ്പോർട്ട് ചെയ്യപ്പെട്ട ശബ്ദങ്ങൾ വാഹനങ്ങളിൽ നിന്നുള്ളതാണെന്നും രാജ്യത്തിന്റെ സുരക്ഷയെ ബാധിക്കുന്ന യാതൊരു ഭീഷണിയും നിലവിലില്ലെന്നും അധികൃതർ ജനങ്ങളെ ആശ്വസിപ്പിച്ചു. യുഎഇ പൂർണ്ണമായും സുരക്ഷിതമാണെന്നും പോലീസ് വ്യക്തമാക്കി.
ദുബായ്, ഷാർജ തുടങ്ങിയ എമിറേറ്റുകളിലെ ജനവാസ പ്രദേശങ്ങളിൽ രാത്രികാല പോലീസ് പട്രോളിംഗ് ശക്തമാക്കിയിട്ടുണ്ട്. യുഎഇ ട്രാഫിക് നിയമപ്രകാരം അമിത ശബ്ദമുണ്ടാക്കുന്ന വാഹനങ്ങൾ ഓടിക്കുന്നവർക്ക് 2000 ദിർഹം പിഴയും 12 ബ്ലാക്ക് പോയിന്റുകളും ലഭിക്കും. കൂടാതെ വാഹനം പോലീസ് പിടിച്ചെടുക്കുകയും ചെയ്യും. അനധികൃതമായി രൂപമാറ്റം വരുത്തിയ വാഹനങ്ങൾ തിരികെ ലഭിക്കാൻ 10,000 ദിർഹം വരെ ഫീസ് നൽകേണ്ടിവരുമെന്നും അധികൃതർ അറിയിച്ചു. ഈ നടപടി കർശനമായി നടപ്പാക്കുന്നതിന് ദുബായ് പോലീസ് ഓപ്പറേഷൻസ് അസിസ്റ്റന്റ് കമാൻഡർ-ഇൻ-ചീഫ് മേജർ ജനറൽ സെയ്ഫ് മുഹൈർ അൽ മസ്റൂയിയും ഷാർജ പോലീസ് സെൻട്രൽ റീജിയൻ ഡയറക്ടർ ബ്രിഗേഡിയർ ഖലീഫ അൽ ഖസൂനിയും നേതൃത്വമൊരുക്കുന്നുണ്ട്. കുട്ടികൾ വാഹനങ്ങളിൽ അനധികൃത മാറ്റങ്ങൾ വരുത്തുന്നില്ലെന്ന് മാതാപിതാക്കൾ ശ്രദ്ധിക്കണമെന്നും അധികൃതർ അഭ്യർത്ഥിച്ചു. ഇത്തരം ശബ്ദശല്യം ഉണ്ടാക്കുന്ന വാഹനങ്ങളെക്കുറിച്ച് ഔദ്യോഗിക ചാനലുകൾ വഴി പോലീസിനെ അറിയിക്കണമെന്നും പൊതുജനങ്ങളോട് നിർദേശിച്ചിട്ടുണ്ട്. മേഖലയിലെ നിലവിലെ സാഹചര്യം പരിഗണിച്ച് ജനങ്ങളുടെ സമാധാനവും സുരക്ഷയും ഉറപ്പാക്കുക എന്ന ലക്ഷ്യത്തോടെയാണ് ഈ നടപടികൾ ശക്തമാക്കിയതെന്നും പോലീസ് അറിയിച്ചു. പോലീസിന്റെ ഈ ഇടപെടലിനെ പ്രവാസികളും സ്വദേശികളും സ്വാഗതം ചെയ്തിട്ടുണ്ട്.യുഎഇയിലെ വാർത്തകളും തൊഴിൽ അവസരങ്ങളും അതിവേഗം അറിയാൻ വാട്സ്ആപ്പ് ഗ്രൂപ്പിൽ അംഗമാവുhttps://chat.whatsapp.com/Dbf59JLetgBECJpr5UZOuZ?mode=gi_t
