യുഎഇയിലെ വ്യോമഗതാഗതം സാധാരണ നിലയിലായതായി സിവിൽ ഏവിയേഷൻ അതോറിറ്റി അറിയിച്ചതിന് പിന്നാലെ ദുബായ് ഇന്റർനാഷണൽ എയർപോർട്ട് ഉൾപ്പെടെയുള്ള ദുബായ് വിമാനത്താവളങ്ങൾ പ്രവർത്തനം കൂടുതൽ വ്യാപിപ്പിക്കുന്നു. സർവീസുകൾ പൂർണതോതിൽ പുനഃസ്ഥാപിക്കാൻ രണ്ടാംഘട്ട നടപടികൾ ആരംഭിച്ചതായി ദുബായ് എയർപോർട്ട്സ് അറിയിച്ചു.
മേഖലയിലെ സംഘർഷാവസ്ഥയെ തുടർന്ന് ഏർപ്പെടുത്തിയിരുന്ന നിയന്ത്രണങ്ങൾ ഒഴിവാക്കിയതോടെയാണ് വിമാന ഗതാഗതം സാധാരണയിലേക്കു മടങ്ങുന്നത്. ഇതോടെ എയർലൈനുകൾക്ക് പഴയ ഷെഡ്യൂളുകൾ തിരിച്ചുകൊണ്ടുവരാനും സർവീസുകൾ വർധിപ്പിക്കാനും സൗകര്യമൊരുങ്ങി. സമീപ രാജ്യങ്ങളിലെ വ്യോമപാതകളുടെ ലഭ്യതയും പരിഗണിച്ച് വിമാനങ്ങളുടെ പോക്കുവരവ് സുഗമമാക്കാൻ ഏകോപിത നീക്കങ്ങൾ തുടരുമെന്നും അധികൃതർ വ്യക്തമാക്കി. പ്രതിസന്ധി നിലനിന്ന കാലയളവിലും ആഗോള കണക്റ്റിവിറ്റി നിലനിർത്താൻ ദുബായ് വിമാനത്താവളം ശ്രമിച്ചതായി അധികൃതർ ചൂണ്ടിക്കാട്ടി. ഫെബ്രുവരി 28 മുതൽ ഏപ്രിൽ 30 വരെയുള്ള കാലയളവിൽ ഏകദേശം 60 ലക്ഷം യാത്രക്കാരും 32,000-ത്തിലധികം വിമാനങ്ങളും വിമാനത്താവളം കൈകാര്യം ചെയ്തു. കൂടാതെ 2.13 ലക്ഷം ടൺ ചരക്കുകളും കൈമാറിയിട്ടുണ്ട്. അതേസമയം 2026-ലെ ആദ്യ പാദ കണക്കുകൾ പ്രകാരം, മൊത്തം യാത്രക്കാരുടെ എണ്ണം 1.86 കോടിയായി, കഴിഞ്ഞ വർഷത്തെ അപേക്ഷിച്ച് 20.6 ശതമാനം ഇടിവാണ് രേഖപ്പെടുത്തിയിരിക്കുന്നത്. മാർച്ചിൽ മാത്രം 65.7 ശതമാനം കുറവോടെ 25 ലക്ഷം യാത്രക്കാരാണ് ഉണ്ടായത്. കാർഗോ കൈകാര്യം ചെയ്യുന്നതിൽ 22.7 ശതമാനം കുറവ് രേഖപ്പെടുത്തി 3,99,600 ടൺ മാത്രമാണ് കൈകാര്യം ചെയ്തത്. വിമാന സർവീസുകളുടെ എണ്ണം 20.8 ശതമാനം കുറഞ്ഞു.

ബാഗേജ് കൈകാര്യം ചെയ്യലിലും ചെറിയ വർധനവാണ് പ്രശ്നങ്ങളിലുണ്ടായത്. മൊത്തം 1.76 കോടി ബാഗുകൾ പ്രോസസ്സ് ചെയ്തതിൽ, നഷ്ടപ്പെടുകയോ മാറിപ്പോകുകയോ ചെയ്ത ബാഗുകളുടെ നിരക്ക് 1,000 യാത്രക്കാരിൽ 3.5 ആയി ഉയർന്നു. കഴിഞ്ഞ വർഷം ഇത് 1.95 ആയിരുന്നു. യുഎസ്–ഇസ്രായേൽ–ഇറാൻ സംഘർഷത്തിന്റെ ആഘാതം കണക്കുകളിൽ പ്രകടമാണെങ്കിലും, നിയന്ത്രണങ്ങൾ നീങ്ങിയതോടെ ദുബായ് വീണ്ടും ആഗോള വിമാന ഗതാഗത ഹബ്ബായി ശക്തമായി തിരിച്ചുവരുമെന്ന് അധികൃതർ പ്രതീക്ഷ പ്രകടിപ്പിച്ചു.യുഎഇയിലെ വാർത്തകളും തൊഴിൽ അവസരങ്ങളും അതിവേഗം അറിയാൻ വാട്സ്ആപ്പ് ഗ്രൂപ്പിൽ അംഗമാവുക https://chat.whatsapp.com/Dbf59JLetgBECJpr5UZOuZ?mode=gi_t

‘സ്ഫോടന ശബ്ദ’മുണ്ടാക്കുന്ന വാഹനങ്ങൾക്കെതിരെ യുഎഇയിൽ കർശന നടപടി; പിഴയും 12 ബ്ലാക്ക് പോയിന്റും

