ദുബായുടെ ആകാശഗോപുരങ്ങൾ പടുത്തുയർത്താൻ വിയർപ്പൊഴുക്കുന്ന തൊഴിലാളികളെ നെഞ്ചോട് ചേർത്ത് ദുബായ് ഭരണകൂടം. രാജ്യാന്തര തൊഴിലാളി ദിനത്തോടനുബന്ധിച്ച് ദുബായ് ജനറൽ ഡയറക്ടറേറ്റ് ഓഫ് റെസിഡൻസി ആൻഡ് ഫോറിനേഴ്സ് അഫയേഴ്സ് (ജിഡിആർഎഫ്എ) സംഘടിപ്പിച്ച ആഘോഷങ്ങൾ പതിനായിരക്കണക്കിന് പ്രവാസികൾക്ക് മറക്കാനാവാത്ത അനുഭവമായി മാറി. അൽ ഖൂസിലെയും ജബൽ അലിയിലെയും മുപ്പത്തിനാലോളം ലേബർ ക്യാംപുകളിൽ ഉന്നത ഉദ്യോഗസ്ഥർ നേരിട്ടെത്തിയാണ് സ്നേഹവും നന്ദിയും അറിയിച്ചത്.

ആഘോഷങ്ങളുടെ ഏറ്റവും വികാരനിർഭരമായ നിമിഷം തൊഴിലാളികൾക്കായി ഒരുക്കിയ സർപ്രൈസ് വിഡിയോ സന്ദേശങ്ങളായിരുന്നു. നാട്ടിലെ കുടുംബാംഗങ്ങൾ അയച്ച സ്നേഹസന്ദേശങ്ങൾ ക്യാംപുകളിലെ വലിയ സ്ക്രീനുകളിൽ അപ്രതീക്ഷിതമായി തെളിഞ്ഞപ്പോൾ പലരും സന്തോഷം കൊണ്ട് വിതുമ്പിപ്പോയി. ദൂരദേശത്തിരുന്ന് പ്രിയപ്പെട്ടവരുടെ മുഖവും ശബ്ദവും കണ്ടത് തൊഴിലാളികൾക്ക് വലിയൊരു ആശ്വാസമായി.

നാൽപ്പതിനായിരത്തിലധികം പേർ പങ്കെടുത്ത ഈ സംഗമത്തിൽ സ്നേഹപ്രകടനങ്ങൾക്കൊപ്പം സമ്മാനപ്പെരുമഴയും ഉണ്ടായിരുന്നു. ടെലികോം കമ്പനിയായ ‘ഡു’ ഉൾപ്പെടെയുള്ള സ്ഥാപനങ്ങളുടെ സഹകരണത്തോടെ നൂറിലേറെ സ്മാർട്ട് ഫോണുകളും മറ്റ് ആകർഷകമായ സമ്മാനങ്ങളുമാണ് വിതരണം ചെയ്തത്. വിവിധ കായിക-വിനോദ മത്സരങ്ങൾ ക്യാംപുകളെ ആവേശത്തിലാഴ്ത്തി. 36,000-ത്തോളം പേർ നേരിട്ടും മറ്റുള്ളവർ ‘ബ്ലൂ കണക്ട്’ ആപ്പ് വഴിയും ഈ സ്നേഹസംഗമത്തിന്റെ ഭാഗമായി.

തൊഴിലാളികളുടെ ജീവിതനിലവാരം ഉയർത്തുകയും അവരെ ആദരിക്കുകയും ചെയ്യുക എന്നത് ദുബായുടെ പ്രധാന കാഴ്ചപ്പാടാണെന്ന് ജിഡിആർഎഫ്എ അസിസ്റ്റന്റ് ഡയറക്ടർ ജനറൽ മേജർ ജനറൽ ഉബൈദ് മുഹൈർ ബിൻ സുറൂർ വ്യക്തമാക്കി. വെറും സമ്മാനങ്ങൾ നൽകുന്നതിലുപരി, സാധാരണക്കാരായ തൊഴിലാളികളുടെ കഷ്ടപ്പാടുകൾ ഭരണകൂടം തിരിച്ചറിയുന്നുവെന്ന ബോധ്യം അവർക്ക് നൽകുന്ന ആത്മവിശ്വാസം വളരെ വലുതാണെന്ന് ഉദ്യോഗസ്ഥർ അഭിപ്രായപ്പെട്ടു. മാനുഷിക മൂല്യങ്ങൾക്ക് വലിയ വില നൽകുന്ന ദുബായുടെ ഈ നടപടി പ്രവാസി ലോകത്തിന് വലിയൊരു മാതൃകയാണ്.യുഎഇയിലെ വാർത്തകളും തൊഴിൽ അവസരങ്ങളും അതിവേഗം അറിയാൻ വാട്സ്ആപ്പ് ഗ്രൂപ്പിൽ അംഗമാവുക https://chat.whatsapp.com/Dbf59JLetgBECJpr5UZOuZ?mode=gi_t

‘സ്ഫോടന ശബ്ദ’മുണ്ടാക്കുന്ന വാഹനങ്ങൾക്കെതിരെ യുഎഇയിൽ കർശന നടപടി; പിഴയും 12 ബ്ലാക്ക് പോയിന്റും

ജനവാസ മേഖലകളിൽ അർദ്ധരാത്രിയിൽ സ്ഫോടനത്തിന് സമാനമായ ശബ്ദമുണ്ടാക്കി ജനങ്ങളിൽ പരിഭ്രാന്തി സൃഷ്ടിക്കുന്ന വിധത്തിൽ നിയമവിരുദ്ധമായി രൂപമാറ്റം വരുത്തിയ കാറുകളുടെയും മോട്ടോർ സൈക്കിളുകളുടെയും യുഎഇ പോലീസ് കർശന നടപടികൾ ആരംഭിച്ചു. മേഖലയിലെ സംഘർഷാവസ്ഥ വാർത്തകളിൽ നിറഞ്ഞുനിൽക്കുന്ന സാഹചര്യത്തിൽ ഇത്തരം വാഹനങ്ങളിൽ നിന്നുണ്ടാകുന്ന ‘ബാക്ക് ഫയർ’ ശബ്ദങ്ങൾ പലരും മിസൈൽ ആക്രമണമോ സ്ഫോടനമോ ആണെന്ന് തെറ്റിദ്ധരിച്ച് ഭീതിയിലായിരുന്നുവെന്ന് അധികൃതർ വ്യക്തമാക്കി. എഞ്ചിനുകളിൽ മാറ്റം വരുത്തി ഉദ്ദേശപൂർവ്വം ശക്തമായ ശബ്ദമുണ്ടാക്കുന്നത് പ്രധാനമായും കൗമാരക്കാരും യുവാക്കളുമാണെന്ന് അന്വേഷണത്തിൽ കണ്ടെത്തിയതായി പോലീസ് അറിയിച്ചു. റിപ്പോർട്ട് ചെയ്യപ്പെട്ട ശബ്ദങ്ങൾ വാഹനങ്ങളിൽ നിന്നുള്ളതാണെന്നും രാജ്യത്തിന്റെ സുരക്ഷയെ ബാധിക്കുന്ന യാതൊരു ഭീഷണിയും നിലവിലില്ലെന്നും അധികൃതർ ജനങ്ങളെ ആശ്വസിപ്പിച്ചു. യുഎഇ പൂർണ്ണമായും സുരക്ഷിതമാണെന്നും പോലീസ് വ്യക്തമാക്കി.

ദുബായ്, ഷാർജ തുടങ്ങിയ എമിറേറ്റുകളിലെ ജനവാസ പ്രദേശങ്ങളിൽ രാത്രികാല പോലീസ് പട്രോളിംഗ് ശക്തമാക്കിയിട്ടുണ്ട്. യുഎഇ ട്രാഫിക് നിയമപ്രകാരം അമിത ശബ്ദമുണ്ടാക്കുന്ന വാഹനങ്ങൾ ഓടിക്കുന്നവർക്ക് 2000 ദിർഹം പിഴയും 12 ബ്ലാക്ക് പോയിന്റുകളും ലഭിക്കും. കൂടാതെ വാഹനം പോലീസ് പിടിച്ചെടുക്കുകയും ചെയ്യും. അനധികൃതമായി രൂപമാറ്റം വരുത്തിയ വാഹനങ്ങൾ തിരികെ ലഭിക്കാൻ 10,000 ദിർഹം വരെ ഫീസ് നൽകേണ്ടിവരുമെന്നും അധികൃതർ അറിയിച്ചു. ഈ നടപടി കർശനമായി നടപ്പാക്കുന്നതിന് ദുബായ് പോലീസ് ഓപ്പറേഷൻസ് അസിസ്റ്റന്റ് കമാൻഡർ-ഇൻ-ചീഫ് മേജർ ജനറൽ സെയ്ഫ് മുഹൈർ അൽ മസ്‌റൂയിയും ഷാർജ പോലീസ് സെൻട്രൽ റീജിയൻ ഡയറക്ടർ ബ്രിഗേഡിയർ ഖലീഫ അൽ ഖസൂനിയും നേതൃത്വമൊരുക്കുന്നുണ്ട്. കുട്ടികൾ വാഹനങ്ങളിൽ അനധികൃത മാറ്റങ്ങൾ വരുത്തുന്നില്ലെന്ന് മാതാപിതാക്കൾ ശ്രദ്ധിക്കണമെന്നും അധികൃതർ അഭ്യർത്ഥിച്ചു. ഇത്തരം ശബ്ദശല്യം ഉണ്ടാക്കുന്ന വാഹനങ്ങളെക്കുറിച്ച് ഔദ്യോഗിക ചാനലുകൾ വഴി പോലീസിനെ അറിയിക്കണമെന്നും പൊതുജനങ്ങളോട് നിർദേശിച്ചിട്ടുണ്ട്. മേഖലയിലെ നിലവിലെ സാഹചര്യം പരിഗണിച്ച് ജനങ്ങളുടെ സമാധാനവും സുരക്ഷയും ഉറപ്പാക്കുക എന്ന ലക്ഷ്യത്തോടെയാണ് ഈ നടപടികൾ ശക്തമാക്കിയതെന്നും പോലീസ് അറിയിച്ചു. പോലീസിന്റെ ഈ ഇടപെടലിനെ പ്രവാസികളും സ്വദേശികളും സ്വാഗതം ചെയ്തിട്ടുണ്ട്.യുഎഇയിലെ വാർത്തകളും തൊഴിൽ അവസരങ്ങളും അതിവേഗം അറിയാൻ വാട്സ്ആപ്പ് ഗ്രൂപ്പിൽ അംഗമാവുhttps://chat.whatsapp.com/Dbf59JLetgBECJpr5UZOuZ?mode=gi_t