ജനവാസ മേഖലകളിൽ അർദ്ധരാത്രിയിൽ സ്ഫോടനത്തിന് സമാനമായ ശബ്ദമുണ്ടാക്കി ജനങ്ങളിൽ പരിഭ്രാന്തി സൃഷ്ടിക്കുന്ന വിധത്തിൽ നിയമവിരുദ്ധമായി രൂപമാറ്റം വരുത്തിയ കാറുകളുടെയും മോട്ടോർ സൈക്കിളുകളുടെയും യുഎഇ പോലീസ് കർശന നടപടികൾ ആരംഭിച്ചു. മേഖലയിലെ സംഘർഷാവസ്ഥ വാർത്തകളിൽ നിറഞ്ഞുനിൽക്കുന്ന സാഹചര്യത്തിൽ ഇത്തരം വാഹനങ്ങളിൽ നിന്നുണ്ടാകുന്ന ‘ബാക്ക് ഫയർ’ ശബ്ദങ്ങൾ പലരും മിസൈൽ ആക്രമണമോ സ്ഫോടനമോ ആണെന്ന് തെറ്റിദ്ധരിച്ച് ഭീതിയിലായിരുന്നുവെന്ന് അധികൃതർ വ്യക്തമാക്കി. എഞ്ചിനുകളിൽ മാറ്റം വരുത്തി ഉദ്ദേശപൂർവ്വം ശക്തമായ ശബ്ദമുണ്ടാക്കുന്നത് പ്രധാനമായും കൗമാരക്കാരും യുവാക്കളുമാണെന്ന് അന്വേഷണത്തിൽ കണ്ടെത്തിയതായി പോലീസ് അറിയിച്ചു. റിപ്പോർട്ട് ചെയ്യപ്പെട്ട ശബ്ദങ്ങൾ വാഹനങ്ങളിൽ നിന്നുള്ളതാണെന്നും രാജ്യത്തിന്റെ സുരക്ഷയെ ബാധിക്കുന്ന യാതൊരു ഭീഷണിയും നിലവിലില്ലെന്നും അധികൃതർ ജനങ്ങളെ ആശ്വസിപ്പിച്ചു. യുഎഇ പൂർണ്ണമായും സുരക്ഷിതമാണെന്നും പോലീസ് വ്യക്തമാക്കി.

ദുബായ്, ഷാർജ തുടങ്ങിയ എമിറേറ്റുകളിലെ ജനവാസ പ്രദേശങ്ങളിൽ രാത്രികാല പോലീസ് പട്രോളിംഗ് ശക്തമാക്കിയിട്ടുണ്ട്. യുഎഇ ട്രാഫിക് നിയമപ്രകാരം അമിത ശബ്ദമുണ്ടാക്കുന്ന വാഹനങ്ങൾ ഓടിക്കുന്നവർക്ക് 2000 ദിർഹം പിഴയും 12 ബ്ലാക്ക് പോയിന്റുകളും ലഭിക്കും. കൂടാതെ വാഹനം പോലീസ് പിടിച്ചെടുക്കുകയും ചെയ്യും. അനധികൃതമായി രൂപമാറ്റം വരുത്തിയ വാഹനങ്ങൾ തിരികെ ലഭിക്കാൻ 10,000 ദിർഹം വരെ ഫീസ് നൽകേണ്ടിവരുമെന്നും അധികൃതർ അറിയിച്ചു. ഈ നടപടി കർശനമായി നടപ്പാക്കുന്നതിന് ദുബായ് പോലീസ് ഓപ്പറേഷൻസ് അസിസ്റ്റന്റ് കമാൻഡർ-ഇൻ-ചീഫ് മേജർ ജനറൽ സെയ്ഫ് മുഹൈർ അൽ മസ്‌റൂയിയും ഷാർജ പോലീസ് സെൻട്രൽ റീജിയൻ ഡയറക്ടർ ബ്രിഗേഡിയർ ഖലീഫ അൽ ഖസൂനിയും നേതൃത്വമൊരുക്കുന്നുണ്ട്. കുട്ടികൾ വാഹനങ്ങളിൽ അനധികൃത മാറ്റങ്ങൾ വരുത്തുന്നില്ലെന്ന് മാതാപിതാക്കൾ ശ്രദ്ധിക്കണമെന്നും അധികൃതർ അഭ്യർത്ഥിച്ചു. ഇത്തരം ശബ്ദശല്യം ഉണ്ടാക്കുന്ന വാഹനങ്ങളെക്കുറിച്ച് ഔദ്യോഗിക ചാനലുകൾ വഴി പോലീസിനെ അറിയിക്കണമെന്നും പൊതുജനങ്ങളോട് നിർദേശിച്ചിട്ടുണ്ട്. മേഖലയിലെ നിലവിലെ സാഹചര്യം പരിഗണിച്ച് ജനങ്ങളുടെ സമാധാനവും സുരക്ഷയും ഉറപ്പാക്കുക എന്ന ലക്ഷ്യത്തോടെയാണ് ഈ നടപടികൾ ശക്തമാക്കിയതെന്നും പോലീസ് അറിയിച്ചു. പോലീസിന്റെ ഈ ഇടപെടലിനെ പ്രവാസികളും സ്വദേശികളും സ്വാഗതം ചെയ്തിട്ടുണ്ട്.യുഎഇയിലെ വാർത്തകളും തൊഴിൽ അവസരങ്ങളും അതിവേഗം അറിയാൻ വാട്സ്ആപ്പ് ഗ്രൂപ്പിൽ അംഗമാവുhttps://chat.whatsapp.com/Dbf59JLetgBECJpr5UZOuZ?mode=gi_t